Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w94 1/15 p. 21-23
  • Ol Painia Ol i Givim na Kisim Ol Blesing

No gat vidio bilong dispela seksen.

Sori, popaia kamap long lodim vidio.

  • Ol Painia Ol i Givim na Kisim Ol Blesing
  • Wastaua i Tokaut Long Kingdom Bilong Jehova—1994
  • Ol Liklik Het Tok
  • Wankain Infomesen
  • Bilong Wanem Sampela i Mekim
  • Ol Narapela Inap Helpim Yu
  • Bihainim Gut Dispela Tingting
  • Planti Amamas na Blesing
  • Ol Gutpela Samting Yumi Kisim Long Wok Painia
    Wastaua i Tokaut Long Kingdom Bilong Jehova—1997
  • Wok Painia—Yu Inap Mekim?
    1995 Wok Kingdom Bilong Yumi
  • Wok Painia—Yu Inap Mekim?
    1998 Wok Kingdom Bilong Yumi
  • “Yu Inap Kamap Wanpela Gutpela Painia!”
    2010 Wok Kingdom Bilong Yumi
Lukim Moa
Wastaua i Tokaut Long Kingdom Bilong Jehova—1994
w94 1/15 p. 21-23

Ol Painia Ol i Givim na Kisim Ol Blesing

“WOK painia em i gutpela wok tru, winim olgeta wok bilong skin. Taim yumi mekim wok bilong helpim ol man long kisim save long Jehova na tok i tru bilong em, bel bilong yumi i gutpela tru.” Wanpela meri Kristen i tok olsem​—⁠em i mekim wok painia, olsem autim tok bilong Kingdom long olgeta de. I no gat narapela wok inap givim bikpela amamas long yumi olsem wok painia.

Wok painia em wanpela gutpela wok tru yumi ken putim olsem wanpela mak bilong winim. Tasol yumi ken mekim wanem bambai yumi ken stap long wok painia inap longtaim na bai yumi ken kisim ol gutpela blesing long en?

I mas i gat tupela samting. Namba wan i olsem sindaun bilong yumi. Planti manmeri i gat sampela hevi long sindaun bilong ol o i gat sampela samting moa i pasim ol na ol i no inap mekim wok painia. Na namba 2 i olsem ol i mas winim sampela mak bilong ol samting bilong spirit na ol i mas i gat stretpela tingting long dispela wok. Tasol maski yumi no gat rot bilong mekim wok painia, yumi olgeta inap wok long kisim pasin bilong strongpela Kristen.

Bilong Wanem Sampela i Mekim

Wanem sampela mak em Kristen i mas winim bilong mekim gut wok painia? Em i mas save gut long autim gutnius long ol man em i no save long ol, na em i mas save long mekim ol gobek long ol man i laik harim, na em i mas save long pasin bilong mekim Baibel-stadi long man. Sapos painia i no save gut long mekim ol dispela wok, ating em bai bel hevi. Tasol i gat sampela samting moa yumi mas tingim.

Olsem: Bilong mekim olgeta samting bilong lotuim Jehova yumi mas pas gut wantaim em na oganaisesen bilong em. Na bilong mekim wok painia tu i wankain. Wanpela yangpela painia nem bilong em Rado em i tok: “Sapos yangpela i tingim Jehova na wokabaut long rot bilong tok i tru, dispela i gutpela samting tru, winim olgeta narapela samting.” Tru tumas, wok painia em wanpela gutpela rot bilong ol yangpela long kamapim bel bilong ol, ol i laikim tru Jehova na ol i pas gut wantaim em.​—⁠Saveman 12:⁠1.

Save na gutpela tingting tu i bikpela samting. (Filipai 1:​9-11) Dispela i olsem bensin i kirapim ensin spirit bilong yumi na em bai wok yet i go. Yumi mas stadi oltaim, nogut strong bilong spirit i lusim yumi na yumi no givim bel moa long autim tok. Tasol taim yumi stadi, nogut dispela save i go long tingting tasol​—⁠em i mas go daun long bel tu. (Sindaun 2:⁠2) Olsem na taim yumi stadi, yumi mas beten na tingim gut ol dispela save yumi kisim na bai em i ken kirapim bel bilong yumi. Olsem na sapos bihain yumi gat rot, bel bai kirapim yumi na bai yumi gat laik long mekim wok painia.​—⁠Lukim Esra 7:⁠10.

Na bilong kamap painia yumi mas daunim sampela laik bilong skin. Yangpela man Ron i stretim pinis ol samting bilong kirap mekim wok painia. Em i wet tasol long kisim wanpela wok mani i gat bikpela pe na bai em i ken kisim ol gutpela samting bilong skin, tasol em i gat taim tu bilong mekim wok painia. Em i kamapim dispela tingting long wanpela strongpela sista, na em i kirap nogut long tok bilong sista, em i tok: “Jehova i save mekim gut long ol wok bilong yumi​—⁠em i no mekim gut long ol tok promis bilong yumi.” Ron i kisim wanpela wok i no gat bikpela pe, tasol em i gat taim bilong mekim wok painia. Sapos man i bihainim tok bilong Matyu 6:​25-34, liklik pe bai inap long em.

Na yumi mas i gat pasin daun na amamas long bihainim ol gutpela tok ol i givim long yumi. Dispela inap helpim yumi long go insait long wok painia. Wanpela meri Kristen, em Hanna, taim em i yangpela yet em i gat laik long mekim wok painia. Tasol em i mas mekim bikpela long ol pikinini bilong em, na bihain em i go insait long wanpela wok bisnis. Orait, ol elda i givim sampela gutpela tok long em, na em i bihainim na em i lusim gutpela wok mani bilong em na em i kirap mekim wok painia. Nau Hanna i kisim bikpela amamas tru long helpim ol man long givim bel long Jehova na dediket long em, na helpim tu ol man i slek long autim tok.

Sapos yumi pilim tru ol gutpela samting tok i tru i bin mekim long yumi, dispela tu inap kirapim yumi long mekim wok painia. Yumi ken tingim wanpela meri em marit bilong em i laik bagarap na em i gat bikpela bel hevi. Tasol em i kisim save long tok i tru bilong Baibel na em i bihainim ol dispela tok. Em i amamas tru long ol samting tok i tru i bin mekim long em, na em i ting, gutpela rot bilong kamapim bel bilong em, em i mas mekim wok painia na helpim ol narapela man. Em i mekim olsem, na nau em i gat planti Baibel-stadi na em wantaim famili bilong em ol i stap amamas.

Ol Narapela Inap Helpim Yu

Planti taim ol painia i save kamapim sampela painia moa. Rado i gat 6-pela krismas taim tupela painia i stadi wantaim papamama bilong em. Taim em i manki yet em i save go wantaim ol dispela painia long autim tok. Orait, taim em i gat 17 krismas em i kirap mekim wok painia oltaim. Narapela yangpela man, em Arno, em i go bikpela insait long famili Kristen, tasol bihain em i no strong moa long samting bilong spirit. Orait, em i kirap mekim ol samting bilong kisim bek strong bilong spirit. Em i tok: “Ol painia i strongim mi. Taim mi gat malolo long skul mi raun wantaim ol, na sampela taim mi kisim 60 aua long mun long autim tok. Bihain i no hatwok tumas long mi long mekim wok painia oltaim [ol i mas kisim 90 aua long mun].” Taim ol yangpela i bin tingim gut tok bilong 1 Korin 7:​29-31, olsem yumi no ken mekim wok tumas long ol samting bilong graun, dispela i bin helpim ol tru.

Sapos famili i putim ol samting bilong spirit i go pas na papamama i kirapim ol pikinini long tingting long mekim wok painia, dispela inap kirapim ol na bai ol i gat laik long mekim. Philo i go bikpela insait long kain famili olsem. Em i tok: “Planti ol i tokim mi long i stap yet long skul na bihain mi inap kisim gutpela wok mani. Tasol papamama i helpim mi long kisim gutpela tingting. Ol i tok, sapos mi laik i stap gutpela tru long bihain, orait nau mi mas mekim ol samting bambai mi ken pas gut wantaim Jehova.”

Yangpela meri Thamar em tu i tok, papamama i stap olsem gutpela piksa na ol i wok long helpim em, na em i kirap mekim wok painia. Em i tok: “Mi no inap tok wanem taim mi bin kirap tingim ol samting bilong spirit. Mi save, taim mama i karim mi, mi no gat dispela tingting. Tasol oltaim papamama i save autim tok na go long ol miting, na ol i givim bel moa yet long tok i tru, na dispela i helpim mi tru long tingim ol samting bilong spirit.”

Bihainim Gut Dispela Tingting

Taim man i go insait long wok painia, em i mas strong long i stap long dispela wok na kisim ol gutpela samting dispela gutpela tingting bilong em i bin kirapim em long mekim. I gat sampela gutpela tok bilong helpim em, olsem: Painia i mas makim gut taim bilong mekim ol samting na bai ol dispela aua i kamapim gutpela wok. Tasol bikpela samting tru, em painia i mas pas gut long Jehova na oganaisesen bilong em.

Na painia i mas beten long Jehova. Wanpela man nem bilong em Cor em i tok: “Taim mi kam insait long tok i tru, mi gat bikpela laik tru long mekim wok painia.” Tasol papa i strong long em i mas pinisim skul bilong em long Yunivesiti Bilong Wok Didiman. Taim em i pinis long skul em i kirap painia. Bihain em i marit na meri bilong em i wok painia wantaim em. Tasol meri i kisim bel na Cor i tingting planti, nogut em i mas lusim wok painia. Em i tok: “Planti taim mi beten long Jehova na kamapim laik bilong mi long i stap yet long wok painia.” Orait, bihain em i kisim wanpela wok i givim rot long em long mekim yet wok painia na lukautim famili bilong em tu.

Painia i mas ting olsem, samting em i holim pinis, em inap long em. Aposel Pol i tok: “Yupela i no ken . . . mangal long mani. Yupela i mas ting olsem, samting yupela i holim pinis, em inap long yupela. God i tokim yumi pinis olsem, ‘Bai mi no lusim yu. Bai mi no larim yu i stap nating.’ ” (Hibru 13:⁠5) Dispela tingting i helpim Harry na Irene long i stap long wok painia. Irene em i aipas, tasol em i wok painia inap 8-pela yia pinis. Em i tok: ‘Maski mipela i no gat planti mani, mipela i no hevi long dispela. Mipela i was gut long ol samting mipela i save baim, nogut mipela i hatwok long bekim dinau. Mipela i gat liklik samting tasol, tasol i stap bilong mipela i gutpela, na mipela i kisim planti blesing.’

Planti Amamas na Blesing

Thamar i painia inap 9-pela yia pinis na em i tok: “Mi stap klostu tru long Jehova, i olsem em i holim han bilong mi.” (Song 73:23) Na em i tingim sampela hevi tu. Em i tok: “Sin i stap long skin bilong mi na bilong ol narapela, oltaim dispela i putim hevi long mi. Na mi save lukim sampela brata sista ol i gat gutpela sindaun na planti samting bilong skin, na taim mi wokabaut long ren na long taim bilong kol na autim tok long ol man, mi ting ol dispela samting bilong skin i gutpela na mi laikim. Tasol long bel bilong mi, mi save mi no inap tru long lusim wok painia na kisim kain sindaun olsem bilong ol, nogat tru. Wok painia tasol inap givim bikpela amamas long yumi na yumi stap bel gut na kisim planti blesing.” Yu tu yu laik kisim ol amamas na blesing olsem?

Ol painia i save lusim bikpela hap taim long autim tok, olsem na ol inap helpim planti manmeri long kisim save long tok i tru bilong Baibel. Harry na Irene i tok: “I gat planti gutpela wok yumi inap kisim insait long oganaisesen bilong Jehova, tasol taim yumi helpim nupela man long kamap strong na kamap wanpela wokman bilong Jehova, dispela i gutpela samting tru.”

Narapela painia i tok: “Tok bilong Sindaun 10:22 i makim mi stret, em i tok: ‘Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.’ Insait long ol yia mi bin mekim wok bilong Jehova, planti taim mi lukim truim bilong dispela tok i painim mi.”

Olsem wanem long yupela ol papamama? Yupela wok long putim laik long bel bilong pikinini long mekim wok painia? Na yupela ol painia, yupela wok long kirapim dispela laik long bel bilong ol narapela? Na olsem wanem long yupela ol elda? Yupela save helpim ol painia long kongrigesen bilong yupela? Yupela wok long kirapim ol narapela long kongrigesen na bai ol i gat laik long mekim wok painia? Mipela laik bai planti brata sista moa i ken tingting long mekim wok painia na kisim ol gutpela blesing long en.

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim