Baibel i Tok Wanem Long Krismas?

Bekim bilong Baibel

Baibel i no kolim det em mama i karim Jisas, na tu, Baibel i no tok olsem yumi mas selebretim de mama i karim em. Buk Cyclopedia bilong McClintock na Strong i tok: “God i no tok long ol man i mas selebretim Krismas, na tu, NT [Nupela Testamen] i no as bilong en.”

Tasol stadi bilong histori bilong Krismas i soim klia olsem ol lotu aiden i as bilong dispela selebresen. Baibel i kamapim klia olsem yumi mekim God i bel hevi taim yumi lotuim em long pasin em i no orait long en.​—Kisim Bek 32:5-7.

Histori bilong ol samting bilong Krismas

1. Selebretim de mama i karim Jisas: “Ol Kristen long bipo i no bin selebretim de mama i karim [Jisas] bikos ol i tingim pasin bilong selebretim de mama i karim man olsem kastom bilong ol aiden.”​—The World Book Encyclopedia.

2. Disemba 25: I no gat wanpela evidens i soim olsem Jisas i bon long dispela det. I luk olsem ol lida bilong lotu i makim dispela det na bai i stret wantaim bung ol aiden i save mekim long taim bilong kol.

3. Givim presen, bikpela kaikai, pati: Buk The Encyclopedia Americana i tok: “Satunalia, em wanpela bikpela kaikai ol Rom i save mekim na selebret long namel long mun Disemba, na i stap olsem model bilong ol kastam bilong Krismas. Olsem, ol samting i kamap long dispela bung em pasin bilong mekim bikpela kaikai, givim ol presen, na laitim ol kandel.” Buk Encyclopædia Britannica i tok olsem “olgeta wok na bisnis i save pas” long taim bilong Satunalia.

4. Ol krismas lait: Buk The Encyclopedia of Religion i tok, ol lain long Yurop i save bilasim haus bilong ol “wantaim ol lait na ol diwai i save gat grinpela lip long yia olgeta” long selebretim taim bilong kol na banisim ol yet long ol spirit nogut.

5. Liklik diwia Mistletoe, diwai beri: “Lain Druids i tok liklik diwai mistletoe i gat mejik. Na ol i lotuim ol diwai beri i save gat grinpela lip long olgeta taim olsem tok promis bilong san bai lait gen.”​—The Encyclopedia Americana.

6. Krismas diwai: “Lotuim diwai, em pasin tru bilong ol aiden long Yurop, ol i bihainim yet dispela pasin bihain long ol i kamap Kristen.” Wanpela pasin we i mekim na pasin bilong lotuim diwai i stap yet, em kastam bilong ol long “putim diwai Yule long dua o insait long haus long taim bilong kol long holide.”​—Encyclopædia Britannica.