ASKIM BILONG OL YANGPELA
Olsem Wanem Sapos Pren i Mekim Mi Bel Hevi?
Samting yu mas save
Olgeta pasin pren i stap namel long ol manmeri i save bungim hevi. Yumi gat sin, olsem na gutpela pren—maski wanpela yu tingim olsem bes pren bilong yu—inap mekim tok o pasin we i mekim yu bel hevi. Em tru, olsem yu tu i gat sin. So yu inap tingim wanpela taim yu mekim samting we narapela i bel hevi long en?—Jems 3:2.
Em isi long bel hevi long rot bilong intanet. Olsem, wanpela tineja em David, i tok: “Taim yu stap onlain na yu lukim ol piksa bilong pren bilong yu i stap long wanpela bung, yu inap tingting olsem wai na ol i no bin singautim mi. Na yu kirap long pilim olsem em i no tingim yu na yu bel hevi.”
Yu ken lain long stori long hevi i kamap.
Samting yu ken mekim
Skelim yu yet. Baibel i tok: “No ken kirap kwik long bel hevi long samting narapela i mekim long yu, bikos dispela em i mak bilong wanpela longlong man.”—Eklisiastis 7:9, futnot.
“Sampela taim bihain, yu luksave olsem samting yu bel hevi long en i no bikpela samting.”—Alyssa.
Samting bilong tingim: Yu save hariap long bel hevi? Yu redi long daunim bel hevi long pasin kranki bilong ol narapela?—Eklisiastis 7:21, 22.
Tingim ol gutpela samting i kamap long pasin bilong fogivim rong. Baibel i tok: “Taim [man] i no tingim rong narapela i mekim long em, em i mekim gutpela pasin tru.”—Provep 19:11.
“Maski sapos wanpela i rongim yu, em gutpela long lusim popaia bilong em, na dispela i makim olsem yu no ken tokim em gen olsem em i rongim yu na em i mas tok sori long dispela. Taim yu fogivim em, yu no ken kamapim gen.”—Mallory.
Samting bilong tingim: Popaia em i mekim i bikpela samting? Yu fogivim em bikos yu laik bai i gat bel isi?—Kolosi 3:13.
Olgeta taim yu kamapim hevi namel long yu na pren bilong yu, i olsem yu wok long opim dua long kol win long kam insait long rum we i hat pinis
Tingim narapela man. Baibel i tok: “Yupela i no ken tingim laik bilong yupela yet tasol, nogat, yupela i mas tingim tu laik bilong ol arapela.”—Filipai 2:4.
“Taim i gat pasin laikim na rispek namel long yupela, bai yu hariap long stretim hevi bikos yu bin wok strong long dispela pasin pren bai stap. Yu bin mekim pinis samting long strongim dispela pasin pren, na yu no laik bai dispela pasin pren i pinis.”—Nicole.
Samting bilong tingim: Yu luksave long sampela gutpela tingting long taim narapela i kamapim tingting bilong em?—Filipai 2:3.
Poin em olsem: Save long karim hevi bilong bel hevi em wanpela samting we bai helpim yu long taim yu go bikpela. Wai na yu mas kisim dispela pasin long nau?