Mas i Gat Man Bilong Kisim Bek Yumi!

I GAT wanpela main i stap klostu long Pittsburgh, Pennsylvania, Amerika, na wantu tasol planti milion lita wara i kam insait long en. Nainpela wokman long main i stap daunbilo tru inap 73 mita insait long graun na ol i kalabus long wanpela liklik hap we wara i no kam insait long en. Tripela de bihain, ol i kam antap pinis na ol i no kisim bagarap. Ol man i kisim bek ol olsem wanem?

Ol i skelim ol mep bilong main na ol i kisim wanpela masin (Global Positioning System) i makim ples ol i stap long en, na ol i drilim bikpela hul, braitpela bilong en i 65 sentimita, na ol i putim longpela waia bokis i go daun insait long hul long ples ol dispela man i stap long en. Wanpela wokman i go insait long waia bokis na ol i pulim em i kam antap, na ol i mekim olsem long ol narapela, inap long olgeta i lusim ples em klostu i kamap matmat bilong ol. Olgeta i amamas na bel i stap isi, na ol i tenkyu tru long ol lain i bin kisim bek ol.

Tru, planti bilong yumi bai i no kalabus insait long main olsem dispela 9-pela man o painim indai long wanpela bikpela bagarap. Tasol i mas i gat man bilong kisim bek yumi, long wanem, yumi no inap abrusim sik na lapun na dai. Gutpela man Jop i bin tok: “Mipela ol manmeri i save stap sotpela taim tasol long graun, na stat long taim mama i karim mipela, ol kain kain trabel i save kamap long mipela. Mipela i olsem ol plaua i kamap long moningtaim na long apinun ol i drai pinis. Na tu mipela i olsem tewel san i mekim i kamap, na i save pinis kwik taim klaut i karamapim lait bilong san.” (Jop 14:​1, 2) Long nau, inap olsem 3,500 yia bihain, dispela tok i stret yet, long wanem, i no gat wanpela bilong yumi inap abrusim dai. Maski yumi sindaun we o yumi save lukautim gut skin bilong yumi, i mas i gat man bilong kisim bek yumi long pen, lapun, na dai.

Ol saveman na ol narapela i save wok strong long helpim ol man long skruim sampela yia moa long laip bilong ol. Wanpela lain i tok, ol i gat wok long ‘daunim dai na helpim ol man long painim rot bambai ol i no inap i dai moa.’ Tasol i kam inap long nau, bikpela save bilong ol saientis na strongpela laik bilong ol i no bin skruim planti yia moa long laip bilong ol man, olsem na planti man i no winim dispela 70 o 80 krismas em Moses i bin tok long en 3,500 yia i go pinis.​—Song 90:10.

Maski yu gat wankain tingting olsem Jop long laip na indai o nogat, taim ol yia i kam i go pinis, bai yu tu yu go pinis “olsem tewel san i mekim i kamap, na i save pinis kwik,” na bai yu dai na lusim ol pren, na famili, na haus, na olgeta samting bilong yu. Saveman King Solomon bilong Israel bilong bipo em i tok: “Ol man i gat laip . . . ol i save bai ol i dai. Tasol ol man i dai pinis, ol i no inap save long wanpela samting. Bai ol i no kisim gutpela samting moa. Ol man i lusim tingting pinis long ol.”​—Saveman 9:​4, 5.

Olsem Baibel i tok, dai i olsem wanpela bos nogut “i wok long daunim olgeta man.” Tru tumas, dai em i birua tru bilong ol man na i mas i gat wanpela bilong kisim bek ol. (Rom 5:14; 1 Korin 15:26) Ol lain i gat bikpela save long kisim bek ol man long ol bikpela bagarap na ol i gat ol kain kain gutpela masin, ol i no inap kisim bek yu long ol birua inap oltaim oltaim, nogat. Tasol Man Bilong Wokim yumi, em God Jehova, em i stretim rot pinis long kisim bek yumi.

[Piksa Kredit Lain long pes 3]

Photo by Gene J. Puskar-Pool/Getty Images