Askim
Jehova i toktok long husat taim em i tok “yumi,” long Stat 3:22?
Yumi ken ting God Jehova i bin tok long em yet na Pikinini bilong em taim em i tok: “Man i save pinis long wanem samting i gutpela na wanem samting i nogut, na em i kamap wankain olsem yumi.” (Stat 3:22) Yumi ken skelim as na yumi ting olsem.
Jehova i bin mekim dispela tok taim em i kolim pinis strafe bilong namba wan man na meri. Sampela i ting dispela tok i makim man i gat bikpela namba, olsem wanpela king bilong graun i save tok, “Mipela i no amamas,” tasol em i tok long em wanpela tasol. Tasol long tok i stap long Stat 1:26 na 3:22, saveman bilong Baibel, em Donald E. Gowan, em i tok: “I no gat wanpela tok long Olpela Testamen i helpim ol tok ol man i mekim long dispela tok ‘mipela’ bilong makim man i holim wok king, o taim man i mas skelim gut wanpela samting na em i tok ‘mipela,’ o bilong makim olsem i gat tupela o tripela man insait long wanpela God. . . . I no gat wanpela bilong ol dispela tok i kamapim stret insait bilong dispela tok ‘yumi’ long Stat 3:22.”
Yu ting Jehova i bin toktok long Satan, em i bin kisim tingting olsem em yet i ken skelim “wanem samting i gutpela na wanem samting i nogut” na em i bin pulim namba wan man na meri long mekim olsem? Yumi no inap ting olsem. Long dispela ves Jehova i bin mekim dispela tok, “yumi.” Satan i no insait moa long ol lain gutpela ensel bilong Jehova, olsem na Jehova i no inap bungim em wantaim ol lain i stap long sait bilong Jehova.
Ating God i toktok long ol gutpela ensel? Yumi no ken tok yes o nogat. Tasol dispela tok “yumi” i stap long Stat 1:26 na 3:22, na dispela i givim sampela tingting long yumi. Long Stat 1:26 Jehova i tok: “Nau yumi wokim ol manmeri bai ol i kamap olsem yumi yet.” Em i bin givim dispela tok long husat? Aposel Pol i stori long dispela spirit em i bin kamap man i nambawan olgeta, em Jisas, na Pol i tok: “Em i piksa tru bilong dispela God yumi no inap lukim, na God i bin wokim em paslain long olgeta narapela samting; long wanem, long rot bilong em olgeta narapela samting i bin kamap long heven na long graun.” (Kolosi 1:15, 16, NW ) Tru tumas, i stret yumi ken ting olsem long Stat 1:26, Jehova i toktok wantaim Pikinini bilong em, em “saveman i bosim wok” na em i bin stap wantaim Jehova taim Jehova i wokim heven na graun. (Sindaun 8:22-31) Na dispela tok “yumi” i kamap gen long Stat 3:22, na dispela i makim olsem Jehova i toktok gen wantaim Pikinini bilong em, em husat i stap klostu tru long Em.
Yumi ken ting Pikinini bilong God i gat save long “wanem samting i gutpela na wanem samting i nogut.” Em i bin stap longpela taim tru wantaim Jehova na i stap klostu tru long em, na em i bin lain gut long tingting, na ol stiatok, na ol lo bilong Papa bilong em. Jehova i save tru olsem Pikinini bilong em i gat save long ol dispela lo na em i bihainim gut, olsem na ating Jehova i bin larim em i mekim sampela wok long save bilong em yet na em i no gat wok long askim Jehova long olgeta taim. Olsem na Pikinini inap skelim wanem samting i gutpela na wanem samting i nogut, na em i bin kisim namba long mekim olsem. Tasol em yet i no bin putim lo bilong makim wanem samting i gutpela na wanem samting i nogut na i pait wantaim lo bilong Jehova, olsem Satan na Adam na Iv i bin mekim, nogat.