Singautim Ol Long Kam

1. Wanem taim bai yumi kirap long singautim ol narapela long kam long kibung?

¹ Sapos yu pasim tok long mekim wanpela bikpela kaikai bilong famili o ol pren, na yu lusim bikpela mani na bikpela haptaim na strong bilong yu long redim dispela kaikai, yu bai amamas tru taim yu singautim ol narapela long kam long dispela kaikai. Olsem tasol, ol brata i bin lusim bikpela haptaim na strong bilong ol long redim ol kaikai bilong strongim bilip, na yumi bai kisim dispela kaikai long kibung. Tripela wik paslain long kibung i kamap, Jehova i laik bai yumi singautim ol narapela long kam long dispela bung. Wanem samting bai helpim yumi long amamas long singautim ol narapela long kam?

2. Wanem samting bai kirapim yumi long givim bel tru long singautim ol manmeri long i kam long kibung?

² Yumi bai givim bel tru long singautim ol narapela sapos yumi yet i tingim bikpela helpim yumi save kisim long rot bilong ol gutpela tok Jehova i givim long taim bilong ol kibung. (Ais. 65:13, 14) Yumi mas tingim tu olsem, wok bilong yumi i save kamapim gutpela samting. (Lukim blok “Gutpela Samting i Kamap.”) Sampela manmeri bai kam long kibung, tasol sampela bai i no inap kam. Maski hamas manmeri i bihainim singaut bilong yumi, pasin bilong yumi long givim bel tru long autim tok bai litimapim nem bilong Jehova na kamapim klia gutpela pasin bilong em.—Sng. 145:3, 7; Rev. 22:17.

3. Olsem wanem yumi bai tilim ol invatesen?

³ Ol lain elda i mas tingim wanpela rot we ol inap tilim ol invatesen long planti manmeri moa. Ol i ken skelim olsem ol bai lusim invatesen long haus i no gat man long en o tilim taim ol i autim tok long pablik ples long teritori bilong kongrigesen. Long wiken, tilim ol magasin wantaim invatesen long seim taim sapos i stret long mekim olsem. Taim yumi pinisim wok bilong singautim ol man i kam long kibung, yumi bai amamas tru long lukim olsem yumi bin insait tru long mekim dispela wok, na planti manmeri tru i kam bung wantaim yumi long kisim kaikai em Jehova i redim bilong strongim bilip bilong yumi!

Gutpela Samting i Kamap

Inap sampela yia i go pinis, wanpela sista i insait long wok bilong tilim invatesen na em i tingting planti olsem, ‘Ol manmeri bai bihainim dispela singaut na kam long kibung, o nogat?’ Taim kibung i kirap long Sarere moning, sista i lukim wanpela man bilong lotu Sik i sindaun klostu long em, olsem na sista i go toktok wantaim dispela man na kolim nem bilong em yet. Dispela man i kam long kibung, long wanem, em i bin kisim wanpela invatesen. Em i givim sampela askim na sista i bekim ol dispela askim. Em i tok olsem em i amamas tru long ol tok i kamap long program, na tu, em i amamas long lukim olsem ol manmeri i bihainim stretpela pasin na werim ol klos i stret. Bihain, long wankain de yet, dispela sista i kirap stori gen wantaim tupela marit i sindaun klostu long em. Ol tu i bin kisim invatesen na ol i kalap long bas na kam long kibung. Ol i amamas long harim ol tok i kamap long kibung, na ol i laik kam tu long Sande. Nau sista i luksave olsem wok bilong tilim invatesen em i bikpela samting.
Long kibung i go pinis, tupela painia marit i kirap toktok wantaim tupela lapun marit. Tupela lapun marit i tok dispela em fes taim bilong tupela long kam long kibung. Tupela marit painia i askim ol: “Husat i invaitim yutupela long kam?” Tupela i bekim tok olsem: “Wanpela taim mitupela i kam bek long haus, na mitupela i lukim invatesen i stap aninit long dua.” Tupela i ritim invatesen na pulimapim tu fom i stap long baksait bilong invatesen. Ol narapela manmeri long kibung i serim kaikai wantaim dispela tupela lapun marit. Tupela i amamas stret long ol tok i kamap long program, olsem na tupela i laik kam gen long neks de. Ol bratasista i stretim rot long i go lukim tupela na stori moa wantaim ol.