Save Long Jehova—Em God i Stap Tru
SAVEMAN Radhakrishnan bilong India i skelim tingting bilong ol Hindu long God wantaim tingting bilong ol narapela lotu, na em i tok: “God bilong ol Hibru i narapela kain God. Em wanpela God i stap tru na em i bin mekim ol wok namel long ol man, na em i save tingim ol senis i wok long kamap long graun, na ol samting i save painim ol man. Em wanpela Man i save salim tok i kam long yumi.”
Nem Hibru bilong God bilong Baibel em יהוה, na ol i save tanim olsem “Jehova.” Em i winim tru olgeta narapela god. Yumi gat wanem save long em? Em i bin mekim wanem long ol man i bin stap long taim bilong raitim Baibel?
Jehova na Moses i “Toktok Wantaim”
Jehova na wokboi bilong em Moses i save ‘toktok wantaim olsem tupela man i save toktok,’ maski Moses i no inap lukim pes bilong God. (Lo 34:10; Kisim Bek 33:20) Taim Moses i yangpela yet, em i bel sori long ol Israel, em ol i stap olsem kalabus long Isip. Em i givim baksait long gutpela sindaun bilong em olsem wanpela wanhaus bilong king na “em i ting, mobeta em i kisim hevi wantaim ol lain bilong God.” (Hibru 11:25) Olsem na Jehova i givim planti gutpela wok long Moses.
Moses em i wanpela wanhaus bilong king, olsem na em “i skul long olgeta gutpela save bilong ol Isip.” (Aposel 7:22) Tasol bilong i stap olsem gopas bilong lain Israel, em i mas kisim sampela pasin olsem pasin daun, no ken les kwik, stap isi olsem man i daunim em yet. Em i kisim ol dispela pasin taim em i stap 40 yia olsem wasman bilong ol sipsip long hap bilong Midian. (Kisim Bek 2:15-22; Namba 12:3) Tru, Moses i no inap lukim Jehova, tasol Jehova i kamapim em yet na ol laik bilong em long Moses, na long rot bilong ol ensel God i bin givim Tenpela Lo long em bilong lukautim. (Kisim Bek 3:1-10; 19:3–20:20; Aposel 7:53; Hibru 11:27) Baibel i tok, Jehova “i save toktok wantaim Moses olsem man i save toktok wantaim pren bilong en.” (Kisim Bek 33:11) Jehova yet i tok: “Mi save toktok wantaim em olsem man i toktok wantaim pren bilong en.” Man! Tingim dispela gutpela samting: Moses i stap pren tru wantaim dispela God Moses i no inap lukim tasol em i stap tru!—Namba 12:8.
Moses i raitim stori bilong lain Israel taim dispela lain i kamap nupela, na em i raitim Lo wantaim olgeta narapela lo i insait long en. Na tu, God i givim narapela gutpela wok tru long em—em wok bilong raitim Buk Stat. Laspela hap bilong dispela buk i gat ol stori em famili bilong Moses i save gut long en, olsem na i no hatwok tumas long raitim dispela stori. Tasol Moses i kisim we stori bilong taim ol man i kamap nupela long graun? Ating Moses i holim sampela rait bilong bipo yet, em ol tumbuna bilong em i bin lukautim, na em i lukim ol dispela stori taim em i raitim tok bilong Buk Stat. O ating em i bin kisim sampela tok long maus bilong ol man, i kam long ol tumbuna bilong ol, o Jehova yet i bin kamapim ol dispela tok long em. Long bipo yet na i kam inap nau, ol man i stap aninit long God ol i bilip olsem God i bin stap olsem pren bilong Moses.
Jehova—Em God Bilong Elaija
Profet Elaija tu i save long Jehova, olsem wanpela God i stap tru. Elaija i strong long helpim lotu i tru, na em i mekim wok bilong Jehova maski ol lain bilong lotuim Bal, em nambawan god bilong ol Kenan, ol i birua nogut tru long em.—1 King 18:17-40.
King Ahap bilong Israel na meri bilong em Jesebel ol i wok long painim rot bilong kilim i dai Elaija. Em i pret, nogut ol i bagarapim em, olsem na em i ranawe i go long hap bilong Berseba, long hap wes bilong raunwara Detsi. Orait nau em i wokabaut long ples drai na em i beten long God long larim em i dai. (1 King 19:1-4) Olsem wanem? Jehova i lusim pinis Elaija? Ating Em i no tingim moa dispela gutpela wokboi bilong em? Ating Elaija i bin ting olsem, tasol dispela tingting bilong em i kranki tru! Bihain Jehova i toktok isi long em na i askim em: “Elaija, bilong wanem yu stap hia?” Orait nau wanpela strongpela win samting i kamap, em i soim bikpela strong bilong Jehova, na bihain Elaija “i harim wanpela tok [gen] olsem, ‘Elaija, bilong wanem yu stap hia?’ ” Jehova i tingim Elaija na i toktok wantaim em bambai em i ken strongim bel bilong dispela gutpela wokboi bilong em. God i gat sampela wok moa bilong Elaija, na Elaija i amamas tru long mekim! Em i pinisim gut ol wok God i bin givim long em, na em i mekim holi nem bilong Jehova, em God bilong em i stap tru.—1 King 19:9-18.
Bihain, taim Jehova i rausim pinis lain Israel, em i no toktok moa wantaim ol wokboi bilong em long graun. Tasol i no olsem em i no tingim ol moa, nogat. Long rot bilong spirit holi bilong em, em i wok yet long stiaim ol na strongim ol long mekim wok bilong em. Yumi ken tingim aposel Pol, pastaim ol i kolim em Sol.
Spirit Holi i Stiaim Pol
Sol em i bilong Tarsus, em wanpela bikpela taun long Silisia. Papamama bilong em i bilong lain Hibru, tasol em i olsem wanpela man bilong Rom. Tasol papamama i bin skulim em long bihainim ol strongpela bilip bilong ol Farisi. Bihain, long hap bilong Jerusalem, em i kamap “sumatin bilong Gamaliel,” em i wanpela tisa bilong Lo Bilong Moses na em i gat nem.—Aposel 22:3, 26-28.
Sol i bihainim rot i kranki na em i strong tumas long bihainim lo bilong ol Juda, olsem na em i insait long wanpela wok nogut bilong sampela lain ol i birua long ol disaipel bilong Krais Jisas. Na em i orait tu long ol i kilim i dai Stiven, em i namba wan Kristen i bin kisim bagarap long han bilong ol birua. (Aposel 7:58-60; 8:1, 3) Bihain Sol i tokaut olsem: “Tru, bipo mi bin tok bilas long nem bilong [Jisas], na mi birua long em na mi bin tok nogut long em. Tasol em i save, mi bin mekim ol dispela pasin, long wanem, mi no bin save gut long em na mi no bilip long em. Olsem na em i sori long mi.”—1 Timoti 1:13.
Sol i gat laik tru long mekim wok bilong God na dispela i bin kirapim em long mekim wok bilong lotu bilong em. Orait taim em i wokabaut long rot i go long Damaskus em i tanim bel, na bihain Jehova i mekim bikpela wok tru long rot bilong em. Krais i go antap pinis long heven na em i tokim Ananaias, em wanpela disaipel Kristen bilong pastaim, long helpim Sol. Kirap long dispela taim, spirit holi bilong Jehova i stiaim Pol (em wanpela nem Rom ol i kolim Sol long en taim em i kamap Kristen) long mekim wok bilong autim tok inap planti yia long sampela hap bilong Yurop na Esia Maina, na gutpela samting i kamap long dispela wok.—Aposel 13:2-5; 16:9, 10.
Olsem wanem? Long nau tu yumi inap lukim wok bilong spirit holi long stiaim ol man olsem? Yes, yumi inap.
Maski Man i No Bilip Long God, Jehova Inap Tingim Em
Joseph F. Rutherford em i namba tu presiden bilong Sosaiti Was Taua. Em i bin kisim baptais long 1906 olsem wanpela Sumatin Bilong Baibel—em nem bilong ol Witnes Bilong Jehova long dispela taim bipo—na long yia antap em i kamap loya bilong Sosaiti, na long Janueri 1917 em i kamap presiden bilong Sosaiti. Tasol bipo dispela yangpela loya em wanpela man i no save bilip long God. Orait, olsem wanem na em i kamap wanpela Kristen i givim bel tru long mekim wok bilong Jehova?
Long Julai 1913, Rutherford i stap siaman bilong wanpela kibung bilong Asosiesen Bilong Ol Intenesenel Sumatin Bilong Baibel, em i bin kamap long Springfil, Masasusets, Yunaitet Stets. Niusman bilong wanpela nius (The Homestead) em i toktok wantaim Rutherford, na ol i raitim gen dispela stori long wanpela buklet i kamapim ol bikpela tok bilong dispela kibung.
Rutherford i stori olsem taim em i tingting long marit, em i bihainim bilip bilong lotu Baptis, tasol meri em i laik marit long en, em i bihainim bilip bilong lotu Presbitirian. Wanpela taim pasto bilong Rutherford i tok, dispela meri “bai go long bikpaia, long wanem, em i no bin baptais long wara, na Rutherford bai go stret long heven, long wanem, em i baptais pinis long wara, tasol dispela tok i no stret long tingting bilong Rutherford, na nau em i kamap man i no bilip long God.”
Inap sampela yia Rutherford i wok long skelim gut ol tok bilong Baibel na em i kisim bek bilip bilong em long dispela God i stap tru. Em i tok, em i bin tingting olsem: “Sapos wanpela tok i no stret long tingting bilong yumi, bel bilong yumi i no ken orait long dispela tok.” Rutherford i tok, ol Kristen “i mas save gut olsem ol tok bilong Baibel ol i bilip long en i tru.” Na em i tok moa olsem: “Ol i mas save gut long as bilong ol dispela tok.”—Lukim 2 Timoti 3:16, 17.
Tru tumas, long nau tu, maski wanpela man i no save bilip long God, o em i tok yumi no inap save long God, em inap skelim ol tok bilong Baibel na kisim bilip na kisim pasin bilong pas gut wantaim God Jehova. Wanpela yangpela man i bin stadi gut long Baibel wantaim wanpela buk bilong Sosaiti Was Taua, em Save i Bringim Man Long Laip Oltaim, na bihain em i tokaut olsem: “Taim mi kirap stadi, mi no bilip long God, tasol nau mi kisim save long Baibel na dispela save i senisim tru tingting bilong mi. Nau mi save liklik long Jehova na bilip long em.”
“Ol Longlong Man” na God
Long wanpela buk (A Dictionary of the Bible) saveman James Hastings i tok: ‘I no gat wanpela man bilong raitim Olpela Testamen em i ting em i mas mekim sampela tok bilong kamapim klia olsem God i stap tru.’ Na em i tok moa olsem: ‘Ol lain bilong bipo i no tingting liklik long tok olsem i no gat God i stap, o long mekim sampela tok bilong kamapim klia olsem God i stap tru. Dispela bilip i stret tru long tingting bilong ol man, na olgeta man i bin holim dispela tingting.’ Tasol i no olsem olgeta man bilong dispela taim bipo ol i bin pret long God na stap aninit long em, nogat tru. Song 14:1 na 53:1, tupela wantaim i stori long “ol longlong man,” em ol i save tok long bel bilong ol yet olsem, “I no gat God i stap.”
Dispela longlong man i save tok i no gat God i stap, em i wanem kain man? Em i no wanpela man i no gat save. Tok Hibru olsem na·valʹ i makim olsem em i sot long stretpela pasin. Long wanpela buk (The Parallel Psalter) Profesa S. R. Driver i tok, asua bilong dispela man ‘i no olsem em i no inap skelim gut ol tok, nogat; bel bilong em i strong pinis na i no inap pilim ol pasin i stret na ol samting bilong lotu, na em i no gat tingting liklik, o pasin bilong pilim gut ol samting.’
Man bilong raitim Song em i stori moa long ol pasin nogut dispela kain tingting i save kamapim, na em i tok: “Ol dispela man ol i man nogut tasol. Ol i save mekim pasin i nogut tru. I no gat wanpela i save mekim gutpela pasin.” (Song 14:1) Bilong pinisim tok bilong em, saveman Hastings i tok: “Taim ol man i ting olsem i no gat God i stap na ol i no inap kisim nogut long em, dispela tingting i save bagarapim pasin bilong ol na ol i mekim ol pasin i nogut tru.” Long ples klia ol i amamas long ol pasin nogut na ol i givim baksait long dispela God i stap tru, long wanem, ol i no laik bai ol i mas kot long em long pasin ol i mekim. Tasol long nau tu dispela kain tingting i kranki tru, wankain olsem long taim man bilong raitim Song i bin raitim ol tok bilong em inap 3,000 yia samting i go pinis.
Tok Lukaut Bilong God i Stap Tru
Orait nau yumi ken tingim gen ol dispela askim i stap long namba wan stori. Taim planti man i tingim ol bikpela pen na hevi i kamap long nau, bilong wanem ol i hatwok long bilip long wanpela God i stap tru?
Baibel i gat ol tok ol man i bin raitim, em ‘Holi Spirit yet i kirapim ol na ol i autim tok God i givim long ol.’ (2 Pita 1:21) Baibel tasol i kamapim klia dispela God i stap tru, em Jehova. Na Baibel i givim tok lukaut long yumi long wanpela man nogut tru em yumi ol man bilong graun i no inap lukim, na em i gat bikpela strong bilong stiaim na bosim tingting bilong ol man—dispela man em Satan. Orait, sapos yumi no bilip long wanpela God i stap tru, olsem wanem yumi inap bilip olsem Satan tu i stap tru?
Spirit holi i stiaim tingting bilong aposel Jon na em i raitim tok olsem: “Satan . . . em i man bilong giamanim olgeta manmeri bilong graun.” (KTH 12:9) Bihain Jon i tok: “Yumi save, yumi stap pikinini bilong God, tasol dispela graun olgeta em i stap aninit long strong bilong Satan.” (1 Jon 5:19) Ol dispela tok i wankain olsem tok bilong Jisas, em Jon yet i bin raitim long Gutnius bilong em, olsem: “Hetman i save bosim dispela graun em i kam nau. Em i no gat strong bilong mekim wanpela samting long mi.”—Jon 14:30.
Dispela tok i narapela kain tru long samting ol man i save bilip long en long nau! Wanpela nius (Catholic Herald) i tok: ‘Em i no pasin bilong nau long stori long Satan. Nau long dispela taim bilong ol man i no bilip tumas na taim bilong saiens, ol man i no tingting moa long Satan.’ Tasol Jisas i tok strong long ol man i gat tingting long kilim em i dai: “Yupela i pikinini bilong papa bilong yupela, em Satan. Na yupela i strong long bihainim ol laik bilong papa bilong yupela.”—Jon 8:44.
Ol tok Baibel i mekim long strong bilong Satan, dispela tok i stret long tingting bilong yumi na yumi inap kisim gut. Na em i kamapim klia as na yumi inap save, maski klostu olgeta man i laik i stap bel isi na sindaun gut wantaim ol narapela man, long olgeta hap bilong graun i gat pasin birua, na pait, na bagarapim nating man, olsem i bin kamap long Danblen (em yumi bin stori long en long pes 3 na 4). Na tu, i no dispela birua tasol, em Satan, yumi mas wok strong long sakim. Baibel i givim sampela tok lukaut moa long yumi long ol spirit nogut, em bipo yet ol i bin kirap na wok wantaim Satan long giamanim ol man na mekim nogut long ol. (Jut 6) Planti taim Krais Jisas i mas sakim strong bilong ol dispela spirit, na em inap daunim strong bilong ol.—Matyu 12:22-24; Luk 9:37-43.
Jehova, em God tru, em i gat laik long pinisim ol pasin nogut i stap long graun, na em i gat laik tu long pinisim ol wok bilong Satan wantaim ol spirit nogut bilong em long bihain. Ol save yumi kisim long Jehova, dispela i mekim na yumi inap bilip strong long ol tok promis bilong em. Em i tok: “Bipo i no gat wanpela god i bin kamap na i stap pastaim long mi. Na bihain tu bai i no gat wanpela god i kisim ples bilong mi. Mi tasol mi Bikpela, na oltaim mi save kisim bek yupela.” Tru tumas, olgeta man i save long Jehova na lotuim em na mekim wok bilong em, ol i tingim em olsem wanpela God i stap tru. Yumi inap wetim em wanpela tasol i kisim bek yumi.—Aisaia 43:10, 11.
[Piksa long pes 7]
Em wanpela piksa ol i bin wokim olsem tu handet yia samting bipo, i makim Moses i raitim tok bilong Stat 1:1 na spirit holi i stiaim em long mekim
[Kredit Lain]
Ol i kisim long buk The Holy Bible, bilong J. Baskett, Oxford
[Piksa long pes 8]
Planti taim Krais Jisas i bin daunim strong bilong ol spirit nogut