ASKIM BILONG OL YANGPELA
Yu Ting Tok Nogut Em i Samting Nogut Tru?
“Mi lain pinis long harim ol tok nogut so mi no kirap nogut moa. Em nomol tasol.”—Christopher, 17.
Taim mi yangpela, mi save tok nogut planti. Em isi long kisim dispela pasin, tasol i hatwok long lusim.”—Rebecca, 19.
Yu bai tok wanem?
Yu pilim olsem wanem taim yu harim ol narapela i tok nogut?
Mi no luksave long dispela—em nomol long mi.
Sampela taim mi no laikim—tasol mi jas ekseptim.
Mi no save amamas long harim tok nogut—mi ting em samting nogut tru.
Hamas taim yu save tok nogut?
Nogat tru
Sampela taim
Planti taim
Yu ting pasin bilong tok nogut em i wanpela bikpela hevi?
Nogat
Yes
Wai na em i bikpela samting
Yu ting pasin bilong tok nogut em i samting nogut tru? Ating yu tok, ‘Mi no ting olsem. I gat ol bikpela hevi tru bilong graun bilong wari long en. Na olgeta man i save tok nogut!’ Yu ting dispela i tru?
Tasol tru tru i gat planti man long graun i no laikim pasin bilong tok nogut. Na i gat ol gutpela risen na ol i no save tok nogut. Olsem:
Taim yu tok nogut yu soim ol narapela yu wanem kain man. Toktok bilong yu i kamapim klia samting i stap long bel bilong yu. So taim yu mekim tok nogut, yu kamapim olsem yu no tingim filings bilong ol narapela. Tru tru yu dispela kain man?
Baibel i tok: “Ol samting i kamaut long maus i save kam long tingting bilong bel.”—Matyu 15:18.
Sampela tineja i no amamas na surik bek long wanpela tineja boi i tok nogut
Pasin bilong tok nogut inap kirapim ol narapela long kisim tingting kranki long yu. Buk Cuss Control i tok: “Wei bilong yumi long toktok inap makim wanem kain ol man bai stap pren bilong yumi, ol famili na wanwok bai rispektim yumi o nogat, yumi bai kisim wok o bikpela namba long wok o nogat, na ol man yumi no save long ol bai ting olsem wanem long yumi.” Na dispela buk i tok moa: “Askim yu yet olsem sapos yu no save tok nogut, pasin pren bilong yu wantaim ol narapela inap kamap gutpela moa o nogat.”
Baibel i tok: “Yupela i mas rausim . . . tok nogut.”—Efesus 4:31.
Man inap ting taim em i tok nogut em i smat moa, tasol nogat tru. Long buk How Rude! em Dr. Alex Packer i raitim, em i tok: “Ol man i save tok nogut long olgeta taim, ol i mekim ol narapela i les long harim ol.” Em i tok olsem man i save tok nogut olgeta taim, “em i no inap mekim ol gutpela tok, tok i gat save savetingting, o kamapim pasin laikim, nogat. Sapos yu save tok nogut long olgeta taim, dispela i no mekim yu smat moa.”
Baibel i tok: “Ol stingpela tok i no ken kamaut long maus bilong yupela, nogat.”—Efesus 4:29.
Samting yu ken mekim
Putim wanpela mak. Insait long wanpela mun traim long stop long mekim tok nogut. Raitim long wanpela sat o kalenda na long olgeta de sekim sapos yu winim mak long dispela de. Olsem:
Sakim ol amamas we i pulap long ol tok nogut. Baibel i tok: “Ol poroman nogut i save bagarapim ol gutpela pasin bilong man.” (1 Korin 15:33) Dispela tok “ol poroman” i makim ol man, na tu, i makim ol amamas—ol muvi yu watsim, ol vidio gem yu pilaim, na ol musik yu harim. Kenneth i gat 17 krismas, i tok: “Em isi long singsing bihainim wanpela song yu laikim na yu no tingim olsem dispela song i gat tok nogut long en—bikos em i gat gutpela bit.”
Soim olsem yu bikpela man pinis long tingting. Sampela i tok nogut bikos ol i ting dispela kain tok i mekim ol i luk olsem ol i bikpela man. Tasol dispela em i no tru. Baibel i tok ol man i bikpela pinis ol “i bin yusim save bilong ol planti taim long skelim ol samting na long dispela rot ol i lainim gut tingting bilong ol long kliagut long wanem samting i stret na wanem samting i no stret.” (Hibru 5:14) Ol i no yusim tok nogut bikos ol i ting ol narapela bai rispektim ol, nogat.
Tru tru, tok nogut (i olsem smok nogut i bagarapim win) i save bagarapim tingting bilong man na em i tingting long ol pasin i doti. Planti man i save tingting long ol samting i doti! So buk Cuss Control i tok: “Yu tu no ken insait long pasin bilong tok nogut. Taim yu toktok wantaim ol narapela, yusim ol gutpela na klinpela tok. Taim yu mekim olsem yu bai amamas, na ol narapela tu bai amamas long yu.”