Bihainim Pasin Bilong Ol Gutpela Ensel

1-2. (a) Olsem wanem yumi no wankain long ol ensel? (b) Wanem samting long ol ensel i wankain long yumi?

TAIM Jehova i bringim yu i kam insait long tok i tru, em i bringim yu i kam insait long wanpela bikpela lain famili em ol i lotuim em, dispela i makim tu planti milion gutpela ensel. (Dan. 7:​9, 10) Taim yumi tingim ol ensel, yumi inap tingim planti samting long ol we i no wankain long yumi. Olsem, ol ensel i stap laip inap longpela haptaim tru winim yumi. (Jop 38:​4, 7) Ol i gat bikpela strong moa winim yumi. Na ol i holi na ol i stretpela olgeta, na yumi ol sinman i no inap tru long kamap long dispela mak.—Luk 9:26.

² Ol dispela samting long ol ensel i no wankain long yumi, tasol i gat planti narapela samting long ol i wankain long yumi. Olsem, wankain olsem ol ensel yumi inap kamapim ol gutpela pasin bilong Jehova. Na wankain olsem ol, yumi stap fri long makim ol samting yumi laik mekim. Na tu, olsem ol yumi gat ol nem bilong yumi yet, ol pasin bilong yumi yet, na ol narapela narapela wok bilong mekim. Na yumi gat laik tru long lotuim Krieta bilong yumi wankain olsem ol ensel.—1 Pita 1:12.

3. Yumi ken kisim wanem skul long ol gutpela ensel?

³ I gat planti samting long ol ensel i wankain long yumi, olsem na gutpela eksampel bilong ol inap strongim yumi na givim skul long yumi. Tru tumas, yumi ken kisim planti gutpela skul long ol. Long dispela atikol, yumi bai stori long hau yumi ken bihainim pasin daun bilong ol gutpela ensel, na tu, pasin bilong ol long laikim ol manmeri, sanap strong, na wok strong long helpim kongrigesen long stap klin.

OL ENSEL I GAT PASIN DAUN

4. (a) Olsem wanem ol ensel i soim pasin daun? (b) Wai na ol ensel i save daunim ol yet? (Buk Song 89:7)

⁴ Ol gutpela ensel i gat pasin daun. Maski ol i gat ekspiriens, bikpela strong, na savetingting, ol i save bihainim tok bilong Jehova. (Sng. 103:20) Taim ol i mekim ol wok bilong ol, ol i no save apim nem bilong ol yet long ol wok ol i mekim o hambak long bikpela strong bilong ol. Ol i save amamas long mekim laik bilong God maski Baibel i no kolim nem bilong ol na givim biknem long ol.a (Stt. 32:​24, 29; 2 Kin. 19:35) Ol i no laik kisim biknem we i stret long Jehova tasol i kisim. Wai na ol ensel i save daunim tru ol yet? Ol i mekim olsem bikos ol i laikim Jehova na ol i rispektim em tru.—Ritim Buk Song 89:7.

5. Hau wanpela ensel i soim pasin daun taim em i stretim aposel Jon? (Lukim tu piksa.)

⁵ Tingim wanpela samting i bin kamap we i soim pasin daun bilong ol ensel. Long 96 C.E. samting, wanpela ensel em Baibel i no kolim nem bilong em, em i soim ol narakain samting long aposel Jon long rot bilong wanpela visen. (Rev. 1:1) Jon i mekim wanem taim em i lukim dispela visen? Em i traim long lotuim dispela ensel. Tasol hariap tru dispela gutpela ensel i stopim em, na em i tok: “No ken mekim olsem! Mi wanpela wokboi tasol wankain olsem yu na ol brata bilong yu . . . Yu mas lotuim God tasol!” (Rev. 19:10) Tok bilong dispela ensel i soim pasin daun tru! Em i no laik kisim biknem o larim ol narapela i preisim em. Hariap tru em i kirapim Jon long givim biknem long God Jehova. Na long wankain taim, em i no luk daun long Jon. Maski dispela ensel i mekim wok bilong Jehova longpela taim moa na em i gat bikpela strong moa long Jon, em i daunim em yet na tokim Jon olsem em i wokboi tasol wankain olsem em. Na maski dispela ensel i stretim Jon, em i no toktok long dispela lapun aposel long hatpela pasin o krosim em, nogat. Em i toktok long em long gutpela pasin. Ating em i luksave olsem Jon i brukim skru bikos em i kirap nogut long ol samting em i lukim.

6. Olsem wanem yumi ken bihainim pasin daun bilong ol ensel?

⁶ Olsem wanem yumi ken bihainim pasin daun bilong ol ensel? Yumi tu i no laik apim nem bilong yumi yet o laik bai ol narapela i preisim yumi long ol wok yumi mekim. (1 Kor. 4:7) Na tu, yumi no ken pilim olsem yumi winim ol narapela bikos yumi mekim wok bilong Jehova longpela taim moa long ol o yumi mekim sampela gutpela wok. Taim yumi kisim planti moa wok, yumi mas daunim yumi yet moa namel long ol narapela. (Luk 9:48) Olsem ol ensel, yumi laik mekim wok bilong helpim ol narapela. Yumi no laik apim nem bilong yumi yet.

7. Olsem wanem yumi ken soim pasin daun taim yumi laik stretim wanpela o givim tok kaunsel long em?

⁷ Yumi ken soim pasin daun tu taim yumi laik stretim wanpela o givim tok kaunsel long em, olsem wanpela wanbilip o pikinini bilong yumi. Taim yumi givim tok kaunsel long wanpela, ating yumi mas toktok stret long em. Tasol long wankain taim, olsem dispela ensel husat i bin toktok long gutpela pasin taim em i stretim Jon, yumi laik mekim tok bilong strongim em. Sapos yumi tingim olsem yumi no winim ol narapela, yumi bai givim tok kaunsel i kam long Baibel long pasin rispek na pasin laikim.—Kol. 4:6.

OL ENSEL I LAIKIM OL MANMERI

8. (a) Olsem Luk 15:10 i kamapim, hau ol ensel i soim olsem ol i laikim ol manmeri? (b) Ol ensel i mekim wanem bilong helpim wok autim tok? (Lukim tu piksa.)

⁸ Ol ensel i no stap longwe tru long ol manmeri, nogat. Ol i laikim ol manmeri. Ol i save amamas taim wanpela sinman i tanim bel—taim wanpela sipsip bilong Jehova i lus i kam bek long em o taim wanpela man i senisim ol pasin bilong em na kam insait long tok i tru. (Ritim Luk 15:10.) Na tu, ol ensel i save givim bel long sapotim wok autim tok bilong Kingdom. (Rev. 14:6) Maski ol i no autim tok stret long ol manmeri, ol inap stiaim wanpela pablisa i go long wanpela man o meri husat i laik kisim save long Jehova. Tasol yumi no inap strong long tok olsem ol ensel i bin helpim wanpela man o meri long kisim tok i tru. Bikos Jehova inap yusim tu ol narapela rot—olsem holi spirit bilong em—long helpim ol manmeri o stiaim ol wokman bilong em. (Apo. 16:​6, 7) Tasol em i save yusim ol ensel long helpim yumi taim yumi autim tok. Olsem na taim yumi autim gutnius, yumi ken save tru olsem ol ensel bai stap bilong helpim yumi.—Lukim blok “God i Bekim Ol Beten Bilong Ol.”b

9. Hau yumi ken bihainim pasin bilong ol ensel long laikim ol manmeri?

⁹ Hau yumi ken bihainim pasin bilong ol ensel long laikim ol manmeri? Taim yumi harim toksave olsem kongrigesen i kisim bek wanpela, yumi laik amamas wankain olsem ol ensel i save amamas. Yumi ken go long dispela brata o sista na welkamim em na soim em olsem yumi laikim em. (Luk 15:​4-7; 2 Kor. 2:​6-8) Na tu, yumi ken bihainim pasin bilong ol ensel long givim bel tru long autim tok. (Ekl. 11:6) Na wankain olsem ol ensel i save helpim yumi taim yumi autim gutnius, yumi ken painim ol rot bilong helpim ol bratasista bilong yumi taim ol i autim tok. Olsem, yumi ken stretim rot long wok wantaim wanpela pablisa husat i no gat bikpela ekspiriens long autim tok. O yumi ken helpim ol lapun bratasista o ol bratasista i gat sik so ol tu i ken insait long wok autim tok.

10. Yumi inap kisim wanem skul long stori bilong Sara?

¹⁰ Olsem wanem sapos sindaun bilong yumi i pasim yumi long mekim bikpela wok moa bilong God? Yumi ken painim ol narapela rot long wok wantaim ol ensel long autim tok. Tingim stori bilong Sara,c em wanpela sista long India. Bihain long em i mekim wok painia inap 20 yia samting, em i kisim bikpela sik na em i mas slip tasol long bet. Dispela i mekim na em i bel hevi tru. Tasol gutpela sapot bilong ol bratasista long kongrigesen bilong em na pasin bilong em long ritim Baibel oltaim i helpim em na isi isi em i holim stretpela tingting long sindaun bilong em. Em i mas senisim wei bilong em long autim tok na bai i stret wantaim sindaun bilong em. Em i no inap long sindaun na raitim ol pas, olsem na em i save autim tok long rot bilong telefon tasol. So em i save ringim ol gobek bilong em na ol i save tokim em long ol narapela em ol i gat laik long kisim save long Baibel. Wanem samting i kamap? Insait long sampela mun, Sara i gat 70 Baibel stadi, dispela i winim tru samting em i tingim! So em i givim sampela Baibel stadi i go long ol narapela bratasista long kongrigesen. Long nau, planti bilong ol dispela sumatin i save kam long ol miting bilong yumi. Ating ol ensel i amamas tru long wok wantaim ol bratasista olsem Sara, em ol i givim bel tru long autim tok!

OL ENSEL I SOIM PASIN BILONG SANAP STRONG

11. Olsem wanem ol gutpela ensel i soim pasin bilong sanap strong?

¹¹ Ol ensel i stap olsem gutpela eksampel tru long pasin bilong sanap strong. Ol i karim hevi long pasin i no stret na pasin nogut inap planti tausen yia. Ol i lukim Satan na planti narapela ensel em pastaim ol i bin wok wantaim ol, ol i bikhet long Jehova. (Stt. 3:1; 6:​1, 2; Jut 6) Baibel i stori long wanpela gutpela ensel i bin pait wantaim wanpela ensel nogut inap planti de. (Dan. 10:13) Na moa yet, kirap long taim bilong Adam na Iv na i kam inap long nau, ol ensel i lukim liklik lain manmeri tasol i mekim ol samting bilong lotuim Jehova. Tasol ol dispela gutpela ensel i wok yet long mekim wok bilong Jehova na ol i amamas na givim bel tru long mekim olsem. Ol i save olsem long taim stret, God bai pinisim tru olgeta pasin i no stret.

12. Wanem samting inap helpim yumi long sanap strong?

¹² Hau yumi ken bihainim pasin bilong ol ensel long sanap strong? Olsem ol ensel, yumi inap lukim ol man i mekim pasin i no stret o ol man inap birua long yumi. Tasol wankain olsem ol, yumi bilip tru olsem long taim stret God bai pinisim tru olgeta pasin nogut. So olsem ol gutpela ensel, yumi “no ken givap long mekim ol gutpela wok.” (Gal. 6:9) Na God i promis olsem em bai helpim yumi long sanap strong. (1 Kor. 10:13) Yumi ken beten askim Jehova long givim yumi holi spirit bilong em, we bai helpim yumi long i no les kwik na amamas. (Gal. 5:22; Kol. 1:11) Olsem wanem sapos yu bungim pasin birua? Yu ken trastim tru Jehova na no ken pret. Oltaim Jehova bai helpim yu na strongim yu.—Hib. 13:6.

OL ENSEL I HELPIM KONGRIGESEN LONG STAP KLIN

13. Ol ensel i gat wanem spesel wok bilong mekim long taim bilong las de? (Matyu 13:​47-49)

¹³ Long taim bilong las de, Jehova i givim wanpela spesel wok long ol ensel. (Ritim Matyu 13:​47-49.) Planti milion manmeri long olgeta hap bilong graun i laik kisim save long gutnius. Sampela bilong ol dispela manmeri i mekim ol samting bilong kamap ol gutpela Kristen, tasol ol narapela i no mekim olsem. Ol ensel i gat wok bilong “kisim ol man nogut i stap namel long ol stretpela man.” Dispela i makim olsem ol i gat wok long helpim kongrigesen long stap klin. Dispela i no makim olsem olgeta lain em ol i stop long bung wantaim yumi, ol i no inap kam bek long kongrigesen. Na tu, em i no makim olsem bai i no gat ol hevi insait long kongrigesen, nogat. Maski i olsem, yumi ken save tru olsem ol ensel i givim bel tru long helpim kongrigesen bilong yumi long stap klin.

14-15. Hau yumi ken bihainim pasin bilong ol ensel long helpim kongrigesen long stap klin long sait bilong bilip na long bihainim stretpela pasin? (Lukim tu ol piksa.)

¹⁴ Hau yumi ken bihainim pasin bilong ol ensel long helpim kongrigesen long stap klin? Yumi ken mekim olsem long rot bilong helpim kongrigesen bilong yumi long stap klin long sait bilong bilip na long bihainim stretpela pasin. Yumi laik wok strong long lukautim gut bel na tingting bilong yumi long rot bilong makim ol gutpela pren na sakim ol samting we inap bagarapim pasin pren bilong yumi wantaim God. (Sng. 101:3) Na tu, yumi ken helpim ol wanbilip bilong yumi long stap gut yet long Jehova. Olsem, yumi mas mekim wanem sapos yumi painimaut olsem wanpela wanbilip i mekim bikpela sin? Yumi laikim wanbilip bilong yumi, olsem na yumi bai kirapim em long toktok long ol elda. Sapos em i no mekim olsem, yumi bai tokim ol elda long dispela samting. Yumi laik bai ol wanbilip em ol i slek long bilip i mas hariap long kisim helpim!—Jems 5:​14, 15.

¹⁵ Sori tru olsem sampela em ol i mekim ol bikpela sin, ol elda i mas seperetim ol long kongrigesen. Taim dispela samting i kamap, yumi mas “lusim pasin bilong poroman” wantaim ol.d (1 Kor. 5:​9-13) Dispela arensmen i helpim kongrigesen long stap klin. Na moa yet, taim yumi stop long bung wantaim ol man em ol elda i bin seperetim ol long kongrigesen, yumi soim gutpela pasin long ol. Taim yumi sanap strong na mekim olsem, dispela bai kirapim ol long kam bek long Jehova. Sapos ol i kam bek long Jehova, yumi laik amamas wantaim Jehova na ol ensel.—Luk 15:7.

16. Yu laik bihainim pasin bilong ol ensel long wanem ol samting?

¹⁶ Em gutpela blesing tru olsem Jehova i larim yumi kisim save long ol ensel na yumi inap wok wantaim ol! Yumi ken bihainim ol gutpela pasin bilong ol, olsem pasin daun, pasin bilong ol long laikim ol manmeri, sanap strong, na helpim kongrigesen long stap klin long sait bilong bilip na long bihainim stretpela pasin. Sapos yumi bihainim pasin bilong ol gutpela ensel, yumi tu inap stap insait long bikpela lain famili bilong Jehova inap oltaim oltaim.