Stadi 11

Kamapim Gut Ol Tok i Givim Save Long Man

¹ Mas redim tok pastaim. Yumi mas lusim hap taim na wok strong long redim ol tok bilong yumi. Sapos yumi mekim olsem, bai yumi amamas, long wanem, save bilong yumi i go bikpela na yumi painim pinis sampela gutpela tok bilong helpim ol man, na sapos ol i harim ol bai laikim Tok Bilong God. Dispela kain tok bai litimapim nem bilong Jehova.

² As bilong tok. Ol man bilong harim, nogut ol i lusim tingting long tok bilong yumi, olsem na yumi mas tok stret na tok klia long ol. Taim yumi wok long redim stori bilong yumi, yumi ken askim olsem: Bilong wanem? Wanem taim? We? Insait long stori yumi ken kamapim bekim bilong ol dispela askim. Mas kolim klia nem bilong ol ples, na det tu, na tokim ol man long as bilong stori bilong yu na bai ol i ken save tok bilong yu i stret. Na tokim ol, i gutpela sapos ol i ken save long ol dispela samting na bilong wanem i gutpela.

³ Tok i givim gutpela save. Yumi laik bai ol man i ken kisim gut ol tok bilong yumi. Sapos yumi givim tok long ol brata, yumi ken redim sampela strongpela tok; tasol sapos yumi mas givim tok long nupela man o long ol man bilong ausait yumi ken givim narapela kain tok long ol. Yumi mas mekim tok bilong yumi i stret long ol man bilong harim.

⁴ Taim yu redim tok, askim skin bilong yu olsem: Olsem wanem long ol dispela man i harim tok bilong mi? Bilong wanem mi givim dispela tok long ol? Mi laik bai ol i lainim wanem samting long tok bilong mi?

⁵ Tok i helpim ol man. Yumi mas save long stretpela pasin Kristen na pasin bilong mekim wok bilong autim tok. Em bikpela samting. Olsem na tok bilong yumi i mas helpim ol man long bihainim stretpela pasin na mekim gut wok bilong ol.

⁶ Sumatin wantaim wasman bilong Skul, tupela i ken tingim ol dispela askim olsem: Sumatin i kamapim wanem ol lo insait long tok? Ol dispela lo bai helpim yumi long tingim gut rot yumi mas bihainim? Ol dispela lo i kamapim gut laik bilong God o nogat?

⁷ Tok i stret. Ol Witnes Bilong Jehova i save kamapim tok i stret tasol. Ol i no save giaman. Taim yumi kamapim tok bilong wanpela man o bilong wanpela buk, yumi mas kolim stret dispela tok. Sapos yumi paulim liklik, ol man bai harim na ol bai tokim narapela man long dispela tok yumi kolim kranki na bai tok i paul tru. Sapos ol man i save sampela tok bilong yumi i no stret, bai ol i no ken bilipim ol narapela tok bilong yumi. Na ating bai ol i no ken bung moa wantaim yumi.

⁸ Wasman bilong Skul i no ken givim hatpela tok long ol sumatin; em i mas givim gutpela tok long ol nupela sumatin. Em i mas helpim ol sumatin long redim gut ol tok bambai ol i ken kamapim ol tok i stret.

⁹ Kamapim sampela tok moa. Yumi ken kamapim sampela tok moa bilong mekim klia tok bilong yumi. Yumi ken kamapim sampela tok yumi bin lainim long buk bilong Sosaiti samting; tasol nogut yumi kamapim tingting bilong yumi yet.

¹⁰ Kamapim gut ol bikpela samting bilong tok. Yumi mas redim gut tok bambai yumi ken kamapim gut ol bikpela samting bilong tok, na ol man i ken kisim gut dispela tok. Sapos yumi laik kamapim klia ol bikpela samting bilong tok, yumi mas tingim tripela samting:

¹¹ Tok i klia. Yumi mas redim gut tok; no ken redim hariap. Yumi yet yumi mas save gut long ol dispela tok bambai em i klia long ol man bilong harim.

¹² Mas kamapim insait bilong ol tok ol man i no save gut long en. Yumi save lainim tok bilong Baibel na ol buk bilong Sosaiti, olsem na sampela tok yumi kolim i narapela kain na ol man bilong ausait i no save long en. Sapos yumi lainim man long tok bilong Baibel, na yumi kolim wanpela kain tok olsem, yumi mas kamapim insait bilong en bambai man i ken save long en.

¹³ Tingim gut ol man bilong harim. Ol i gat bikpela save o nogat? Ol i save gut long wok bilong yumi ol Witnes o nogat? Ol brata i save long ol dispela tok, olsem: Remnan, ol narapela sipsip, Armagedon, Kingdom; tasol ol man bilong ausait, nogat. Sapos yumi givim tok long ol man bilong ausait o nupela man na yumi kolim dispela kain tok, yumi mas kamapim insait bilong en.

¹⁴ No ken kamapim planti tok tumas. Sapos yumi kamapim planti tok tumas bai ol man i no inap kisim gut tok bilong yumi. Tok i mas stret long minit bilong tok. Yumi no ken pulim tok i go bikpela.

¹⁵ Taim yumi redim tok yumi mas tingim minit bilong en. Tingim ol man bilong harim. Dispela tok yumi laik givim long ol, em nupela tok long ol o ol i save pinis long en? Sapos ol i no save gut long ol dispela tok yumi laik kamapim, yumi mas kamapim liklik tok tasol na stori gut long en bambai ol i ken kisim gut. Sapos ol i save pinis long tok yumi laik kamapim, orait, bai yumi ken stori long planti tok liklik.