Kamap Gen Long Narapela Bodi
Stori: Sampela man i ting yumi bin i stap bipo na taim yumi dai, yumi kamap gen long narapela bodi, olsem bilong man o animal. Ol i ting yumi gat tewel i save go insait gen long narapela bodi. Em i no wanpela tok bilong Baibel.
Sapos yu bungim wanpela man yu no save long em bipo na yu pilim olsem yu save long em, o yu go long wanpela ples yu no bin go long en bipo na yu pilim olsem yu save long dispela ples, yu ting dispela i makim olsem yu bin i stap long wanpela taim bipo?
Olsem wanem? Wanpela taim yu bungim wanpela man (o meri) na yu popaia na ting em i narapela man (o meri) em tu i stap laip long nau? Kain samting olsem i painim planti man, long wanem, sampela man o meri i gat wankain pasin, o pes bilong ol i wankain. Olsem na sapos yu pilim olsem yu save long wanpela man yu no bin bungim em bipo, dispela i no makim olsem yu bin i stap long wanpela taim bipo, a?
I gat wanem as na bai yu ting yu save long wanpela haus o taun em yu no bin lukim bipo? Yu ting dispela i makim olsem yu bin stap bipo na yu bin stap long dispela haus o taun? Ol man i wokim planti haus i wankain, a? Na ol tebol na sia samting long ol haus long narapela narapela taun, ating ol man i wokim long wankain stail. Na sampela ples i wankain long narapela ples i stap longwe, a? Olsem na yumi save, i gat as na yu pilim olsem yu bin lukim dispela haus o taun bipo—i no olsem yu bin i stap bipo, nogat.
Yu ting sampela tok bilong Baibel i helpim dispela tingting olsem yumi save kamap gen long narapela narapela bodi?
Olsem wanem long tok bilong Matyu 17:12, 13?
Mt 17:12, 13: “[Jisas i tok:] ‘Elaija em i kam pinis, na ol man i no bin save long em. Nogat. Ol i bihainim laik bilong ol yet na ol i mekim ol kain kain pasin long em. Na long wankain pasin bai ol i mekim nogut long Pikinini Bilong Man.’ Jisas i tok olsem, na ol disaipel i save, em i toktok long Jon Bilong Baptais.”
Yu ting dispela tok i makim olsem Jon Bilong Baptais em Elaija i kamap gen long narapela bodi? Taim ol pris bilong lotu Juda i askim Jon, “Ating yu Elaija, a?” Jon i tok, “Nogat.” (Jo 1:21) Orait, wanem insait bilong dispela tok bilong Jisas long Matyu 17:12, 13? Olsem ensel bilong Jehova i tok profet pinis, Jon i “kisim pasin na strong bilong Elaija” na i go pas long Krais bilong “mekim ol papa na ol pikinini i kamap wanbel,” na “stretim tingting bilong ol man bilong sakim tok, na ol bai i kisim gutpela tingting olsem bilong ol stretpela man,” na bilong “redim ol man na ol i stap redi long Bikpela i kam.” (Lu 1:17) Olsem na Jon i mekim wok wankain olsem bilong Elaija na em i truim dispela tok profet.—Mal 4:5, 6.
Olsem wanem long tok bilong Jon 9:1, 2?
Jo 9:1, 2: “Jisas i wokabaut i go, na em i lukim wanpela man aipas. Taim mama i karim em, em i aipas pinis. Na ol disaipel bilong Jisas i askim em, ‘Tisa, husat i mekim sin na taim mama i karim dispela man em i kamap aipas? Dispela man yet i mekim sin, o papamama bilong en i mekim sin?’ ”
Yu ting ol disaipel i bihainim tingting bilong ol Farisi bilong lain Juda, em ol i tok “tewel bilong ol gutpela man tasol i save go kamap insait long narapela bodi”? (Buk 2 bilong Wars of the Jews, sapta 8, par. 14) Nogat, long wanem, tok bilong ol i no makim olsem ol i ting dispela man em i ‘gutpela man.’ Ol i disaipel bilong Jisas, olsem na ol i bilipim tok bilong Baibel na ol i save, taim man i dai em i dai tru; em i no gat tewel. Tasol pikinini i stap yet long bel bilong mama em i gat laip na em i gat sin (em i kisim long papamama), olsem na ating ol disaipel i laik save, taim dispela man i stap yet long bel bilong mama em inap mekim sin na long dispela as em i kamap aipas, o olsem wanem? Bekim bilong Jisas i no helpim dispela tingting olsem yumi bin i stap bipo na yumi kamap gen long narapela bodi. Na tok bilong em i no helpim dispela tingting olsem pikinini i stap yet long bel em inap mekim sin. Jisas i bekim tok olsem: “Dispela man i no mekim sin, na papamama bilong en tu i no mekim sin.” (Jo 9:3) Jisas i save, yumi lain bilong Adam, olsem na yumi olgeta i gat sin na ol pasin kranki em sin i kamapim long yumi. Dispela samting i bin kamap, Jisas i mekim wok long en bilong litimapim nem bilong God—em i opim ai bilong dispela aipas.
Tok bilong Baibel long laip na i dai, yu ting dispela i makim olsem yumi gat tewel i kamap gen long narapela narapela bodi?
Stat 2:7 i tok: “Bikpela i kisim graun na em i wokim man long en. Na em i winim win bilong laip i go insait long nus bilong man, na man i kisim laip.” Olsem na Baibel i tok, God i givim laip long man; i no tok, God i givim tewel long man. Taim man i dai, em i “tanim i kamap graun gen. Na long dispela taim [em] i no inap mekim olgeta samting [em] i bin tok long mekim.” (Sng 146:4) Olsem na taim man i dai, em i dai tru; i no gat wanpela hap bilong em i stap laip yet bilong kamap gen long narapela bodi. Nogat tru. (Bilong kisim sampela save moa, lukim bikpela het-tok “Tewel” na “Dai.”)
Sav 3:19: “Pinis bilong yumi man i wankain olsem ol abus. Ol abus i save dai, na yumi man tu i save dai.” (Dai bilong animal i wankain olsem dai bilong man—taim animal i dai, i no gat wanpela hap bilong en i stap laip yet. I no gat wanpela hap, olsem tewel samting, i stap laip yet na em inap kamap gen long narapela bodi. Nogat.)
Sav 9:10: “Sapos yu mekim wanpela wok, orait taitim bun na mekim save tru. Long wanem, bai yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.” (Ol man i dai pinis ol i no i go insait long narapela bodi. Nogat. Ol i go long ples bilong ol man i dai pinis, em matmat.)
Dispela bilip olsem yumi bin i stap bipo na yumi kamap gen long narapela bodi, dispela bilip i narapela kain tru long tok bilong Baibel, o olsem wanem?
Kamap gen long narapela narapela bodi: Ol man i gat dispela bilip ol i ting, taim man i dai, sapos em i gutpela man, i stap bilong tewel bilong em bai i gutpela moa. Tasol sapos em i man nogut, bai em i kamap gen olsem wanpela animal samting. Ol i ting, man i save kamap gen planti taim long dispela graun, na em bai kisim pen na hevi gen na em bai dai gen. Ol i ting man i save kamap nupela long graun na i dai na kamap nupela gen, na i no gat pinis bilong en. Yu ting samting olsem bai painim yu? Sampela i ting i gat wanpela rot tasol bilong abrusim dispela, em ol i mas daunim olgeta laik na amamas bilong skin. Na taim ol i dai, wanem samting bai painim ol? Ol i ting olsem ol bai i stap nating—no gat tingting o save.
Baibel: Baibel i tok, maski man i bin mekim pasin nogut, sapos em i tanim bel na senisim pasin bilong em, God Jehova bai lusim rong bilong em. (Sng 103:12, 13) Taim man i dai, i no gat wanpela liklik hap bilong em i stap laip yet. Dai i olsem slip, olsem man i slip strong na em i no driman. Baibel i tok, ol man i dai pinis, bihain bai ol i kirap bek na kisim laip gen. Dispela i no olsem ol i kamap gen long narapela bodi, nogat. Dispela man yet i kisim laip gen na em i kisim bek tingting na pasin bilong em. (Ap 24:15) Planti bai ol i kisim laip long graun. Dispela samting bai kamap taim God i pinisim pasin nogut bilong nau. Bai sik na pen i pinis, na ol man i no ken i dai moa. (Dan 2:44; KTH 21:3, 4) Olsem wanem? Yu laik kisim sampela save moa long dispela gutpela samting yu ken wetim i kamap, na bai yu inap bilip tru long en?
Sapos Man i Tok—
‘Mi bilip olsem yumi save kamap gen long narapela bodi’
Yu ken tok: ‘Yu ting long dispela rot i stap bilong yu bai kamap gutpela long bihain? . . . Tasol olsem wanem? Yu laik i stap long gutpela taim tru long bihain, olsem Kamapim Tok Hait 21:1-5 i stori long en?’
O yu ken tok: ‘Tenkyu long yu tokim mi long bilip bilong yu. Olsem wanem? Bipo tu yu bin bilip olsem o nau tasol yu kisim dispela bilip? . . . Wanem samting i mekim na yu lusim olpela bilip bilong yu?’ (Ating yu ken kamapim sampela tok long het-tok long pes 176, 177.)
Narapela tok yu ken mekim, em olsem: ‘Mi bin toktok wantaim sampela moa ol i gat dispela bilip. Tasol yu ting i gat wanem as na yumi mas kamap gen long narapela narapela bodi?’ Na ating yu ken tok moa olsem: (1) ‘Yu inap tingim bek olgeta samting yu bin mekim long ol dispela taim yu ting yu bin stap bipo? . . . Tasol sapos yu no inap tingim bek ol samting yu bin mekim, olsem wanem bai yu inap abrusim ol pasin kranki yu bin mekim bipo na kamap gutpela?’ (2) Sapos man bilong haus i tok, i gutpela yumi no inap tingim bek ol samting, yu ken tok: ‘Tasol sapos long olgeta taim man i lusim tingting long ol samting, yu ting dispela inap helpim em? Sapos long olgeta 70 yia 70 yia yumi lusim tingting long olgeta samting yumi bin kisim save long en, yu ting dispela bai helpim yumi na bai i stap bilong yumi i wok long kamap gutpela moa?’ (3) Sapos man bilong haus i tok, ol gutpela man tasol i kamap gen long bodi bilong man, yu ken tok: ‘Sapos olsem, bilong wanem pasin bilong graun i wok yet long i go nogut? . . . Baibel i makim rot tru bilong ol samting bai kamap gutpela long taim bilong yumi. (Dan 2:44)’