Yu Tingim Yet?
Yu bin amamas long kaunim ol tok bilong ol nupela Wastaua? Sapos olsem, bai yu amamas long tingim gen ol tok i stap daunbilo:
◻ Wanem insait bilong tok Grik pa·rou·si’a olsem i stap long Matyu 24:3, 27, 37, 39?
Wanpela buk (Expository Dictionary of New Testament Words, bilong Vine) i tok: “PAROUSIA, . . . i makim olsem kamap pinis, na i stap.” Olsem na dispela tok i no makim taim stret man i kamap long wanpela hap na em tasol, nogat. Em i makim wanpela hap taim kirap long taim man i kamap pinis long dispela hap na i go moa long taim em i stap long dispela hap.—8/15, pes 11.
◻ Olsem wanem Jehova i bin ‘sotim taim’ na bai em i ken kisim bek sampela “manmeri” long taim bilong ol aposel, na bikpela truim bilong en bai kamap olsem wanem? (Matyu 24:22)
Long yia 66 C.E., wantu tasol ol Rom i lusim wok bilong ol long banisim Jerusalem, na rot i op long ol “manmeri” Kristen long ranawe. Yumi ken ting long wankain pasin God bai sotim taim bilong bikpela hevi taim ol lain politik i bagarapim Bikpela Babilon, bambai em i ken kisim bek ol Kristen spirit holi i makim wantaim ol poroman bilong ol na bai bagarap i no ken painim ol.—8/15, pes 18-20.
◻ Yumi ken ting olsem wanem sapos wanpela man o meri i kirap kisim bret na wain long Memorial o em i no kisim moa?
Yumi no ken tingting planti sapos wanpela man o meri i mekim olsem. Jisas i tok: “Mi yet mi gutpela wasman bilong ol sipsip. Mi save long ol sipsip bilong mi.” Na Jehova tu i save long ol manmeri em i bin makim ol olsem pikinini bilong em long spirit. (Jon 10:14; Rom 8:16, 17)—8/15, pes 31.
◻ Wanem nambawan bikpela wok bilong Lo Bilong Moses?
Em i skulim ol olsem ol i mas i gat Mesaia bilong kisim bek ol long dispela sin i stap long ol. (Galesia 3:24) Na Lo i skulim ol long pret long God na bihainim tok bilong em, na em i helpim lain Israel long i stap narapela kain long ol narapela lain i save bihainim ol pasin nogut. (Wok Pris 18:24, 25)—9/1, pes 9.
◻ Nupela kontrak i gat wanem wok bilong en? (Jeremaia 31:31-34)
Wok bilong en long kamapim wanpela lain king na pris bilong mekim gut long olgeta lain bilong graun. (Kisim Bek 19:6; 1 Pita 2:9; KTH 5:10)—9/1, pes 14, 15.
◻ Bilong wanem yumi mas lain long mekim tok sori?
Taim yumi tok sori, dispela inap daunim hevi em sin bilong yumi i save kamapim, na em inap stretim ol liklik kros samting i stap namel long yumi na narapela. Long olgeta taim yumi mekim tok sori, dispela i lainim yumi long mekim pasin daun, na em i lainim yumi tu long was gut, nogut yumi bagarapim bel bilong man.—9/15, pes 24.
◻ Olsem wanem? Bikpela Tait long olgeta hap long taim bilong Noa em i samting tru i bin kamap long bipo?
Yes. Long olgeta hap bilong graun, kirap long ol hap bilong Amerika i go inap long Ostrelia yumi inap painim ol stori bilong bipo long bikpela tait. Ol stori bilong olgeta hap bilong graun long bikpela tait i kamapim tru olsem Bikpela Tait i bin kamap long olgeta hap bilong graun olsem Baibel i stori long en. (Stat 7:11-20)—9/15, pes 25.
◻ Yumi mas mekim wanem bilong mekim gut long ol man? (Rom 12:13)
Dispela tok ‘lukautim gut ol man bilong narapela ples,’ ol i kisim long wanpela tok Grik, i gat tupela tok i as bilong en, na insait bilong tupela tok hia i olsem “laikim tru” na “ol man bilong narapela ples.” Olsem na dispela tok Grik i olsem “laikim tru ol man bilong narapela ples.” Tasol dispela pasin bilong mekim gut long ol narapela man, yumi no mekim bilong inapim wanpela lo, o yumi pilim olsem yumi gat wok long mekim olsem, nogat. Yumi mekim, long wanem, yumi laikim em tru na yumi laik stap pren bilong em.—10/1, pes 9.
◻ Long 1 Korin sapta 7, Pol i mekim wanem bikpela tok long pasin bilong marit na i stap singel?
Marit em samting i stret long mekim, na long sampela taim i gutpela sapos man i marit. Tasol sapos man o meri Kristen i laik mekim wok bilong Jehova na i no gat planti samting i pulim nabaut tingting bilong em, orait pasin bilong i stap singel i winim marit.—10/15, pes 13.
◻ Elda i mas “lukautim ol wanblut tru bilong em yet” olsem wanem? (1 Timoti 5:8)
Elda i mas ‘lukautim famili bilong em,’ em meri na ol pikinini bilong em long ol samting bilong skin, na spirit, na bilong bel i stap gutpela.—10/15, pes 22.
◻ Olsem wanem Jehova i save mekim gut bel bilong ol wokboi bilong em?
Spirit holi bilong God i mekim wok olsem “Helpim” bilong ol. (Jon 14:16) Narapela rot bilong God long mekim gut bel bilong yumi, em long Baibel. (Rom 15:4) God i save long ol hevi bilong yumi wan wan, na em inap mekim wok long rot bilong yumi long mekim gut bel bilong narapela narapela, olsem Taitus i bin mekim gut bel bilong Pol taim em i stori long Pol long ol Korin. (2 Korin 7:11-13)—11/1, pes 10, 12.
◻ Long 2 Korin 1:3 Pol i kolim Jehova olsem, “as bilong olgeta pasin marimari na pasin sori,” na dispela tok i makim wanem samting?
Pol i kolim wanpela tok Grik em yumi ken tanim olsem “ol pasin marimari na pasin sori.” Ol i kisim dispela tok Grik long wanpela tok ol i save mekim bilong kamapim sori bilong ol long wanpela man i karim bikpela pen na hevi. Long dispela pasin Pol i tokaut long bel sori bilong God, em i pilim tru ol pen na hevi i painim ol wokman bilong em ol i stap gut long em.—11/1, pes 13.
◻ Ol Israel i kamapim klia wanem samting taim ol i stap tambu long kaikai long Bikpela De Bilong God i Tekewe Sin Bilong Ol Manmeri? (Wok Pris 16:29-31; 23:27)
Taim ol Israel i stap tambu long kaikai, dispela i kirapim ol long tingim sin bilong ol na i mas i gat wanpela man bilong baim bek ol. Na ol i kamapim long God olsem ol i bel hevi long ol rong bilong ol na ol i tanim bel pinis.—11/15, pes 5.
◻ Baibel i tokim ol yangpela: ‘Yupela i mas tingim Man bilong wokim yumi.’ Wanem insait bilong dispela tok? (Saveman 12:1)
Wanpela saveman i stori long wanpela tok Hibru yumi tanim olsem “tingting” o “tingim,” na em i tok, planti taim dispela tok i makim olsem “tingting i laikim tumas wanpela samting o wanpela man, na taim em i tingim, em i kirap mekim wanpela samting.” Bilong bihainim dispela tok, i no olsem yumi tingting tasol long Jehova—yumi mas mekim ol samting em i laikim.—12/1, pes 16.