Yu Redi Sapos Bikpela Sik i Kamap Wantu?
Bikpela sik o eksiden inap kamap wantu long taim yumi no tingim. (Jems 4:14) Olsem na man i gat savetingting em bai mekim ol samting bilong redi paslain long hevi i kamap. (Snd. 22:3) Yu makim pinis wanem rot bilong stretim sik na marasin samting em yu laik kisim, na yu raitim pinis long pepa? Bilong helpim yu, lukim DVD Transfusion-Alternative Health Care—Meeting Patient Needs and Rights, namba 2 hap, Transfusion-Alternatives—Documentary Series. Taim yu lukim DVD, traim long painim bekim bilong ol dispela askim. Em i gat ol piksa bilong dokta i katim man, olsem na papamama i mas bihainim savetingting taim ol i lukim dispela DVD wantaim ol pikinini.
(1) Bilong wanem sampela dokta i wok long skelim pasin bilong ol long givim blut long man? (2) Kolim 3-pela bikpela operesen ol dokta inap mekim na i no gat wok long givim blut. (3) Bilong wanem ol dokta long olgeta hap bilong graun i orait long helpim ol sikman em ol i no laik kisim blut? (4) Ol i bin mekim wok painimaut long sampela haus sik na ol i kisim wanem save long pasin bilong yusim blut? (5) Wanem kain hevi inap painim man sapos em i kisim blut? (6) Ol gutpela samting i kamap taim ol dokta i yusim ol narapela marasin samting na ol i no mekim wok long blut, dispela i givim wanem save long ol? (7) Wanem samting i save kamapim sik animia, olsem sot long blut? Ol i ken mekim wanem bilong helpim man i sot long blut? (8) Ol dokta i ken mekim wanem bilong kirapim bodi long kamapim planti retpela sel long blut? (9) Ol dokta i save bihainim wanem ol pasin na bai planti blut i no ken lus taim ol i katim man? (10) Yu ting ol inap yusim ol marasin samting bilong helpim ol yangpela pikinini na ol manmeri long taim bilong bikpela bagarap i painim ol we ol inap dai? (11) Kolim wanpela bikpela stiatok bilong stiaim ol dokta long save wanem samting i stret o i no stret long mekim bilong lukautim sikman.
Sampela pasin ol i mekim wok long en long DVD em samting ol wan wan Kristen i mas bihainim maus bilong bel na wokim disisen bilong ol yet. Yu no ken wet inap long taim hevi i kamap na nau yu laik skelim dispela samting. Bilong helpim yu, lukim buk “Pasin Laikim Bilong God,” sapta 7, na ol referens long dispela sapta, na tu, Wastaua, Jun 15, 2004, p. 19-24, 29-31 na Wastaua, Oktoba 15, 2000, p. 30-31. Sapos yu wanpela brata o sista i baptais pinis, yu mas raitim ol samting yu makim long kat Advance Medical Directive/Release, na yu mas kisim dispela kat wantaim yu long olgeta taim.
[Rait long pes 5]
Yu makim pinis wanem rot bilong stretim sik na marasin samting em yu laik kisim, na yu raitim pinis long pepa?