Nambawan Bikpela Wok Tru
1. Yumi pilim tru wok autim tok na dispela bai kirapim yumi long givim wanem ol samting bilong yumi yet long mekim dispela wok?
1 Bilong wanem olgeta taim yumi save kisim ol tok bilong kirapim yumi long givim taim, strong, na mani samting bilong yumi long mekim wok bilong autim tok? Long wanem, dispela wok tasol inap long helpim tru ol man! Taim yumi tingim ol gutpela samting dispela wok inap mekim long olgeta man, dispela bai kirapim laik bilong yumi moa yet long insait long dispela wok we yumi no inap mekim gen long bihain.—Ap. 20:24.
2. Olsem wanem wok autim tok bilong yumi i helpim wok bilong litimapim biknem bilong Jehova?
2 Litimapim Nem Bilong Jehova: Wok autim tok i kamapim klia olsem Kingdom Bilong Jehova long han bilong Krais Jisas, bai pinisim olgeta gavman bilong ol man na em bai pinisim olgeta samting i save givim hevi long ol man. (Mt. 6:9, 10) Yumi litimapim nem bilong Jehova, long wanem, em wanpela tasol inap kisim bek yumi long sik na indai. (Ais. 25:8; 33:24) Nem bilong God i stap long yumi, olsem na taim ol man i lukim yumi mekim gutpela pasin na givim bel tru long wok, ol bai litimapim nem bilong em. (1 Pi. 2:12) Yumi amamas olsem yumi inap long kamapim nem bilong Bikpela King Jehova long olgeta hap bilong graun!—Sng. 83:18, NW.
3. Ol man husat i harim na bihainim tok bilong Kingdom, ol i kisim wanem ol gutpela blesing?
3 Helpim Ol Man Long Abrusim Bagarap: Jehova “i no laik bai wanpela man i lus. Em i laik bai olgeta man i mas tanim bel.” (2 Pi. 3:9) Tasol sapos i no gat man bilong skulim ol, olsem wanem bai ol inap save long ol pasin em Jehova i tok i stret o i no stret? (Jna. 4:11, NW; Ro. 10:13-15) Taim ol wan wan man i harim gutnius na i bihainim, ol i givim baksait long ol pasin nogut i save bagarapim ol, na sindaun bilong ol i kamap gutpela moa. (Mai. 4:1-4) Na moa yet, ol i kisim bikpela amamas long ol inap kisim laip oltaim long bihain. Wok bilong yumi long autim tok na skulim ol man, dispela i opim rot long God i kisim bek yumi na ol man husat i harim tok bilong yumi. (1 Ti. 4:16) Em gutpela samting tru long yumi i insait long dispela nambawan bikpela wok, laka!
4. Bilong wanem yumi mas wok strong na insait moa yet long autim tok bilong Kingdom na kamapim disaipel?
4 Klostu nau bikpela hevi tru bai kamap na pinisim kwik ol man nogut bilong graun. Tasol ol man i stap long sait bilong Jehova ol bai abrusim bagarap. Olsem na wok bilong autim tok na kamapim disaipel, em i wanpela bikpela wok tru em yumi mas hariap long mekim, na em i helpim tru planti manmeri long nau. Olsem na yumi mas putim dispela wok i stap nambawan samting tru long laip bilong yumi!—Mt. 6:33.