Sampela Gutpela Tok Bilong Matyu
BIPO Matyu i man bilong kisim takis. God Jehova i kirapim em long raitim stori long Krais Jisas. Matyu i stori long mama i karim Jisas, na em i go bikpela, na mekim ol wok, na em i dai, na em i kirap bek. Sampela olpela rait i tok Matyu i raitim stori bilong em 8-pela yia bihain long taim Jisas i bin go long heven (41 Y.B.). Em i stret, long wanem, laspela tok bilong Matyu, em i tok Jisas i tokim lain bilong em long kamapim disaipel, na Matyu i no stori long ol Rom i bagarapim Jerusalem long 70 Y.B.
Yusibius i tok, Papias na Irenias na Origen i ting Matyu i raitim dispela stori bilong em na em i raitim long tok Hibru. (Buk Historia Ecclesiastica) Sampela man i ting em i raitim long tok Arameik, tasol wanpela profesa bilong Yunivesiti long Jojia, em George Howard, i tok: ‘Sampela man i ting ol man bilong Palestain long taim bilong Jisas ol i no bin mekim tok Hibru—ol i mekim tok Arameik, tasol ol man i painim sampela olpela rait long tok Hibru (Dead Sea Scrolls), na nau ol i save, long taim Jisas i stap ol man i save mekim tok Hibru long Palestain.’ Matyu i raitim tok bilong em long tok Hibru bilong helpim ol Kristen Hibru, na ating em i tanim tu long tok Grik.
Gutpela sapos yu kaunim tok bilong Matyu. Nau yumi ken stori long sampela gutpela tok bilong em.
Taim Mama i Karim Em, na Taim Em i Kirap Autim Tok
Matyu i stori pastaim long lain tumbuna bilong Jisas na long mama i karim em. Taim Maria i kisim bel man bilong em, em Josep, “em i laik lusim em. Tasol em i no laik givim sem long Maria long ai bilong ol manmeri. Olsem na em i laik lusim em isi tasol.” (1:19) Tru, ol i no marit yet, tasol ol i makim pinis tupela bilong marit, na long lo bilong ol Juda, sapos meri i slip wantaim narapela man ol i mas kilim em i dai. (Diuteronomi 22:23-29) Olsem na Josep i laik brukim marit bilong ol, maski ol i no marit tru.
Long sapta 5 inap 7 Matyu i stori long taim Jisas i autim tok antap long maunten em i tok, sapos “man i tok nogut long brata bilong en, em i mas kamap long namba wan kaunsil.” (5:22) Olsem na no ken toknogutim na rabisim brata.
Dispela “namba wan kaunsil” i gat 71 memba bilong en, na wanpela buk (Cyclopedia bilong McClintock na Strong) i tok: ‘Bilong man i ken memba long dispela kaunsil em i mas i gat stretpela pasin na gutpela skin, na no ken yangpela tumas o lapun tumas, na mas i gat gutpela skin na planti mani na save; na em i mas save long planti tok ples; nogut em i lapun tumas; em i mas inap kamapim pikinini; em i mas man bilong lain Juda; na em i mas i gat pikinini na bai em i ken sori long ol famili; na papa bilong em mas wanpela pris o lain bilong Livai o Isrel; na bipo em i mas mekim wok jas.’
Olsem na dispela “man i tok nogut long brata bilong en,” rong bilong em i bikpela olsem rong bilong man em kaunsil i makim em bilong dai. Tru tumas, yumi no ken mekim nogut nem bilong brata, olsem na yumi mas bosim maus bilong yumi, nogut yumi gat kot long Jehova, em “Jas bilong olgeta graun.”—Jenesis 18:25; Jems 3:2-12.
Jisas i Gutpela Tisa
Matyu i stori long Jisas em i gutpela tisa na em i save gut long bekim gut ol askim. Ol i bin askim em, olsem wanem na ol disaipel bilong em i no save tambu long kaikai long sampela taim. (9:14-17) Jisas i tok taim em i stap, ol i no gat wok long tambu long kaikai, tasol taim em i dai ol bai tambu long kaikai na ol bai sori na krai, long wanem, ol i no save bilong wanem em i mas dai, tasol taim ol i kisim spirit holi long de Pentikos ol bai save na ol i no ken hevi moa.
Na Jisas i tok, man i no save samapim hap nupela laplap long hul long olpela saket, long wanem, taim em i wasim, nupela hap laplap bai go liklik na saket bai bruk na hul bai kamap bikpela. Na em i tok, man i no save pulimapim nupela wain long olpela skin meme, nogut em i bruk. Long wanem, nupela wain i save solap, na sapos skin meme i nupela em inap i go bikpela, tasol olpela skin meme i drai na i strong pinis na em bai bruk. Na i olsem long tok i tru em Krais i lainim ol man long en—em i strongpela tok, na i no inap long ol man i bihainim olpela lotu Juda i pilim, long wanem, tingting na bel bilong ol i strong pinis na ol i no laik senis. Na Jisas i no laik stretim o mekim gut olpela lotu Juda tu, olsem mekim gut olpela saket, nogat. God i salim Jisas long kirapim nupela lotu. Olsem na yumi no ken bungim trupela lotu wantaim lotu giaman o helpim lotu giaman, nogat.
Harim Tok Bilong Pikinini Bilong God
Matyu i stori long taim skin bilong Jisas i senis na i kamap narapela kain na God i tok, em i laikim tumas Jisas na yumi mas harim tok bilong em. (17:5) Yumi mas harim olgeta tok bilong Jisas. Jisas i tok, sapos man i bilip long em, na narapela man i mekim sampela samting bilong paulim dispela bilip, ol i mas pasim ston long nek bilong dispela narapela man na tromoi em i go long solwara. (18:6) Jisas i toktok long bikpela ston olsem bilong krungutim na wilwilim wit, braitpela bilong en inap 1.2 i go 1.5 mita. Sapos draipela ston olsem i stap long nek bilong man long solwara em bai dai. I olsem Jisas i tok, yumi no ken sutim lek bilong man o pundaunim wanpela bilong lain bilong em. Aposel Pol tu i tok olsem, em i tok: “Sapos yu kaikai mit o yu dring wain o yu mekim narapela samting, na dispela i mekim brata bilong yu i pundaun, orait mobeta yu no mekim dispela pasin.”—Rom 14:21.
Pikinini bilong God i givim tok long ol Farisi long rot bilong tok bokis na em i tok ol i olsem matmat ol man i penim long waitpela pen. (23:27, 28) Bipo ol i save penim ol matmat long waitpela pen na bai ol man i ken lukim gut, nogut ol i popaia na holim na nau ol i no klin. Insait bilong tok bilong Jisas i olsem: Long ai bilong ol man i olsem ol saveman bilong lo na ol Farisi i stretpela man, tasol “pasin bilong giaman na pasin bilong sakim lo” i pulap long bel bilong ol.—1 Timoti 1:5; Provep 3:32; 2 Timoti 1:5.
Jisas i Makim Gutpela Pasin long Sanap Strong
Matyu i stori pinis long ol samting Jisas i tok bai kamap bilong makim em i kam bek pinis, na nau Matyu i stori long taim Judas i kamapim Krais long ol birua, na ol i holim em na kotim em na kilim em i dai, na bihain em i kirap bek. Taim em i hangamap long pos em i sakim wain i gat marasin bilong pait long en. (27:34) Ol meri i save givim dispela samting long ol man nogut ol i bin nilim ol long pos na i bilong mekim dai pen. Na ol i putim narapela marasin long wain bilong mekim wain i swit. (Mak 15:23) Jisas i no laik dring, nogut wain i mekim tingting bilong em i no klia. Nau laspela hevi i stap long em na em i laik tingting gut na stap strong na stap gut long Jehova inap em i dai. Yumi tu i ken tingting oltaim long stap gut long God Jehova.—Sam 26:1, 11.