Sapta 11
Bilong Wanem God i Larim Pasin Nogut i Stap?
LONG olgeta hap bilong graun pasin nogut na birua na hevi i stap. Planti taim ol manmeri i no gat asua ol i kisim hevi long dispela. Olsem na sampela man i gat tok long God. Ating ol i tok: “Sapos God i stap, bilong wanem em i larim ol dispela pasin nogut i kamap?”
2. (a) Husat ol i mekim ol pasin nogut nogut? (b) Ol man inap mekim wanem na planti hevi na pasin nogut i no ken kamap long graun?
2 Tasol husat ol i mekim ol dispela pasin nogut nogut? God i no mekim. Ol manmeri i mekim. God i no laik tru long pasin nogut. Na sapos ol man i bihainim ol lo bilong God, orait planti hevi na pasin nogut i no ken kamap long graun. God i tok yumi mas sori long ol narapela man. Em i tambuim pasin bilong birua na kilim man i dai, stil, pamuk, mangal, dring spak, na ol narapela pasin olsem. (Rom 13:9; Efesas 5:3, 18) God i wokim Adam tupela Iv i gutpela olgeta na tupela inap i stap amamas tru. Em i no laik bai tupela yet o ol pikinini bilong tupela i kisim pen o hevi.
3. (a) Asua bilong husat na pasin nogut i kamap? (b) Olsem wanem yumi save, Adam tupela Iv inap sakim Seten?
3 Seten i as bilong ol pasin nogut i kamap long graun. Tasol Adam tupela Iv tu i gat asua. Taim Seten i traim tupela, ol inap sakim em. Ol inap tokim Seten: “Yu klia!” Gutpela man Jisas i mekim olsem. (Matyu 4:10) Tasol tupela i no mekim, olsem na tupela i no stap gutpela man moa. Tupela i gat sin na yumi olgeta pikinini bilong tupela yumi tu yumi gat sin. Long dispela rot sik na hevi na i dai i painim yumi. (Rom 5:12) Tasol bilong wanem God i larim dispela pen na hevi i stap longtaim?
4. Wanem tok piksa i helpim yumi na yumi inap save, God bilong sori em inap larim pasin nogut i stap inap liklik taim?
4 Ating pastaim bai man i ting i no gat wanpela gutpela as tru na God i larim ol manmeri i karim hevi inap planti planti yia. Tasol yu ting dispela tingting i stret? Sampela papamama i sori tru long pikinini bilong ol, tasol ol i larim dokta i katim pikinini na inap liklik taim pikinini i kisim pen bambai dokta inap stretim sik bilong em. Inap liklik taim papamama i larim pikinini i kisim pen bambai em inap i stap gutpela long bihain. Orait, God i laik kamapim wanem gutpela wok na em i larim pasin nogut i stap?
BIKPELA TOK BILONG STRETIM
5. (a) Seten i mekim wanem tok i narapela kain long tok bilong God? (b) Seten i mekim wanem tok promis long Iv?
5 Taim Seten na Adam tupela Iv i bikhet long God, wanpela bikpela tok o askim i kamap. Yumi mas skelim dispela bikpela tok bambai yumi inap save bilong wanem God i larim pasin nogut i stap. Jehova i tokim Adam, em i no ken kisim kaikai long wanpela diwai long Iden. Sapos Adam i kisim, wanem samting bai painim em? God i tok: “Bambai yu dai.” (Jenesis 2:17) Tasol Seten i tokim Iv: “Yutupela i no ken dai. Sapos yutupela i kaikai pikinini bilong dispela diwai, bai yutupela i kisim save long wanem samting i gutpela, na wanem samting i nogut, na bai yutupela i kamap olsem God. God i save long dispela, na olsem em i tambuim yutupela.”—Jenesis 3:1-5.
6. (a) Bilong wanem Iv i sakim tok bilong God? (b) Taim tupela i kisim kaikai bilong diwai tambu, i olsem tupela i mekim wanem?
6 Iv i sakim tok bilong God na em i kaikai. Bilong wanem em i mekim olsem? Long wanem, em i ting sapos em i sakim tok bilong God dispela samting bai helpim em, na bai tupela inap bihainim laik bilong ol yet na God i no ken bosim ol moa. Bai tupela yet inap skelim wanem samting “i gutpela” na wanem samting “i nogut.” Adam i bihainim Iv na em tu i kaikai. Wanpela Baibel Katolik (The Jerusalem Bible) i stori long dispela namba wan rong na i tok: “Man yet i laik skelim wanem samting i gutpela na wanem samting i nogut na bihainim laik bilong em yet; em i no laik bai wanpela man i bosim em o putim lo long em . . . Dispela namba wan rong i laik daunim wok bos bilong God.” I stret God i stap nambawan bos bilong man, tasol man i laik pait long dispela wok bos bilong God.
7. (a) Taim tupela i bikhet long God, wanem bikpela tok i kamap? (b) I gat wanem ol bikpela askim i kamap long dispela tok na God i mas stretim?
7 Olsem na taim Adam tupela Iv i kaikai pikinini bilong diwai tambu, tupela i lusim God na ol i no i stap aninit moa long em. Ol i kirap bosim wokabaut bilong ol yet; ol i mekim ol samting ol yet i ting “i gutpela” o “i nogut.” Olsem na wanpela bikpela tok o askim i kamap, olsem: I stret God i stap nambawan bos bilong olgeta man? I stret God yet i mas skelim samting i gutpela bilong helpim ol man o i nogut? Jehova tasol i ken tok wanem pasin i stret na wanem pasin i no stret? O ol man yet inap bosim wokabaut bilong ol? Husat inap bosim gut ol man? Ol man inap sakim Jehova na i stap aninit long Seten na bosim gut graun? O God i mas bosim ol na kamapim wanpela gutpela gavman bambai gutaim i ken i stap oltaim long graun? Ol dispela bikpela askim i kamap taim Seten na Adam tupela Iv i bikhet na ol i laik daunim wok bos bilong God, na ol i gat tok long God wanpela tasol i stap bos bilong ol.
8. Bilong wanem God i no kilim i dai wantu dispela tripela bikhetman?
8 Tru, taim dispela pasin bikhet i kamap, Jehova em inap kilim i dai dispela tripela bikhetman. Em i gat bikpela strong moa, winim strong bilong ol. Tasol sapos em i kilim tripela i dai, dispela i no gutpela rot bilong stretim ol dispela bikpela tok i bin kamap. Dispela i no inap stretim dispela bikpela tok olsem ol man yet inap bosim gut wokabaut bilong ol na maski long God. Olsem na Jehova i givim hap taim long ol bambai em i ken stretim dispela bikpela tok i bin kamap.
EM I STRETIM DISPELA TOK
9, 10. Ol man i sakim God na traim save bilong ol yet long bosim graun, na wanem samting i kamap?
9 Nau dispela hap taim i pinis na wanem samting i bin kamap? Inap 6,000 yia pinis ol man i bin bosim wokabaut bilong ol yet na God i no bin soim rot long ol, orait yu ting ol i mekim gut dispela wok? Yu ting ol i bin kamapim ol gutpela gavman i bin helpim olgeta manmeri long kisim gutpela sindaun na i stap amamas? O yu ting tok bilong profet Jeremaia i stret? Em Jeremaia i tok: “I no wok bilong man long bosim wokabaut bilong em.”—Jeremaia 10:23, NW.
10 Ol man i bin kamapim kain kain gavman. Tasol i no gat wanpela gavman i bin kamapim gutaim long graun. Ating sampela man i lukim sampela wok ol man i mekim na ol i tok, wok bilong ol man i kamap gutpela. Tru, long sampela hap ol man i lusim ol banara na ol i gat save long wokim ol bom nogut nogut, tasol ol manmeri i tingim dispela samting na ol i pret, nogut narapela bikpela pait i kamap. Na nau ol man inap wokabaut long mun, tasol sapos ol i no inap sindaun gut wantaim long graun, yu ting yumi ken tok wok bilong ol i kamap gutpela? Ol i wokim ol haus i gat ol gutpela gutpela samting long en, tasol sapos ol famili i stap long ol dispela haus ol i kros na pait na famili i bruk, yu ting em i gutpela? Ol man i bung na pait long rot, na bagarapim ol samting na bagarapim man, na bikhet, yumi no amamas long ol dispela pasin, a? Nogat tru! Tasol ol dispela pasin nogut i kamap long wanem ol man i traim save bilong ol yet long bosim sindaun bilong ol, na ol i maski long God.—Provep 19:3.
11. Olsem na husat i mas bosim ol man?
11 Olsem na yumi inap save, wok bilong ol man long bosim sindaun bilong ol yet, em i no kamap gutpela; ol i pundaun tru long mekim dispela wok na ol manmeri i bin kisim bikpela pen na hevi. Baibel i tok: “Man i bin bosim man na mekim nogut long em.” (Eklisiastis 8:9, NW) Tru tumas, God i mas bosim ol man na soim rot long ol. God i wokim man bambai man i mas kisim kaikai na dring wara. Na olsem tasol man i mas bihainim ol lo bilong God. Sapos man i sakim kaikai, em i no inap i stap gutpela. Na i wankain tu sapos em i sakim ol lo bilong God, bai hevi i painim em.—Provep 3:5, 6.
BILONG WANEM I STAP LONGTAIM OLSEM?
12. Bilong wanem God i larim bikpela hap taim tru i lus bilong stretim dispela tok?
12 Tasol bilong wanem God i larim bikpela hap taim i lus, olsem 6,000 yia samting, bilong stretim dispela bikpela tok? God i no laik stretim kwik? Nogat, long wanem, sapos em i laik stretim kwik dispela tok, orait bihain bai sampela man i sutim tok long em. Bai ol i tok, em i bin givim liklik hap taim tumas long ol man na ol i no gat taim inap long ol i traim save bilong ol long bosim sindaun bilong ol yet. Tasol God i no stretim kwik, olsem na ol man i gat bikpela hap taim bilong traim save bilong ol na kamapim wanpela gutpela gavman em inap helpim olgeta manmeri long i stap gutpela. Na ol i gat taim tu bilong kisim save na wokim kain kain samting em inap helpim olgeta manmeri long kisim gutpela sindaun. Tru, ol i bin kamapim kain kain gavman. Na ol i bin kisim save long planti samting. Tasol olsem wanem? Ol dispela samting i bin kamapim gutpela taim long graun na givim gutpela sindaun long ol man? Nogat tru!
13. (a) Ol man i bin kisim save long planti samting, tasol wanem samting i kamap long nau? (b) Olsem na yumi save tru long wanem samting?
13 Long nau planti hevi moa yet i kamap long graun, olsem kilim man i dai, stil, bagarapim graun, pait, ol famili i bruk, na ol narapela hevi tu. Olsem na ol saveman bilong graun i ting, liklik taim bai olgeta man i bagarap. Longtaim pinis, inap 6,000 yia samting, ol man i bin bosim graun na ol i kisim bikpela save, tasol ol samting ol yet i mekim i laik bagarapim ol! Olsem na yumi save tru, ol man i no inap sakim God na bosim gut sindaun bilong ol yet! Na i no inap wanpela man i ken sutim tok long God na tok, dispela hap taim em i liklik tumas long stretim dispela bikpela tok bipo i bin kamap.
14. Bilong wanem yumi mas laik tru long save long dispela narapela bikpela tok Seten i bin kamapim?
14 Tru tumas, i gat gutpela as na God i larim ol man, em Seten i bosim ol, na ol i kamapim ol dispela pasin nogut i bin i stap longtaim tru long graun. Taim Seten i bikhet i gat narapela bikpela tok tu i kamap, na i mas i gat hap taim bilong stretim dispela tok tu. Orait, nau yumi ken skelim dispela bikpela tok, na dispela tu bai helpim yumi long save bilong wanem God i larim pasin nogut i stap. Yu mas laik tru long save long dispela bikpela tok, long wanem yu tu yu insait long en.
1. (a) Nau wanem kain pasin i stap long graun? (b) Sampela man i gat tok long wanem samting?
[Piksa long pes 100]
Taim papamama i larim dokta i katim pikinini na pikinini i kisim pen, i gat as bilong dispela samting na papamama i mekim olsem. Na i gat as tu na God i larim ol manmeri i karim hevi inap liklik taim
[Piksa long pes 101]
Taim Adam tupela Iv i kaikai pikinini bilong diwai tambu, tupela i lusim God na ol i no i stap aninit moa long em. Tupela yet i kirap long skelim wanem samting i gutpela na wanem samting i nogut
[Ol Piksa long pes 103]
God i wokim man bambai em i mas kisim kaikai na dring wara, na olsem tasol man i mas bihainim ol lo bilong God bambai em i ken i stap gutpela