Lukluk i Go Long Jehova Long Mekim Isi Bel Bilong Yu

1. Stori long laip bilong ol Juda i stap kalabus long Babilon i olsem wanem?

PIKSAIM long tingting ol Juda em ol i stap kalabus long Babilon i bin pilim olsem wanem. Ol i bin lukim ol birua i kam bagarapim asples bilong ol. Ol i bin mekim ol sin na ol tumbuna papa bilong ol tu i bin mekim ol sin, olsem na Jehova i larim ol birua i kam bagarapim graun bilong ol na kisim ol i go kalabus long narapela kantri. (2 Sto. 36:​15, 16, 20, 21) Maski ol i stap kalabus long Babilon, ol i stap fri long mekim ol wok bilong ol long wan wan de. (Jer. 29: 4-7) Tasol laip i hatwok tru na em i no laip ol i laikim. Ol Juda i pilim olsem wanem long laip bilong ol? Lukim tok em wanpela Juda i stap kalabus i bin mekim, em i tok: “Mipela i sindaun arere long wara bilong Babilon. Na mipela i tingim Saion na mipela i krai.” (Sng. 137:1) Ol dispela Juda i bel hevi tru na ol i nidim ol tok bilong mekim isi bel bilong ol, tasol husat bai mekim isi bel bilong ol?

2-3. (a) Jehova i mekim wanem bilong helpim ol Juda i stap kalabus? (b) Yumi bai stori long wanem samting long dispela atikol?

² Jehova em i “God bilong mekim isi bel bilong ol man long olgeta kain taim.” (2 Kor. 1:3) Em i God bilong mekim pasin laikim, olsem na em i save amamas long mekim isi bel bilong olgeta man em ol i go klostu long em. Jehova i save olsem sampela Juda i stap kalabus bai sori tru olsem ol i bin sakim tok bilong em na ol bai kirap gen long lotuim em long stretpela rot. (Ais. 59:20) So winim 100 yia paslain long ol Juda i go kalabus long Babilon, Jehova i kirapim profet Aisaia long raitim buk bilong Baibel i gat nem bilong em. Bilong wanem Jehova i tokim em long raitim dispela buk? Aisaia i tok: “God bilong yupela i tok, ‘Mekim isi bel, mekim isi bel bilong ol manmeri bilong mi.’” (Ais. 40:1) Yes, long Buk Aisaia, Jehova i mekim ol tok bilong mekim isi bel bilong ol Juda i stap kalabus na em ol tok ol i nidim tru.

³ Wankain olsem ol Juda i stap kalabus, sampela taim yumi tu i mas kisim ol tok bilong mekim isi bel bilong yumi. Long dispela atikol, yumi bai stori long 3-pela rot Jehova i bin mekim isi bel bilong ol Juda i stap kalabus: (1) Em i tok promis long fogivim rong bilong ol man i tanim bel, (2) em i helpim ol manmeri bilong em long bilip na wet long ol gutpela samting bai kamap, na (3) em i mekim ol i stap isi taim ol i pret. Taim yumi stori long ol dispela poin, luksave long olsem wanem yumi ken kisim helpim long ol dispela gutpela tok em Jehova i mekim.

JEHOVA I SAVE MEKIM PASIN MARIMARI NA FOGIVIM YUMI

4. Long wanem rot Jehova i soim olsem em i God bilong mekim pasin marimari? (Aisaia 55:7)

⁴ Jehova em i “Papa bilong marimari.” (2 Kor. 1:3) Em i soim klia dispela pasin taim em i tok promis long fogivim ol Juda em ol i tanim bel. (Ritim Aisaia 55:7.) Em i tok: “Long rot bilong gutpela pasin laikim bilong mi i save stap oltaim oltaim, mi bai marimari long yu.” (Ais. 54:8) Long wanem rot Jehova bai soim pasin marimari bilong em? I stret long ol Juda i mas karim pen na hevi long ol pasin nogut ol i bin mekim, tasol Jehova i tok promis olsem ol bai i no inap stap long Babilon inap oltaim, nogat. Ol bai kalabus long Babilon inap planti yia, tasol bihain ol bai lusim kalabus. (Ais. 40:2) Ating ol dispela tok i mekim isi tru bel bilong ol Juda i stap kalabus em ol i bin tanim bel!

5. Wai na yumi gat gutpela risen moa long bilip tru long pasin marimari bilong Jehova winim ol Juda i bin stap kalabus?

⁵ Yumi kisim wanem skul? Jehova i redi long lusim olgeta ol rong bilong ol wokman bilong em. Long nau, yumi gat gutpela risen moa long bilipim dispela tok winim ol Juda i stap kalabus long bipo. Wai na yumi tok olsem? Long wanem, yumi kliagut long rot Jehova i stretim bilong fogivim ol rong bilong yumi. Planti handret yia bihain long Aisaia i mekim dispela tok profet, Jehova i salim Pikinini em i laikim tumas i kam long graun bilong givim pe bilong baim bek olgeta sinman em ol i tanim bel. Dispela ofa i opim rot long ol sin bilong yumi i “tekewe,” olsem pinis olgeta. (Apo. 3:19; Ais. 1:18; Efe. 1:7) Tru tumas, yumi lotuim God i gat bikpela pasin marimari!

6. Yumi inap kisim wanem helpim taim yumi tingim pasin marimari bilong Jehova? (Lukim tu piksa.)

⁶ Ol tok bilong Jehova long Aisaia 55:7 i ken mekim isi bel bilong yumi sapos bel i kotim yumi tru. Sampela bilong yumi inap wok yet long pilim gilti long wanpela rong em yumi bin mekim long bipo, maski yumi tanim bel pinis. Yumi inap pilim olsem, na moa yet sapos yumi wok yet long karim hevi long rong yumi bin mekim. Tasol sapos yumi tokaut pinis long ol sin bilong yumi na yumi lusim pasin nogut yumi bin mekim, yumi ken save tru olsem Jehova i lusim pinis ol rong bilong yumi. Na taim Jehova i fogivim yumi, em i no save tingim moa ol sin bilong yumi. (Skelim Jeremaia 31:34.) Jehova i no save tingim tingim yet ol rong yumi bin mekim long bipo, olsem na yumi mas mekim olsem tu. Bikpela samting long Jehova em ol gutpela pasin yumi mekim long nau, na i no ol rong yumi bin mekim long bipo. (Ese. 33:​14-16) Na klostu nau, Papa bilong yumi husat i gat pasin marimari, em bai pinisim olgeta pen na hevi yumi karim bikos long ol rong yumi bin mekim.

7. Wanem samting inap kirapim yumi long kisim helpim sapos yumi haitim wanpela bikpela rong?

⁷ Sapos bel bilong yumi i kotim yumi bikos yumi haitim wanpela bikpela rong, orait yumi mas mekim wanem? Baibel i kirapim yumi long lukim ol elda na kisim helpim. (Jems 5:​14, 15) Tasol ating yumi inap pilim hatwok long tokaut long rong bilong yumi. Tasol bel bilong yumi bai kirapim yumi long kisim helpim long ol elda sapos yumi tanim bel na yumi tingim olsem Jehova na ol dispela man em i makim bilong helpim yumi, ol bai soim pasin laikim na pasin marimari long yumi. Lukim olsem wanem pasin marimari bilong Jehova i mekim isi bel bilong wanpela brata nem bilong em Arthur,a em maus bilong bel bilong em i bin kotim em tru. Em i tok: “Inap wanpela yia olgeta, mi wok long lukim ponografi. Tasol taim mi harim wanpela tok i stori long maus bilong bel, dispela i kirapim mi long tokaut long meri bilong mi na ol elda long sin mi mekim. Bihain long mi tokim ol, mi pilim bikpela bel isi tru, tasol mi bel hevi yet long samting mi bin mekim. Ol elda i kirapim mi long tingim olsem Jehova i laik stap yet olsem Pren bilong mi. Em i save stretim yumi bikos em i laikim yumi. Mi pilim tru long bel ol gutpela tok ol i mekim long mi na dispela i helpim mi long senisim tingting mi gat.” Long nau, Arthur i mekim wok olsem wanpela painia na kongrigesen sevan. Yumi kisim bel isi tru long save olsem Jehova i save mekim pasin marimari long yumi taim yumi tanim bel!

JEHOVA I SAVE HELPIM YUMI LONG BILIP NA WET

8. (a) Jehova i helpim ol Juda i stap kalabus long bilip na wet long wanem samting? (b) Olsem Aisaia 40:​29-31 i kamapim, olsem wanem pasin bilong bilip na wet bai helpim ol Juda i tanim bel?

⁸ Ating ol Juda i stap kalabus long Babilon i no bin ting olsem ol bai go bek long Jerusalem. Olgeta manmeri i save olsem ol Babilon i no save larim ol kalabus lain bilong ol i go fri. (Ais. 14:17) Tasol Jehova i helpim ol manmeri bilong em long bilip na wet long gutpela samting bai kamap. Em i tok promis long helpim lain bilong em long lusim kalabus na i go fri, na i no gat wanpela samting bai pasim em long mekim olsem. (Ais. 44:26; 55:12) Long ai bilong Jehova, Babilon i olsem liklik hap das tasol. (Ais. 40:15) Taim yu winim win, dispela liklik hap das bai i go pinis wantu tasol. Olsem wanem pasin bilong bilip na wet bai helpim ol Juda i stap kalabus? Em bai mekim isi bel bilong ol. Tasol em bai mekim sampela samting moa. Aisaia i tok: “Ol manmeri i bilip na wet long Jehova, ol bai kisim strong gen.” (Ritim Aisaia 40:​29-31.) Tru tumas, pasin bilong bilip na wet bai strongim ol. Ol bai “flai i go antap, i olsem ol i gat wing bilong tarangau.”

9. Wai na ol Juda i ken trastim ol tok promis bilong Jehova olsem em bai kisim bek ol long han bilong ol Babilon?

⁹ Jehova i kamapim tu ol evidens bilong soim klia olsem em bai truim ol tok promis bilong em. Hau em i mekim olsem? Tingim ol tok profet i bin kamap tru pinis. Ol Juda i save olsem ol Asiria i bin pait na daunim tenpela traib bilong ol Israel na ol i kisim ol manmeri i go kalabus. (Ais. 8:4) Na tu, ol i lukim ol Babilon i kam pait na daunim Jerusalem na kisim ol manmeri bilong en i go kalabus. (Ais. 39:​5-7) Ol i stap laip taim Nebukatnesar i mekim King Sedekaia i kamap aipas na bringim em i go long Babilon. (Jer. 39:7; Ese. 12:​12, 13) Olgeta samting Jehova i tokaut long en, ol i kamap tru. (Ais. 42:9; 46:10) Tru tumas, olgeta dispela samting i stap olsem evidens bilong strongim bilip bilong ol Juda olsem tok promis Jehova i mekim bilong kisim bek ol, em bai kamap tru!

10. Wanem samting i ken helpim yumi long holimpas pasin bilong bilip na wet long dispela taim bilong las de?

¹⁰ Yumi kisim wanem skul? Taim yumi bel hevi, pasin bilong bilip na wet i ken mekim isi bel bilong yumi na helpim yumi long kisim bek strong bilong yumi. Yumi stap long haptaim i gat planti hatwok, na tu, ol birua i mekim ol samting bilong daunim yumi. Tasol yumi no ken larim ol dispela samting i daunim yumi. Jehova i givim yumi gutpela samting em yumi ken bilip na wet long en—em laip oltaim long Paradais we yumi bai stap gut na stap bel isi tru. Oltaim yumi mas tingim tingim long bel dispela samting yumi bilip na wet long en. Sapos nogat, pasin bilong yumi long bilip na wet bai i wankain olsem yumi lukluk i go ausait long windo na yumi lukim wanpela naispela ples, tasol yumi no inap lukim gut dispela ples bikos windo i doti. Hau yumi ken klinim dispela windo, olsem holim strong pasin bilong yumi long bilip na wet? Oltaim yumi ken lusim sampela haptaim long piksaim long tingting laip bilong yumi bai olsem wanem long nupela taim bai kamap. Yumi ken ritim ol atikol, watsim ol vidio, na harim ol singsing i stori long ol gutpela samting yumi bilip na wet long en. Na yumi ken beten na tokim Jehova long ol promis em yumi laik tru long lukim ol i kamap tru.

11. Wanem samting i helpim wanpela sista husat i gat ol bikpela sik long kisim bek strong bilong em?

¹¹ Tingim olsem wanem pasin bilong bilip na wet i strongim na mekim isi bel bilong wanpela sista nem bilong em Joy, em i gat ol bikpela sik. Em i tok: “Taim mi pilim olsem ol hevi i daunim mi tru, mi save tokim Jehova long ol samting mi pilim long bel, na mi save olsem em i kliagut long hau mi pilim. Na Jehova i harim beten bilong mi na em i givim mi ‘dispela strong i winim strong bilong yumi ol man.’” (2 Kor. 4:7) Na tu, Joy i save piksaim long tingting olsem em i stap long nupela taim, long dispela taim “i no gat wanpela man i stap long dispela ples bai tok: ‘Mi sik.’” (Ais. 33:24) Sapos yumi tu i tokim Jehova long ol samting yumi pilim long bel na yumi putim tingting long ol samting yumi bilip na wet long en, yumi inap kisim bek strong bilong yumi.

12. I gat wanem ol risen na yumi ken trastim ol tok promis bilong Jehova? (Lukim tu piksa.)

¹² Wankain olsem Jehova i mekim long ol Juda i kalabus long Babilon, Em i givim yumi planti gutpela risen long yumi ken trastim ol tok promis bilong em. Tingim ol tok profet em yumi lukim truim bilong ol i kamap long nau. Olsem, yumi luksave olsem Gavman Inglan-Amerika i ‘gat strong long wanpela samting na long narapela samting, em i malumalum.’ (Dan. 2:​42, 43) Na tu, yumi harim nius long ‘ol guria i kamap long narapela narapela hap,’ na yumi autim gutnius long “olgeta lain man.” (Mat. 24:​7, 14) Ol dispela tok profet na planti narapela tok profet i strongim bilip bilong yumi olsem Jehova bai truim olgeta tok promis bilong Em.

JEHOVA I SAVE MEKIM YUMI STAP ISI TAIM YUMI PRET

13. (a) Ol Juda bai bungim wanem ol hatwok taim ol i lusim Babilon na i go fri? (b) Olsem Aisaia 41:​10-13 i kamapim, Jehova i mekim wanem tok bilong mekim isi bel bilong ol?

¹³ Em tru olsem Jehova i mekim isi bel bilong ol Juda i stap kalabus taim em i tokim ol long gutpela samting ol i ken bilip na wet long en, tasol em i save tu olsem ol bai bungim ol hatwok taim ol i lusim Babilon na i go fri. Jehova i bin tokaut olsem klostu long taim ol Juda bai lusim kalabus long Babilon, wanpela strongpela king bai pait na daunim ol kantri i stap klostu long Babilon na em bai pait na daunim Babilon tu. (Ais. 41:​2-5) Yu ting ol Juda i mas pret long dispela? Paslain tru long dispela samting i kamap, Jehova i mekim isi bel bilong lain bilong em taim em i tok: “Yu no ken pret, bikos mi stap wantaim yu. Yu no ken tingting planti, bikos mi God bilong yu.” (Ritim Aisaia 41:​10-13.) Wanem insait bilong dispela tok, “mi God bilong yu”? Em i no mekim dispela tok bilong kirapim ol Juda long lotuim em, nogat. Ol i save pinis long samting ol i mas mekim. Em i mekim dispela tok bilong helpim ol long tingim olsem Em i stap yet long sait bilong ol na em bai helpim ol.—Sng. 118:6.

14. Jehova i mekim wanem samting moa bilong mekim isi bel bilong ol Juda taim ol i pret?

¹⁴ Narapela rot Jehova i mekim isi bel bilong ol Juda i stap kalabus em long kirapim ol long tingim bikpela strong na save bilong em. Em i kirapim ol long lukluk i go antap long skai na lukim planti sta i stap. Em i tokim ol olsem em i bin wokim ol dispela sta, na tu, em i save long nem bilong olgeta wan wan sta. (Ais. 40:​25-28) Tingim, sapos Jehova i save long nem bilong olgeta wan wan sta, orait em i save long nem bilong olgeta wan wan wokman bilong em! Na sapos Jehova i gat bikpela strong long wokim ol sta, orait em i gat bikpela strong long helpim lain bilong em. Tru tumas, i no gat risen long ol Juda i stap kalabus i tingting planti o pret.

15. Olsem wanem God i redim ol Juda i stap kalabus long samting bai painim ol long bihain?

¹⁵ Jehova i redim tu lain bilong em long ol samting bai painim ol long bihain. Long ol sapta i kamap paslain long Buk Aisaia, God i tokim lain bilong em olsem: “Go insait long ol rum bilong yupela i stap insait tru, na pasim ol dua bilong yupela. Haitim yupela yet inap sotpela taim tasol inap long belhat bilong God i pinis.” (Ais. 26:20) Ating fes truim bilong dispela tok profet i kamap taim King Sairus i kam pait na daunim Babilon. Wanpela saveman bilong Grik bilong bipo i tok olsem taim Sairus i go insait long Babilon, em “i givim oda long [ol soldia bilong em] long kilim i dai olgeta man i stap ausait long haus bilong ol.” Tingim, ol man i stap long Babilon long dispela taim, ating ol i pret nogut tru! Tasol ol Juda i stap kalabus long Babilon long dispela taim, ating ol i no lusim laip bilong ol bikos ol i bihainim ol instraksen i kam long Jehova.

16. Wai na yumi no ken tingting planti tumas long ol samting bai painim yumi long bihain? (Lukim tu piksa.)

¹⁶ Yumi kisim wanem skul? Klostu nau traipela hevi tru bai kirap, na dispela hevi bai bikpela moa winim olgeta narapela hevi i bin kamap long bipo yet na i kam inap long nau. Taim traipela hevi tru i kamap, ol manmeri bai paul na pret nogut tru. Tasol lain bilong Jehova i no inap mekim olsem. Yumi save olsem Jehova em i God bilong yumi. Yumi bai sanap strong, bikos yumi save olsem “taim bilong God long kisim bek [yumi] i kam klostu.” (Luk 21:28) Na maski ol kantri i bung wantaim na i kam pait long yumi, yumi bai sanap strong yet. Jehova bai lukautim yumi long rot bilong ol ensel bilong em, na tu, long rot bilong ol instraksen em i givim yumi bilong seivim laip bilong yumi. Long wanem rot em bai givim yumi ol dispela instraksen? Yumi mas wet bilong painimaut bekim bilong dispela askim. Tasol i luk olsem yumi bai kisim ol dispela instraksen long rot bilong ol kongrigesen bilong yumi. Ol kongrigesen bilong yumi i olsem ‘ol rum i stap insait tru,’ em ples we yumi inap stap seif tru. Hau yumi inap redim yumi yet long ol samting bai kamap klostu nau? Yumi mas pas gut wantaim ol wanbilip bilong yumi, redi long bihainim ol instraksen yumi kisim long oganaisesen bilong Jehova, na bilip tru olsem Jehova i stiaim oganaisesen bilong em.—Hib. 10:​24, 25; 13:17.

17. Hau yu ken lukluk i go long Jehova long mekim isi bel bilong yu?

¹⁷ Laip bilong ol Juda i stap kalabus long Babilon i hatwok tru, tasol Jehova i mekim ol samting bilong mekim isi bel bilong ol na givim helpim ol i nidim tu long dispela taim. Em bai mekim olsem long yumi tu. So maski wanem samting i painim yu long tumora, oltaim yu mas wok yet long lukluk i go long Jehova long mekim isi bel bilong yu. Yes, yu mas trastim bikpela pasin marimari bilong em. Strongim yet pasin bilong yu long bilip na wet. Tingim dispela, Jehova i stap olsem God bilong yu, olsem na yu no ken pret long wanpela samting.