Helpim Ol Baibel Sumatin Long Kamap Pablisa Bilong Autim Gutnius Bilong Kingdom
1 Wok em Jisas i givim long ol disaipel bilong em olsem Matyu 28:19, 20 i tok long en, em i wanpela bikpela wok tru. Ol disaipel bilong Krais i mas kamapim ol disaipel, na ol dispela lain em ol disaipel bilong Krais i kamapim, ol bai mekim yet wok bilong kamapim ol disaipel. Dispela i mekim na bai i gat ol man bilong autim gutnius bilong Kingdom Bilong God long olgeta hap bilong graun long dispela taim bilong las de, nau yumi stap long en.—Mt. 24:14.
2 Ating ol Baibel sumatin bilong yumi em ol pikinini bilong yumi yet o ol narapela man i laik yumi stadi long Baibel wantaim ol. Yumi gat laik tru long helpim ol kain man olsem long kirap mekim wok bilong helpim ol narapela man long kamap disaipel bilong Jisas Krais.—Lu. 6:40.
3 Redim Ol Sumatin Long Autim Tok: Kirapim ol man yu stadi wantaim ol long tokim ol narapela man long ol samting ol i lainim. Stori long ol sumatin long ol gutpela ekspiriens yu kisim long wok autim tok. Skulim ol pikinini bilong yu taim ol i liklik yet long mekim sampela wok taim yupela i autim tok, inap long skel na save bilong ol. (Sng. 148:12, 13) Long rot bilong toktok na pasin bilong yu, soim olsem wok autim tok i bikpela samting long yu.—1 Ti. 1:12.
4 Jehova i orait tasol long ol man i bihainim ol stretpela lo bilong em. Tru, ol nupela pablisa i no gat wankain save olsem ol pablisa i dediket na baptais pinis na i bin mekim wok autim tok inap longpela taim, tasol ol nupela pablisa i mas bilip long ol bikpela tok bilong Baibel na ol i mas i gat save long kamapim gut ol dispela tok. (Lukim buk Oganaisesen, p. 79-82.) Ol i lusim pinis ‘Bikpela Babilon’ na olgeta samting bilong wok politik, na ol i save kam oltaim long ol miting bilong kongrigesen.— KTH 18:2, 4; Jo. 17:16; Hi. 10:24, 25.
5 Taim yu ting wanpela Baibel sumatin bilong yu i winim mak bilong kamap pablisa i no baptais, yu mas toksave long wasman siaman. Em bai stretim rot long tupela elda bai bung wantaim yu na Baibel sumatin bilong yu bilong painimaut olsem dispela sumatin i winim mak bilong kamap pablisa bilong autim gutnius bilong Kingdom wantaim kongrigesen o nogat. Orait nau, em wok bilong yu long skulim gut Baibel sumatin taim em i wok wantaim yu long autim tok.