Baibel i Tok Wanem?

Yu Ting Jehova Em i God Bilong Ol Juda Tasol?

LONG planti kantri long nau, ol man i tok nem Jehova em bilong oganaisesen bilong ol Witnes Bilong Jehova. Tasol dispela nem i stap long sampela Baibel em ol Witnes Bilong Jehova i save yusim, na ol narapela lotu tu i save yusim ol dispela wankain Baibel. Tru tumas, inap planti tausen yia pinis ol man i bin yusim dispela nem Jehova olsem Tetragramaton i makim.

Sampela taim Baibel i kolim Jehova olsem “God bilong Israel.” (1 Stori 17:24) Dispela tok i kirapim sampela man long ting olsem em i god bilong wanpela lain na ol Juda i kisim long ol na mekim em i kamap olsem god bilong ol o ol yet i kamapim dispela god. Karen Armstrong, em i raitim buk A History of God, em i tok: ‘Pastaim ol man i ting [Jehova] em i god bilong lain Israel i save belhat na kros. Bihain, long yia 650 B.C. na 550 B.C. samting, ol profet bilong Israel i yusim dispela nem bilong makim olsem dispela God i winim tru olgeta samting ol man inap tingim bilong stori long em.’

Sampela saveman bilong lotu i traim long painim ol samting bilong soim olsem dispela nem Jehova i kirap long Kenan o Isip. Ol narapela i tok dispela nem i ‘wanpela olpela nem bilong lain Juda’ na i no makim dispela God em “Nupela Testamen” i stori long em. Yu ting dispela tok i tru? Yumi inap kisim wanem save taim yumi skelim gut ol tok bilong Baibel?

Jehova​​—⁠God Bilong Olgeta Lain Man

Baibel i tokaut long pasin bilong Jehova long pas gut wantaim lain Israel. Tasol dispela i no gutpela as bilong yumi ken ting olsem em i wanpela god tasol bilong lain Israel. Aposel Pol i askim: “Olsem wanem? Ating God em i God bilong ol Juda tasol? Ating em i no God bilong ol arapela lain tu?” Bekim bilong Pol i klia: “Nogat. Em i God bilong ol arapela lain tu.” (Rom 3:​29) Pol i toktok long wanem God? Long dispela wankain pas em i salim long ol Rom, dispela nem Jehova i stap 19 taim long en. Aposel Pol i kamapim tok bilong wanpela profet Hibru bilong bipo, em Joel, na em i tok “olgeta manmeri i singaut long nem bilong Jehova, bai em i kisim bek ol,” na i no ol Juda tasol.​​—⁠Rom 10:​13, NW; Joel 2:​32.

Lain Israel i no bin makim Jehova bilong kamap God bilong ol, nogat; Jehova i makim ol bilong inapim laik bilong em​​—⁠bilong redim rot bilong Mesaia. Na tu, wanem samting i painim wanpela lain, dispela wankain samting bai painim god bilong ol tu. Taim birua i daunim dispela lain, ol i save daunim god bilong ol tu. Tasol dispela samting i no bin painim Jehova.

Kontrak Jehova i mekim wantaim Abraham​​—⁠em ol i mekim inap planti handet yia paslain long taim bilong ol Kristen⁠​—⁠i tok promis olsem ol gutpela samting bai painim olgeta lain man, na dispela i soim olsem God i laikim olgeta man. (Stat 12:​1-3; Aposel 10:​34, 35; 11:18) King Devit bilong Israel i soim olsem i no graun bilong Israel tasol i samting bilong Jehova. Em i tok: “Dispela graun wantaim olgeta samting i stap long en, em olgeta i bilong Bikpela tasol. Olgeta ples na olgeta manmeri bilong ples, ol tu i bilong em.”​​—⁠Song 24:⁠1.

Bihain taim pikinini bilong Devit, em Solomon, i dediketim tempel bilong lotuim Jehova, em i soim olsem i gat rot bilong ol man bilong olgeta lain em ol i gat pasin daun ol i ken i go klostu long God. Long beten Solomon i mekim bilong dediketim tempel, em i tok: “Ol man bilong ol arapela kantri . . . sapos wanpela bilong ol i laik lotu long yu na i lusim as ples bilong en na i kam klostu long dispela haus na i beten long yu, orait, Bikpela, yu stap long ples bilong yu long heven na yu ken harim beten bilong en na mekim ol samting em i askim yu long mekim. Olsem na bai olgeta lain man long olgeta kantri i ken save long yu na i stap aninit long yu, olsem mipela Israel, ol manmeri bilong yu, i save mekim.”​​—⁠1 King 8:​41-​43.

God i Sakim Lain Israel

Profesa C. J. Labuschagne i stori long pasin i stap namel long lain Israel na Jehova na em i tok: “Planti taim dispela God ‘bilong Israel’ i no helpim lain bilong em na sampela taim i olsem em i birua long lain bilong em.” Long taim bilong ol aposel lain Israel i sakim Mesaia, olsem na Jehova i sakim ol.

Tasol ol Kristen i mas wok yet long yusim nem bilong Jehova. Taim kongrigesen Kristen i wok long kamap bikpela, ol man bilong olgeta lain i go insait long en. Long wanpela kibung Kristen long Jerusalem, disaipel Jems bilong lain Juda, em i tok olsem God “i kam long ol man bilong ol arapela lain, bilong kisim ol lain manmeri bilong ol na mekim ol i kamap lain bilong em yet.” Bilong kamapim klia olsem wanpela tok profet i bin tokaut pinis long dispela samting, Jems i kolim wanpela tok profet bilong Buk Amos i gat nem Jehova i stap long en.​​—⁠Aposel 15:​2, 12-​18; Amos 9:​11, 12.

Em i Tingim Tru Olgeta Man na Mekim Gut Long Ol

Bilong kamapim klia olsem Jehova em i God bilong olgeta lain, Pol i tok: “Ol Juda na Grik i wankain tasol. Bikpela wanpela tasol em i Bikpela bilong yumi olgeta. Na em i save mekim gut tru long olgeta manmeri i singaut long em na askim em long helpim ol.” (Rom 10:12) Em nau, Jehova bai mekim gut long olgeta man i bihainim tok bilong em.

Olgeta man i stap gut long God na i bihainim tok bilong em​​—⁠maski ol i bilong wanem lain o skin⁠​—⁠Jehova i tok promis long ol bai kisim ol gutpela samting long bihain. Baibel i tok ol dispela kain manmeri i olsem “ol gutpela samting bilong olgeta lain.” (Hagai 2:​7, NW ) Ol dispela lain i kisim save long Jehova na ol i laikim em tru. Laspela buk bilong Baibel i tok long ol olsem: “Olgeta lain man bai i kam na lotu long yu [Jehova]. Long wanem, stretpela pasin bilong yu i kamap ples klia pinis.”​​—⁠KTH 15:⁠4.

[Piksa long pes 26]

Moses i holim Tenpela Lo