Ol Drak, Wok Bilong Ol Spirit Nogut, na Baibel

Pol i bin tok lukaut long ol Kristen bilong pastaim long “pasin bilong mekim olkain posin.” (Galesia 5:20) Pol i kolim wanpela tok Grik, em phar·ma·kiʹa, insait bilong en i olsem “mekim wok long drak.” Wanpela buk (The Interpreter’s Bible) i tok: ‘Ol sangumameri na ol posinman i bin mekim wok long ol drak, olsem na bihain dispela tok i makim pasin sanguma na posin na marila.’

Long nau tu, ol wailis bilong ol spirit nogut, ol i save mekim wok long ol drak. Olsem: Sampela i tok, ol lain i save lotu long Satan, taim ol i laik kisim ol nupela man i kam insait long lain bilong ol, ol i save givim dring na ol drak long ol. Na ol i tok, taim ol i mekim lotu long Satan, ating ol i givim drak long man bambai ol inap bosim gut em na bai em i mekim sampela pasin ol i tokim em long mekim. Tasol Pita i tok, Satan “i olsem wanpela laion i singaut strong. Oltaim em i . . . painim ol manmeri bilong kaikai.” (1 Pita 5:8) Dispela tok ol i tanim olsem “kaikai” ol i kisim long wanpela tok Grik ka·ta·piʹno, na em i makim olsem ‘bagarapim olgeta,’ o ‘daunim tru.’ Ol drak na wok bilong ol spirit nogut i save mekim olsem tasol. Dispela i ken strongim tru tingting bilong ol Kristen long abrusim pasin bilong mekim nabaut long olkain drak.​—Skelim wantaim 2 Korin 4:4.