God Bilong Givim Bel Isi Em i Tingim Tru Ol Man i Gat Hevi
BAIBEL i kamapim klia olsem Devit i bin karim planti hevi. Inap planti yia em i wanpela ranaweman. Wanpela king nogut i wok oltaim long raunim Devit na i tingting strong long kilim em i dai. Long taim Devit i karim dispela hevi, em i save hait long ol ples i no gat man. Tasol em i mekim sampela samting moa. Em i beten strong long Jehova na kamapim hevi bilong em. Bihain em i stori long samting i bin painim em, olsem: “Mi singaut strong long Bikpela bilong em i helpim mi. Mi wok strong long askim em long helpim mi. Mi save tokim em long olgeta wari na olgeta hevi i kamap long mi.”—Song 142:1, 2.
Long nau, sampela bai tok bilas long pasin Devit i bin mekim long beten na wetim God i helpim em. Ol bai tok, beten em wanpela samting bilong giamanim tasol tingting bilong man na bai tingting i stap isi, na em i no save helpim tru ol man. Tasol Devit i no kranki long bilip na wetim God i helpim em, long wanem, bihain em i bin daunim ol birua bilong em. Taim em i tingim bek ol samting i bin painim em, Devit i tok: “Ol rabisman i prea long Bikpela na em i harim prea bilong ol, na i helpim ol long olgeta hevi bilong ol.” (Song 34:6) Narapela hap bilong Baibel i kolim dispela God tru em Devit i bin ran i go long em olsem “as bilong pasin bilong bel isi.” (Filipai 4:9; Hibru 13:20) Olsem wanem? God bai pinisim hevi bilong yumi na givim bel isi long yumi?
Jehova i Save Tingim Yu
Jehova i no save givim baksait long ol hevi em lain bilong em i karim. (Song 34:15) Em i save tingim ol samting lain wokman bilong em i sot long en na tu olgeta wan wan bilong dispela lain em ol i pret long em. Taim Solomon i dediketim tempel long Jerusalem bipo, em i beten askim Jehova olsem: “Sapos wanpela bilong mipela Israel, ol manmeri bilong yu, i pilim tru dispela hevi i bin kamap long en na i lukluk i kam long dispela haus bilong yu na i litimapim han bilong en na i beten long yu, . . . yu ken harim beten bilong en.” (2 Stori 6:29) Olsem Solomon i tok, olgeta wan wan i gat hevi bilong ol yet ol i wok long karim. Narapela i gat hevi bilong sik. Narapela i gat hevi bilong bel na tingting. Sampela i gat hevi bilong wanpela long famili i dai. Na long dispela taim bilong hevi, planti man i no gat wok, o ol i sot long mani, o ol i gat hevi insait long famili.
Tingim yu yet na wanem ‘hevi i bin kamap long yu.’ Ating sampela taim yu pilim wankain olsem Devit, em man bilong raitim Song, em i tok: “Mi bin ting bai sampela man i sori long mi, tasol i no gat wanpela. Na mi ting bai sampela man i givim mi gutpela tok bilong strongim bel bilong mi, tasol i no gat.” Tasol yu ken bilip olsem God i tingim hevi bilong yu, long wanem, Devit i tok moa: “Bikpela i save harim prea bilong ol manmeri i sot long ol samting, na em i no save lusim tingting long ol manmeri bilong en ol i stap long kalabus.”—Song 69:20, 33.
Dispela tok bilong Devit i ken strongim yumi long bilip olsem Man bilong wokim yumi em i save harim beten bilong ol manmeri i stap olsem kalabus long ol hevi bilong ol. Na tu, em i save mekim sampela samting bilong helpim ol. Tingim ol tok nau bai kamap, em i kamapim klia olsem Jehova i save sori long ol man i gat hevi.
“Yupela i no ken mekim nogut long meri, man bilong en i dai pinis, o long pikinini, papa i dai pinis. Sapos yupela i mekim nogut long ol na ol i krai long mi long helpim ol, bai mi harim singaut bilong ol. Na bai mi belhat.”—Kisim Bek 22:22-24.
“Orait olsem wanem? Ol manmeri God i bin makim bilong em yet, na ol i wok long krai long em long olgeta de na long olgeta nait, ating God bai i no helpim ol, a? Ating em bai i wet wet na i no helpim ol kwik, a? Nogat tru.”—Luk 18:7.
“Em i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol. Sapos ol man nogut i laik daunim ol na bagarapim ol, em i save kisim bek ol. Em i save laikim ol tumas na em i mekim olsem.”—Song 72:12-14.
“Man i holim yupela [lain bilong God long graun], em i holim ai bilong mi.”—Sekaraia 2:8, NW.
Ol dispela skripsa i kamapim klia olsem Man bilong wokim yumi em i tingim tru lain bilong em na em i laik helpim ol long i stap gut. Olsem na i gat as tru na yumi ken bihainim tok bilong aposel Pita, olsem: “God i save wari long yupela. Olsem na olgeta hevi yupela i karim, yupela i mas putim long han bilong en.” (1 Pita 5:7) Tasol olsem wanem bai God i helpim yumi long taim bilong hevi?
Olsem Wanem God i Helpim Ol Man i Gat Hevi
Olsem yumi lukim pinis, taim Devit i karim hevi em i beten strong long God i mas soim rot long em. Na tu, em i mekim sampela samting bilong helpim em yet na em i wokim gut tingting bilong em bambai em inap abrusim ol man i raunim em. Olsem na Devit inap karim hevi bilong em, long wanem, em i bilip na wetim Jehova i helpim em, na tu em yet i bin mekim sampela samting. Yumi inap kisim wanem save long dispela stori?
Taim hevi i painim yumi, i no gat rong sapos yumi mekim sampela samting bilong stretim dispela hevi. Olsem: Sapos Kristen i no gat wok mani, ating em bai wok strong long painim wok, a? O sapos em i sik, ating em bai go lukim dokta, a? Jisas i gat strong long oraitim olgeta kain sik, tasol em i tok, ‘ol sikman i save go long dokta.’ (Matyu 9:12; skelim wantaim 1 Timoti 5:23.) Tru, i gat sampela hevi yumi no inap pinisim; yumi mas karim tasol. Tasol Kristen tru i no ting pen na hevi i gutpela samting olsem sampela manmeri i tingim. Nogat. (Skelim wantaim 1 King 18:28.) Em i save mekim ol samting em inap mekim bilong stretim hevi bilong em.
Tasol i stret yumi mas beten na kamapim hevi bilong yumi long Jehova. Bilong wanem yumi mas mekim olsem? Namba wan samting, taim yumi putim olgeta hevi bilong yumi long han bilong Man bilong wokim yumi, dispela i helpim yumi long “skelim gut olgeta pasin na kisim ol pasin i gutpela tru.” (Filipai 1:10) Olsem: Sapos yumi laik painim wok mani, pasin bilong beten na wetim God, dispela i ken helpim yumi long sakim wanpela kain wok i pait wantaim ol lo bilong Baibel. Na tu, bai yumi no larim pasin bilong laikim tumas mani i ‘pulim yumi na yumi lusim bilip.’ (1 Timoti 6:10) Taim yumi mas skelim sampela bikpela samting yumi laik mekim—long samting bilong wok mani o long sampela narapela samting bilong sindaun bilong yumi—yumi mas bihainim tok bilong Devit: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.”—Song 55:22.
Na beten i helpim tingting bilong yumi long i stap stret bambai hevi bilong yumi i no daunim yumi olgeta. Aposel Pol i tok: “Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela.” Orait, dispela bai kamapim wanem samting? “Bel isi God i save givim yumi, em i gutpela samting tru, na yumi man i no inap tru long save long as bilong en. . . . Yupela bai i pas gut wantaim Krais Jisas, na bel na tingting bilong yupela bai i stap gut tru.” (Filipai 4:6, 7) Em nau, yumi kisim bel isi, em dispela bel isi God i save givim yumi. Dispela bel isi “em i gutpela samting tru,” olsem na em inap strongim yumi long taim bel na tingting bilong yumi i hevi tru. Em bai mekim na ‘bel na tingting bilong yumi bai i stap gut tru’ na bai yumi no kirap nating na mekim sampela longlong pasin em inap kamapim bikpela hevi moa long yumi.—Saveman 7:7.
Beten inap kamapim sampela samting moa. Sapos yumi gat wanpela hevi, beten inap senisim sampela samting long dispela hevi. Tingim wanpela stori long Baibel. Taim aposel Pol i stap kalabus long Rom, em i kirapim ol wanlotu Kristen long beten long God i mas helpim em. Bilong wanem em i mekim olsem? Em i tok: “Mi laikim tumas bai yupela i prea long God i helpim mi, na bai mi ken i kam bek long yupela kwiktaim.” (Hibru 13:19) Pol i save, sapos ol wanlotu bilong em i wok long beten strong, dispela inap senisim taim bilong em i lusim kalabus.—Filemon 22.
Olsem wanem long hevi bilong yu? Ating beten bai senisim sampela samting long dispela hevi long bihain? Em inap mekim olsem. Tasol yu mas save, i no olgeta taim Jehova bai mekim ol samting olsem yumi beten askim em long en. Tingim Pol. Planti taim em i beten long Jehova i ken tekewe ‘wanpela samting olsem nil i save sutim skin bilong em’—ating em wanpela sik bilong ai. God i no pinisim sik bilong Pol, tasol em i tokim em olsem: “Marimari bilong mi em inap long yu. Long wanem, strong bilong mi em i save kamap strong tru long man i no gat strong.”—2 Korin 12:7-9.
Olsem na sampela taim Jehova bai i no pinisim hevi bilong yumi. Tasol dispela bai givim rot long yumi long kamapim bel olsem yumi bilip na wetim Man bilong wokim yumi. (Aposel 14:22) Na tu, yumi ken bilip tru olsem, sapos Jehova i no pinisim hevi bilong yumi em bai “wokim rot bilong helpim [yumi]. Dispela rot i olsem. Em bai i mekim [yumi] i sanap strong, na dispela traim bai i no inap daunim [yumi].” (1 Korin 10:13) Tru tumas, i gat as na Baibel i tok, Jehova em “God bilong mekim isi bel bilong olgeta man i gat hevi. Long olgeta hevi i kamap long mipela, em i save mekim isi bel bilong mipela.” (2 Korin 1:3, 4) Em i save givim olgeta samting long yumi em yumi mas kisim na bai yumi inap karim hevi na sanap strong na stap bel isi tru.
Klostu Nau—Wanpela Taim i No Gat Hevi!
Man bilong wokim yumi em i promis olsem, long rot bilong Kingdom liklik taim em bai pinisim olgeta hevi bilong yumi ol man. Em bai pinisim olsem wanem? Em bai rausim Satan, em nambawan as bilong ol hevi na nambawan birua bilong gutaim, na Baibel i kamapim klia olsem em i “giaman god bilong dispela graun.” (2 Korin 4:4) Tasol klostu nau em bai i no inap bosim moa ol manmeri. Taim God i rausim Satan dispela bai opim rot long planti blesing i ken kamap long ol manmeri i pret long God. Baibel i tok promis olsem Jehova bai “mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:1-4.
Yu ting wanpela taim i no gat hevi long en i olsem wanpela driman nating tasol na i no inap kamap tru? Ating i hatwok long tingim wanpela taim olsem, long wanem, yumi lain pinis long stap wantaim hevi. Tasol taim God i bin wokim man long pastaim, em i laik bai pret na tingting planti na hevi i no ken painim yumi, na dispela laik bilong em bai kamap tru.—Aisaia 55:10, 11.
Em dispela gutpela samting Sonia, Fabiana, na Ana—em yumi bin stori long ol long namba wan stori—ol i kisim save long en na ol i wetim i kamap. Sonia, em tupela pikinini bilong em i dai long sik AIDS, em i kisim bel isi long wetim wanpela samting Baibel i tok long en—ol stretpela man na ol man nogut i dai pinis ol bai kirap bek. (Aposel 24:15) Em i tok: “Wanpela samting mi save tru long en i olsem, ol gutpela samting yumi wetim i winim tru olgeta pen na hevi.”
Taim Ana i stap yet long haus bilong ol pikinini i no gat papamama, wanpela Witnes Bilong Jehova i kam lukim em. Ana i tok: “Em i soim mi long nem bilong Jehova i stap long Baibel, na mi amamas tru na mi krai. Mi bin laik tru long wanpela i mas helpim mi, na mi kisim save olsem i gat wanpela God i save tingim yumi.” Taim Ana i lusim pinis dispela haus, em i kirap stadi long Baibel na em i kisim sampela save moa long ol tok promis bilong Jehova. Bihain em i dediket long Jehova na bilong makim olsem, em i kisim baptais. “Kirap long dispela taim na i kam inap nau mi save kamapim olgeta hevi bilong mi long Jehova long rot bilong beten, na bel bilong mi i stap isi, long wanem, mi save em bai helpim mi.”
Na Fabiana tu i painim pinis bel isi; em i kisim save long ol samting God i promis long kamapim long bihain na nau tingting bilong em i stap isi na hevi bilong em i no daunim em moa. “Taim mi kisim save long tok i tru bilong Baibel, i olsem mi lusim wanpela hap i tudak olgeta na mi kam insait long wanpela gutpela rum i lait tru.”—Skelim wantaim Song 118:5.
Tasol olsem wanem bai gutaim tru i kamap long olgeta hap, na em bai kamap long wanem taim? Ol stori i kam bihain long dispela bai helpim yumi long kisim save long dispela samting.
[Blok long pes 6]
Kain Kain Pen Na Hevi
▪ Inap olsem 25 pesen bilong ol manmeri long graun i stap rabis tru, na planti milion moa i save sindaun long ol hap i nogut tru na i no stret long ol man i stap long en—ol inap i dai.
▪ Winim 200 milion pikinini i sot long kaikai.
▪ Long olgeta wan wan yia sik pekpek wara i save kilim i dai 3 milion pikinini i no winim yet 5-pela krismas.
▪ Ol sik i save kalap long planti man i bin kilim i dai 16.5 milion manmeri long 1993. Sampela kantri i save skelim ol sik long narapela narapela pasin, olsem na ating namba tru i bin dai i winim dispela namba.
▪ Ol i tok inap 500 milion manmeri i gat wanpela kain sik bilong tingting.
▪ Namba bilong ol man i kilim i dai skin bilong ol yet i wok long go bikpela hariap namel long ol yangpela—winim olgeta narapela lain.
▪ Nius The Unesco Courier i tok: “Hangre na no gat wok mani em tupela bikpela hevi bilong ol man long olgeta hap. I gat 35 milion man i no gat wok long 7-pela kantri i gat planti mani, winim ol narapela kantri bilong graun, na long Brasil i gat 20 milion man em ol i gat wok tasol dispela i no makim olsem ol bai i gat kaikai inap long ol.”
[Ol Piksa long pes 7]
Beten inap helpim yumi long tingim promis bilong God long kamapim wanpela taim i no gat hevi long en