ASKIM BILONG OL YANGPELA
Hau Bai Baibel Inap Helpim Mi?—Hap 2: Enjoim Baibel Ritim
Wanpela tineja nem bilong em Will i tok: “Yu inap pilim olsem Baibel ritim em boring, sapos yu no mekim sampela samting em yu mas mekim.”
Yu laik kisim save long sampela rot bilong hau yu ken enjoim Baibel ritim? Dispela atikol bai helpim yu.
Piksaim ol stori i stap long Baibel
Mekim ol dispela samting taim yu rit. Yu ken mekim olsem:
Makim wanpela stori long Baibel em yu laik stadi long en. Yu ken makim wanpela bikpela samting i kamap we Baibel i stori long en o wanpela stori i stap long 4-pela Gutnius, o yu ken makim wanpela bilong ol rekodim bilong Baibel ritim i stap long jw.org/tpi.
Ritim dispela stori. Yu wanpela i ken ritim, o yu ken ritim wantaim ol pren na famili bilong yu. Wanpela i ken ritim hap bilong man husat i raitim stori, na ol narapela i ken ritim hap bilong ol wan wan man insait long stori.
Traim wanpela o sampela bilong ol dispela rot:
Droim ol piksa i kamapim ol samting insait dispela stori. O yu ken wokim storibot—yu ken droim ol piksa bilong dispela stori long ol samting i kamap paslain na i kamap bihain. Yu ken raitim ol sotpela tok klostu long ol wan wan piksa we i stori long ol samting i kamap long ol dispela piksa.
Taim yu ritim stori bilong wanpela bilipman long Baibel, raitim ol pasin bilong em na ol samting em i mekim na ol blesing em i kisim.
Mekim dispela stori i kamap olsem wanpela nius. Kamapim toktok wan wan man insait long stori bai mekim long samting i kamap. Ol pren na famili bilong yu i ken i stap olsem ol ekta i makim ol manmeri insait long stori na yu ken mekim intaviu long ol.
Sapos wanpela insait long stori i wokim wanpela kranki disisen, traim piksaim long tingting wanem samting inap kamap sapos em i bin wokim gutpela disisen. Olsem, tingim stori bilong Pita i tok em i no save long Jisas. (Mak 14:66-72) Olsem wanem sapos Pita i bin tok em i save long Jisas?
Sapos yu inap, yu ken raitim wanpela Baibel drama. Raitim tu ol lesen yu inap lainim long dispela stori.—Rom 15:4.
Taim yu ritim Baibel, piksaim ol samting i kamap!
Mekim wok painimaut!
Sapos yu skelim gut ol samting insait long stori yu ritim, yu inap painimaut ol gutpela poin. Sampela taim wanpela o tupela wed insait long stori bilong Baibel inap skulim yu long wanpela bikpela samting.
Olsem, skelim Matyu 28:7 na Mak 16:7.
Wai na long stori bilong Mak em i tok klostu nau Jisas bai go lukim ol disaipel “na Pita”?
Givim tingting: Mak i no lukim ol samting i bin kamap; i luk olsem Pita i tokim em long ol dispela samting.
Ol gutpela poin: Taim Pita i harim olsem Jisas i laik lukim em gen, wai na dispela i mekim gut bel bilong em? (Mak 14:66-72) Hau na Jisas i kamapim klia olsem em i gutpela pren bilong Pita? Hau yu ken bihainim pasin bilong Jisas na stap gutpela pren bilong ol arapela?
Taim yu ritim Baibel na piksaim ol samting i kamap na mekim wok painimaut long ol samting insait long ol stori, yu bai enjoim Baibel ritim!