Rot Bilong Helpim Ol Man i Bel Hevi na Ol i Ken Amamas Gen

WANPELA disaipel Kristen bilong pastaim, em Epafroditus, i bin bel hevi. Ol i bin salim em i go long helpim aposel Pol i stap long kalabus, tasol bikpela sik i painim em. Bihain Epafroditus i orait gen, tasol em i bel hevi long wanem kongrigesen long as ples bilong em, em ol i bin salim em i go long Rom, ol i “harim tok long em i gat sik.” (Filipai 2:​25, 26) Em i laik mekim gut bel bilong ol, tasol em i stap longwe long ol na dispela i mekim em i bel hevi. Na em i ting, nogut ol i ting em i no bin wok strong long mekim wok bilong em. Olsem wanem ol brata inap helpim em long i stap amamas gen?

Aposel Pol i salim Epafroditus i go bek long as ples bilong em na em i karim wanpela pas Pol i raitim. Long dispela pas Pol i skulim kongrigesen: “Yupela i mas amamas tru long kisim Epafroditus long nem Bilong Bikpela. Yupela i mas givim biknem long ol dispela kain man.” (Filipai 2:​27-30) Em i tokim ol Kristen long Filipai long pas gut wantaim Epafroditus long gutpela pasin em kongrigesen Kristen i save bihainim. Gutpela tok ol i mekim bilong strongim bel bilong em i soim olsem ol i tingim em, na ol i “givim biknem” long em. Dispela amamas em i kisim bai helpim em long tekewe hevi i stap long tingting bilong em.

Dispela i soim olsem i tru lain Kristen “i mas amamas long Bikpela,” tasol sampela namel long ol i karim kain kain bel hevi. (Filipai 4:⁠4) Bikpela bel hevi inap bagarapim bel na tingting bilong ol manmeri na dispela i kirapim planti long kilim i dai skin bilong ol yet. Sampela taim, kru bilong het na sampela samting bilong skin inap kamapim bel hevi. Tasol gutpela save na tingting na helpim ol narapela i givim long em inap daunim bel hevi. Olsem na Pol i tok strong: “Strongim bel bilong ol man i save pret na long helpim ol man i no strong.” (1 Tesalonaika 5:14) Olsem na ol kongrigesen bilong ol Witnes Bilong Jehova i mas amamas long helpim ol man i bel hevi. Kirap long yia 1903 lain Kristen bilong nau i bin tingim dispela wok long helpim ol man i bel hevi. Yumi save long dispela, long wanem, wanpela Wastaua bilong yia 1903 i stori long ol manmeri i bel hevi o i no gat strongpela bel, olsem: ‘Ol manmeri i no gat strongpela bel na ol manmeri i no strong, i mas i gat man bilong helpim ol na strongim ol.’ Tasol olsem wanem yu inap helpim ol manmeri i bel hevi?

Namba wan samting em olsem: Long rot bilong soim ‘pasin sori,’ yu inap helpim man i bel hevi na bai em i kamapim ‘bel hevi’ i stap long bel bilong em. Bihain, ‘gutpela tok’ yu mekim bai mekim em i amamas. (1 Pita 3:8; Sindaun 12:25) Sapos yu larim em i toktok na em i pilim olsem yu laik helpim em, dispela bai mekim em i stap bel isi. Wanpela Kristen, nem bilong em Mary, em i singel, em i bin hatwok long lusim bel hevi. Em i tok, ‘Mi bin i gat sampela pren em mi inap long kamapim ol hevi i stap long bel bilong mi. Mi laik tru long wanpela man o meri i harim ol hevi bilong mi.’ Sapos i gat man i stap bilong yumi ken kamapim ol hevi nau i wok long painim yumi, dispela bai helpim tru yumi.

I gat sampela samting moa yumi mas mekim na i no inap sapos yumi givim tok tasol long ol, olsem: ‘Yu mas tingim ol samting em inap long amamasim bel bilong yu,’ o ‘Yu mas kisim stretpela tingting.’ Dispela kain tok i no soim pasin sori na em i no inap helpim man i bel hevi, olsem Sindaun 25:20 i tok: “Sapos yu go lukim man i bel hevi tru, na yu singim ol song bilong amamas, orait yu no helpim dispela man liklik. Nogat tru. Yu olsem man i rausim klos bilong en long taim bilong kolwin.” Ol kain toktok olsem bai mekim man i bel hevi moa yet. Bilong wanem? Long wanem dispela tok i no stret long as bilong bel hevi bilong em.

Ol Tok Inap Strongim Man

Man i bel hevi tru, ating em bai pilim olsem em i samting nating na i no gat wanpela gutpela samting em inap wetim i kamap bihain. Dispela tok “man i bel hevi,” long tok Grik ol i tanim olsem ‘ol man bel bilong ol i no strong.’ Wanpela saveman bilong Grik i kamapim insait bilong dispela tok olsem: “Man i hatwok long daunim ol hevi bilong em, na dispela i mekim bel bilong em i hevi tru.” Olsem na bel bilong em i bagarap na em i ting em i nogut tasol.​—⁠Lukim Sindaun 17:⁠22.

Job i tok: “Maus bilong mi inap mekim planti toktok bilong strongim yupela na mekim pen bilong yupela i slek olgeta.” (Jop 16:⁠5) Sampela taim ol i tanim dispela tok “strongim” long tok Hibru olsem “kamap strong moa” o “strongim moa yet.” Dispela i soim olsem wanem ol i bin strongim haus lotu taim ol i wok long stretim bek. (Aisaia 41:10; Nahum 2:1; 2 Stori 24:13) Ol tok yu mekim i mas strongim bel na tingting bilong man i bel hevi, olsem wanpela man i laik wokim haus brik na em i wok long skruim narapela brik i go antap long narapela brik. Taim yu mekim olsem yu mas tingim pasin bilong em long ‘skelim ol samting i stret.’ (Rom 12:⁠1) Wastaua bilong 1903 em yumi stori long en pastaim i stori long ol man i bel hevi olsem, na ol i ting ol i samting nating, na Wastaua i tok: ‘Ol i sot long stretpela tingting, olsem na i mas i gat man bilong strongim ol long kamapim ol gutpela pasin bilong ol na bilong strongim ol, na dispela bai helpim olgeta manmeri i bilip.’

Baibel i kamapim stori bilong Elkana na meri bilong em Hana em i stap bel hevi, na dispela stori i soim olsem wanem yumi inap strongim ol man i bel hevi, olsem Jop i bin mekim. Elkana i gat tupela meri. Wanpela nem bilong em Penina, i gat pikinini, tasol Hana i no gat pikinini. Olsem na Hana i ting em i samting nating tru. (Lukim Stat 30:⁠1.) Hana i no gat pikinini, olsem na Penina i sutim tok long em na putim hevi long em, na Hana i krai na em i no laik kaikai. Elkana i no save olsem Hana i gat bikpela bel hevi, olsem na em i askim em: “Hana, bilong wanem yu krai? Bilong wanem yu no laik kaikai? Na bilong wanem yu bel hevi oltaim?”​—⁠1 Samuel 1:​1-8.

Elkana i mekim askim long pasin isi na dispela i kirapim Hana long kamapim ol hevi bilong em. Ating em i bekim o nogat, tasol dispela i helpim em yet long save bilong wanem em i ting em i samting nating. Olsem na man i bel hevi bai tok: “Mi man nogut tasol.” Yu inap askim em olsem, “Bilong wanem yu ting olsem?” Na putim gut yau taim em i kamapim ol hevi i stap long bel bilong em.​—⁠Lukim Sindaun 20:⁠5.

Nau Elkana i givim wanpela tok long Hana na dispela tok i strongim bel bilong em. Elkana i tok: “Maski sapos yu karim 10-pela pikinini man, ating long tingting bilong yu bai mi stap namba wan.” Maski Hana i no karim pikinini, tasol em i save Elkana i laikim em tru. Olsem na Hana inap ting olsem: “Mi no samting nating tasol. Man bilong mi i laikim mi tru.” Ol tok bilong Elkana i strongim Hana, olsem na em i kirap kaikai gen na em i go long haus bilong Jehova.​—⁠1 Samuel 1:​8, 9.

Ol askim Elkana i givim long Hana i kirapim Hana long tingim as bilong hevi bilong em na em i no ken bel hevi. Olsem na ol manmeri i laik helpim ol man i bel hevi ol i mas bihainim pasin bilong Elkana. Wanpela Kristen nem bilong em Naomi i stori long samting i bin helpim em long i stap amamas gen, em i tok: “Sampela pren i tokim mi long gutpela pasin mi bihainim long mekim bikpela long pikinini man bilong mi, na ol i tok mi lukautim gut haus bilong mi, na tu ol i tok, bilas bilong mi i gutpela tru maski mi gat bel hevi. Ol dispela tok i strongim mi tru.” Yes, ol gutpela tok yu mekim bai helpim man i bel hevi long tingim ol gutpela pasin bilong em na em bai kisim stretpela tingting long em yet.

Sapos meri bilong yu i bel hevi, yu ken helpim na strongim em long ol tok i stap long Sindaun 31:​28, 29. Dispela skripsa i tok: “Man bilong en i litimapim nem bilong em moa yet na i tok, ‘Viles na taun bilong yumi i gat planti meri i save mekim gutpela pasin tru, tasol yu winim ol moa yet.’ ” Tasol sapos meri marit i stap bel hevi, ating em bai bel hevi yet, long wanem em i ting em i no mekim gutpela wok long lukautim gut ol wok bilong haus. Yu ken tokim em long tingim gutpela pasin bilong em na em i wanem kain meri paslain long em i painim bel hevi. Yu no mekim nating ol tok bilong amamasim em. Yu ken tok olsem: ‘Mi save yu hatwok long mekim dispela wok. Em i gutpela samting yu wok strong long mekim dispela wok.’ Sapos papa na pikinini ol i save mama i bel hevi na ol i litimapim nem bilong mama, dispela bai strongim em long kisim stretpela tingting long em yet​—⁠Lukim 1 Korin 7:​33, 34.

Ol gutpela stori i stap long Baibel bai helpim ol man i bel hevi long senisim sampela tingting bilong ol. Olsem, wanpela man i bel hevi bai tingting planti long tingting bilong ol narapela man. Yu ken kamapim stori bilong Epafroditus na yu ken askim em olsem: “Yu ting bilong wanem em i bel hevi taim em i save olsem kongrigesen long ples i harim em i gat sik? Bilong wanem Pol i tok long litimapim nem bilong em? Yu ting wok bilong Epafroditus i makim ol pasin tru bilong em?” Ol kain askim olsem bai helpim man i bel hevi long tingim sampela pasin bilong em, na tu em bai save olsem em i no samting nating tasol.

“Helpim Man i No Strong”

Baibel i tok: “Helpim ol man i no strong.” (1 Tesalonaika 5:14) Gutpela pasin sori ol brata sista i mekim long lukautim ol man i bel hevi i wanpela mak bilong trupela lotu. “Ol gutpela pren i save laikim yumi long olgeta taim,” na ol i save sambai long man i bel hevi. (Sindaun 17:17) Taim aposel Pol i ‘bel hevi’ na i ‘pret,’ Taitus i stap wantaim em na dispela i ‘mekim isi bel bilong em.’ (2 Korin 7:​5, 6) Taim yumi go lukim ol man i bel hevi o telefon long ol, dispela bai amamasim tru bel bilong ol. Yumi ken askim ol sapos ol i laik long yumi mekim sampela wok long haus o narapela wok.a Wanpela Kristen nem bilong em Maria i tok: ‘Taim mi bel hevi, wanpela pren i save raitim pas long mi na kamapim ol skripsa na dispela i save strongim mi tru. Taim mi kaunim ol pas mi save krai. Mi tingim ol pas i olsem gol.’

Taim em i strongim ol kongrigesen long helpim ol ‘man i bel hevi,’ Pol i tok: “Yupela i mas isi isi long olgeta man. Sapos ol i mekim pasin nogut long yupela, orait yupela i no ken bekim pasin nogut long ol.” (1 Tesalonaika 5:​14, 15) Pasin isi em i bikpela samting, long wanem man i bel hevi em i no save kisim gutpela slip na i no inap tingting stret na bai em i toktok nabaut, olsem Jop i bin mekim. (Jop 6:​2, 3) Wanpela meri, em Rachelle, em mama bilong em i bin i gat bikpela bel hevi, em i tok: ‘Planti taim mama i save mekim ol tok bilong skrapim bel. Taim em i mekim ol kain tok olsem, mi save tingim ol gutpela pasin bilong em​—⁠pasin sori na pasin bilong tingim narapela man na helpim ol. Dispela samting i lainim mi olsem ol man i bel hevi i no save tingting long ol tok ol i mekim​—⁠ol i tok nating tasol. Sapos man i bekim long ol, dispela i no inap daunim hevi.’

Sampela strongpela meri Kristen inap helpim ol meri i stap bel hevi (Lukim 1 Timoti 5:​9, 10.) Ol dispela strongpela meri Kristen i ken toktok gut wantaim ol, tasol ol i mas tingim gutpela taim bilong mekim. Sampela taim i stret sapos ol sista yet i ken wok long helpim ol kain meri olsem. Ol elda i ken wok long stretim rot bilong ol dispela sista i ken helpim ol.

Ol Elda i Gat “Gutpela Pasin Bilong Toktok”

Ol wasman bilong sipsip i mas i gat “gutpela tingting na save” na dispela bai helpim ol long “mekim gutpela tok bilong strongim bel bilong ol manmeri i no gat strong.” (Jeremaia 3:15; Aisaia 50:⁠4) Tasol sapos wanpela elda i no was gut, ol toktok em i mekim inap bagarapim moa bel bilong man i bel hevi. Ol trupela pren bilong Jop i bin go bilong ‘sori na strongim bel bilong em.’ Tasol ol toktok bilong ol i no strongim Jop; ol tok ol i mekim i bagarapim bel bilong em.​—⁠Jop 2:11; 8:​1, 5, 6; 11:​1, 13-19; 19:⁠2.

Ol tok i stap long ol Wastaua i helpim yumi long save, olsem wanem yumi ken mekim wok long helpim ol man i bel hevi.b Planti elda i bihainim ol tok i stap long ol Wastaua. Tasol sampela elda i no tingting stret, na ol tok ol i mekim taim ol i toktok wantaim man i bel hevi o ol tok ol i mekim long kongrigesen i bin bagarapim bel bilong man. Olsem na ol elda i no ken mekim tok bilong bagarapim bel bilong man olsem bainat i sutim em. Tasol tok bilong ol i mas helpim man olsem gutpela marasin. (Sindaun 12:18) Sapos elda i tingting gut pastaim long ol tok em i mekim, ol tok bilong em inap mekim gut bel bilong man. Olsem na ol elda i mas putim gut yau na harim ol tok pastaim, na ol i ken skelim gut na save gut long dispela hevi, na nau ol inap bekim tok, na dispela bai helpim ol man i gat bel hevi.​—⁠Sindaun 18:⁠13.

Taim ol elda i tingim tru ol man i bel hevi na i laik helpim ol, ol i save tingim gutpela pasin bilong ol elda olsem ol i sori long ol na laikim tru ol. Gutpela pasin sori ol elda i mekim inap helpim ol dispela man long lusim tingting long sampela liklik tok bilong elda em inap long bagarapim bel bilong ol. (Jems 3:⁠2) Ol man i bel hevi i no inap tingting stret na ol i ting ol i gat asua long wanpela samting, na ol elda i ken helpim ol long kisim stretpela tingting. Taim wanpela i mekim bikpela rong, ol elda i ken helpim em long samting bilong spirit, na ‘lek bilong em i no ken bagarap olgeta.’​—⁠Hibru 12:⁠13.

Taim ol man i bel hevi i pilim olsem ol beten bilong ol i no karim kaikai, ol elda i ken beten wantaim ol na beten long helpim ol. Na ol elda i ken kaunim sampela buk samting i kamapim tok bilong Baibel na i stori long bel hevi, na long dispela rot ol elda i ‘welim’ ol man i bel hevi long ol gutpela tok bilong mekim isi bel bilong man. (Jems 5:​14, 15) Ol elda i ken mekim wok long ol skripsa long helpim man o meri long i stap gut wantaim narapela sapos dispela i as bilong hevi. (Lukim Matyu 5:​23, 24; 18:​15-17) Planti taim ol kros i kamap insait long famili i as bilong bel hevi.

Yu mas save olsem man bai lusim bikpela hap taim bambai em inap orait gen. Pasin sori Elkana i mekim long Hana i no helpim em long kamap orait wantu tasol. Ol beten bilong em na ol gutpela tok pris i mekim i helpim em long lusim bel hevi. (1 Samuel 1:​12-18) Yu mas isi long man i no kamap orait kwiktaim. I tru, ol elda i no dokta na sampela taim ol i no inap long oraitim tru ol kain man olsem. Tasol ol i ken wok wantaim famili bilong man i bel hevi long helpim em long i go lukim ol man i gat save long helpim em. Ol elda o famili bilong man i ken toksave long dokta long ol bilip bilong man.

Long nupela pasin God bai kamapim bai i no gat man o meri i gat sik long skin na tingting na sik bilong bel hevi. Olsem na nau long taim bilong yumi ol Kristen i bel hevi i ken kisim strong long ol brata sista insait long kongrigesen, na tu, ol inap kisim strong long Papa i stap long heven, em i save “mekim isi bel bilong ol manmeri i stap bel hevi.”​—⁠2 Korin 7:⁠6.

“Tok bilong man i gat gutpela tingting i save helpim ol man olsem gutpela marasin.”​—⁠Sindaun 12:⁠18.

[Ol Futnot]

[Blok long pes 29]

OLSEM WANEM YU INAP MEKIM GUTPELA TOK

◻ PUTIM GUT YAU​—⁠Ol askim yu givim long em inap ‘pulim’ o ‘kamautim’ ol tingting i stap long bel bilong man. Yu mas hariap long putim gut yau, tasol yu no ken hariap long mekim ol tok. Na yu mas larim em i kamapim tingting bilong em na bai yu save gut long as bilong bel hevi bilong em.​—⁠Sindaun 20:5; 18:⁠13.

◻ MEKIM PASIN SORI​—⁠Mekim ‘pasin sori’ taim yu helpim ol man i bel hevi. “Krai wantaim ol man i krai.”​—⁠1 Pita 3:8; Rom 12:⁠15.

◻ MAS ISI LONG EM​—⁠Mekim pasin isi na toktok planti taim wantaim man na bai yu inap helpim em. Lusim tingting long ol kain toktok nabaut bilong em​—⁠tingting bilong em i no wok stret.​—⁠Jop 6:⁠3.

◻ STRONGIM EM LONG TOKTOK BILONG YU​—⁠Helpim em long tingim ol gutpela pasin bilong em. Sampela pasin bipo em i mekim o ol liklik pasin kranki bilong em, dispela i no makim olsem em i nogut tasol. Tokim em bilong wanem God i sori long em na i tingim em.​—⁠Jop 16:⁠5.