Ol Yangpela i Laik Save . . .
Husat i Mas Stap Olsem Gutpela Piksa Mi Ken Bihainim?
“Em i save gut tru long pilai basketbal. Olgeta pren bilong mi i laikim em tru. Em i gutpela piksa long mi, na mi laik kamap wankain olsem em na kisim ol samting em i kisim.”—Em tok bilong Ping, em wanpela yangpela bilong Esia.
OL MAN i save laikim na bihainim pasin bilong sampela man. Wanpela meri bilong raitim buk, em Linda Nielsen, em i tok: “Ol yangpela i save bihainim pasin bilong ol man i gat wankain tingting olsem ol, na ol man i save tingim ol o ol i kisim ol gutpela samting ol dispela yangpela yet i mangalim.” Olsem na ol yangpela i save laikim ol wanlain bilong ol em ol narapela i laikim ol o ol i gat gutpela skin. Tasol planti yangpela i laik moa long bihainim pasin bilong ol man i gat nem long piksa wokabaut, na long pilaim musik, na long pilai spot.
Tru, taim ol nius samting i stori long planti man i gat nem, ol i save kamapim ol stori i narapela kain na i no tru. Ol dispela stori i haitim rong bilong ol dispela man, na kirapim ol narapela long givim biknem long ol, na bikpela samting moa—ol i laik salim planti samting i stori long ol. Ping, em pastaim yumi bin stori long em, em i tok: “Mi baim olgeta video i stori long dispela man bilong pilai basketbal na mi pasim wankain klos na su olsem em.” Sampela yangpela i save pasim wankain klos olsem ol man i kamap long televisen o ol man bilong pilai spot ol i save laikim, na ol i wokim gras bilong ol long wankain stail, na wokabaut na toktok bilong ol tu i wankain olsem ol dispela man ol i save laikim.
Gutpela Piksa na Piksa Nogut
Tasol yu inap tok: ‘Wanem kain hevi inap kamap sapos mi laikim pasin bilong wanpela man?’ Bilong save long bekim bilong dispela askim, yu mas skelim husat man yu laik bihainim. Baibel i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” (Sindaun 13:20) Baibel i no kirapim yumi long bihainim pasin bilong ol man. (Matyu 23:10) Tasol Baibel i tok, yumi “mas bihainim pasin bilong ol man i bilip tru na i no les kwik, na ol i kisim olgeta samting bipo God i tok long givim long ol pikinini bilong em.” (Hibru 6:12) Man i raitim dispela tok, em aposel Pol, na em i bin stap olsem gutpela piksa long ol Kristen bilong bipo. Olsem na em inap tok: “Yupela i mas bihainim pasin bilong mi na wokabaut, olsem mi tu mi save bihainim pasin bilong Krais na wokabaut.”—1 Korin 11:1.
Wanpela yangpela man, nem bilong em Timoti, em i bin mekim olsem. Em i kamap gutpela pren bilong Pol taim ol i raun wantaim na mekim wok misineri. (Aposel 16:1-4) Pol i tingim Timoti i olsem ‘pikinini bilong em, na em i laikim em tru. Em i save lukautim gut wok bilong Bikpela.’ (1 Korin 4:17) Pol i helpim Timoti na em i kamap strongpela man Kristen.—Filipai 2:19-23.
Tasol wanem samting inap kamap, sapos yu laik bihainim pasin bilong ol man nogut? Wanpela yangpela man, nem bilong em Richard, em i tok: “Taim mi gat 15 krismas, wanpela wanskul, nem bilong em Mario, em i kamap nambawan gutpela pren bilong mi. Papamama bilong mi ol i Kristen, na ol i wok strong long helpim mi long ol samting bilong spirit. Tasol Mario i painim amamas long kain kain samting—disko, pati, motabaik, na ol samting olsem. Em inap mekim ol samting em i laik mekim, na long taim em i laik mekim. Tasol mi nogat. Olsem na taim mi gat 16 krismas, mi tokim papamama olsem mi no laik stap moa olsem wanpela Kristen.”
Olsem wanem? Wankain hevi inap kamap long yu sapos yu bihainim pasin bilong ol man i gat nem, na ol man bilong pilai spot? Yes, hevi inap kamap. Tru, i no gat rong long amamas long save bilong wanpela man bilong pilai spot, o wokim piksa wokabaut, o pilaim musik. Tasol askim skin bilong yu yet: ‘Long sindaun tru bilong ol, ol dispela man i makim wanem kain pasin yu ken bihainim?’ Planti man bilong spot, musik, na piksa wokabaut samting, ol i save mekim pasin pamuk, kisim ol drak, na dring planti. Na tu, planti bilong ol i no amamas, na ol i no sindaun gut, maski ol i gat mani na biknem. Taim yu skelim ol dispela samting, yu inap kisim wanem gutpela samting sapos yu bihainim pasin bilong ol dispela kain man?
Tru, yu inap ting em i liklik samting sapos yu wokim gras, o pasim klos, o toktok olsem ol man i gat nem. Tasol sapos yu bihainim pasin bilong ol liklik, dispela inap mekim na bihain bai yu “wokabaut wankain olsem ol man bilong dispela graun.” (Rom 12:2) Ating pastaim yu ting em i gutpela samting. Tasol sapos yu larim ol man bilong graun i stiaim yu, dispela inap mekim na pasin bilong yu bai pait wantaim laik bilong God. Long Jems 4:4 Baibel i tok: “Sapos man i laikim pasin bilong graun, em i mekim pasin birua long God.”
Olsem Wanem Pasin Bilong Gutpela Man Inap Helpim Yu
Tasol sapos yu bihainim pasin bilong gutpela man, dispela inap helpim i stap bilong yu! Namel long ol wanbilip Kristen, yu inap painim planti man i stap olsem gutpela piksa. Yu ken bihainim pasin bilong ol long toktok, na wokabaut, na long pasin bilong laikim tru ol narapela, na long bilip bilong ol, na long pasin bilong ol long i stap klin tru long ai bilong God. (1 Timoti 4:12) Tru, yu mas skelim gut ol man yu laik poroman wantaim ol, insait long kongrigesen Kristen tu. (2 Timoti 2:20, 21) Tasol i no hatwok long luksave husat insait long kongrigesen “ol i save bihainim tok tru.” (2 Jon 4) Hibru 13:7 i tok: “Yupela i mas tingting long pasin ol i bin wokabaut long en, na yupela i mas bihainim pasin bilong bilip bilong ol.” Bihain, pasin tru bilong planti wanlain bilong yu bai kamap ples klia. Tasol long kongrigesen i gat ol brata sista i lapun liklik na ol i kamapim ples klia olsem ol i stap strong long bilip, na yu bihainim savepasin sapos yu save gut long ol.
Ating yu bai tok: ‘Yu laik mi save gut long ol brata sista i lapun liklik, a?’ Tru, ating pastaim yu no amamas long dispela tok. Tasol tingim pasin pren bilong Timoti wantaim aposel Pol i lapun liklik. Pol i luksave long wok Timoti inap mekim, na Pol i strongim em long “mekim dispela presen God i bin givim [em] i kamap strong.” (2 Timoti 1:6) Sapos wanpela i helpim yu na strongim yu, na kirapim yu long mekim presen God i givim long yu i kamap strong, dispela inap helpim gut yu.
Kain samting olsem i bin painim wanpela yangpela, nem bilong em Bryan. Bryan i hatwok long daunim tingting bilong em olsem em i no gutpela olsem ol narapela, na nau em i bungim wanpela brata singel i lapun liklik na em i wanpela wokman insait long kongrigesen. Bryan i tok: “Mi laikim tru pasin bilong em long tingim ol narapela—mi tu—na pasin bilong em long givim bel long mekim wok autim tok, na long mekim gut ol tok.” Dispela Kristen i lapun liklik i tingim gut Bryan, olsem na dispela i helpim Bryan. Bryan i tok: “Em i helpim mi long senisim pasin bilong mi—bipo mi man bilong sem na mi stap nating tasol.”
Bihainim Pasin Bilong Papamama
Wanpela buk (Adolescence—Generation Under Pressure) i tok, papamama ol i “nambawan bikpela samting bilong helpim o pasim yangpela long kamapim pasin tru bilong em.” Sapos ol yangpela i no gat wanpela i givim gutpela tingting long ol, buk i tok ol bai stap olsem “sip i no gat stia, em si i save sakim nabaut.”
Dispela tok i kamapim wankain tingting olsem disaipel Jems i raitim inap 1,900 yia i go pinis long Jems 1:6: “Dispela man i mas bilip tru na i beten long God. Em i no ken lusim bilip liklik na i ting olsem, ‘Ating God bai i givim dispela long mi, o nogat?’ Long wanem, man i gat tupela tingting, em i olsem solwara win i sakim na i kirap nabaut.” Ating yu save long sampela yangpela olsem, a? Ol i save tingim amamas bilong nau tasol, na ol i no tingim tumora.
Olsem wanem? Papamama bilong yu i save pret long God na stap olsem gutpela piksa insait long kongrigesen? Sapos olsem, yu save larim ol i stiaim wokabaut bilong yu? O olgeta taim yu save sakim tok bilong ol? Tru, papamama i no gutpela olgeta. Tasol yu mas tingim ol gutpela pasin bilong ol—ol pasin i gutpela long yu long bihainim. Wanpela yangpela Kristen, nem bilong em Jarrod, em i tok: “Mi save amamas tru long papamama bilong mi. Ol i no les long givim bel long wok autim tok, na gutpela pasin bilong ol long karim hevi long taim ol i sot long mani, na ol i strongim mi long mekim wok bilong God long olgeta de—olgeta dispela samting i helpim mi gut. Long olgeta taim papamama i bin stap olsem gutpela piksa mi laik bihainim.”
Nambawan Gutpela Piksa Bilong Bihainim
Taim wanpela lain (Gallup) i askim sampela yangpela long Amerika ol i ting husat em i nambawan gutpela man i bin i stap long bipo, planti i kolim nem bilong wanpela man politik bilong Amerika. Liklik lain (6 pesen) tasol i tok Krais Jisas em i nambawan man. Tasol Baibel i tok, Krais Jisas “i soim [yumi] pinis dispela pasin bilong em, bai [yumi] i ken bihainim.” (1 Pita 2:21; Hibru 12:3) Jisas i strongim ol disaipel long kisim skul long pasin bilong em. (Matyu 11:28, 29) Tasol olsem wanem yu inap mekim olsem?
Kisim gutpela save long i stap bilong Jisas. Ritim olgeta 4-pela Gutnius wantaim buk Nambawan Man Tru i Winim Olgeta Narapela Man.a Tingim pasin bilong Jisas long lainim ol man, na pasin bilong em long sori long ol man, na pasin bilong em long strongim bel long taim hevi i painim em. Bai yu kisim save olsem i no gat narapela man olsem Jisas na em i nambawan gutpela piksa long yu ken bihainim pasin bilong em.
Taim yu save gut long dispela man i gutpela olgeta—ol wanlain i no gat gutpela pasin o ol man i gat nem—ol i no inap pulim yu long bihainim pasin bilong ol. Olsem wanem? Yu inap tingim Ping na pasin bilong em long laikim wanpela man bilong pilai spot? Ping i save amamas yet long pilai basketbal long sampela taim, tasol nau em i luksave olsem em i no gutpela long bihainim pasin bilong ol man i gat nem.
Na olsem wanem long Richard? Pasin bilong dispela man em i laik bihainim i mekim na em i lusim bilip Kristen. Tasol Richard i bungim wanpela yangpela man i gat 20 krismas samting, nem bilong em Simon, na em i wanpela Witnes Bilong Jehova. Richard i tok: “Simon i kamap pren bilong mi na em i helpim mi long save olsem, mi inap kisim amamas, tasol mi no lusim lo bilong Baibel liklik. I no longtaim na mi pilim tru gutpela pasin bilong Simon. Em i stap olsem gutpela piksa na dispela i bikpela samting long helpim mi long kam bek long kongrigesen na dediketim laip bilong mi long Jehova. Nau mi amamas moa yet, na i stap bilong mi i gat as bilong en.”
Yes, yu mas makim gut man yu laik bihainim—dispela i bikpela samting!
[Futnot]
a Sosaiti Wastaua Bilong Nu Yok i wokim.
[Piksa long pes 13]
Sapos yu bung wantaim ol man i lapun liklik na i gat gutpela nem, dispela inap helpim yu