Vidio i Stori Long Wanpela Pasin Ol Dokta i Bihainim
Ol loya na ol dokta samting i wok long skelim gut tingting bilong ol man long wanem samting i stret o i no stret (ol i kolim etiks o etikol vius) na ol raits bilong ol sikman. Dispela tingting i mekim na ol i bin kamapim sampela nupela marasin na nupela pasin bilong helpim ol sikman na ol inap helpim ol Witnes Bilong Jehova. (Ap. 15:28, 29) Nupela vidio, nem bilong em Transfusion-Alternative Health Care—Meeting Patient Needs and Rights, i stori long dispela samting. Lukim dispela vidio na bihain skelim save yu bin kisim.
(1) Bilong wanem sampela dokta i wok long skelim pasin bilong ol long givim blut long man? (2) Kolim 3-pela bikpela operesen ol dokta inap mekim na i no gat wok long givim blut. (3) Hamas dokta long olgeta hap bilong graun i orait long helpim ol sikman em ol i no laik kisim blut? Bilong wanem ol i amamas long mekim olsem? (4) Ol i bin mekim wok painimaut long sampela haus sik na ol i kisim wanem save long pasin bilong yusim blut? (5) Wanem kain hevi inap painim man sapos em i kisim blut? (6) Planti saveman i kisim wanem save long ol gutpela samting i kamap taim ol i yusim ol transfiusen oltenetivs—em ol samting ol dokta inap mekim na i no gat wok long givim blut? (7) Wanem samting i save kamapim sik animia, olsem sot long blut? Man inap sot long hamas blut na em inap stap gut yet? Ol i ken mekim wanem bilong helpim man i sot long blut? (8) Ol dokta i ken mekim wanem bilong kirapim bodi long kamapim planti retpela sel (ol i kolim ret sel prodaksen)? (9) Ol dokta i save bihainim wanem ol pasin na bai planti blut i no ken lus taim ol i katim man? (10) Ol inap yusim ol transfiusen oltenetivs bilong helpim ol yangpela pikinini na ol manmeri long taim bilong imejensi? (11) Kolim wanpela bikpela stiatok (olsem etikol prinsepol) bilong stiaim tingting bilong ol dokta long save wanem samting i stret o i no stret long mekim bilong lukautim sikman. (12) Ol Kristen i mas makim wanem samting ol i orait long en na ol i no gat wok long kisim blut. Bilong wanem em i bikpela samting long makim ol dispela samting paslain long hevi i kamap? Yumi ken mekim olsem wanem?
Sampela pasin ol i mekim wok long en long vidio em samting ol wan wan Kristen i mas skelim gut na bihainim maus bilong bel em Baibel i skulim pinis, na wokim disisen bilong ol yet. Olsem wanem? Yu wokim disisen pinis long ol transfiusen oltenetivs yu na ol pikinini bilong yu bai orait long kisim? Yu mas stori gut long ol wanblut i no Witnes, long ol disisen bilong yu na wanem as na yu gat dispela tingting.—Lukim “Askim” i stap long Wastaua bilong Jun 15, 2004 na Oktoba 15, 2000.