Ol Inap Katim Marit

‘Sapos poroman marit bilong yu em i dai, ol narapela man bai pilim hevi bilong yu, maski yu no bin stap olsem gutpela poroman tru. Tasol sapos man bilong yu i lusim yu, orait, sampela i ting yu no bin givim bel long stap olsem gutpela meri marit. Plis, plis, HELPIM MI!’​—⁠Em tok bilong wanpela meri i save ritim Kirap! long Saut Afrika.

PASIN bilong bagarapim marit na katim marit inap givim bikpela hevi long ol marit. Maski i gat as na sampela meri ol inap kamap wanbel gen wantaim poroman marit bilong ol na ol i no katim marit, tasol i gat gutpela as na sampela ol i laik katim marit, em God i orait long ol i mekim olsem taim poroman i bagarapim marit. (Matyu 5:​32; 19:⁠9) Olsem: Man inap putim hevi long meri pikinini na ol i no inap i stap gut, na ol inap bagarap long ol samting bilong spirit na skin. Na meri inap tingting planti, nogut man bilong em i givim sik bilong pamuk long em. O ating em i lusim rong bilong man bilong em i bin mekim pasin pamuk, tasol i no gat as tru na em inap ting olsem em i ken bilip gen long em, na i stap wantaim em olsem meri marit bilong em.

Wanpela meri marit i bel hevi tru, em i tok: ‘Mi hatwok tru long pasim tok long katim marit, winim olgeta narapela samting mi bin pasim tok long mekim.’ Em nau, i hatwok tru long pasim tok long katim marit, long wanem, taim man i no stap gut long meri bilong em dispela i bagarapim tru bel bilong meri. Tasol i no dispela samting tasol, nogat; pasin bilong katim marit i mekim na inap longpela taim meri bai karim hevi long dispela samting. Olsem na meri marit i laik katim marit bilong em o nogat, em samting bilong em yet. Baibel i orait long poroman i no gat asua em i mekim olsem, olsem na ol narapela i no ken skelim samting em i pasim tok long mekim.

Tasol sori tru, planti manmeri ol i katim marit hariap na ol i no tingting gut pastaim. (Skelim wantaim Luk 14:28.) Wanem ol samting bai kamap sapos ol marit i katim marit?

Sapos Yupela i Gat Ol Pikinini

Buk Couples in Crisis i tok: ‘Planti papamama i lusim tingting o ol i no tingim ol samting pikinini bilong ol i mas kisim, long wanem, ol i tingim ol hevi bilong ol yet tasol.’ Olsem na taim yu tingting long katim marit, tingim i stap bilong ol pikinini long ol samting bilong spirit na skin. Planti saveman i tok, taim ol marit i katim marit long gutpela pasin, ol pikinini i no ken karim bikpela hevi tumas. Na maski bikpela hevi i stap namel long tupela marit, pasin isi bai helpim man na em i no ken tok pait na tok kros. Nogat. Em bai mekim gutpela pasin na daunim belhat bilong em.​—⁠2 Timoti 2:​24, 25.a

Sapos meri i laik katim marit, em i mas tingim dispela samting: Em na man bilong em ol i katim marit​—⁠ol pikinini, nogat. Ol pikinini i mas i gat yet mama na papa. Tru, ating sampela taim papa o mama inap mekim nogut long pikinini. Tasol sapos papamama i no wanbel long lotu o long ol narapela samting, ol i no ken mekim wok long dispela samting bilong pasim pikinini long bung wantaim papa o mama.

Na tu, ol papamama i mas tingim bel bilong ol yangpela pikinini olsem bel i save bagarap hariap, na ol i gat laik long man i mekim gut bel bilong ol, na sori yet long ol. Wanpela buk i tok: ‘Dispela pasin bilong papamama long sori long ol pikinini, em bai helpim ol pikinini long karim hevi bilong nupela sindaun bilong ol.’ Na taim papamama i helpim ol long olgeta de long kisim ol samting bilong spirit, dispela tu bai helpim ol pikinini long i stap gut.​—⁠Lo 6:​6, 7; Matyu 4:⁠4.

Ol Samting Bilong Mani na Kot

Taim man na meri i katim marit, dispela i mekim na ol i lus long sampela mani, na kago, na sampela gutpela samting bilong skin, na ating haus bilong ol tu, em ol i laikim tru. Ating man o meri i mas tromoi bikpela mani moa bilong baim ol samting na em i kisim pe bilong wanpela man tasol, olsem na em i bihainim savepasin sapos em i skelim gut mani na baim tasol ol samting em i mas kisim. Em i mas wok long abrusim pasin bilong baim ol samting o kisim dinau bilong kisim ol samting bilong mekim gut bel bilong em.

Sapos meri i pasim tok long katim marit, em i mas stretim tok wantaim poroman bilong em long pasin bilong ol long mekim wok long akaun bilong tupela long beng. Olsem: Bilong pasim man long kisim nating mani long akaun bilong tupela, ating i gutpela long askim maneja bilong beng long putim lo olsem taim wanpela i laik kisim mani, tupela wantaim i mas sainim pepa, na ol i mas mekim olsem i go inap long taim man na meri i gat akaun bilong em yet.

Na tu, meri i bihainim gutpela tingting sapos em i raitim long pepa hamas kina em i save kisim, na hamas kina em i save tromoi bilong baim ol samting. Dispela bai helpim em long stretim tok long hamas kina man i mas givim long em na pikinini bilong lukautim ol taim em i no stap moa wantaim ol. Na long planti kantri, lo i tok ol man i mas toksave long ol man bilong kisim takis olsem senis i kamap long sindaun bilong ol.

Na planti manmeri i kisim helpim long wanpela loya samting i gat save long ol samting bilong katim marit. Long sampela kantri, lo i orait long wanpela namelman samting i helpim tupela marit long wok gut wantaim bilong stretim ol samting long rot em tupela wantaim i amamas long en, na bihain kot i orait long tok ol i pasim. Sapos ol i gat ol pikinini, planti marit i laik wanpela loya samting i helpim ol long stretim ol samting, long wanem, loya i no insait long hevi bilong ol. Taim ol papamama i katim marit, ol i no painim rot bilong kisim bikpela mani long en, na ol i laik abrusim pasin bilong tok pait na bagarapim bel bilong narapela na bilong ol pikinini. Sapos ol i wok long kisim ol samting bilong skin, dispela inap kamapim bikpela bel hevi tru na pinisim mani bilong ol tu.

Ol Pren i No Pas Gut Moa

Wanpela savemeri i tok: ‘Planti man i tingting kranki long ol pren bilong ol i bin katim marit, na ol i hatwok long pas gut wantaim ol.’ Maski i stret meri i no gat asua em i katim marit, na lo bilong gavman na Baibel tu i orait long en, ating i gat sampela man bai ting olsem em asua bilong meri na marit i bagarap. Ating sampela bai tok gude tasol long em na sampela i givim baksait long em. Na sampela i mekim pasin i nogut tru, ol i bel nogut long meri, em gutpela pren bilong ol long bipo.

Planti man i no save olsem man o meri i katim marit, ol i mas i gat man bilong strongim bel bilong em. Ol inap ting olsem sapos ol i salim wanpela liklik pas o kat dispela em inap. Buk Divorce and Separation i tok, i gat ol pren ‘i pilim tru hevi bilong yu, na ol bai kam lukim yu bilong kisim yu i go long wanpela hap sapos yu laik, o mekim wanpela wok bilong helpim yu o toktok wantaim yu sapos yu laik mekim olsem.’ Em nau, long kain taim olsem em i bikpela samting long man i gat gutpela “pren na tupela i pas gut,” olsem Baibel i tok.​—⁠Sindaun 18:⁠24.

Wok Long Winim Hevi

Inap 16 yia bihain long taim em i katim marit, wanpela mama i tok: “Sampela taim mi bel hevi yet long mi stap wanpis​—⁠maski mi stap wantaim ol narapela man.” Olsem wanem em i save karim dispela hevi? Em i tok: “Bilong dispela hevi i no ken daunim mi, mi save givim bel long wok, na lukautim pikinini man bilong mi, na lukautim haus. Mi kirap tu long i go long ol miting bilong ol Witnes Bilong Jehova, na mi autim bilip bilong mi long ol narapela man, na mi mekim ol samting bilong helpim ol narapela. Dispela i helpim mi tru.”

Sampela de na sampela taim bilong yia inap kirapim meri long tingim ol samting i bin bagarapim bel bilong em. Olsem: De pasin pamuk bilong poroman marit i bin kamap long ples klia, o de man i bin lusim haus, o de ol i bin kot long dispela samting. Na taim em i tingim ol samting bilong amamas em tupela i bin mekim wantaim, olsem taim ol i go malolo na taim ol i bin tingim de ol i marit long en, dispela tu inap bagarapim bel bilong em. Pat i tok: “Bilong karim hevi bilong ol dispela de, mi save stap wantaim famili bilong mi o wantaim ol gutpela pren em ol i save long hevi bilong mi. Mipela i mekim ol samting bambai mi no ken tingim ol samting bilong bipo na mipela i mekim ol nupela samting mi ken tingting long en long bihain. Tasol wanpela samting i bin helpim mi gut, em pasin bilong stap gut wantaim Jehova.”

No Ken Bel Hevi Olgeta

Ol poroman i no gat asua na ol i bihainim ol lo bilong Baibel, na ol i laik katim marit sapos lo bilong God i orait long en, i no gat as na bel bilong ol i kotim ol o ol i pret olsem Jehova i givim baksait long ol. God i no laik tru long pasin pamuk man i mekim, em dispela pasin i givim bikpela bel hevi long poroman i no gat asua. (Malakai 2:​13-​16) Jehova, em God bilong “marimari,” em tu i pilim pinis bel hevi i save kamap taim wanpela em i laikim em tru, em i lusim em. (Luk 1:​78; Jeremaia 3:1; 31:​31, 32) Olsem na, yu ken bilip olsem “God i laikim tumas stretpela pasin. Em i no inap larim ol manmeri bilong en i lus.”​—⁠Song 37:⁠28.

Tasol em i gutpela tru sapos pasin bilong bagarapim marit na ol samting nogut em i save kamapim i no bin kamap. Buk The Secret of Family Happinessb (tok Inglis), em i wanpela gutpela buk bilong stiaim famili, na i wok long helpim planti marit long olgeta hap long pas gut wantaim na long abrusim pasin bilong bagarapim marit. Long dispela buk i gat ol sapta i stori long wok bilong kamapim amamas insait long marit, na wok bilong skulim ol pikinini, na wok bilong karim ol hevi bilong marit. Ol Witnes Bilong Jehova i stap long hap bilong yu o lain i wokim dispela nius, ol bai amamas long givim sampela save moa long yu long dispela samting.

[Ol Futnot]

[Blok long pes 10]

OL PIKININI I MAS I GAT PAPA NA MAMA

Long 1988, Diana, Prinses Bilong Wels, em i dai pinis, em i tok, long olgeta de long Briten, papamama bilong 420 pikinini ol i katim marit. Long olgeta 3-pela 3-pela bilong ol dispela pikinini, wanpela i no winim 5-pela krismas. Sori tru, planti pikinini (40 pesen) ol i no bungim moa papa o mama bihain long papamama i katim marit.

Wanpela meri bilong raitim ol buk bilong ol dokta samting, em i tok, maski planti man i no ting olsem, tasol ‘wan wan pikinini tasol i amamas taim papamama i katim marit. Klostu olgeta pikinini i laik papamama bilong ol i stap wantaim, maski sindaun bilong famili i no gutpela.’ Na maski tupela marit i tok pait planti long taim pasin pamuk i kamap long ples klia, ol i no ken hariap na ting olsem sapos ol i katim marit dispela bai helpim ol pikinini long i stap gutpela. Sapos papamama i mekim sampela senis long tingting na pasin bilong ol, ating ol inap i stap wantaim na dispela bai helpim i stap bilong famili olgeta.

Wanpela meri bilong raitim buk, em Pamela Winfield, em i tok: ‘Ol man marit i save prenim ol narapela meri, ol i mas tingting long bel hevi ol pikinini i pilim taim famili i bruk, em pasin longlong bilong papa i as bilong en.’

[Blok long pes 11]

GOD I NOLAIK TRU LONG OLGETA PASIN BILONG KATIM MARIT?

Pat i tok: “Wanpela samting mi bin tingting planti long en i olsem: Jehova i ‘no laikim tru pasin bilong katim marit.’ Long olgeta taim mi tingting, ‘Jehova i orait long samting mi mekim?’ ”

Bilong bekim dispela askim, yumi ken skelim ol tok i stap klostu long Malakai 2:16. Long taim bilong Malakai planti man bilong Israel ol i katim marit bilong ol, ating ol i laik maritim ol yangpela meri haiden. God i no orait liklik long dispela pasin nogut bilong ol long bagarapim marit. (Malakai 2:​13-​16) Olsem na God i nolaik tru long man i rausim nating poroman marit bambai em i ken kisim narapela. Man i stretim rot bilong em i ken mekim pasin pamuk na bihain em i katim marit bilong em o em i ting meri bai katim marit, dispela man i mekim bikpela sin i nogut tru.

Tasol ol dispela ves bilong Baibel i no tok man i no ken katim marit. Tok bilong Jisas i strongim dispela, em i tok: “Sapos meri bilong wanpela man em i no bin mekim pasin pamuk, na man i rausim em na i maritim narapela meri, dispela man yet em i mekim pasin pamuk.” (Matyu 19:⁠9) Jisas i tok, Baibel i orait long man o meri i katim marit sapos poroman i mekim pasin pamuk​—⁠em nau, long dispela as tasol em i ken marit gen. Ating poroman i no gat asua em i laik lusim rong bilong poroman bilong em. Tasol meri i laik katim marit taim tok bilong Jisas i as bilong en, em i no mekim wanpela samting Jehova i nolaik tru long en, nogat. Samting God i nolaik tru long en, em pasin nogut man i mekim bilong bagarapim marit.

[Ol Piksa long pes 10]

Narapela man i ken helpim ol marit i no gat asua na ol pikinini bilong ol