Klostu Nau Bai i No Gat Pait Moa
LUKIM gen dispela tok profet bilong Aisaia i tok: “Bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.” Taim yu skelim ol ves klostu yu inap save, ol man i paitim bainat bilong ol i kamap olsem ain bilong brukim graun, ol i planti manmeri na ol i wokabaut long rot bilong God. (Aisaia 2:2-4) Olsem na dispela lain manmeri i save lotuim God Jehova na bihainim ol lo bilong em. Ol i husat?
Ol i bilong olgeta lain manmeri. Na ol i no bin givim baksait tasol long ol samting bilong pait, nogat; ol i bin wok long rausim tru long tingting na bel bilong ol, ol laik na tingting nogut i as bilong kros na pait. (Rom 12:2) Ol i no kilim ol narapela man, ol i laikim tru ol. (Matyu 22:36-39) Olsem wanem? Yu save long wanpela lain olsem?
Ating yu bin harim olsem ol Witnes Bilong Jehova i amamas long stap olsem wanpela lain brata bilong olgeta hap, na ol i sakim pinis ol samting bilong pait. Tingim: Sapos olgeta man i gat dispela tingting, gutaim na gutpela sindaun i pulap long graun, a?
Tasol i no olgeta man i gat dispela tingting. I olsem King Solomon i bin tok inap 3,000 yia i go pinis: “Mi tingting gen long olkain pasin i no stret, ol manmeri bilong graun i save mekim. Ol man nogut i save daunim planti manmeri, na ol dispela manmeri i krai nogut tru. Tasol i no gat man bilong helpim ol.”—Saveman 4:1.
Singautim Ol Man i Laikim Tumas Bel Isi
Yumi ken bilip olsem bihain bai i no gat pait moa long graun? Yes, yumi ken bilip olsem. Olsem wanem? Ol man bai mekim i dai ol pait? Nogat. Ol pait bai pinis, long wanem, olgeta man bai tanim bel? Nogat. Baibel i tok: “Kaman! Yupela lukim wok Bikpela [Jehova] i mekim. . . . Em i save mekim i dai pait long olgeta hap graun.”—Song 46:8, 9.
God Jehova bai mekim olsem wanem? Buk Sindaun i tok: “Ol gutpela stretpela man bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em. Em bai i kamautim ol, olsem man i kamautim kaikai long gaden bilong en.”—Sindaun 2:21, 22.
Nambawan as na God i no bin mekim wanpela samting inap long nau em olsem: Em i laik ol man i ken kisim save long laik bilong em na wokabaut long rot em yet i makim. Aposel Pita i tok: “Bikpela i no save wok isi isi long kamapim samting em i bin promis long mekim, olsem sampela man i save tok. Nogat. Tasol em i no laik bai wanpela man i lus. Em i laik bai olgeta man i mas tanim bel.” (2 Pita 3:9) Olsem na lain bilong God i no tingim ol yet, nogat; ol i save helpim ol narapela man long save long Jehova. Olsem Aisaia i tok, ol i save singaut: “Kam, yumi go long maunten Saion, em maunten bilong Bikpela . . . bilong em i ken skulim yumi long ol pasin em i laik yumi mekim.”—Aisaia 2:3.
Taim Bilong Las De
Aisaia i mekim tok profet moa olsem, God bai skulim ol man long ol pasin bilong kamapim gutaim long “wanpela taim bai i kamap bihain.” (Aisaia 2:2) Yumi stap long dispela taim nau. Ol pait i bin kamap long taim bilong yumi i makim dispela samting.
Taim ol disaipel bilong Jisas i askim em, wanem samting bai makim olsem em taim bilong las de, Jisas i tok, ‘ol bikpela bikpela guria na bikpela hangre na bikpela sik bai i kamap.’ (Luk 21:11; Matyu 24:3) Na em i tok: “ ‘Taim yupela i harim tok long ol kantri i mekim bikpela pait, orait yupela i no ken pret na guria. Ol dispela samting i mas kamap pastaim, tasol las de bai i no inap kamap kwiktaim.’ Na em i tokim ol moa olsem, ‘Ol man bilong sampela lain bai i kirapim pait long ol narapela narapela lain. Na ol lain bilong sampela king bai i kirapim pait long ol lain bilong ol narapela narapela king.’ ”—Luk 21:9, 10.
Tru, inap planti tausen yia ol pait i bin kamap, tasol kirap long yia 1900 i kam inap nau, tupela bikpela pait i bin kamap na planti handet pait moa. Ol pait i bin kilim i dai planti milion manmeri, em samting nogut tru. Nius World Watch i tok, insait long 2,000 yia paslain long yia 1900, inap 50 yia i bin lus na wan milion manmeri i bin i dai long pait. Kirap long yia 1900 i kam inap nau, wanpela yia tasol i lus na wan milion manmeri i dai long ol pait.
Taim i No Gat Pait Moa
Kirap long yia 1900 i kam inap nau, ol pait nogut tru na planti samting moa em Baibel i tok profet long en, i makim olsem yumi stap klostu pinis long nupela taim God bai kamapim. Olpela pasin bilong nau bai pinis, na “nupela graun” i gat bel isi na stretpela pasin long en bai kamap. (2 Pita 3:13) Baibel i tok: “Ol man nogut bai i bagarap olgeta. Tasol ol manmeri i bilip na wetim Bikpela . . . bai ol i stap gut long graun bilong ol. Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”—Song 37:9, 11.
Long olgeta hap long nau, planti milion man i laik bai i no gat pait moa long graun. Bilong makim olsem God bai truim tok promis bilong em long kamapim kain taim olsem, wanpela profet bilong God bilong bipo em i tok: “Taim bilong ol dispela samting i mas kamap, em i no yet. . . . Tasol i no longtaim na . . . em bai i kamap. Yu ting bai em i no inap kamap kwik, tasol yu mas wet liklik na em bai i kamap.”—Habakuk 2:3.
Olsem na yu mas bihainim savepasin na bilip tru long God, na bai yu ken amamas na lukim truim bilong tok promis bilong em olsem: “God yet bai i stap wantaim [lain bilong em]. . . . Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:3, 4.
[Blok/Ol Piksa long pes 9, 10]
Ol Samting Baibel i Tok Promis Bai Kamap Long Nupela Taim:
No Gat Pasin Raskol, Kros Pait, o Pasin Nogut
“[God] i save mekim i dai pait long olgeta hap graun.”—Song 46:9.
“Ol man nogut bai i bagarap olgeta. . . . I no longtaim na bai ol man nogut i lus olgeta.”—Song 37:9, 10.
Olgeta Man i Stap Bel Isi
“Wanpela pikinini man i kamap pinis long yumi, em wanpela pikinini God i givim long yumi. Em bai i stap king bilong yumi, na em bai i gat . . . nem, . . . ‘King bilong kamapim gutpela sindaun na bel isi.’ . . . Bai i no gat pait na ol manmeri bai i sindaun gut oltaim.”—Aisaia 9:6, 7.
Graun Olgeta i Kamap Paradais
Jisas i tok: “Mi tok tru long yu nau, bai yu stap wantaim mi long Paradais.”—Luk 23:43, NW.
“Ol stretpela man bai i kisim graun God i givim ol, na bai ol i stap oltaim long en.”—Song 37:29.
Ol Gutpela Lain Brata Bilong Olgeta Hap
“God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.”—Aposel 10:34, 35.
Ol Man Yumi Laikim Tumas Bai Kirap Bek
“Taim i laik kamap na olgeta manmeri i stap long matmat ol bai i harim maus bilong Pikinini [Jisas], na ol bai i lusim matmat na i kam ausait.”—Jon 5:28, 29.
No Gat Sik, Lapun, o Indai
“Em bai i mekim drai wara i stap long ai bilong olgeta . . . Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:4.