Halowin i Kirap Olsem Wanem?

Bekim bilong Baibel

Baibel i no stori long Halowin, em wanpela holide planti man i save selebretim long Oktoba 31 long olgeta yia. Tasol bilip na pasin ol i bihainim long bipo long Halowin i no stret wantaim tok Baibel i kamapim.

Long dispela atikol

• Histori na pasin ol i bihainim long Halowin

• Em bikpela samting long save long bilip haiden long Halowin?

• Wai na ol i kolim Halowin?

Histori na pasin ol i bihainim long Halowin

• Samhain: Bilong save long hau na Halowin i kirap, yumi ken skelim stori em buk The World Book Encyclopedia, i mekim long ”ol bung bilong ol haiden em ol man bilong Keltik i save mekim winim 2,000 yia i go pinis. Lain Keltik i bilip olsem long dispela taim, ol man i dai pinis inap wokabaut namel long ol man i stap laip. Long Samhain, ol man i stap laip inap bungim ol man i dai pinis.”​—Lukim “Wai na Ol i Kolim Halowin?”

• Ol kostium bilong Halowin, loli, na ol trik na presen: Wanpela wok painimaut i stori olsem, sampela lain Keltik i bilas long ol kostium i wankain olsem ol spirit na bai ol narapela spirit “i ting olsem ol i wanpela bilong ol na bai ol i lusim ol i go.” Na ol narapela i save givim ol loli samting long ol bilong kamap wanbel.a

  

  Long Yurop, namel long yia 500 C.E na 1500 C.E, ol hetman bilong lotu Katolik i bihainim kastam bilong ol haiden long hap bilong ol na kirapim ol wan lotu bilong ol long bilas long ol kostium olsem ol spirit na go long ol haus na askim long ol liklik presen.

• Ol tewel, vampaia, wulf man, wits, na ol daiman i wokabaut: Inap longtaim pinis ol dispela samting i insait long wok bilong ol spirit nogut. Ol i tingim ol olsem “ol narakain strongpela spirit,” buk Halloween Trivia i stori olsem ol “i wankain long ol samting bilong dai, daiman o pret long dai.”

• Halowin pamkin: Long Briten, namel long yia 500 C.E na 1500 C.E, ol manmeri i save “go long wan wan haus na askim long kaikai na bai ol i beten long ol daiman,” na ol bai karim “ol karot ol i katim na laitim kandel na putim insait long en, ol kandel i makim spirit bilong daiman i trap i stap long klinpaia.” (Halloween—From Pagan Ritual to Party Night) Sampela saveman i tok ol i yusim ol lait bilong kendol na bai ol spirit nogut i stap longwe. Long Not Amerika long yia 1800 samting, ol man i yusim ol pamkin bikos i gat planti na em i bikpela so em isi long ol i katim na wokim ol seip long en, olsem na ol i no yusim ol karot.

Em bikpela samting long save long bilip haiden long Halowin?

Yes. Maski sampela man i tingim Halowin olsem samting bilong kisim amamas, ol pasin ol i bihainim i pait wantaim tok bilong Baibel. Bilip giaman bilong Halowin i stori long ol man i dai pinis na ol spirit yumi i no inap lukim, o ol dimon.

Lukim ol dispela ves i kamapim tingting bilong God long bilip bilong Halowin:

• ‘Yupela i no ken lukim namel long yupela wanpela i yusim spirit nogut o wanpela i toktok wantaim spirit bilong ol daiman.’​—Lo 18:10, 11, King Jems Pisin Baibel.

  Mining: God i no orait long ol samting ol man i mekim long toktok wantaim ol man i dai pinis o giaman olsem ol i toktok wantaim ol man i dai pinis.

• “Ol man i dai pinis ol i no save long wanpela samting.”​—Eklisiastis 9:5.

  Mining: Bikos ol man i dai pinis i no inap save long wanpela samting, ol i no inap toktok wantaim ol man i stap laip.

• “Mi no gat laik long yupela i ken gat poroman pasin wantaim ol spirit nogut. Yupela i no inap dringim kap bilong Bikpela, na kap bilong ol spirit nogut.”​—1 Korin 10:20, 21, King Jems Pisin Baibel.

  Mining: Ol man i laik bai God i orait long ol i no ken poroman wantaim ol dimon.

• ‘Sanap strong na sakim ol pasin trik bilong Devil, long wanem, yumi pait wantaim ol spirit nogut.’​—Efesus 6:11, 12.

  Mining: Ol Kristen i mas sakim ol spirit nogut, na no ken mekim ol bung na ting ol i amamas wantaim ol.