Wanem Samting i Makim Olsem Man Em i Wanpela Kristen?​—Baibel i Tok Wanem?

Long nau ol manmeri long olgeta hap bilong graun i amamas long tokaut olsem ol i Kristen; tasol, pasin bilong ol i givim hevi long ol narapela. Sampela i tingim ol yet tasol, tok giaman, na i no mekim gutpela pasin. Na ol narapela i no stap gut long poroman marit bilong ol. Pasin bilong ol i mekim na sampela manmeri i laik save: ‘Wanem samting i makim olsem man em i wanpela Kristen?’

Wanem samting i makim olsem man i kamap wanpela Kristen

Em isi long wanpela i tok em i Kristen. Tasol i gat sampela samting moa. Baibel i tok olsem Kristen em wanpela husat i stap disaipel bilong Jisas Krais. (Aposel 11:26) Jisas yet i tok: “Sapos yupela i holimpas tok bilong mi, orait yupela i disaipel tru bilong mi.” (Jon 8:31) Em tru olsem i no gat wanpela inap bihainim gut olgeta tok bilong Jisas. Tasol wanpela Kristen i save wok strong long bihainim ol skul bilong Jisas long i stap bilong em long olgeta wan wan de na dispela i kamapim olsem em i tingim tru ol skul em i kisim save long en. Skelim sampela eksampel.

Ol Kristen i save laikim ol narapela

Tok Jisas i mekim: “Mi givim nupela lo long yupela, olsem narapela i mas laikim narapela. Yupela i mas laikim narapela narapela olsem mi bin laikim yupela. Sapos pasin laikim i stap namel long yupela, orait olgeta bai save olsem yupela i disaipel bilong mi.”​—Jon 13:34, 35.

Samting Jisas i mekim: Jisas i soim olsem em i laikim olgeta maski ol i gat wanem kain sindaun o bekgraun. Em i oraitim ol sikman, givim kaikai long ol man i stap hangre, na tu, em i givim laip bilong em long helpim ol narapela.​—Matyu 14:14-21; 20:28.

Samting ol Kristen i mekim: Ol Kristen i laikim olgeta man, olsem na ol i save givim samting long ol narapela, mekim wankain pasin long olgeta, na fogivim ol man i rongim ol. Ol i helpim ol man i nidim helpim na ol i redi long daunim laik bilong ol yet na helpim ol narapela.​—1 Jon 3:16.

Ol Kristen i save mekim tok tru

Tok Jisas i mekim: “Mi yet . . . mi tok i tru.”​—Jon 14:6.

Samting Jisas i mekim: Jisas i tok tru long olgeta tok na samting em i mekim. Em i no save giamanim ol narapela long bihainim em o kirapim ol long bilip long samting i no tru. Ol man i tingim em olsem man bilong tok tru, maski dispela i kamapim pasin birua.​—Matyu 22:16; 26:63-67.

Samting ol Kristen i mekim: Ol Kristen i no save giaman. Ol i save baim takis bilong ol, ol i no save stil, na ol i save givim pe bilong wan wan de long ol wokman bilong ol. (Rom 13:5-7; Efesus 4:28) Ol i no save giaman na pulim samting bilong ol narapela, giaman long ol eksem, o raitim ol giaman infomesen long pepa bilong painim wok samting.​—Hibru 13:18.

Ol Kristen i save mekim gutpela pasin

Tok Jisas i mekim: “Yupela ol man i save hatwok nating na karim ol bikpela hevi, yupela kam long mi na bai mi givim nupela strong long yupela. Karim hap plang bilong mi na kisim skul long mi, long wanem, mi man bilong pasin isi na pasin daun, na yupela bai kisim nupela strong. Hap plang bilong mi i gutpela na samting mi askim yupela long karim i no hevi.”​—Matyu 11:28-30.

Samting Jisas i mekim: Jisas i gat pasin isi na ol man inap kam long em. Em i gat taim long toktok wantaim ol pikinini, mekim gut long ol man i bel hevi, na soim rispek long ol narapela.​—Mak 10:13-15; Luk 9:11.

Samting ol Kristen i mekim: Ol Kristen i save mekim gutpela tok long ol narapela; ol i no save mekim tok bilong daunim o bagarapim narapela. (Efesus 4:29, 31, 32) Ol i tingim ol narapela na painim rot bilong helpim ol.​—Galesia 6:10.

Ol Kristen i save i stap gut long poroman marit bilong ol

Tok Jisas i mekim: “Samting God i pasim pinis, man i no ken katim.”​—Mak 10:9.

Samting Jisas i mekim: Maski Jisas i no marit, em i kirapim ol marit long stap gut long poroman marit bilong ol. (Matyu 19:9) Em i givim tok lukaut long ol pasin we inap brukim marit bilong ol.​—Matyu 5:28.

Ol Kristen i mekim gutpela pasin: Ol Kristen i sakim ol pasin we i no soim rispek long marit. (Hibru 13:4) Ol poroman marit i laikim na rispektim poroman bilong ol.​—Efesus 5:28, 33.