Yu Larim Nambawan Tisa Bilong Yumi i Skulim Yu?

JULIO i tok: “Mi skul 5-pela yia long wanpela gutpela yunivesiti long Spen bilong kamap loya, tasol save mi kisim long taim mi kirap stadi long Baibel i win tru. Yunivesiti i lainim mi long pasin bilong stadi; Baibel i lainim mi long pasin bilong wokabaut.”

Long rot bilong Baibel yumi inap kisim save long tingting bilong God na ol lo na tok bilong em. Baibel i kolim God Jehova olsem Nambawan Tisa; em i skulim gut yumi, winim olgeta narapela. (Aisaia 30:20) Long tok Hibru, dispela tok “Nambawan Tisa” i olsem “ol tisa”; dispela i makim em i nambawan tisa tru. Tru tumas, Jehova i winim olgeta narapela tisa na sapos yumi larim em i skulim yumi, bai yumi kisim gutpela save tru.

Gutpela Tingting i Kam Long Jehova

Olsem wanem na ol tok God i skulim yumi long en inap helpim yumi tru? Long wanem, em ol gutpela tok i givim “gutpela tingting” long yumi. Na gutpela tingting i kam long God em i “givim laip” long ol man i save bihainim.​—⁠Sindaun 3:​21, 22; Saveman 7:12.

Man bilong raitim Song 119 em i save, gutpela tingting Jehova i givim long em i bin lukautim em. Em i tok: “Mi no save laikim mani olsem mi laikim lo bilong yu. Mi no ken lusim ol lo bilong yu, long wanem, mi bihainim ol na yu mekim mi i stap laip. Lo bilong yu . . . i givim planti save long mi. Na dispela i mekim mi saveman tru na mi winim save bilong ol birua bilong mi. Oltaim mi save tingting long tok tru bilong yu, olsem na mi kisim gutpela tingting tru, na mi winim ol tisa bilong mi.”​—⁠Song 119:​72, 93, 98, 99.

Ol narapela tu i save, taim ol i bihainim lo bilong Jehova, dispela i lukautim ol na helpim ol long “i stap laip.” Wanpela yangpela meri bilong Spen, nem bilong em Rosa, em i bilip tru olsem. Em i tok: “Taim mi no winim yet 26 krismas, tupela taim mi bin traim kilim i dai skin bilong mi yet.”

Rosa i bin kamap pamukmeri, na em i save dring tumas na kisim ol drak. Em i tok: “Wanpela taim mi bel hevi tru na tupela Witnes, man wantaim meri bilong em, i toktok wantaim mi long olsem wanem Baibel inap helpim yumi long winim ol hevi bilong yumi. Mi kirap stadi long Baibel, na mi laikim tru ol tok mi lainim. Insait long wanpela mun mi kisim strong inap long mi senisim tru pasin bilong mi. Nau mi save, i gat as bilong i stap bilong mi, na mi no kisim dring o drak bilong helpim mi. Mi laik tru long kamap pren bilong Jehova, olsem na mi pasim tok strong long bel long mi mas bihainim ol lo bilong em. Mi save, sapos mi no bin kisim gutpela tingting long rot bilong Baibel, longtaim mi kilim i dai skin bilong mi.”

Tru tumas, gutpela tingting i kam long Jehova em inap helpim yumi long i stap laip. Ol tok bilong God na pasin bilong em long skulim ol wokboi bilong em i helpim ol tru. Krais Jisas, em Pikinini bilong God, i tok yumi mas skulim ol narapela man na kamapim ol disaipel, olsem na yumi laik lain long gutpela rot bilong mekim.​—⁠Matyu 28:​19, 20.

Jehova i Mekim Ol Tok Piksa

Gutnius Mak i raitim i tok, Jisas i “no autim klia wanpela tok long ol manmeri. Nogat. Em i save autim long tok piksa tasol.” (Mak 4:34) Em pasin bilong Jisas long autim tok, na yumi no kirap nogut. Em i bihainim pasin bilong Jehova long autim ol tok profet long lain Israel. Jehova i mekim ol gutpela tok piksa.​—⁠Aisaia 5:​1-7; Jeremaia 18:​1-11; Esekiel 15:​2-7; Hosea 11:​1-4.

Tingim gutpela tok piksa Jehova i mekim bilong makim olsem ol piksa o god giaman i no inap helpim yumi. Aisaia 44:​14-17 i tok: “Ol i save katim ol diwai sida . . . na painim ol gutpela diwai ok na . . . ol i save planim tu ol yangpela diwai pain . . . Ol i save katim ol dispela diwai na katim sampela hap olsem paiawut bilong hatim skin bilong ol, na . . . kukim bret long en. Na ol i save kisim wanpela hap . . . [na] sapim piksa bilong giaman god na ol i save lotu long en. Ol i save mekim dispela pasin long ol dispela diwai. Ol i save katim bilong wokim paia na kukim kaikai na . . . ol i save wokim ol giaman god bilong ol yet. Na ol i save brukim skru na lotu long ol. Na ol i save prea olsem, ‘Yu mas helpim mi, long wanem, yu god bilong mi.’ ” Kain tok piksa olsem em i strongpela samting bilong helpim ol man i gat gutpela bel, na bai ol i sakim pasin bilong lotuim piksa o god giaman, na sakim ol tok kranki bilong lotu.

Ol Askim i Kirapim Tingting

Baibel i stori tu long Jehova i bin kamapim ol askim bilong skulim na stretim tingting bilong sampela wokboi bilong em. Wanpela em Jop. Long pasin isi God i helpim Jop long save, nem bilong em yet i no bikpela samting; em i mas litimapim nem bilong God. Bilong helpim Jop olsem, em i givim sampela askim long Jop, em Jop i no gat save long bekim.

Em i askim Jop: “Taim mi wokim na strongim as bilong dispela graun, yu stap we? . . . Husat i bin pasim ol dua, na solwara i stap insait long mak bilong en? Jop, ating yu inap long bungim wanpela lain sta na pasim ol i stap wantaim long wanpela hap bilong skai, a? . . . Ating strong bilong yu i bikpela tru olsem strong bilong mi, a?” Ol dispela askim i daunim Jop, na God i givim bikpela askim long em, olsem: “Yu bin tok strong olsem, ol pasin bilong yu i stret. Tasol bilong wanem yu kotim mi, na tok mi save mekim pasin i no stret?”​—⁠Jop 38:​4, 8, 31; 40:​8, 9.

Ol dispela askim i kirapim tru tingting bilong Jop na em i save em i bin tok nating, olsem na em i sem na tanim bel. (Jop 42:⁠6) Yumi tu inap mekim ol gutpela askim bilong helpim ol pikinini bilong yumi o ol man yumi lainim ol long Baibel, na bai ol i stretim tingting bilong ol.

Lain Long Strongim Bel

Yumi ken mekim wanem bilong helpim man i pilim olsem em i nogut tasol na em i no inap mekim wok? Ol tok i kamap namel long Jehova na Moses inap helpim yumi. Taim God i givim wok long Moses bilong i go autim tok bilong em long king bilong Isip na ol Israel, Moses i pilim olsem em i no inap mekim dispela wok. Em i tok: “Maus bilong mi i hevi tumas, na mi no inap toktok gut.” Tasol God i tok: “Husat i save givim maus long ol manmeri? . . . Mi Bikpela tasol . . . Goan, yu go nau. Bai mi helpim yu long toktok na bai mi tokim yu long olgeta tok yu mas mekim.”​—⁠Kisim Bek 4:​10-12.

Jehova i makim brata bilong Moses, em Aron, bilong i stap maus bilong Moses, na tupela inapim wok bilong ol long Isip. (Kisim Bek 4:​14-16) Planti Witnes Bilong Jehova, taim ol i kirap pastaim long autim tok, ol i pilim olsem ol i no inap mekim, olsem Moses. Tasol yumi save, Jehova i bin sambai long Moses na em bai sambai long yumi, na bai yumi wok wantaim wanpela brata o sista i save pinis long mekim wok, na dispela inap helpim yumi long daunim pret. Moses i strongim bel na lain gut long autim tok; ol strongpela tok em i mekim i stap long buk Lo long Baibel. Jehova inap helpim yumi tu, na bai yumi lain long autim gut tok.

Samting Em i Lukim i Skulim Em

Yumi mas sori long ol man na laik tru long helpim ol, em bikpela samting. Profet Jona i sot long dispela pasin. Jehova i salim em i go toksave long ol manmeri long biktaun Ninive olsem bagarap i laik painim taun. Na olaman! Ol Ninive i bilipim tok na tanim bel. (Jona 3:⁠5) Olsem na Jehova i no bagarapim ol long dispela taim. Tasol Jona i no amamas; em i bel nogut, long wanem, ol samting bai no ken kamap olsem em i tok. Orait, Jehova i mekim wanem bilong helpim em long kisim stretpela tingting?

Jehova i mekim wok long wanpela bus rop bilong skulim Jona long pasin bilong sori. Jona i bin wokim liklik haus win ausait long taun na em i sindaun i stap. Orait Jehova i wokim mirakel na mekim rop i kamap wantu long nait, na rop i haitim Jona na bai san i no ken boinim em. Jona i “amamas tru long dispela rop.” Tasol Jehova i salim wanpela binatang i kam bagarapim rop na rop i drai. Bihain san na hatpela win i kukim Jona. Jona i belhat na i tok: “Mobeta mi dai.” (Jona 4:​5-8) Long dispela rop, Jehova i laik lainim em long wanem samting?

Jehova i tokim Jona: “Dispela rop i kamap bikpela long wanpela nait tasol, na long narapela nait em i dai. Yu no bin wok liklik long en, na yu no mekim em i kamap bikpela. Tasol yu sori long dispela liklik samting nating. Na mi tu mi mas sori tumas long Ninive. Em i bikpela taun na i gat planti manmeri, namba bilong ol i winim 120,000.”​—⁠Jona 4:​9-11.

Em nau, Jehova i skulim Jona long rot bilong samting em inap lukim! Jona i moa tingim rop​—⁠em i no tingim planti tausen manmeri! Tru, yumi mas lukautim ol samting Jehova i bin wokim, tasol bikpela wok bilong yumi em bilong helpim ol man long kisim laip.

Skulim Ol na No Ken Les

Olsem Jona, sampela taim yumi tu i hatwok long mekim tru wok bilong God. (2 Timoti 4:⁠5) Tasol sapos yumi no les kwik long ol man, dispela bai helpim yumi.

Taim yu skulim man long Baibel na em i no kisim kwik ol tok, o tingting bilong em i kranki, yu mekim wanem? Nambawan Tisa Jehova i soim rot long yumi bilong winim dispela hevi. Taim Abraham i givim planti askim long Jehova long bagarap i laik painim Sodom na Gomora, Jehova i no les. Abraham i tok: “Ating yu laik bagarapim ol gutpela man wantaim ol man nogut?” Na em i tok: “Sapos i gat 50 gutpela man i stap long dispela taun, bai yu bagarapim ol tu wantaim ol arapela? Inap yu tingim dispela 50 gutpela man na yu larim dispela taun i stap?” Jehova i tok, em bai mekim. Olsem na Abraham i askim gen askim gen inap long em i tok: “Sapos i gat 10-pela gutpela man tasol i stap, orait olsem wanem?” Jehova i save lain bilong Lot tasol i gutpela man, na em i wokim pinis rot bilong helpim ol, tasol em i no les long Abraham. Em i larim em i askim i go inap long em i pilim tru bikpela marimari bilong Jehova.​—⁠Stat 18:​20-32.

Jehova i isi long Abraham, long wanem, em i save Abraham i sot long sampela save na em i wari i stap. Yumi mas mekim wankain pasin long man yumi lainim em long Baibel, na bai yumi no les taim em i hatwok long kisim wanpela tok o long daunim wanpela pasin i pas strong long bel bilong em.

Oltaim Larim Jehova i Skulim Yu

God Jehova em i Nambawan Tisa. Em i save mekim ol tok piksa, na ol askim, na mekim wok long samting man inap lukim na wok isi long skulim ol man. Sapos yumi bihainim pasin bilong em long skulim ol man bai yumi kamap gutpela tisa.

Ol man i skulim ol narapela, ol i no ken les long skulim ol yet. Olsem na oltaim yumi mas larim Jehova i “skulim” yumi. (Aisaia 54:13) Aisaia i tok: “[God] yet bai i stap wantaim yupela na skulim yupela. . . . Na taim yupela i wokabaut na yupela i paul long wanem rot yupela i mas bihainim, rot bilong han sut o rot bilong han kais, orait em bai i stap baksait long yupela na em bai i tokim yupela long rot yupela i mas bihainim.” (Aisaia 30:​20, 21) Sapos yumi wok long bihainim rot Jehova i makim na yumi helpim ol narapela long mekim olsem, orait bai Nambawan Tisa inap skulim yumi i go long olgeta taim bihain.

[Piksa long pes 28]

Jehova i tokim Jop: “Ating yu yet yu save tok na ol tarangau i save flai i go antap long maunten na wokim ol haus bilong ol, laka?”

[Piksa long pes 28]

Long rot bilong wanpela bus rop, Jehova i lainim Jona long sori long ol man