Mekim Wok Painimaut Long Ol Tok Bilong Helpim Yu

Taim yumi ritim Baibel, yumi ken kisim sampela save moa long rot bilong mekim wok painimaut. Hau yumi ken mekim olsem long rot we inap helpim yumi?

Kisim sampela save moa long ol infomesen bilong ol stori bilong Baibel. Olsem, painimaut husat i raitim dispela stori, em i raitim ol tok i go long husat, na wanem taim em i raitim dispela stori. Wanem ol samting i bin kamap long dispela taim, wanem ol samting i bin kamap paslain, na wanem ol samting i kamap bihain?

Tingim ol skul yu inap kisim taim yu mekim wok painimaut long ol kain askim olsem: ‘Ol lain insait long dispela stori i pilim olsem wanem? Ol i mekim wanem ol pasin? Wai na mi mas bihainim ol dispela pasin o sakim ol dispela pasin?’

Bihainim ol skul yu bin kisim, olsem long wok autim tok bilong yu o long ol pasin yu mekim long ol narapela. Long dispela rot, yu soim olsem yu bihainim savetingting bilong God, olsem Baibel i tok: “Ol man i gat savetingting bai tingim gut ol dispela samting.”—Sng. 107:43.

• Traim dispela: Luksave long hau ol tok i stap long hap bilong miting i save kamap namel long wik, long hap em Gutpela Save i Kam Long Baibel, i save helpim yumi long tingim ol rot yumi ken bihainim ol tok yumi lainim. Oltaim dispela hap i kamapim ol askim em yumi wan wan i ken givim long yumi yet, ol poin yumi ken tingim tingim long bel, na ol piksa em yumi ken skelim.