Nambawan Gutpela Rot Bilong Lukautim Sikman—Em Wanem Rot?
Dokta Michael Rose i tok: “Sapos sikman i kisim operesen na ol i no mekim wok long blut, dispela em nambawan gutpela operesen tru.” Wanem sampela samting ol dokta i ken mekim na i no gat wok long givim blut? Yu mas save gut long ol dispela samting na bai yu inap makim wanem kain marasin samting yu ken kisim. Lukim vidio No Blood—Medicine Meets the Challenge. Bihain, traim save bilong yu long rot bilong ol dispela askim.—Harim: Dispela vidio i kamapim sampela piksa bilong ol dokta i katim man, olsem na ol papamama i mas tingting gut na skelim sapos ol liklik pikinini i ken lukim o nogat.
(1) Wanem nambawan as na ol Witnes Bilong Jehova i no laik kisim blut? (2) Taim ol Witnes Bilong Jehova i mas kisim marasin samting, ol i laik bai ol dokta i ken mekim wanem? (3) Ol sikman i gat rait long mekim wanem? (4) Bilong wanem em i gutpela tingting long kisim ol marasin samting i no gat blut long en? (5) Taim sikman i lusim planti blut, i gat wanem tupela bikpela samting ol dokta i mas mekim? (6) I gat wanem 4-pela samting ol dokta i ken mekim na i no gat wok long givim blut? (7) Olsem wanem ol dokta i ken (a) stopim planti blut long lus, (b) mekim na planti retpela sel bilong blut i no lus, (c) helpim bodi long wokim blut, (d) kisim bek blut i lus? (8) Stori long wok bilong (a) hemodilution na (b) cell salvage. (9) Gutpela sapos yu save long wanem samting bilong ol marasin ol dokta i ken mekim wok long en na i no gat wok long givim blut? (10) Ol dokta inap mekim ol bikpela operesen na i no gat wok long givim blut? (11) Planti dokta moa i orait long mekim wanem?
Sampela pasin ol i mekim wok long en long vidio em samting bilong wan wan yet i mas skelim gut na bihainim maus bilong bel em Baibel i skulim pinis. Olsem wanem? Yu wokim disisen pinis long wanem kain marasin samting yu orait long yu na ol pikinini bilong yu i ken kisim? Yu mas stori gut long ol famili bilong yu i no Witnes long ol disisen bilong yu na i gat wanem as na yu gat dispela tingting.—Lukim “Askim” i stap long Wastaua bilong Jun 15, 2004, na Oktoba 15, 2000.