“Yu Tokim Mipela, Wanem Taim Ol Dispela Samting Bai i Kamap?”
“Nau bai mi tokim yupela long ol arapela samting bai i kamap bihain, olsem bai yupela i ken save long ol long taim ol i no kamap yet.”—AISAIA 42:9.
1, 2. (a) Ol aposel bilong Jisas i laik save long wanem samting bilong bihain? (b) Bekim bilong Jisas long mak bai kamap, truim bilong en i kamap olsem wanem?
GOD JEHOVA i save skulim yumi. Em i tok: “Taim wanpela samting i no kamap yet, mi save tokaut long dispela samting bai i kamap.” (Aisaia 46:10) Olsem stori paslain long dispela i tok, ol aposel i laik bai Jisas i skulim ol olsem. Ol i askim em: “Yu tokim mipela, wanem taim ol dispela samting bai i kamap? Wanem mak bai i kamap pastaim, na mipela i ken save, ol dispela samting klostu i laik kamap?”—Mak 13:4.
2 Bilong bekim dispela askim, Jisas i kolim planti samting i mas kamap wantaim, olsem wanpela mak, na bai ol i ken save, lo na pasin bilong lain Juda klostu bai pinis. Dispela i kamap long taim Jerusalem i bagarap long yia 70. Tasol dispela tok profet i gat narapela truim bilong en, em bikpela truim i mas kamap long bihain tru. Taim bilong “ol arapela lain,” i pinis long yia 1914, na wanpela bikpela mak i kamap long olgeta hap na ol man i ken save, pasin nogut nau i stap long graun klostu bai i pinis long taim bilong “bikpela hevi tru.”a (Luk 21:24) Planti milion manmeri i stap long nau ol inap tokaut olsem dispela mak i kamap tru pinis, long wanem, ol yet i bin lukim ol bikpela pait bilong olgeta hap na ol narapela samting nogut i kamap long taim bilong yumi. Dispela i olsem bikpela truim bilong tok profet bilong Jisas, na ol samting i bin kamap long yia 33 i go inap long yia 70 i olsem piksa bilong en.
3. Taim Jisas i stori long narapela mak, em i tok profet long wanem ol samting moa bai kamap?
3 Taim Luk i stori pinis long taim bilong ol arapela lain, bihain dispela wankain stori long Matyu na Mak na Luk i stori long sampela samting moa i mas kamap, em narapela “mak.” Em i no dispela mak i mas kamap bilong makim olsem ‘pasin bilong graun i laik pinis,’ em mak i gat planti hap bilong en i kamap wantaim. Nogat. (Matyu 24:3) (Long pes 15 ol i putim tupela lain wantaim bilong makim dispela tok bilong Baibel.) Matyu i tok: “Taim bilong ol dispela bikpela hevi i pinis, orait kwiktaim san bai i kamap tudak, na mun bai i no moa lait, na ol sta bai i lusim skai na pundaun, na ol strongpela samting i stap long skai bai i guria. Long dispela taim mak bilong Pikinini Bilong Man bai i kamap long skai na olgeta lain manmeri bilong graun bai i krai. Na ol bai i lukim Pikinini Bilong Man i stap antap long ol klaut bilong heven na i kam wantaim bikpela strong na bikpela lait bilong en. Na biugel bai i krai strong moa, na em bai i salim ol ensel bilong en i go bilong bungim ol manmeri em i bin makim bilong em yet. Ol ensel bai i kisim ol long olgeta hap . . . bilong graun, na bringim ol i kam.”—Matyu 24:29-31.
Bikpela Hevi na Mak Long Skai
4. I gat wanem askim long ol dispela narapela kain samting bai kamap long skai olsem Jisas i tok?
4 Wanem taim truim bilong dispela tok bai kamap? Matyu na Mak na Luk, tripela wantaim i stori long ol narapela kain samting i mas kamap long skai, olsem san na mun bai kamap tudak, na ol sta bai pundaun. Jisas i tok, dispela i mas kamap bihain long “bikpela hevi.” Olsem na yumi laik save: Jisas i tok long bikpela hevi i bin kamap long yia 70, o em i tok long bikpela hevi tru i mas kamap long taim bilong yumi na i no kamap yet?—Matyu 24:29; Mak 13:24.
5. Pastaim ol i bin ting olsem wanem long dispela bikpela hevi tru i mas kamap long taim bilong yumi?
5 Taim bilong ol arapela lain i pinis long yia 1914 na i kam inap nau, lain bilong God i gat bikpela laik tru long save long taim bilong dispela ‘bikpela hevi tru.’ (KTH 7:14) Inap planti yia ol i bin ting dispela bikpela hevi tru i bin kirap long taim bilong Namba Wan Pait, na bihain long en dispela bikpela hevi i pinis pastaim, na laspela hap bilong en, em “pait long dispela bikpela de bilong God I Gat Olgeta Strong.” Tasol sapos olsem, wanem samting bai kamap long ol yia namel long dispela taim bilong las de?—KTH 16:14; Matyu 13:39; 24:3; 28:20.
6. Ol i bin ting, wanem samting i truim tok profet bilong Jisas long ol narapela kain samting bai kamap long skai?
6 Ol i bin ting, long dispela hap taim i stap namel, bai yumi lukim dispela bikpela mak i gat planti hap bilong en—wanpela em ol manmeri God i bungim ol pinis ol bai mekim wok bilong autim tok bilong Kingdom. Ol i bin ting, dispela mak bai kamap long skai bihain long taim namba wan hap bilong bikpela hevi i pinis long 1918. (Matyu 24:29; Mak 13:24, 25; Luk 21:25) Ol i tingim ol samting tru long antap, olsem ol man i salim ol roket samting i go antap, na ol strongpela samting kain olsem paua i kam daun, na ol man i go antap long mun.
7 Tasol Wastaua bilong Februeri 1971, i skelim gen tok profet bilong Jisas, na i glasim gut tok profet bilong bikpela hevi tru bai kamap. Wastaua i tok, taim yumi skelim ol samting i bin kamap long taim bilong ol aposel yumi ken save, i no gat namba wan hap bilong bikpela hevi tru bilong taim bilong yumi i ken kamap long 1914 na i pinis long 1918 na planti yia bihain em i kirap gen, nogat. Wastaua i tok: ‘Dispela “bikpela hevi tru” i no kamap yet; em bai kamap bihain. Long taim bilong “bikpela hevi tru,” olgeta lotu giaman wantaim [ol lotu ol i holim nating nem Kristen] bai bagarap, na bihain long en pait bilong bikpela de bilong Nambawan Strongpela God bai kamap.’
8. Taim ol i senisim tingting bilong ol long dispela “bikpela hevi tru,” ol i tok wanem long Matyu 24:29?
8 Tasol Matyu 24:29 i tok, “bikpela hevi i pinis” na “kwiktaim” ol dispela narapela kain mak i kamap long skai. Dispela i kamap olsem wanem? Wastaua bilong Oktoba 1, 1976, i kamapim tingting olsem dispela tok i makim bikpela hevi i bin kamap long yia 70. Tasol olsem wanem ol inap tok, ol narapela kain samting i kamap long skai long taim bilong yumi ol i bin kamap “kwiktaim” bihain long yia 70? Ol i bin ting, long ai bilong God ol dispela planti handet handet yia i go pinis bihain long yia 70 na i kam inap nau em i sotpela taim tasol. (Rom 16:20; 2 Pita 3:8) Tasol taim ol i skelim gut dispela tok profet olsem i stap long Matyu 24:29-31, ol i kisim nupela save long en. Dispela i makim olsem save bilong yumi i wok long kamap klia moa, olsem lait “i wok long kamap strong moa.” (Sindaun 4:18) Orait, nau yumi ken toktok long olsem wanem dispela nupela save i stret.
9. Olsem wanem Olpela Testamen i mekim wankain tok olsem Jisas long ol narapela kain samting bai kamap long skai?
9 Tok profet bilong Jisas long san bai kamap tudak, na mun bai i no lait moa, na ol sta bai pundaun, em i mekim long 4-pela aposel. Ol i bilong lain Juda, olsem na ol i save dispela tok i wankain olsem sampela tok profet bilong Olpela Testamen, olsem long Sefanaia 1:15. Sefanaia i tok, long de bilong God long mekim kot, “bai ol manmeri i gat bikpela hevi na bel nogut, na bai ol samting i bagarap nabaut. Na ol klaut bai i karamapim san na bikpela tudak bai i kamap.” Na sampela profet Hibru ol tu i stori long san bai kamap tudak, na mun bai i no lait moa, na ol sta bai i no lait moa. Yu inap lukim kain tok olsem long ol strongpela toksave God i bin givim long Babilon, na Idom, na Isip, na kantri Israel long hap bilong not.—Aisaia 13:9, 10; 34:4, 5; Jeremaia 4:28; Esekiel 32:2, 6-8; Amos 5:20; 8:2, 9.
10, 11. (a) Joel i tok profet long wanem ol samting bai kamap long skai? (b) Truim bilong wanem hap tok profet bilong Joel i kamap long yia 33? Truim bilong wanem hap tok bilong em i no bin kamap long dispela taim?
10 Taim Pita na 3-pela narapela aposel i harim dispela tok Jisas i mekim, ating ol i tingim tok profet bilong Joel 2:28-31 na Joe 3:15. Joel i tok: “Bikpela i tok moa olsem, ‘Bihain bai mi kapsaitim spirit bilong mi long olgeta manmeri. Na ol pikinini man na pikinini meri bilong yupela bai i autim tok bilong mi olsem ol profet. Na bai . . . mi mekim ol narakain samting i kamap long graun na long skai olsem ol mak bilong dispela De. Blut na paia na bikpela smok bai i kamap. Na san bai i kamap tudak na mun bai i kamap retpela olsem blut. Na bihain bai De bilong Bikpela i kamap. Long dispela bikpela De bai olgeta manmeri bai i pret nogut tru.’ ” “Na bai san na mun i kamap tudak, na ol sta bai i no lait moa.”
11 Aposel 2:1-4 na 14-21 i tok, long Pentikos long yia 33 God i kapsaitim spirit bilong em long ol 120 disaipel, ol man wantaim ol meri. Long dispela taim Pita i tokaut olsem dispela i truim tok profet bilong Joel. Tasol olsem wanem long hap tok profet bilong Joel i stori long ‘san bai kamap tudak, na mun bai kamap retpela olsem blut, na ol sta bai i no lait moa’? I no gat samting i makim olsem truim bilong en i bin kamap long yia 33 o insait long ol narapela 30 yia samting i go inap long taim ol lo na pasin bilong lain Juda i pinis.
12 Yumi ken save, ol dispela laspela samting Joel i tok profet long en i bilong ‘bikpela de bilong Jehova’—taim Jerusalem i bagarap. Wastaua tok Inglis bilong Novemba 15, 1966, i stori long bikpela hevi i bin painim Jerusalem long yia 70, na i tok: “Tru tumas, wanpela ‘de bilong Jehova’ i bin painim Jerusalem wantaim lain bilong en. Na long dispela de i gat planti ‘blut na paia na smok.’ Lait bilong san i no inap rausim tudak i karamapim taun long san, na long nait gutpela lait bilong mun i no mekim ol i stap bel isi; ol i tingim bikpela blut i bin kapsait.”b
12, 13. Tok profet bilong Joel long ol narapela kain samting bai kamap long skai, truim bilong en i bin kamap olsem wanem?
13 Joel na ol narapela profet i tokaut olsem ol narapela kain samting bai kamap long skai, na ol dispela samting i mas kamap long taim Jehova i givim strafe long Jerusalem. Ol dispela samting i no bilong kamap long ol yia bihain long las de bilong lain Juda. Nogat. Ol i kamap long las de stret bilong ol. Taim ami bilong ol birua i kam bagarapim Jerusalem, orait nau san na mun na ol sta i kamap tudak. Na olsem tasol yumi ken save, bikpela truim bilong dispela hap bilong tok profet bilong Joel bai kamap long las de bilong dispela taim nau, taim Jehova i kirap na givim strafe long ol man nogut bilong dispela graun.
Wanem Bikpela Hevi Paslain Long Ol Mak i Kamap Long Skai?
14, 15. Tok profet bilong Joel i helpim yumi long kisim wanem save long tok bilong Matyu 24:29?
14 Truim bilong tok profet bilong Joel (na ol wankain tok profet) em inap helpim yumi long kisim gut tok bilong Matyu 24:29. Tru tumas, tok bilong Jisas olsem san bai kamap tudak, na mun bai i no lait moa, na ol sta bai pundaun, dispela i no makim ol samting i kamap long skai long nau, olsem ol man i sutim ol roket i go long ples antap, na ol man i kisim ol roket samting i go pundaun long mun. Nogat. Tok bilong Jisas i makim ol samting i mas kamap long las de stret, long ‘bikpela de bilong Jehova,’ em dispela bikpela bagarap i no kamap yet.
15 Dispela i helpim yumi long save gut long tok profet bilong Jisas, em i tok taim bikpela hevi “i pinis,” orait “kwiktaim” ol dispela narapela kain samting bai kamap long skai. Jisas i no tok long bikpela hevi i kamap na i pinis long yia 70. Nogat. Em i tok long narapela bikpela hevi i mas kamap long ol man bilong dispela graun bihain long taim em i kam bek na i stap king. (Matyu 24:3) Dispela bikpela hevi tru i no kamap yet.
16. Mak 13:24 i toktok long wanem bikpela hevi? Olsem wanem yumi ken save long dispela?
16 Orait, olsem wanem long tok bilong Mak 13:24? Em i tok: “Taim bilong ol dispela bikpela hevi i pinis, orait long dispela taim san bai i kamap tudak, na mun bai i no moa lait.” Hap tok Grik (e·keiʹnos) ol i tanim olsem “dispela” em inap makim samting i kamap bipo bipo (o ol i stori long en bipo) o i mas kamap bihain bihain. (Matyu 3:1; 7:22; 10:19; 24:38; Mak 13:11, 17, 32; 14:25; Luk 10:12; 2 Tesalonaika 1:10) Olsem na taim Mak 13:24 i stori long “dispela bikpela hevi,” em i no stori long hevi ol Rom i bin kirapim, nogat; em i stori long bikpela wok Jehova bai mekim long las de bilong pasin nogut nau i stap long graun.
17, 18. Kamapim Tok Hait i givim wanem save long yumi long ol samting bai kamap taim bikpela hevi tru i kirap?
17 Ol tok bilong Kamapim Tok Hait sapta 17 i go 19 i stret wantaim dispela nupela save yumi kisim long tok bilong Matyu 24:29-31, na Mak 13:24-27, na Luk 21:25-28, na em i strongim dispela save. Em i mekim olsem wanem? Gutnius em Matyu na Mak na Luk i raitim i makim olsem bikpela hevi tru long las de i no ken kirap na pinis wantu tasol. Nogat. Taim dispela bikpela hevi i kirap pinis, bai i gat sampela bikhetman i stap yet na bai ol i lukim “mak bilong Pikinini Bilong Man,” na bai ol i krai. Na olsem Luk 21:26 i tok, ol “bai i tingting long ol samting i laik kamap long graun, na ol bai i pret tru.” Ol bai pret tru, long wanem, ol bai lukim “mak” i kamapim klia olsem bagarap i laik painim ol kwiktaim.
18 Stori bilong Kamapim Tok Hait i makim olsem dispela bikpela hevi tru bilong bihain bai kirap long taim ‘ol kom’ bilong “wel animal” i birua long “pamukmeri,” em Bikpela Babilon, na ol i bagarapim em.c (KTH 17:1, 10-16) Tasol bihain long dispela, i gat planti man bai ol i stap yet; ol king, na ol bisnisman, na ol kepten bilong ol sip, na sampela moa ol i stap na ol i krai sori long bagarap i painim olgeta lotu giaman. Planti bai ol i save, bagarap bai painim ol tu.
Wanem Samting Bai Kamap Bihain?
19. Yumi ken tingim wanem ol samting bai kamap taim bikpela hevi tru i kirap?
19 Matyu 24 na Mak 13 na Luk 21 i wok wantaim Kamapim Tok Hait sapta 17 i go 19 bilong givim gutpela save long yumi long ol samting klostu bai kamap. Long taim God i makim pinis, dispela bikpela hevi tru bai kirap taim ol i kirapim pait long olgeta lotu giaman (Bikpela Babilon). Bai ol i pait strong long ol misin i holim nating nem Kristen, em ol i olsem Jerusalem bilong bipo i lusim Jehova. Orait, “kwiktaim” bihain long dispela hap bilong bikpela hevi, “ol kain kain mak bai i kamap long san na long mun na long ol sta. Na long graun tingting bilong olgeta lain man bai i bagarap tru.”—Matyu 24:29; Luk 21:25.
20. Yumi ken tingim wanem ol narapela kain samting bai kamap long skai?
20 Wanem insait bilong dispela tok olsem san bai kamap tudak, na mun i no lait moa, na ol sta bai lusim skai na pundaun? Yumi ken ting olsem: Taim bikpela hevi tru i kirap nupela, “ol dispela 10-pela kom” bilong Kamapim Tok Hait 17:16 bai kamapim giaman bilong planti man i olsem “ol lait”—em ol bikpela man bilong lotu—na bagarapim ol. Ating ol lain politik tu bai guria nogut. Na olsem wanem long skai tru? Yu ting sampela narapela kain samting bai kamap long en? Yumi ken ting olsem. Na ol dispela samting bai mekim ol man i pret moa yet, winim ol samting Josifas i tok i bin kamap long taim ol lo na pasin bilong lain Juda i laik pinis. Yumi save, bipo God i bin kamapim klia strong bilong em long kamapim ol kain bikpela bagarap olsem, na em inap mekim olsem gen.—Kisim Bek 10:21-23; Josua 10:12-14; Hetman 5:20; Luk 23:44, 45.
21. Wanpela “mak” bai kamap olsem wanem long bihain?
21 Taim Matyu na Mak na Luk i stori pinis long ol dispela samting, nau ol i laik stori long samting bai kamap bihain long dispela, olsem na ol i kolim dispela hap tok Grik toʹte. Ol i tok: “Long dispela taim [bihain long samting ol i stori pinis long en] mak bilong Pikinini Bilong Man bai i kamap.” (Matyu 24:30; Mak 13:26; Luk 21:27) Kirap long taim bilong Namba Wan Pait na i kam inap long nau, ol disaipel tru bilong Jisas i bin lukim ol planti samting i kamap wantaim olsem mak na ol i save, Jisas i kam bek pinis na i stap. Planti manmeri i no luksave long dispela mak. Tasol Matyu 24:30 i kolim narapela “mak” i mas kamap, em “mak bilong Pikinini Bilong Man,” na bai olgeta lain bilong graun i mas luksave long en. Jisas bai “i stap namel long ol klaut na i kam,” na olgeta birua bilong em long graun i mas luksave olsem em “i kam” (tok Grik, er·khoʹme·non), maski ai bilong ol i no inap lukim em. Bai ol i lukim ol narapela kain samting i kamap, em ol i kamapim klia bikpela strong em i holim olsem king.—KTH 1:7.
22. Taim ol man i lukim “mak” bilong Matyu 24:30, ol bai mekim wanem? Lain bilong God bai mekim wanem?
22 Matyu 24:30 i kolim gen hap tok Grik toʹte bilong kirapim stori long narapela samting bai kamap, olsem: Ol lain man bai lukim bagarap i laik painim ol, na bai ol i krai. Tasol yumi ol wokboi bilong God bai amamas. Bai yumi inap litimapim het bilong yumi, long wanem, yumi save, taim bilong God i kisim bek yumi i kam klostu pinis! (Luk 21:28) Kamapim Tok Hait 19:1-6 tu i stori long ol lain i lotu tru long God long heven na long graun ol i amamas long lukim dispela bikpela pamukmeri i bagarap.
23. (a) Jisas bai kirap mekim wanem long ol manmeri God i bin makim bilong em yet? (b) Yumi ken tok wanem long lain remnan bai go antap long heven?
23 Long Mak 13:27, Jisas i tok profet moa olsem: “Long dispela taim [“bihain,” tok Grik, toʹte] em bai i salim ol ensel bilong en i go, na em bai i bungim ol manmeri em i bin makim bilong em yet. Em bai i kisim ol long olgeta hap.” Jisas i tok long lain remnan, em liklik hap lain bilong ol 144,000 “manmeri [God] i bin makim” na ol i stap laip yet long graun. Taim dispela “taim bilong las de” i kirap pinis, God i bin bungim ol na ol i kamap wanbel aninit long lo bilong em. Tasol sapos yumi tingim olsem narapela samting i kamap bihain long narapela, orait yumi ken save Mak 13:27 na Matyu 24:31 i stori long narapela samting, olsem “biugel bai i krai strong moa,” na bai God i bungim “ol manmeri em i bin makim”; bai em i kisim ol long olgeta hap bilong graun. Em bai bungim ol olsem wanem? Bai em i “putim mak” long ol, na bai em i kamapim klia tru olsem ol i hap bilong dispela lain “em i bin singautim ol na . . . ol i save bihainim tru tok bilong em.” Na long taim God i makim pinis, bai em i kisim ol i go long heven bilong kamap king na pris.d Dispela bai givim bikpela amamas long ol yet na long ‘bikpela lain’ poroman bilong ol, em ol tu i kisim mak bilong winim taim bilong “bikpela hevi,” na bai ol inap i stap long Paradais long graun.—Matyu 24:22; KTH 7:3, 4, 9-17; 17:14; 20:6; Esekiel 9:4, 6.
24. Matyu 24:29-31 i makim wanem ol samting bai kamap, olsem narapela bai kamap bihain long narapela?
24 Taim ol aposel i tokim Jisas, “Yu tokim mipela,” Jisas i tokim ol long sampela samting ol i no inap kisim gut. Tasol taim ol i stap laip yet ol i bin lukim namba wan truim bilong dispela tok profet i kamap, na ol i amamas. Yumi bin skelim hap bilong dispela tok profet em truim bilong en bai kamap klostu nau. (Matyu 24:29-31; Mak 13:24-27; Luk 21:25-28) Yumi lukim olsem taim bilong God i kisim bek yumi i kam klostu nau. Yumi ken wetim taim bilong bikpela hevi tru i kirap, na bihain bai mak bilong Pikinini Bilong Man i kamap, na bihain long dispela bai God i bungim ol manmeri em i bin makim. Na las tru, King Krais Jisas, em strongpela Man bilong pait, em bai “winim pait” na kilim i dai ol birua bilong Jehova long Armagedon. (KTH 6:2) Dispela de bilong Jehova bilong givim strafe long ol man nogut em las de bilong pasin i bin i stap long graun long de bilong Bikpela Jisas, kirap long yia 1914.
25. Olsem wanem yumi ken insait long truim bilong Luk 21:28 em bai kamap bihain?
25 Yu mas wok yet long kisim save long ol tok God i laik skulim yumi long en na bai yu inap bihainim singaut bilong Jisas, em bai kamap tru long bihain olsem: “Taim ol dispela samting i stat long kamap, orait yupela i mas sanap na litimapim het bilong yupela, long wanem, taim bilong God i kisim bek yupela em i kam klostu pinis.” (Luk 21:28) Bihain bai Jehova i mekim nem bilong em i kamap holi, na long dispela taim bai gutpela samting tru i painim ol manmeri em i bin makim na bikpela lain poroman bilong ol!
[Ol Futnot]
a Ol Witnes Bilong Jehova bai amamas long kamapim klia long yu olsem ol samting i kamap long nau i truim tok profet bilong Baibel.
b Josifas i raitim stori bilong ol samting i bin kamap namel long taim ol Rom i kam banisim Jerusalem (yia 66) na taim ol i bagarapim Jerusalem. Em i tok: ‘Long nait traipela win na ren nogut tru i kamap na ol man i pret nogut tru, na klaut i wok long pairap bikpela tru, na bikpela guria i kamap na i pairap strong. Olgeta samting i bagarap nabaut na dispela i makim klia olsem bikpela hevi tru i laik painim ol man, em kain hevi olsem i no bin kamap bipo.’
c Tok profet bilong Jisas long “bikpela hevi tru” na “bikpela hevi,” namba wan truim bilong en i kamap taim ol lo na pasin ol Juda i stap aninit long en i kisim bagarap. Tasol long ol ves i makim taim bilong yumi tasol, em i kolim olsem “dispela bikpela hevi.”—Matyu 24:21, 29; Mak 13:19, 24.
d Lukim “Askim” long Wastaua bilong Februeri 1, 1991.
Yu Tingim?
◻ Olsem wanem truim bilong sampela hap bilong Joel 2:28-31 na Joe 3:15 i kamap long taim bilong ol aposel?
◻ Matyu 24:29 i toktok long wanem bikpela hevi? Olsem wanem yumi ken tok olsem?
◻ Matyu 24:29 i toktok long wanem ol narapela kain samting bai kamap long skai? Olsem wanem dispela inap kamap kwiktaim bihain long bikpela hevi?
◻ Bihain wanem samting bai kamap bilong truim tok bilong Luk 21:26, 28?
7. Ol i kisim wanem nupela save long dispela bikpela hevi tru?
[Piksa long pes 16, 17]
Hap bilong haus lotu
[Kredit Lain]
Pictorial Archive (Near Eastern History) Est.