Yumi Ken “Amamas Moa Yet” Long Jehova

1-2. (a) Planti man i pilim olsem wanem long nau? (b) Yumi bai stori long wanem samting long dispela atikol?

LONG nau planti man long olgeta hap bilong graun i painim rot bilong stap amamas tru. Maski i olsem, ol i no stap amamas tru. Planti i tingting planti na wari na ol i pilim olsem ol i no gat hop. Lain bilong Jehova tu inap pilim olsem. Yumi stap long “taim bilong las de,” olsem na ol samting inap kamap em yumi no ekspektim ol long kamap, o ol samting yumi pilim long bel inap “givim hatwok” long yumi.—2 Tim. 3:1.

² Long dispela atikol, yumi bai stori long ol samting we inap pinisim amamas bilong yumi, na tu, ol samting yumi ken mekim bilong kisim bek dispela amamas. Tasol pastaim, yumi mas luksave long husat em i As bilong pasin bilong stap amamas tru.

JEHOVA EM I AS TRU BILONG PASIN BILONG STAP AMAMAS

3. Ol samting Jehova i wokim i skulim yumi long wanem pasin bilong em? (Lukim tu ol piksa.)

³ Oltaim Jehova i save amamas. Na em i laik tru olsem yumi tu i mas stap amamas. Olsem na yumi no kirap nogut long lukim ol samting em i wokim i mekim yumi amamas. Olsem, yumi amamas long dispela naispela graun yumi stap long en na long ol kain kain kala yumi lukim, na tu, yumi amamas taim yumi lukim ol animal i pilai na long lukim planti naispela kaikai i stap. I klia tru olsem God i laikim yumi na em i laik bai yumi enjoim laip!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Jehova i lukim pen na hevi i pulap long graun, tasol wanem samting i helpim em long stap amamas yet? (b) Jehova i givim wanem presen long yumi? (Buk Song 16:11)

⁴ Jehova em i “God bilong amamas.” Maski i olsem, em i kliagut long bel hevi ol man i pilim na ol pen na hevi ol i karim long dispela graun. (1 Tim. 1:11) Tasol em i no larim dispela i pinisim amamas bilong em. Em i save olsem ol dispela pen na hevi i bilong sotpela taim tasol, long wanem, em i makim pinis taim stret we em bai pinisim olgeta pen na hevi. Na em i no les kwik na em i wet i stap long dispela taim bai kamap we em bai pinisim tru pasin bilong krai sori na ol pen na hevi inap oltaim oltaim. Tasol long nau yet, Jehova i kliagut long ol hevi yumi karim na em i laik helpim yumi. Em i helpim yumi long wanem rot? Wanpela rot em i mekim olsem, em i givim yumi presen bilong i stap amamas. (Ritim Buk Song 16:11.) Lukim olsem wanem em i serim dispela presen wantaim Pikinini bilong em, Jisas.

5-6. Wai na Jisas i stap amamas tru?

⁵ Jehova i bin wokim Jisas na olgeta narapela samting, tasol Jisas i stap amamas tru winim olgeta dispela samting. Bilong wanem yumi tok olsem? Skelim dispela tupela risen. (1) “Em i piksa tru bilong dispela God ol man i no inap lukim” na em i bihainim gut tru pasin bilong Papa bilong em long olgeta samting em i mekim. (Kol. 1:15; lukim “happy” long stadi nout long 1 Timoti 6:15 long Study Bible.) (2) Jisas i bin stap longpela taim tru wantaim Papa bilong em winim olgeta narapela man, na Papa bilong em i as tru bilong pasin bilong stap amamas.

⁶ Oltaim Jisas i save amamas long mekim olgeta samting em Papa i askim em long mekim. (Prov. 8:​30, 31; Jon 8:29) Jisas i stap gut long Jehova na mekim laik bilong em, olsem na Jehova i amamas tru long em.—Mat. 3:17.

7. Yumi ken mekim wanem bilong painim amamas tru?

⁷ Yumi tu i ken stap amamas tru taim yumi go klostu moa long Jehova, em i As tru bilong pasin bilong stap amamas. Taim yumi lusim bikpela haptaim moa long kisim save long Jehova na bihainim pasin bilong em, yumi bai stap amamas tru. Na tu, yumi bai stap amamas tru taim yumi mekim laik bilong God na taim yumi save olsem em i orait long yumi.a (Sng. 33:12) Tasol olsem wanem sapos sampela taim o olgeta taim yumi no save pilim amamas? Yu ting dispela i makim olsem God i no orait long yumi? Nogat, i no olsem! Yumi no gutpela olgeta, na sampela taim yumi karim pen na hevi, o yumi bel hevi na wari na tingting planti. Jehova i kliagut long hau yumi save pilim. (Sng. 103:14) Yumi ken stori long ol samting em ol inap pinisim amamas bilong yumi na samting yumi ken mekim bilong kisim bek dispela amamas.

NO KEN LARIM WANPELA SAMTING I PINISIM AMAMAS BILONG YU

8. Ol hevi yumi karim inap mekim wanem long yumi?

⁸ Namba 1 samting inap pinisim amamas: Ol hevi bilong laip. Olsem wanem? Yu karim hevi bilong pasin birua, wanpela netrol disasta, pasin bilong stap rabis, sik, o hevi bilong kamap lapun? Em isi tru long yumi inap lusim amamas bilong yumi taim yumi karim ol kain hevi olsem, moa yet taim yumi no inap pasim ol dispela hevi long kamap long yumi. Baibel i tokaut stret olsem, “taim man i bel hevi, dispela i save daunim em tru.” (Prov. 15:13) Babis em i wanpela elda, na insait long 4-pela yia brata bilong em na papamama bilong em i dai. Em i tok: “Mi pilim olsem mi stap wanpis na mi no gat helpim. Sampela taim, mi save tingting planti bikos mi bisi tru long mekim planti samting na mi no lusim haptaim long stap wantaim papamama na brata bilong mi paslain long ol i dai.” Ol hevi bilong laip inap pinisim olgeta strong bilong yumi na mekim yumi wari na tingting planti tru.

9. Wanem samting i ken helpim yumi long kisim bek amamas bilong yumi? (Jeremaia 29:​4-7, 10)

⁹ Wanem samting i ken helpim yumi long kisim bek amamas bilong yumi? Yumi ken kisim bek amamas bilong yumi long rot bilong holim stretpela tingting na kisim pasin bilong tok tenkyu. Ol man bilong dispela graun i strongim dispela tingting olsem yumi bai stap amamas tru sapos olgeta samting long laip bilong yumi i gutpela tasol. Tasol dispela kain tingting em i no tru. Olsem, Jehova i bin tokim ol Juda em ol i kalabus long Babilon long ekseptim olsem laip bilong ol i senis na nau ol i stap olsem ol kalabus lain long narapela kantri na ol i mas traim long amamas maski ol i karim ol hevi. (Ritim Jeremaia 29:​4-7, 10.) Yumi kisim wanem skul long dispela? Tingim ol gutpela samting i kamap long laip bilong yu na amamas long ol dispela samting. Tingim olsem Jehova bai wok yet long helpim yu. (Sng. 63:7; 146:5) Effie i bin insait long wanpela eksiden na em i kamap paralais, em i tok: “Mi kisim planti helpim na sapot i kam long Jehova, famili bilong mi, na kongrigesen tu. So mi pilim olsem sapos mi givap, mi no inap soim tenkyu bilong mi long ol. Mi laik soim tenkyu bilong mi long Jehova na long ol pren em ol i givim bikpela helpim long mi.”

10. Wai na yumi ken amamas yet maski yumi karim ol hevi?

¹⁰ Sampela taim ol samting long laip bilong yumi i no kamap olsem yumi ting long en o ol hevi i kamap long yumi o long famili bilong yumi. Maski i olsem, yumi inap long stap amamas yet.b (Sng. 126:5) Bilong wanem yumi tok olsem? Long wanem, maski wanem samting i kamap long laip bilong yumi, dispela i no ken pinisim amamas bilong yumi. Maria em i wanpela painia sista, em i tok: “Maski ol hevi i painim yu, yu ken stap amamas yet. Tasol dispela i no makim olsem yu no onest long samting yu pilim long bel. Em i makim olsem yu wok long tingim ol tok promis bilong Jehova. Papa bilong yumi bai helpim yumi long lukautim pasin bilong yumi long stap amamas.” Tingim, maski ol hevi i go bikpela tru, olgeta hevi yumi karim em i bilong sotpela taim tasol—ol i olsem ol lek mak long wesan long nambis. Klostu nau ol bai pinis olgeta, i olsem solwara i wasim i go na ol i no stap moa.

11. Olsem wanem eksampel bilong aposel Pol i ken strongim yu?

¹¹ Olsem wanem sapos yumi stat long kisim kain tingting olsem ol hevi i painim yumi i soim olsem Jehova i no orait moa long yumi? Sapos olsem, orait yumi inap tingim ol gutpela wokman bilong Jehova em ol i bin karim ol bikpela hevi. Tingim eksampel bilong aposel Pol. Jisas yet i bin makim em long karim tok i tru i go long “ol lain manmeri, na long ol king na long ol manmeri bilong Israel.” (Apo. 9:15) Em i kisim gutpela wok tru bilong mekim! Maski i olsem, Pol i bin karim planti hevi long laip bilong em. (2 Kor. 11:​23-27) Olsem wanem? Yu ting ol hevi Pol i karim i makim olsem Jehova i no orait long em? Nogat, i no olsem! Em i sanap strong na karim ol hevi na dispela i soim olsem Jehova i blesim ol wok em i mekim. (Rom 5:​3-5) Orait tingim ol samting i kamap long yu long nau. Maski ol hevi i painim yu, yu wok yet long holimpas bilip na sanap strong na karim ol dispela hevi. So yu tu i ken bilip tru olsem Jehova i orait long yu.

12. Sapos ol samting i no kamap olsem yumi ting long en, olsem wanem dispela inap pinisim amamas bilong yumi?

¹² Namba 2 samting inap pinisim amamas: Ol samting i no kamap olsem yu ting long en. (Prov. 13:12) Taim yumi laikim Jehova na yumi tenkyu long em, dispela bai kirapim yumi long putim ol mak long mekim wok bilong em. Tasol sapos ol mak yumi putim i antap tumas na i no stret long sindaun bilong yumi, dispela inap mekim yumi bel hevi. (Prov. 17:22) Wanpela painia em nem bilong em Holly, em i tok: “Mi laik go long Skul Bilong Ol Kingdom Evanselis, mekim wok long ol narapela kantri, o go wok long Ramapo konstraksen projek. Tasol ol samting long laip bilong mi i senis, na mi no inap long winim ol dispela mak mi bin putim. Mi bel hevi tru. Taim yu laik mekim sampela samting, tasol yu no inap long mekim olsem, dispela bai mekim yu bel hevi tru.” Planti i pilim olsem tu.

13. Sapos ol samting long laip bilong yumi i pasim yumi long mekim bikpela wok moa, orait yumi ken putim wanem ol mak i stret long yumi inap winim?

¹³ Wanem samting i ken helpim yumi long kisim bek amamas bilong yumi? Tingim olsem Jehova i no save askim yumi long mekim planti samting tumas. Em i no ekspektim yumi long mekim planti wok moa winim skel bilong yumi, na tu, i no olsem em bai laikim yumi moa sapos yumi mekim planti wok moa bilong em, nogat. Jehova i laik bai yumi mekim pasin daun na bilip long em. (Mai. 6:8; 1 Kor. 4:2) Em i save tingim moa tingting na filings bilong yumi winim ol wok yumi mekim. Yu ting em i gutpela tingting long yumi subim yumi yet long mekim planti samting moa winim samting Jehova i laik yumi mas mekim?c Nogat tru! So sapos ol samting long laip bilong yu i pasim yu long mekim bikpela wok moa bilong Jehova, orait traim long putim tingting long ol samting yu inap mekim. Olsem wanem? Yu inap trenim ol yangpela o strongim ol lapun bratasista? Yu inap putim mak long strongim wanpela long rot bilong i go toktok wantaim em, o ringim em long fon, o salim teks mesis long em? Jehova bai blesim yu na helpim yu long stap amamas taim yu wok long putim ol kain gutpela mak olsem em yu inap winim! Na tingim tu olsem, klostu nau long nupela taim em Jehova bai kamapim, planti rot bai op long yumi inap lotuim Jehova long ol rot em yumi no bin ting long en! Holly em yumi stori pinis long em, em i tok: “Mi save sindaun na tingting long mi yet olsem, ‘Mi bai stap laip oltaim long bihain.’ Jehova i ken helpim mi long winim sampela bilong ol dispela mak mi putim long nupela taim.”

14. Wanem samting moa inap pinisim amamas bilong yumi?

¹⁴ Namba 3 samting inap pinisim amamas: Oltaim tingting long amamasim yumi yet tasol. Sampela i yusim sosel midia long strongim dispela tingting olsem yumi inap stap amamas tru na laip bilong yumi bai gat as bilong en taim yumi mekim ol samting bilong amamasim yumi yet. Ol i kirapim ol manmeri long mekim ol samting ol i laikim, baim ol samting, na raun lukim ol narapela ples na putim ol dispela samting olsem nambawan samting long laip bilong ol. I no gat rong long kisim amamas long ol dispela samting. Jehova i wokim yumi na bai yumi ken enjoim ol naispela samting. Tasol planti i luksave olsem samting ol i ting bai bringim amamas long ol, tru tru em i pinisim amamas bilong ol. Eva em i wanpela painia, na em i tok: “Sapos yu tingting oltaim long amamasim yu yet, yu bai pilim olsem ol samting yu gat i no inap na yu bai laikim planti samting moa.” Pasin bilong tingting oltaim long amamasim yumi yet inap pinisim strong bilong yumi na mekim yumi bel hevi tru.

15. Yumi inap kisim wanem skul long King Solomon?

¹⁵ Yumi inap kisim skul long stori bilong King Solomon long hevi inap painim wanpela husat i tingting oltaim long amamasim em yet. Em i traim long painim amamas long rot bilong inapim ol laik bilong em, olsem enjoim ol gutpela kaikai na ol naispela musik, na olgeta gutpela samting em mani inap baim long taim bilong em. Tasol ol dispela samting i no mekim em i amamas, em i bel hevi. Em i tok: “Ai i no save les long lukluk; na yau i no save les long harim.” (Ekl. 1:8; 2:​1-11) Ol tingting bilong ol man bilong dispela graun long samting inap mekim man i stap amamas tru em ol tingting giaman, wankain olsem giaman mani. I luk olsem ol i gat veliu long en, tasol yu no inap yusim long baim o kisim samting em yu laikim.

16. Taim yumi givim ol samting long ol narapela, hau dispela i ken helpim yumi long kisim bek amamas bilong yumi? (Lukim tu ol piksa.)

¹⁶ Wanem samting i ken helpim yumi long kisim bek amamas bilong yumi? Jisas i skulim yumi olsem “amamas bilong givim samting i winim amamas bilong kisim samting.” (Apo. 20:35) Wanpela elda nem bilong em Alekos, em i tok: “Mi save traim long mekim ol liklik samting bilong helpim ol narapela. Taim mi helpim ol narapela, nau mi no tingting tumas long mi yet, na dispela i mekim mi amamas.” Yu ken mekim wanem bilong helpim ol narapela? Sapos yu lukim olsem hevi i daunim tru wanpela, orait yu ken strongim em. Ating yu no inap long pinisim ol hevi bilong em, tasol yu ken mekim isi bel bilong em long rot bilong putim gut yau na pilim tingting bilong em, sori long em, na helpim em long tingim olsem em i mas putim ol hevi bilong em long han bilong Jehova. (Sng. 55:22; 68:19) Na tu, yu ken helpim em long tingim olsem Jehova i no givim baksait long em. (Sng. 37:28; Ais. 59:1) Yu inap mekim sampela samting bilong helpim em, olsem redim kaikai bilong em o go wokabaut liklik wantaim em. Invaitim em long go autim tok wantaim yu, dispela bai mekim em i amamas. Larim Jehova i yusim yu olsem tul bilong helpim ol arapela. Taim yumi tingting long helpim ol narapela na yumi no tingting long yumi yet tasol, yumi bai stap amamas tru.—Prov. 11:25.

17. Olsem wanem Jehova inap helpim yumi long stap amamas tru? (Buk Song 43:4)

¹⁷ Yumi ken stap amamas tru sapos yumi wok yet long i go klostu long Papa bilong yumi long heven. Baibel i helpim yumi long save tru olsem Jehova i ken helpim yumi long “amamas moa yet.” (Ritim Buk Song 43:4.) Olsem na maski yumi karim wanem ol hevi long laip bilong yumi, yumi no ken tingting planti na pret. Yumi mas wok yet long putim tingting i go long Jehova, em i As tru bilong pasin bilong stap amamas!—Sng. 144:15.