Askim

Long Baibel, tok “ol arapela sipsip” na ‘bikpela lain’ i makim wankain samting o narapela narapela samting?

Dispela tupela tok i no makim wankain samting, tasol yumi no ken kros o bel nogut sapos sampela i paul liklik long dispela.

Klostu olgeta Kristen i save long ol ves dispela tupela tok i stap long en. Tok “ol arapela sipsip” i stap long Jon 10:16. Long dispela ves, Jisas i tok: “Mi gat ol arapela sipsip tu, na ol i no bilong dispela banis. Mi mas bringim ol dispela sipsip tu i kam. Na bai ol i harim maus bilong mi. Na bai i gat wanpela lain sipsip tasol na wanpela wasman tasol bilong ol sipsip.” Na tok bilong ‘bikpela lain’ i stap long Kamapim Tok Hait 7:​9, olsem: “Orait bihain mi lukluk gen, na mi lukim planti manmeri tru [olsem bikpela lain] ol i bung i stap, na i no inap man i kaunim namba bilong ol. Dispela ol manmeri ol i bilong olgeta lain man na bilong olgeta kantri na bilong olgeta kain skin na bilong olgeta tok ples. Ol i sanap i stap long pes bilong sia king na long ai bilong Pikinini Sipsip. Ol i bin putim ol longpela waitpela klos, na long han bilong ol, ol i holim ol lip bilong diwai pam.”

Orait, pastaim yumi ken skelim tok bilong Jon 10:16. Ol dispela “sipsip” i husat? Yumi mas save, Baibel i kolim olgeta gutpela disaipel bilong Jisas olsem sipsip. Long Luk 12:32 em i kolim ol disaipel ol bai go long heven olsem “liklik lain.” Wanpela liklik lain bilong wanem samting? Bilong lain sipsip. Ol “sipsip” bilong “liklik lain” bai mekim wok long Kingdom bilong heven. Tasol i gat ol narapela man, ol i wet long kisim laip oltaim long graun, na Jisas i tingim ol tu i olsem sipsip.

Yumi ken lukim dispela long Jon sapta 10. Pastaim Jisas i stori long ol sipsip, olsem ol aposel bilong em, em bai singautim ol bilong kisim laip long heven, na long ves 16, em i tok: “Mi gat ol arapela sipsip tu, na ol i no bilong dispela banis. Mi mas bringim ol dispela sipsip tu i kam.” Longtaim pinis ol Witnes Bilong Jehova i save, long dispela ves Jisas i stori long ol manmeri ol inap kisim laip long graun. Paslain long taim bilong ol Kristen, ol bilipman olsem Abraham na Sara na Noa na Malakai ol i gat tingting long kisim laip long graun. Olsem na i stret yumi ken tok ol i insait long lain “arapela sipsip,” em Jon 10:16 i stori long en. Long Taim Bilong Wan Tausen Yia, ol dispela bilipman bilong bipo bai kirap bek na bai ol i kisim save long Krais Jisas na bilip long em, na bai ol i kamap ol “arapela sipsip” bilong Gutpela Wasman.

Taim God i pinis long singautim lain bilong heven, planti milion manmeri i bin kamap Kristen tru. I stret yumi ken kolim ol tu olsem “ol arapela sipsip,” long wanem, ol i no bilong “liklik lain sipsip.” Ol arapela sipsip bilong nau i wet long kisim laip oltaim long Paradais long graun.

Orait, husat ol i olsem ‘bikpela lain’ em Kamapim Tok Hait 7:9 i tok long en? Lukim ves 13, i gat askim olsem: “Ol dispela manmeri . . . em ol husat? Ol i kam long wanem hap?” Bekim i stap long Kamapim Tok Hait 7:​14, i tok ol i winim taim bilong ‘bikpela hevi tru.’ Olsem na dispela ‘bikpela lain’ em ol manmeri i abrusim bagarap long taim bilong bikpela hevi tru. Olsem ves 17 i tok, Krais bai bringim ol i go “long ol hul i gat wara i kamap, em wara bilong givim laip” long ol hia long graun.

Tasol yumi save, bilong ol i ken abrusim bagarap long bikpela hevi tru klostu nau bai kamap, pastaim ol i mas wasim klos bilong ol long blut bilong Pikinini Sipsip na kamap ol man bilong lotu tru long God. Olsem na tru Kamapim Tok Hait 7:9 i stori long dispela bikpela lain taim ol i winim pinis taim bilong bikpela hevi tru, tasol yumi ken kolim dispela tok ‘bikpela lain’ bilong makim olgeta manmeri i wet long kisim laip oltaim long graun, em ol i mekim wok bilong Jehova nau long taim ol gavman i no daunim yet ol lotu giaman na bikpela hevi tru i no kirap yet.

Yumi ken tingim olsem: Dispela tok “ol arapela sipsip” i karamapim planti manmeri moa, olsem olgeta wokboi bilong Jehova i bilong kisim laip oltaim long graun. Na tok ‘bikpela lain’ i makim tasol ol sipsip nau ol i bung na ol inap winim taim bilong bikpela hevi tru. Planti tru bilong ol gutpela Kristen i stap long nau ol i bilong lain “arapela sipsip” na ‘bikpela lain’ tu.

Mipela i laik tok gen olsem i gutpela yumi save klia long insait bilong ol kain tok olsem, tasol i no gat wok long ol Kristen long tingting planti sapos sampela i paul liklik long dispela tupela tok. Pol i toksave olsem, nogut sampela “i bikhet” na “tok pait nabaut long ol liklik samting nating.” (1 Timoti 6:⁠4) Sapos yumi yet i save gut olsem ol dispela kain tok i makim narapela narapela samting, em gutpela. Tasol sapos narapela i no save gut olsem long ol tok Baibel i kolim na em i paulim tok liklik, i no gat wok long yumi sutim tok long em o tingting nogut long em.