Helpim Man i No Redi Long Kisim Buk Baibel i Tok
1. Yu ting olgeta man bai laikim buk Baibel i Tok long namba 1 taim yu bungim ol? Stori long dispela.
1 Sapos man i laik lotuim Jehova, em i mas kisim save long tok bilong Baibel. Tasol sampela man i no bilong lotu Kristen na ol i no ting Baibel em i Tok Bilong God. Ol arapela i no bilip long God na ol i no rispektim Baibel. Wanem ol buk na nius inap helpim ol man husat i no laik kisim buk Baibel i Tok long namba 1 taim yumi bungim ol? Ol tok i stap daunbilo, em ol tok ol pablisa long 20 narapela narapela kantri i mekim.
2. Sapos man i tok em i no bilip long God, yumi mas painimaut wanem as na em i tok olsem. Bilong wanem yumi mas mekim olsem?
2 Ol Man i No Bilip Long God: Sapos man i tok em i no bilip long God, orait i gutpela long askim em long risen na em i tok olsem. Yu ting em i bilip long evolusen? Yu ting em i no bilip moa long God, long wanem, pasin i no stret i pulap long graun o pasin giaman i pulap insait long ol lotu? O ating long ples bilong em ol man i no bilip long God? Ating em i save olsem God i stap, tasol em i pilim olsem i no gat wok long bilip long God. Planti pablisa i save givim dispela askim, “Bipo yet yu bin i gat dispela tingting?,” na dispela i save kirapim man long stori. Putim gut yau na no ken katim tok. Taim yumi kliagut long as na man i no bilip long God, bai yumi save long olsem wanem yumi inap bekim tok na wanem buk samting bai yumi tilim.—Snd. 18:13.
3. Olsem wanem yumi inap soim olsem yumi rispektim man na bilip bilong em?
3 Taim yumi bekim tok, was gut long tok yumi mekim nogut man i ting olsem yumi laik daunim tok bilong em. Wanpela long Amerika i tok: “Em i bikpela samting long tingim olsem ol man i gat rait long makim samting ol i laik bilip long en. I no gutpela long daunim tingting bilong ol, tasol yumi ken kamapim ol askim bilong kirapim tingting bilong ol long skelim na ol yet i ken bekim askim bilong ol.” Bihain long man bilong haus i kamapim tingting bilong en, wanpela wasman raun i save mekim kain askim olsem, “Sampela taim yu bin tingting long dispela samting?”
4. Olsem wanem yumi inap helpim ol man bilong lotu Buda?
4 Dispela tingting olsem i gat God i stap, em i narapela kain samting long tingting bilong ol man bilong lotu Buda. Sampela pablisa long Briten i save yusim buklet Lasting Peace and Happiness—How to Find Them taim ol i autim tok long ol dispela lain. Taim ol i soim buklet pinis, ol i stori long hap: “Is There Really a Most High Creator?” na bihain ol i stori long narapela hap “A Guidebook for the Blessing of All Mankind.” Na ating bihain, ol i soim buk Baibel i Tok na tokim man bilong haus olsem, “Maski yu no bilip long God, sapos yu stadi long Baibel dispela bai helpim yu, long wanem, i gat planti gutpela tok i stap long en bilong stiaim yu.” Wanpela painia long Amerika i stap long kongrigesen bilong tokples Saina i tok: “Planti man long teritori bilong mipela i save amamas long ritim buk. Olsem na planti taim ol i save ritim ol buk o nius olgeta paslain long mipela i go bek lukim ol. Tasol ol i no kliagut long Baibel stadi em wanem samting. Olsem na long namba 1 taim mi bungim man mi save tilim buklet Gutpela Nius, long wanem, ol i wokim long pasin we inap kirapim man long kamapim tingting bilong en.” Wanpela wasman sekit i save raun long ol kongrigesen bilong tokples Saina long Amerika i tok, pablisa inap stori long buk Baibel i Tok long namba 1 taim em i bungim man. Tasol ating i gutpela long kirapim stadi long sapta 2, we i stori long Baibel, na i no long sapta 1, we i stori long God.
5. Bilong wanem pasin bilong i no les kwik i bikpela samting?
5 Sampela hap taim i mas lus pastaim na bihain man inap kisim pasin bilong bilip long God, olsem na em i bikpela samting long yumi no ken les kwik. Namba 1 taim yumi toktok wantaim man, dispela i no inap kirapim em long bilip olsem i gat wanpela Man Bilong Wokim olgeta samting i stap. Tasol ating bihain em bai luksave olsem i gat wanpela Man Bilong Wokim olgeta samting i stap, o ating em bai tok em i klia long as na sampela i gat dispela bilip.
6. Bilong wanem sampela man i no gat laik long save long Baibel?
6 Ol Man i No Bilip o No Gat Laik Long Harim Tok Bilong Baibel: Planti taim man husat i save olsem i gat God i stap, em i no laik save long tok Baibel i skulim man long en, long wanem, em i no bilip olsem Baibel em i Tok Bilong God. Ating em i stap long kantri we ol i no Kristen na em i ting Baibel i bilong ol man husat i kolim ol yet olsem Kristen. O ating em i stap long kantri we ol man i holim nating nem Kristen na ol i no tingim lotu, na em i ting Baibel i no inap helpim em. Olsem wanem yumi inap helpim kain man olsem long kisim laik bilong save long Baibel na bihain em bai amamas long stadi long buk Baibel i Tok?
7. Wanem wanpela gutpela rot bilong kirapim ol man long kisim save long Baibel?
7 Brens ofis long Grik i tok: “Gutpela rot bilong helpim ol man husat i no gat laik long save long Baibel em long opim Baibel na soim ol long ol tok bilong en. Planti pablisa i save olsem tok bilong Baibel i gat strong moa long senisim tingting bilong bel bilong man winim ol tok ol i mekim. (Hib. 4:12) Planti man i lukim nem bilong God long Baibel, na dispela i kirapim laik bilong ol long kisim save long Baibel.” Na brens ofis long India i tok: “Tok i tru bilong Baibel long i stap bilong man na samting i painim man taim em i dai, dispela i kirapim planti Hindu long kisim save long Baibel. Na tu, tok promis bilong Baibel long pasin bilong ol man long daunim ol narapela bai pinis.” Ol pablisa i save stori long ol hevi em ol man long teritori i save tingting planti long en, na dispela i opim rot long pablisa inap soim ol tok bilong Baibel olsem Kingdom Bilong God tasol bai stretim na pinisim ol hevi.
8. Bai yumi tok wanem long ol man i gat tingting kranki long Baibel, long wanem, ol i lukim pasin nogut ol lotu i holim nating nem Kristen i mekim?
8 Sapos pasin nogut bilong ol lotu i holim nating nem Kristen i mekim na man i gat tingting kranki long Baibel, orait stori long em olsem ol samting ol lotu i skulim ol man long en i no stret wantaim tok bilong Baibel. Brens ofis long India i tok: “Sampela taim, yumi mas helpim ol narapela long luksave olsem em i no wok bilong ol lotu long was gut long ol tok bilong Baibel.” Ol i tok olsem planti taim ol lain bilong lotu Hindu i kirap nogut taim ol i lukim buklet Yumi Stap Bilong Mekim Wanem? Yu Ken Save Olsem Wanem?, long hap 4 we i kamapim klia hau ol lotu i paulim na bagarapim Tok Bilong God. Wanpela painia long Brasil i save tokim ol man olsem: “I gutpela sapos yu painimaut wanem ol tok i stap long Baibel. Planti man i bin mekim na ol i no ting ol i mas insait long wanpela lotu bilong mekim olsem. Ating yu bai kirap nogut long ol samting yu lainim.”
9. Taim yumi bungim man long namba 1 taim na em i no laik harim tok bilong Baibel, bilong wanem yumi no ken les kwik?
9 Jehova i save lukim bel bilong olgeta man. (1 Sml. 16:7; Snd. 21:2) Em i save kirapim ol man i gat gutpela bel long kam long lotu i tru. (Jon 6:44) Planti bilong ol dispela man i no bin kisim skul long God o ol i no save long Baibel. Wok autim tok bilong yumi i opim rot long ol i ken “kisim stretpela save long tok i tru” na God bai ‘kisim bek ol.’ (1 Tim. 2:4) Olsem na sapos long namba 1 taim ol i no laik long harim tok bilong Baibel, no ken les kwik! Yusim wanpela buk samting bilong Baibel long kirapim laik bilong ol long kisim save. Ating bihain, yu inap senisim buk na stadi wantaim em long buk Tru Tru Baibel i Tok Wanem?
[Blok long pes 4]
Sapos man i tok em i no bilip long God, traim dispela:
• Bilong save long as na em i gat dispela tingting, askim em, “Bipo yet yu gat dispela tingting?”
• Sapos em i wanpela man bilong lotu Buda, mekim wok long buklet Lasting Peace and Happiness—How to Find Them, pes 9-12.
• Sapos em i bilip long evolusen, ol dispela buk samting i gutpela long yusim:
Hap stori long Kirap!, “Yu Ting Wanpela i Bin Wokim?”
DVD The Wonders of Creation Reveal God’s Glory
Buklet A Satisfying Life—How to Attain It, hap 4; Was Life Created?; na The Origin of Life—Five Questions Worth Asking
• Sapos em i no bilip moa long God, long wanem, em i lukim pasin i no stret na pen na hevi i stap, orait i gutpela long yusim ol dispela buk na buklet:
Buk Is There a Creator Who Cares About You?, sapta 10
Buklet Tru God i Save Tingim Yumi?, hap 6, na Yumi Stap Bilong Mekim Wanem?, hap 6
• Taim yu lukim olsem man i orait long dispela tok olsem i gat God i stap, orait kirap stori long buk Baibel i Tok. I gutpela long kirap long sapta 2 o narapela stori i stret long em.
[Blok long pes 5]
Sapos man i tok em i no bilip long Baibel, traim dispela:
• Stori long buk Life—How Did It Get Here? By Evolution or by Creation?, sapta 17 na 18.
• Long ol Hindu, yusim buklet Why Should We Worship God in Love and Truth?
• Long ol Juda, yusim buklet Will There Ever Be a World Without War?, pes 3-11.
• Stori long olsem wanem ol stiatok bilong Baibel inap helpim man. Ol buk samting yu inap yusim bilong soim ol gutpela tok bilong Baibel:
Hap stori long Kirap!, “Bilong Helpim Famili”
DVD The Bible—Its Power in Your Life
Ol buklet Gutpela Nius i Kam Long God!, lesen 9 na 11; A Book for All People, pes 22-26; na A Satisfying Life—How to Attain It, hap 2
Long ol Buda, yusim buklet The Pathway to Peace and Happiness, pes 3-7.
Long ol Muslim, yusim buklet Real Faith—Your Key to a Happy Life, hap 3.
Sapos yumi autim tok long ol hap we ol man i save rabisim tok bilong Baibel, i no gutpela long kamapim olsem Baibel i as bilong gutpela tok yu autim. Taim yu mekim gobek inap sampela taim pinis orait yu ken mekim olsem.
• Stori long olsem wanem ol tok profet bilong Baibel i kamap tru. Ol buk samting yu ken yusim:
DVD The Bible—Accurate History, Reliable Prophecy
Buklet A Book for All People, pes 27-29
• Sapos man i laik save Baibel i tok wanem long wanpela samting, orait lusim buklet na stori long buk Baibel i Tok.
[Blok long pes 6]
Sapos man i tok: “Mi no bilip long God,” yu ken tok:
• “Inap mi stori liklik long samting i kirapim mi long bilip olsem i gat Man i wokim olgeta samting?” Nau kamapim sampela poin long buk Toktok Gut, pes 122-123, o stretim rot long bringim i go long em wanpela buk em yu bin amamas long ritim.
• “Sapos i gat God i stap, orait yu laik bai em i gat wanem ol pasin?” Planti man i tok ol bai laikim God i gat pasin laikim, stretpela pasin, marimari, na mekim wankain pasin long olgeta man. Yu ken soim em long Baibel olsem God i gat ol dispela pasin. (Ating yu ken yusim buk Baibel i Tok, sapta 1, kirap long paragraf 6.)
Sapos man i tok: “Mi no bilip long Baibel,” yu ken tok:
• “Planti man i gat dispela tingting. Sampela i kisim tingting olsem ol tok bilong Baibel i no stret wantaim tok bilong saiens o ol tok bilong Baibel i no inap helpim yumi. Olsem wanem? Yu bin ritim Baibel tu? [Larim man i bekim tok. Orait soim em buklet A Book for All People, long tok i stap long pes 3, na tilim buklet.] Planti man i no bilip long Baibel, long wanem, ol lotu i paulim ol tok bilong en. Taim mi kam bek, mi laik stori long wanpela eksampel i stap long pes 4 na 5.”
• “Planti man i gat wankain tingting olsem yu. Inap mi soim yu wanpela tok long Baibel em mi bin pilim tru? [Ritim Jop 24:7 o Aisaia 40:22, i soim olsem tok bilong Baibel i stret wantaim tok bilong saiens.] Na tu, Baibel i kamapim ol gutpela tok bilong helpim ol famili. Taim mi kam bek, mi laik stori long wanpela eksampel.”
• “Tenkyu long kamapim tingting bilong yu. Sapos God i bin kamapim wanpela buk bilong olgeta man, yu ting dispela buk bai kamapim wanem ol tok?” Nau soim man wanpela tok bilong Baibel we i stret wantaim tingting bilong em.