Buk Jop Inap Helpim Yu Taim Yu Givim Tok Kaunsel

1-2. Tripela pren bilong Jop na Elihu i mas mekim wanem long Jop?

NIUS i spred i go long olgeta hap na ol manmeri long hap Is i harim dispela nius. Jop em man i gat planti mani kago na planti man i save long em, em i lusim olgeta samting em i gat. Taim tripela pren bilong Jop, em Elifas, Bildat, na Sofar i harim nius long dispela samting i kamap, ol i go long kantri Us bilong mekim isi bel bilong em. Tasol ol i kirap nogut long samting ol i lukim taim ol i go kamap long hap.

² Piksaim long tingting samting ol i lukim. Jop i lusim olgeta samting i dia tumas long em. Ol man i stilim na kilim i dai ol sipsip, ol bulmakau, ol kamel, na ol donki bilong em. Haus i pundaun na i kilim i dai ol pikinini bilong em na ol man nogut i kilim i dai planti wokman bilong em. Na haus we ol pikinini bilong Jop i dai long en, dispela haus i bagarap i stap. Na i no dispela tasol, Jop i karim tu hevi bilong sik. Bodi olgeta bilong em i pulap long ol strongpela boil nogut. Taim dispela tripela man i wokabaut i kam, ol i lukim Jop i bel hevi tru na em i sindaun antap long sit bilong paia. Ol i mekim wanem? Inap 7-pela de, ol i sindaun wantaim Jop na ol i no mekim wanpela tok. (Jop 2:​12, 13) Bihain, Elihu em wanpela yangpela man i kam sindaun klostu long ol. Long dispela taim, Jop i kirapim tok na em i toknogutim de em i bon na em i tok i gutpela moa sapos em i bin dai long dispela de. (Jop 3:​1-3, 11) Jop i nidim tru helpim! Ol tok ol dispela man i mekim na pasin ol i bihainim long toktok bai soim olsem ol i pren tru bilong Jop na ol i tingim em tru, o nogat.

3. Yumi bai stori long wanem samting long dispela atikol?

³ Jehova i stiaim Moses long raitim ol tok na ol samting em tripela pren bilong Jop na Elihu i bin mekim. I luk olsem wanpela spirit nogut i bin stiaim Elifas long mekim sampela tok i no stret. Tasol ol tok em Elihu i mekim, Jehova i bin stiaim em long mekim ol dispela tok. (Jop 4:​12-16; 33:​24, 25) Olsem na maski Buk Jop i gat sampela gutpela edvais long en, em i gat tu ol edvais nogut. Yumi bai stori long olsem wanem Buk Jop i ken helpim yumi taim yumi mas givim tok kaunsel long narapela. Pastaim, yumi bai stori long tripela pren bilong Jop em ol i no stap gutpela piksa long yumi. Bihain, yumi bai stori long gutpela eksampel bilong Elihu. Na tu, yumi bai stori long helpim em lain Israel inap kisim long Buk Jop na hau dispela buk inap helpim yumi long nau.

HAU TRIPELA PREN BILONG JOP I GIVIM TOK KAUNSEL LONG EM

4. Bilong wanem tripela pren bilong Jop i no mekim isi bel bilong em? (Lukim tu piksa.)

⁴ Baibel i tok tripela pren bilong Jop i “go lukim Jop bilong soim sori bilong ol long em na strongim bel bilong em” taim ol i harim stori long ol hevi i painim em. (Jop 2:11) Tasol ol i no bin mekim olsem. Bilong wanem? I gat tripela risen. Namba 1, ol i hariap long kisim tingting kranki long em. Olsem, ol i holim tingting kranki olsem ol hevi i painim Jop em panismen God i givim long em bikos long ol sin em i bin mekim.a (Jop 4:7; 11:14) Namba 2, ol tok kaunsel ol i givim long Jop i no helpim em, ol i daunim em tru na bagarapim bel bilong em. I luk olsem ol edvais bilong ol em gutpela edvais, tasol tru tru ol tok bilong ol i samting nating. (Jop 13:12) Inap tupela taim Bildat i tokim Jop olsem em i toktok planti. (Jop 8:2; 18:2) Na Sofar i tok Jop em “man i no gat gutpela tingting.” (Jop 11:12) Namba 3, maski ol i no bikmaus long Jop, ol i sutim ol tok giaman long em na rabisim em na mekim em i pilim nogut tru. (Jop 15:​7-11) Dispela tripela man i tingting strong long pruvim olsem Jop em i man nogut, na ol i no tingting long mekim gut bel bilong em na strongim bilip bilong em.

5. Tok kaunsel bilong tripela pren bilong Jop i mekim wanem long em?

⁵ Tok kaunsel bilong tripela pren bilong Jop i no bin helpim em liklik. Ol tok bilong ol i daunim tru Jop. (Jop 19:2) Em as na Jop i traim long difendim gutnem bilong em. Na dispela i mekim na em holim tingting kranki na em i mekim ol tok i no stret. (Jop 6:​3, 26) Ol pren bilong Jop i mekim ol tok i no stret wantaim tingting bilong Jehova, na ol i no sori liklik long Jop. Em risen na ol i stap olsem ol tul long han bilong Satan, maski ol yet i no luksave long dispela samting. (Jop 2:​4, 6) Olsem wanem stori bilong Jop inap helpim lain Israel bilong bipo, na hau em inap helpim yumi long nau?

6. Ol hetman bilong Israel inap kisim wanem skul long eksampel nogut bilong tripela pren bilong Jop?

⁶ Hau ol Israel inap kisim helpim. Bihain long Jehova i givim ol lo long lain Israel, em i makim ol hetman, em ol elda, long jasim lain bilong em na helpim ol long bihainim ol stretpela lo bilong em. (Lo 1:​15-18; 27:1) Ol dispela hetman i gat wok long putim gut yau paslain long ol i givim edvais o skelim kot. (2 Sto. 19:6) Na ol i mas givim ol askim na ol i no ken ting olsem ol i save long olgeta samting. (Lo 19:18) Na tu, ol dispela hetman long Israel i mas abrusim pasin bilong tok hat long ol manmeri i kam bilong kisim helpim long ol. Wai na ol i mas mekim olsem? Bikos sapos ol i krosim ol o tok hat long ol, ol manmeri bai no inap autim ol wari na bel hevi bilong ol long ol. (Kis. 22:​22-24) Ol hetman long Israel em ol i tingim stori bilong Jop, ol inap kisim planti gutpela skul long dispela stori.

7. Husat moa long lain Israel inap givim tok kaunsel long ol manmeri, na hau stori bilong Jop inap helpim ol? (Provep 27:9)

⁷ Ol hetman long lain Israel i gat wok long givim tok kaunsel long ol manmeri, tasol ol narapela tu inap mekim olsem. Olgeta long lain Israel—ol yangpela na ol lapun na ol man na ol meri—inap givim edvais long ol pren bilong ol em ol i nidim helpim long pas gut gen wantaim Jehova o stretim wanpela pasin bilong ol. (Sng. 141:5) Taim wanpela i mekim olsem, em i soim klia olsem em i gutpela pren tru. (Ritim Provep 27:9.) Eksampel nogut bilong tripela pren bilong Jop inap helpim lain Israel long luksave long wanem tok na pasin ol i no ken mekim taim ol i givim tok kaunsel long ol narapela.

8. Yumi no ken mekim wanem taim yumi givim tok kaunsel long ol narapela? (Lukim tu ol piksa.)

⁸ Hau yumi ken kisim helpim. Yumi ol Kristen i laik helpim ol wanbilip bilong yumi taim ol i karim ol hevi. Tasol bilong mekim olsem, yumi no ken bihainim pasin bilong tripela pren bilong Jop. Namba 1, yumi mas sakim pasin bilong hariap long skelim man na yumi mas save gut long ol samting paslain long yumi givim tok kaunsel. Namba 2, yumi no ken yusim tasol ekspiriens bilong yumi long givim edvais olsem Elifas i bin mekim, yumi mas givim edvais em tok bilong Baibel i as bilong en. (Jop 4:8; 5:​3, 27) Namba 3, yumi mas abrusim pasin bilong tok hat o sutim tok long narapela. Tingim, Elifas na ol pren bilong em i bin mekim sampela tok i stret. Bihain, wanpela man bilong raitim Baibel i bin kolim ol wankain tok em Elifas i mekim. (Skelim Jop 5:13 wantaim 1 Korin 3:19.) Maski i olsem, planti tok ol i mekim long God i no tru na ol dispela tok i bagarapim tru bel bilong Jop, olsem na Jehova i skelim ol tok ol i mekim olsem i no tru. (Jop 42:​7, 8) Gutpela tok kaunsel i no save kirapim man long ting olsem Jehova i gat hatpela pasin o em i no laikim ol man i lotuim em. Yumi ken stori nau long skul yumi inap kisim long eksampel bilong Elihu.

HAU ELIHU I GIVIM TOK KAUNSEL LONG JOP

9. Stori long risen na Jop i mas kisim helpim bihain long ol pren bilong em i stop long toktok, na hau Jehova i helpim em.

⁹ Taim Jop na ol pren bilong em i stop long toktok, ating ol i pilim nogut. Ol i mekim planti tok we i pulapim 28 sapta bilong Baibel, na planti tok ol i mekim i soim olsem ol i belhat na bel hevi. Em as na Jop i no kisim bel isi! Em i nidim wanpela long mekim gut bel bilong em na stretim em. Hau Jehova i bin helpim Jop? Em i yusim Elihu long givim tok kaunsel long Jop. Wai na Elihu i no hariap long toktok? Em i tok: “Mi yangpela man na yupela i gat bikpela krismas moa. Olsem na mi rispek long yupela na mi pasim maus.” (Jop 32:​6, 7) Elihu i luksave long samting em planti long nau i luksave long en: Ol lain i gat bikpela krismas, ol i stap laip longpela taim moa na ol i lainim planti samting, olsem na ol i gat savetingting na ekspiriens bilong laip em planti yangpela i no gat. Elihu i stap isi na putim gut yau long Jop na ol pren bilong em, tasol taim i kamap we em i mas toktok. Em i tok: “Maski man i gat bikpela krismas, dispela tasol i no makim olsem em i gat savetingting, na i no ol lapun tasol inap skelim wanem pasin i stret na wanem pasin i no stret.” (Jop 32:9) Elihu i mekim wanem tok moa, na em i bihainim wanem pasin taim em i toktok?

10. Elihu i mekim wanem samting paslain long em i givim tok kaunsel long Jop? (Jop 33:​6, 7)

¹⁰ Paslain long Elihu i givim tok kaunsel long Jop, em i laik bai Jop i stap isi na redi long putim yau long em. Hau Eilhu i mekim olsem? Pastaim, em i bosim gut bel bilong em. Yumi save long dispela bikos Baibel i tok pastaim Elihu i belhat. (Jop 32:​2-5) Maski i olsem, i no gat wanpela taim Elihu i tok hat long Jop. Em i daunim em yet na mekim ol tok bilong strongim Jop. Olsem, em i tokim Jop: “Long ai bilong God tru, mitupela i wankain tasol.” (Ritim Jop 33:​6, 7.) Na bihain Elihu i soim olsem em i bin putim gut yau long Jop. Paslain long em i givim tok kaunsel, em i kolim gen sampela bikpela poin long ol tok Jop i mekim. (Jop 32:11; 33:​8-11) Na em i mekim olsem tu long ol narapela taim we em i givim tok kaunsel long Jop.—Jop 34:​5, 6, 9; 35:​1-4.

11. Elihu i bihainim wanem pasin taim em i givim tok kaunsel long Jop? (Jop 33:1)

¹¹ Taim Elihu i givim tok kaunsel long bilipman Jop, em i mekim long pasin i soim rispek long em. Olsem, Elihu i kolim nem bilong Jop em samting tripela pren bilong Jop i no bin mekim. (Ritim Jop 33:1.) Taim Jop na tripela pren bilong em i wok long tok pait, ating Elihu i laik tru long mekim sampela tok long dispela taim. Em i tingim dispela, olsem na em i givim sans long Jop long bekim tok long edvais em i givim em. (Jop 32:4; 33:32) Na tu, Elihu i givim tok lukaut long Jop long hevi inap kamap long ol tingting i no stret em i gat, na long gutpela pasin em i helpim Jop long tingim savetingting, bikpela strong, stretpela pasin, na gutpela pasin laikim bilong Jehova. (Jop 36:​18, 21-26; 37:​23, 24) Gutpela tok kaunsel Elihu i givim i mekim isi bel bilong Jop na redim em long kisim sampela moa skultok i kam long Krieta bilong em. (Jop 38:​1-3) Long wanem rot eksampel bilong Elihu inap helpim lain Israel bilong bipo, na hau em inap helpim yumi long nau?

12. (a) Long wanem rot Jehova i yusim ol profet long helpim lain bilong em? (b) Olsem wanem gutpela eksampel bilong Elihu inap helpim ol Israel?

¹² Hau ol Israel inap kisim helpim. Planti taim Jehova i bin yusim ol profet long skulim na stretim lain Israel. Olsem, long taim bilong ol Hetman, Jehova i yusim profet meri Debora long givim ol gutpela edvais bilong stiaim ol manmeri na em i yusim Samuel taim em i yangpela yet long mekim ol tok bilong stiaim lain Israel. (Het. 4:​4-7; 5:7; 1 Sml. 3:​19, 20) Na long haptaim we ol king i bosim ol manmeri, Jehova i wok long yusim planti profet long helpim ol manmeri long holimpas lotu i tru na long stretim ol manmeri em ol i bin lusim lotu i tru. (2 Sml. 12:​1-4; Apo. 3:24) Eksampel bilong Elihu i stap long Buk Jop inap helpim ol bilipman na meri long kliagut long wanem tok ol i mas mekim na pasin ol i mas bihainim taim ol i givim tok kaunsel long ol narapela.

13. Ol Kristen long nau i ken mekim wanem bilong strongim ol wanbilip bilong ol?

¹³ Hau yumi ken kisim helpim. Yumi ol Kristen i save helpim ol manmeri long save long laik bilong God taim yumi tokim ol long ol tok i stap long Baibel. Narapela rot yumi mekim olsem em long mekim ol tok bilong strongim ol wanbilip bilong yumi. (1 Kor. 14:3) Ol elda i mas save olsem em i bikpela samting long ol i mas “mekim gut bel” bilong ol wanbilip, dispela i makim tu ol lain em ol i save tingting planti o ol i bel hevi tru na ol i “mekim planti toktok nabaut.”—1 Tes. 5:14; Jop 6:3.

14-15. Stori long olsem wanem ol elda i ken bihainim pasin bilong Elihu taim ol i givim tok kaunsel.

¹⁴ Piksaim long tingting dispela samting. Wanpela elda i harim olsem wanpela sista long kongrigesen bilong em i bel hevi tru. So em na narapela brata i go visitim dispela sista bilong strongim em. Long visit bilong ol, dispela sista i kamapim sampela tingting kranki em i gat. Em i tok maski em i go long ol miting na autim tok, em i no pilim amamas. Dispela elda bai mekim wanem long kain taim olsem?

¹⁵ Namba 1 samting, ating em bai traim long save long ol risen na dispela sista i pilim olsem. Bilong mekim olsem, em i mas putim gut yau na no ken les kwik. Dispela sista i pilim olsem em i no gutpela inap long God i laikim em? “Ol wari bilong laip” i daunim em tru? (Luk 21:34) Na namba 2 samting, dispela elda bai painim ol rot bilong tok amamas long dispela sista long ol gutpela wok em i mekim. Na i stret em i mekim olsem, bikos dispela sista i wok yet long go long ol miting na autim tok maski em i bel hevi tru. Na namba 3 samting, taim dispela elda i kliagut long ol samting i mekim na sista i bel hevi, em bai yusim tok bilong Baibel long strongim pasin bilong em long bilip olsem God i laikim em.—Gal. 2:20.

WOK YET LONG KISIM HELPIM LONG BUK JOP

16. Yumi ken mekim wanem na bai yumi wok yet long kisim helpim long Buk Jop?

¹⁶ Yumi kisim planti helpim taim yumi skelim Buk Jop! Olsem yumi lainim long atikol i go pinis, stori bilong Jop i skulim yumi long as na God i larim pen na hevi i stap, na tu, samting yumi ken mekim bilong sanap strong na karim ol hevi. Na olsem yumi skelim long dispela atikol, yumi olgeta i ken lain long givim gutpela tok kaunsel long rot bilong bihainim gutpela eksampel bilong Elihu na i no pasin bilong tripela pren bilong Jop. Sapos yu tingting long givim tok kaunsel long ol narapela long bihain, i gutpela long skelim gen ol skul yu kisim long Buk Jop. Na sapos sampela haptaim i lus pinis na yu no bin ritim gen Buk Jop, orait yu ken putim mak long ritim gen dispela narakain buk. Taim yu mekim olsem, yu bai luksave olsem ol tok bilong en inap helpim yu long nau wankain olsem em i bin helpim ol man long taim ol i bin raitim dispela buk.