Wanem Samting i Mekim Ol Manmeri i Stap Amamas?
Inap 20 yia wanpela lain saveman i stap long olgeta hap bilong graun, ol i wok long kisim save long pasin bilong i stap amamas. Ol i kisim save long wanem samting? Nius Scientific American i tok: “I luk olsem sindaun bilong man na ol samting bilong skin i no save kamapim amamas.”
Dispela nius bilong saiens i tok moa olsem: “Planti mani kago i no kamapim amamas. Taim sindaun bilong ol manmeri i bin kamap gutpela moa na ol i gat planti gutpela samting bilong skin, dispela i no mekim na ol i amamas moa winim bilong bipo. . . . Long planti kantri taim ol man i kisim bikpela pe long wok mani, dispela i kamapim liklik amamas tasol.”
Save ol i kisim i soim olsem, i gat 4-pela samting i makim man i amamas: Ol i laikim ol yet na ol i ting ol i gutpela man, na ol inap bosim laip bilong ol yet, na ol i gat gutpela tingting long ol samting, na ol i save tingim ol narapela man. Na tu, sapos marit i stap gut na man i gat ol gutpela pren, dispela i kamapim amamas, na dispela i mekim na man i no sik tumas na i ken stap longpela taim moa.
Nius Scientific American i tok: “Ol manmeri i save givim bel long lotu, ol i amamas moa. Wanpela lain (Gallup) i bin mekim ol askim long ol man i kisim save olsem, ol man i givim bel long lotu ol i amamas tru, winim ol man i no save tingim tumas lotu. Narapela lain i skelim 166,000 manmeri long 14 kantri, na ol i kisim save olsem, amamas na bel isi i kamap bikpela moa taim man i bung wantaim ol wanlotu na go long lotu long olgeta taim.”
Long bipo tru man bilong raitim Song, em Devit, em i kamapim klia olsem taim man i lotu long God Jehova wantaim ol narapela wanlotu, dispela i kamapim amamas. Em i tok: “Ol i tokim mi olsem, ‘Goan, yumi go long haus bilong Bikpela.’ Ol i tok olsem na mi belgut tru.”—Song 122:1.
Olsem na aposel Pol i tokim ol Kristen: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim”! (Hibru 10:24, 25) Tru tumas, pasin bilong bung wantaim ol wanbilip i kamapim bikpela amamas long ol manmeri i laikim tok i tru bilong Baibel. Planti milion Witnes Bilong Jehova i pilim pinis dispela samting na ol i singautim yu tu long kisim dispela amamas taim yu bung wantaim ol long Haus Kingdom i stap klostu long hap bilong yu.