Askim

◼ Olsem wanem? Papa na mama wantaim inap kisim aua long taim ol i lusim bilong mekim famili stadi?

Papa i gat bikpela wok long ‘stretim gut ol pikinini na skulim ol long tok bilong Bikpela,’ tasol em wok bilong papa na mama wantaim long skulim ol pikinini. (Ef. 6:⁠4) Baibel i tokim ol pikinini: “Pikinini, yu mas harim tok bilong papamama bilong yu na yu no ken sakim tok bilong tupela.” (Snd. 1:⁠8) Wanpela bikpela hap bilong wok papamama i mekim bilong skulim ol pikinini em long mekim Baibel stadi bilong famili.

Long bipo, papa o mama husat i mekim Baibel stadi wantaim pikinini i no baptais yet, em tasol inap putim ripot long taim em i lusim bilong mekim dispela stadi, maski papa na mama wantaim i mekim dispela stadi. Tasol nau i gat senis long dispela. Sapos long taim bilong famili stadi, papa na mama wantaim i insait long skulim ol pikinini, orait tupela wantaim bai i kisim wanpela aua tasol long wanpela wik olsem aua bilong wok autim tok. Tru, ol papamama i save lusim bikpela haptaim winim wanpela aua long olgeta wik bilong skulim ol pikinini. Bilong skulim pikinini, papa na mama wantaim i mas wok strong long mekim olsem long olgeta taim. (Lo 6:​6-9) Tasol bikpela hap bilong ol aua ol i putim long ripot bilong olgeta mun em aua bilong wok autim tok ol i mekim long ol ausaitman. Olsem na ol i mas kaunim wanpela aua tasol long wanpela wik maski stadi i abrusim wanpela aua, o ol i mekim stadi inap 2-pela taim samting long wanpela wik, o ol i mekim stadi wantaim narapela narapela pikinini long narapela narapela taim. Papa o mama wanpela tasol i mas putim ripot bilong famili Baibel stadi na kaunim olsem wanpela gobek long olgeta wan wan wik taim ol i mekim famili stadi.