Yu Save Laikim Tru Oganaisesen Bilong Jehova Long Graun?
SAPOS yu lukim long ai wanpela naispela ston daimon ol i bin katim gut, bai yu lukim wanem samting? Bai yu lukim wanpela naispela samting tru. Orait, nau mekim wok long wanpela strongpela glas na lukim dispela ston daimon. Nau yu lukim wanem samting? Bai yu lukim ol liklik mak nogut long en.
Olsem wanem? Bai yu tromoi dispela daimon, long wanem taim yu lukim long strongpela glas em i gat ol dispela mak nogut long en? Nogat, a? Taim yu lukim dispela daimon long ai tasol, yu lukim wanpela samting i naispela tru, na i winim olgeta narapela ston i gat bikpela pe bilong en.
Oganaisesen bilong Jehova long graun i kain olsem dispela daimon. I no gat narapela oganaisesen long graun, em lain bilong em inap i stap wanbel wantaim Man bilong wokim ol. Aposel Pita i raitim pas i go long ol Kristen bilong pastaim em God i bin makim ol long spirit holi na ol i gat tingting long kisim laip long heven, na em i stori long ol inap i stap wanbel wantaim God, na em i tok: “God i makim yupela pinis, na yupela i stap lain manmeri bilong em stret. Yupela i stap ol pris bilong lain bilong king. Yupela i stap lain manmeri i holi, em ol lain manmeri tru bilong God. Yupela i stap lain manmeri God i bin makim bilong em yet.” (1 Pita 2:9) Long nau, wanpela bikpela lain “arapela sipsip” em ol i tingting long kisim laip oltaim long graun, ol i bung wantaim hap bilong dispela “lain manmeri tru bilong God” em ol i stap yet long graun na ol i lotuim God wantaim dispela liklik lain. (Jon 10:16) Dispela tupela lain wantaim i insait long wanpela oganaisesen i narapela kain tru, olsem wanpela naispela ston tru i gat bikpela pe.
No Ken Tingting Nogut Long Ol Narapela
Tasol yumi mas save, ol manmeri bilong olgeta hap em ol i stap long dispela oganaisesen, ol i no gutpela olgeta—sin i stap long skin bilong ol tu. Orait, sapos yumi lukim dispela oganaisesen long wanpela “strongpela glas,” bai yumi lukim wanem samting? Bai yumi lukim sin bilong olgeta manmeri long dispela oganaisesen na bai yumi lukim ol pasin kranki na popaia bilong ol.—Rom 3:23.
Aposel Pol i tok em i save popaia. Em i tok: “Taim mi laik mekim gutpela pasin, pasin nogut i save pasim rot bilong mi.” (Rom 7:21) Olgeta Kristen i gat wankain hevi olsem Pol. Yumi olgeta i save popaia. Na sampela taim, narapela man i karim hevi long dispela popaia bilong yumi. Sapos yumi kisim save long pasin kranki o popaia bilong narapela Kristen, yu ting i stret sapos yumi bel hevi o les long em? Yu ting dispela i mas mekim na yumi no laikim moa oganaisesen bilong Jehova? Nogat tru! Yumi mas lukim oganaisesen olgeta, na yumi no ken lukim na tingim olgeta liklik pasin kranki na popaia bilong olgeta wan wan insait long dispela oganaisesen, olsem skelim ol long dispela “strongpela glas,” nogat.
Baibel i stori long pasin bilong ol man em strong bilong holi spirit i stap long ol, em ol pasin olsem, “pasin bilong laikim tru ol arapela na pasin bilong amamas na pasin bilong i stap bel isi na pasin bilong i no belhat kwik na pasin bilong helpim ol man na mekim gutpela pasin long ol na pasin bilong wokabaut stret oltaim na pasin bilong i stap isi na pasin bilong daunim laik bilong olpela bel.” (Galesia 5:22, 23) Tasol ol lotu na ol man bilong bisnis na wok politik ol i no bihainim dispela kain pasin. Ol i bihainim ol pasin em Baibel i kolim olsem “pasin bilong olpela bel.” Em ol kain pasin olsem “pasin birua na belhat na kros na bel nogut na mangal na pasin bilong tingting long yu yet tasol na tok pait na brukim lain, na pasin bilong bel kaskas long ol man i stap gut na pasin bilong spak na hambak na singaut bikmaus nabaut, na ol kain kain pasin olsem.” (Galesia 5:20, 21) Sapos wanpela daimon i stap namel long ol ston nating, em bai lait na yu inap lukim, na i wankain tu long lain bilong Jehova, ol i stap olsem gutpela samting tru namel long ol manmeri bilong dispela graun em ol i mekim ol pasin i no stret.—Matyu 5:14-16.
“Stap Wanlain Tru Long Wankain Tingting”
Olgeta liklik liklik hap bilong daimon i pas gut wantaim, na i wankain tu long oganaisesen bilong Jehova long graun, ol i wanbel long bilip na ol i pas gut wantaim olsem lain brata brata. Ol manmeri i stap insait long dispela lain ol i bihainim tok bilong Baibel long 1 Korin 1:10, em i tok: “Ol brata, long nem bilong Bikpela bilong yumi Jisas Krais mi tokaut strong long yupela olsem, yupela olgeta i mas wanbel long ol toktok yupela i mekim. Yupela i no ken bruk nabaut. Yupela i mas i stap wanlain tru long wankain tingting na wankain laik.”
Ol Witnes Bilong Jehova i no save tingim wanpela lain i winim narapela lain. Ol i kisim pinis “save i kam long God,” olsem na ol i save mekim wankain pasin tasol long olgeta man, maski ol i gat wanem kain skin. (Jems 3:17) Mipela i save litimapim nem bilong Jehova, long wanem, em i mekim dispela gutpela samting long lain bilong em, maski olgeta wan wan long dispela lain ol i gat sin.
Wanpela nius (The Christian Century) i stori long ol samting i bin kamap long 1990 na i tok, ‘olgeta lain long graun i bruk bruk i go long narapela narapela lotu na lain na tingting politik. Long hap bilong India na i go long hap bilong Yurop, na long hap bilong Midel-Is i go long hap bilong Solwara Pasifik, lotu i bung wantaim tingting bilong ples na wok politik—na sampela taim dispela i kamapim ol bikpela hevi na pait.’ Tru tumas, sapos man i laik mekim wok bilong God, i gat wanpela oganaisesen tasol ol inap i go long en, em dispela oganaisesen em strong na blesing bilong Jehova i stap long en.
“Bai Mi Mekim Yu i Kamap Strong Olsem Ston Daimon”
Ston daimon i gat bikpela strong, winim olgeta narapela samting man i bin painim long graun. Baibel i stori long man i mekim wok long daimon bilong katim nem samting bilong ol long narapela hap ston. (Jeremaia 17:1) Lukim dispela tok Jehova i bin mekim long Esekiel, em i tok: “Bai mi mekim yu i kamap strong olsem ston daimon, na strong bilong yu bai i winim strong bilong ol. Olsem na yu no ken pret long ol na surik long ol. Nogat. Ol i man bilong sakim tok tasol.” (Esekiel 3:8, 9) Jehova i strongim Esekiel bambai em i “kamap strong olsem ston daimon,” na bai em inap mekim wanpela tok profet long ol bikhetman.—Esekiel 2:6.
Na i wankain tu long nau, Jehova i mekim pes bilong lain bilong em i strong olsem ston daimon, bambai ol inap sanap strong na karim bikpela hevi i painim ol. Kain kain hevi i bin painim ol Witnes Bilong Jehova—gavman i bin tambuim wok bilong ol, na bikpela lain man i bung bilong mekim nogut long ol, na ol man i hangamapim ol na ol i dai; na paitim ol, na kalabusim ol nating, na givim bikpela pen long ol, na kilim i dai sampela. Tasol bilip bilong ol Witnes i stap strong.
“Lain Bilong Mi, Ol Bai i Amamas”
Baibel i tok profet long wanpela taim bai kamap na ol man bai “bihainim pasin bilong God long skin tasol na ol bai i no save liklik long bikpela strong i stap long pasin tru bilong God.” (2 Timoti 3:1, 5) Wanpela nius i tok, ‘Ol lotu Talatala na Katolik na Juda i tingting planti, long wanem lain bilong ol i wok long i go liklik.’ Tasol lain bilong Jehova i narapela kain—ol i wok strong long kisim save long tok bilong Baibel. Lain bilong ol i wok long i go bikpela, ol lapun na ol yangpela, ol man na ol meri, olgeta i save go long ol miting bilong ol long olgeta wik. Wanpela nius i bin kisim pas i stori long ol Witnes, na dispela pas i tok, ‘lotu bilong ol Witnes i bikpela samting tru long tingting bilong ol, winim olgeta narapela samting, na bikpela tingting bilong ol, em ol i laik tokim ol narapela man long lotu bilong ol.’
Dispela tingting bilong ol Witnes i mekim na ol i narapela kain tru long ol narapela lotu, kain olsem wanpela gutpela ston daimon. Yumi mas litimapim nem bilong dispela Man, long rot bilong spirit holi em i bin soim rot na strongim lain bilong em bambai ol inap bihainim pasin i stret.
Aisaia i mekim tok profet, olsem: “Mi God, Bikpela, mi tok olsem: Ol wokman bilong mi bai ol i gat planti kaikai na wara. . . . Ol lain bilong mi, ol bai i amamas, . . . Bel bilong ol wokman bilong mi bai i pulap long amamas na bai ol i singim ol song bilong amamas.”—Aisaia 65:13, 14.
Long nau yumi lukim truim bilong dispela tok profet. God i lukautim lain bilong em long wanpela narapela kain pasin! Olsem na sapos yu bung wantaim ol, yu no ken larim sampela tingting kranki i mekim na yu no amamas. Lukim dispela lain olgeta, na tingim dispela samting: I no gat narapela lain i stap long graun, em God i save lukautim na was long en. Yumi mas laikim tru dispela gutpela samting yumi inap insait long en!