Yu Tingim?

Olsem wanem? Yu pilim ol tok bilong ol nupela Wastaua i bin helpim gut yu? Sapos olsem, orait yu ken traim ol save yu bin kisim long en, yu tingim yet o nogat:

▫ Sapos sampela tingting i no stret i kamap long bel bilong yumi, gutpela yumi mekim wanem samting?

Yumi mas kirap long tingim narapela samting, go wokabaut ausait, kaunim buk, o mekim wanpela wok long haus. Beten tu em i bikpela samting long kain taim olsem. (Song 62:⁠8)​—⁠4/15, pes 17.

▫ Bilong wanem ol yangpela i mas was gut long musik ol i laik harim?

Musik i gat strong long kirapim bel bilong man, na em inap stiaim tingting bilong em. Planti ol singsing i olsem tok bokis long maritpasin na tok hait bilong pamuk samting. Olsem na i bikpela samting yumi mas skelim gut wanem kain musik yumi laik harim.​—⁠4/15, pes 20-21.

▫ Wanem insait bilong dispela tok “taim Bikpela bilong yumi Jisas Krais em i kam bek”? (1 Tesalonaika 5:23)

Dispela tok i makim olsem Bikpela Krais Jisas i stap pinis long mekim wok king long heven, kirap long 1914. (Song 110:​1, 2)​—⁠5/1, pes 11.

▫ Bilong wanem Jehova i bin klinim haus lotu spirit bilong em? (Malakai 3:​1-4)

Jehova i laik bai dispela haus lotu i mas i stap klin, olsem na taim ol manmeri bilong i stap long graun i laik kam na lotuim Jehova, ol i ken i stap long gutpela ples em ol man i save daun long Jehova, na ol i save mekim gut nem holi bilong em, na ol i bihainim ol stretpela lo bilong em.​—⁠5/1, pes 16.

▫ Wanem dispela “olgeta samting” Krais Jisas i givim long dispela wokboi em i bin makim? (Matyu 24:​45-47)

Em olgeta wok samting bilong spirit hia long graun, em Krais i kisim taim em i kamap king long heven, na wanpela wok em bilong kamapim ol disaipel bilong em long olgeta lain man. (Matyu 28:​19, 20)​—⁠5/1, pes 17.

▫ Olsem wanem ol elda Kristen i ken ‘amamas’ long lukautim ol manmeri bilong God, olsem 1 Pita 5:2 i tok?

Sapos elda Kristen i tingim gut ol brata sista, em bai amamas long lukautim ol na wok aninit long Gutpela Wasman Krais Jisas. Em i mas larim Jehova i bosim em, na em i mas daun long oganaisesen bilong Jehova.​—⁠5/15, pes 20.

▫ Wanem insait bilong dispela tok bilong Jisas, sapos wanpela man i laik bihainim em, em i mas “daunim laik bilong em yet”? (Matyu 16:⁠24)

Insait bilong dispela tok yu mas ‘daunim laik bilong yu yet’ i olsem yu givim yu yet wantaim laip bilong yu i go long Jehova. (1 Korin 6:​19, 20) Em i olsem nau yumi stap bilong mekim laik bilong God, i no laik bilong yumi yet. (Rom 14:⁠8)​—⁠6/1, pes 9.

▫ Wanem samting bai mekim man i stap amamas?

Stap gut wantaim Jehova na mekim gut wok bilong em, dispela bai mekim man i stap amamas tru.​—⁠6/1, pes 22.

▫ Bilong wanem Jehova i no kros long Abraham i mekim planti toktok taim Em i laik bagarapim Sodom? (Stat 18:​22-32)

Wanpela as em i olsem, Abraham em i pren bilong God. (Jems 2:23) Na Jehova i save Abraham i bel hevi, long wanem, em i tingim Lot i stap long Sodom, em pikinini bilong brata bilong Abraham. Olsem na Jehova i amamas long bekim ol askim bilong Abraham long tingting bilong Em long bagarapim Sodom.​—⁠6/15, pes 16.

▫ Olsem wanem? Taim ol misin Talatala i kamap bihain long yia 1500, ol i kirap na bihainim gen lotu Kristen tru?

Nogat, ol i no mekim! Taim ol misin Talatala i kamap, dispela i no helpim ol misin long kirap bihainim stret ol lo na pasin bilong lotu Kristen tru, nogat. Ol i stap olsem yet, na planti ol misim moa i kamap, na ol i grisim ol gavman na helpim ol long taim bilong pait.​—⁠7/1, pes 10-11.

▫ Wanem dispela “ol gutpela samting . . . long heven” Jisas i toktok long en long Matyu 6:20?

Dispela em ol gutpela samting i no save bagarap, olsem gutnem long ai bilong God na stap gut long wok Kristen. Dispela em sampela samting Jehova i no save lusim tingting long en. (Hibru 6:10)​—⁠7/1, pes 32.

▫ Pita i tok yumi mas bungim wanem pasin wantaim bilip bilong yumi? (2 Pita 1:​5-7)

Pita i tok yumi mas bungim ol samting wantaim bilip bilong yumi olsem: gutpela pasin, na save long God, na pasin bilong bosim gut laik bilong bodi, na pasin bilong kamap strong na karim hevi, na pasin bilong wokabaut long pasin bilong God, na pasin bilong i stap pren tru bilong ol arapela manmeri bilong God, na pasin bilong givim bel long ol arapela.​—⁠7/15, pes 13.

▫ Stori bilong rong em Devit na Batseba i mekim i givim wanem tok lukaut long ol wokman bilong God? (2 Samuel 11:​2-4)

I stret Devit i ken mekim maritpasin wantaim meri bilong em yet, tasol em i mangal long gutpela skin bilong Batseba, em meri bilong Uria, na em i no daunim dispela laik, nogat; em i tingim i go inap bel i kirapim em long mekim pasin pamuk. Wankain samting inap painim wokman bilong God sapos em i no klia long dispela kain pasin mangal. (Jems 1:​14, 15)​—⁠8/1, pes 14.