Pinis Long Wok Mani—Em i Opim Rot Long Mekim Wok Bilong God?
PINIS long wok mani—long planti man dispela em i pinis bilong wanpela bikpela hap taim bilong bel i no stap isi na planti samting i save skrapim bel. Ol i bin kalabus insait long wanpela wok ol i save les tru long mekim, o ol i mas hariap hariap long olgeta taim, olsem na planti ol i amamas long wetim taim bilong pinis long wok—em i olsem wanpela rot i op long kisim malolo na i stap fri long mekim ol samting. Tasol long planti man, taim ol i stap pinis long dispela rot, ol i save les tru long i stap bilong ol, na ol i no stap isi. Taim ol i malolo na mekim ol samting bilong kisim amamas, ol i no save pilim olsem ol i mekim wanpela gutpela wok, olsem ol i bin pilim taim ol i mekim wok tru.
Long ol Witnes Bilong Jehova, taim ol i pinis long wok mani, dispela inap “opim rot” long ol i ken mekim “bikpela wok.” (1 Korin 16:9) Tru, taim man i go lapun, dispela i save givim sampela hevi long em, na tu, i gat sampela samting em i no inap mekim, tasol sampela lapun i save pinis, taim Jehova i helpim ol, ol inap mekim bikpela wok moa bilong em, winim bilong bipo. Yumi ken tingim stori bilong sampela lapun Kristen long Netelan. Long yia bilong wok bilong 1995, i gat olsem 1,223 painia (em ol manmeri i save autim tok bilong Kingdom long olgeta de), na 269 painia namel long ol, ol i gat 50 krismas o i winim bikpela krismas moa. Long dispela 269 painia, 81 i gat 65 krismas o ol i winim bikpela krismas moa.
Sampela ol i save bihainim yet pasin bilong wok strong olsem ol i bin mekim taim ol i wok mani, na long dispela rot ol inap mekim wok painia. (Skelim wantaim Filipai 3:16.) Karel, em wanpela Kristen i pinis long wok mani, em i tok: “Taim mi mekim wok mani, mi save kirap long wok long 7:30 long moningtaim. Taim mi kirap long kisim pensen, mi tingting olsem bai mi bihainim yet dispela pasin mi bin kisim long mekim wok mani. Long 7 klok long olgeta moningtaim mi save kirap mekim wok bilong tilim nius long rot klostu long ples bilong kisim tren.”
Na ol i mas tingting gut na stretim gut ol samting na bai wok bilong ol i ken kamap gutpela. (Sindaun 21:5) Olsem: Sampela ol i bin putim hap mani i stap bilong lukautim ol long kaikai samting taim ol i mekim wok painia. Sampela i tingting pinis olsem ol i no ken tromoi mani long baim planti samting, na ol bai kisim wanpela wok haptaim. Tingim Theodore na Ann. Taim tupela i marit nupela ol i mekim wok painia, na ol i mekim i go inap long taim ol i gat famili, na nau ol i mas lusim wok painia. Tasol tingting bilong mekim wok painia i stap strong yet long bel bilong tupela! Taim ol pikinini bilong tupela i wok long go bikpela, oltaim tupela i wok long kirapim ol long mekim wok painia. Na bikpela samting moa, em Theodore na Ann i stap olsem gutpela piksa—planti taim tupela i save mekim wok painia haptaim. Taim ol pikinini i go bikpela, Theodore na Ann i lusim sampela hap wok mani bilong ol bambai ol i gat bikpela hap taim bilong mekim wok autim tok.
Bihain ol pikinini i go insait long wok painia na ol i lusim papamama, na nau Ann i kirap mekim wok painia. Wanpela taim em i laik kirapim Theodore long lusim wok mani bilong em. Ann i tokim em: “Mitupela wantaim inap mekim wok painia.” Orait Theodore i toksave long bos long samting em i laik mekim. Em i kirap nogut taim bos i tok em i laik givim wanpela wok haptaim long em bilong helpim em. Bos i tok: “Ating yu laik mekim wok oltaim long bos bilong yu i stap antap [long heven].” Nau Theodore na Ann i amamas long mekim wok painia wantaim.
Ol hevi i bin painim sampela, dispela i kirapim ol long mekim wok painia. Pikinini meri na yangpela bubu meri bilong tupela lapun marit ol i dai, na dispela i kirapim tupela lapun long skelim gut ol samting ol i wok long mekim insait long ol yia i stap yet long ol. (Saveman 7:2) Tupela i no larim bel hevi i daunim ol; tupela i kirap mekim wok painia, na nau ol i winim pinis 8-pela yia long dispela wok!
Tru, bilong i stap long wok painia, man i mas i gat strongpela tingting long mekim dispela wok. Yumi ken tingim Ernst na meri bilong em Riek. Tupela i kirap mekim wok painia taim ol pikinini i lusim ol pinis. Orait, i no longtaim na wanpela wanwok bilong bipo i laik givim wanpela wok long Ernst em inap kisim bikpela mani long en. Ernst i tokim em: “Mipela i gat gutpela bos tru, winim olgeta narapela bos, na mipela i no laik lusim wok bilong em!” Ernst na meri bilong em ol i stap gut long wok bilong Jehova, olsem na rot i op na tupela i kisim sampela bikpela wok moa. Ol i winim 20 yia long wok sekit, na nau ol i mekim yet wok painia. Olsem wanem? Tupela i bel hevi long ol i bin lusim sampela samting bilong ol yet na mekim dispela wok? Bipo liklik tupela i bin raitim pas na i tok: “Sapos em i laik bilong Jehova, inap 3-pela mun bihain bai mitupela i mekim amamas bilong makim namba 50 yia bilong mitupela i marit. Dispela namba 50 yia bilong marit, ol man i save kolim olsem gutpela yia i kain olsem gol. Tasol mitupela inap tok olsem, ol gutpela yia bilong mitupela i kain olsem gol, ol i bin kirap taim mitupela i kirap long mekim wok painia.”
Planti ol i pilim pinis olsem dispela rot i op long ol i ken mekim bikpela wok moa, em i rot tu bilong kisim bikpela amamas moa! Wanpela brata i bin kirap mekim wok painia tupela wik bihain long taim em i kisim 65 krismas. Em i tok: “Insait long 10-pela yia mi mekim wok painia, mi kisim planti blesing tru. Long ol yia paslain long dispela taim, mi no bin kisim planti blesing olsem.” Tupela marit i winim pinis 7-pela yia long wok painia ol i tok: “Ol marit i gat wankain krismas na sindaun olsem mitupela, i stret ol i mas mekim dispela wok. Long hap mipela i autim tok long en, planti taim mipela i save lukim ol marit ol i gat wankain krismas samting olsem mipela—ol i sindaun gut long haus bilong ol, na skin bilong ol i wok long kamap patpela, na i go lapun, na ol skru i go strong na i no wok gut. Wok bilong autim tok i save strongim tingting na skin bilong mitupela. Oltaim mitupela i save stap wantaim. Mitupela i save lap planti na amamas long i stap bilong mipela.”
Tru, i no olgeta lapun i gat rot long mekim wok painia. Tasol ol dispela Kristen i ken bilip tru olsem, Jehova i amamas long ol wok bilong em ol inap mekim. (Skelim wantaim Mak 12:41-44.) Wanpela sista em skin bilong em i nogut na em i save stap long wanpela kain haus bilong lukautim ol lapun na ol man i no inap lukautim gut skin bilong ol. Tasol i gat wanpela rot i op long em tu! Wanpela dokta i askim em, em i save mekim wanem insait long ol planti aua em i sindaun i stap. Em i stori olsem: “Mi tokim em, mi no gat taim bilong mekim ol wok bilong mi. Dokta i no kisim gut tok bilong mi. Orait mi tokim em, mi sot long taim, long wanem, mi gat planti gutpela wok bilong mekim long olgeta de. Mi no bel hevi long i stap wanpis, tasol mi wok long painim ol narapela ol i bel hevi long i stap wanpis, na mi traim tokim ol long ol gutpela samting God i laik mekim bilong helpim ol man.” Na sista i tok: “Mi gat klostu 80 krismas, olsem na mi no inap mekim bikpela wok tumas. Yupela i ken beten bilong helpim mi na bai mi inap bringim planti man moa i kam long Jehova.”
Olsem wanem long yu? Yu winim pinis bikpela krismas na klostu nau bai yu pinis long wok mani? Ating yu amamas long rot i laik op na yu inap malolo na yu no gat bikpela wok moa, tasol dispela i no rot bilong kisim ol blesing bilong spirit. Beten na skelim i stap bilong yu. Ating rot inap op long yu tu na bai yu inap mekim bikpela wok moa long wok bilong Jehova.
[Ol Piksa long pes 25]
Taim yumi pinis long wok mani, dispela inap opim rot bilong mekim bikpela wok moa long autim tok