Go Klostu Long God
“Bai Yu Laikim Tumas”
BEL bilong yumi i save bagarap stret taim wanpela wanblut o pren i kisim bikpela pen na i dai. Em pasin bilong yumi long krai sori long kain taim olsem. Taim yumi save olsem Man Bilong Wokim yumi, God Jehova, i pilim tru bel pen bilong yumi, dispela i mekim gut bel bilong yumi. Na moa yet, em i gat laik tru long yusim bikpela strong bilong em long kirapim bek ol man i dai pinis. Tok bilong Jop long Jop 14:13-15, i stori long gutpela samting yumi inap wetim i kamap bihain.
Tingim ol samting i bin kamap. Bikpela hevi tru i bin painim Jop, em man i gat strongpela bilip—olgeta mani kago bilong em i lus, olgeta pikinini bilong em i dai, na em i kisim sik i givim bikpela pen long em. Long taim dispela bikpela hevi tru i painim em, em i tokim God olsem: “I gutpela sapos yu haitim mi long ples bilong ol man i dai pinis [matmat].” (Ves 13, 14) Jop i tingim matmat olsem ples we olgeta hevi bilong em bai pinis. I kain olsem Jop em wanpela samting i dia tumas na God i haitim insait long matmat, em ples we em i no inap karim moa pen na hevi.a
Olsem wanem? Jop bai stap oltaim long matmat? Jop i no gat dispela tingting. Em i tok moa long beten bilong em olsem: “Yu ken makim wanpela taim bilong tingim mi gen.” Jop i bilip olsem em bai stap sotpela taim tasol long matmat na Jehova i no inap lusim tingting long em. Jop i tok em bai stap long matmat na em bai “wet i stap inap long taim [God i] makim.” Dispela haptaim i longpela olsem wanem? Em i tok: “Inap long taim [God i] makim bilong [em] i stap long dispela ples, em i pinis.” (Ves 13, 14) Dispela i makim taim em bai lusim matmat—em long taim em bai kirap bek!
I gat wanem as na Jop i save tru olsem em bai kirap bek? Long wanem, em i save long tingting em Man Bilong Wokim yumi i gat long ol gutpela wokman bilong em husat i dai pinis. Jop i tok: “Bai yu ting long yu yet yu bin wokim mi, na bai yu laikim tumas bai mi stap klostu long yu gen. Olsem na bai yu singautim mi na bai mi lusim dispela ples na kam long yu.” (Ves 15) Jop i tokaut olsem God yet i bin wokim em. Man Bilong Givim Laip husat i bin givim laip long Jop taim em i stap long bel bilong mama, Em inap givim bek laip long Jop taim Jop i dai.—Jop 10:8, 9; 31:15.
Tok bilong Jop i skulim yumi long gutpela pasin marimari bilong Jehova: Jehova i laikim tru ol manmeri olsem Jop, em ol i givim ol yet long em na larim em i stretim stretim ol na mekim ol i kamap ol gutpela samting tru long ai bilong em. (Aisaia 64:8) Jehova i save tingim tru ol man i stap gut long lotuim em. I gat samting em Jehova i “laikim tumas” long mekim long ol gutpela wokman bilong em husat i dai pinis. Wanpela saveman i tok, long tok Hibru dispela hap tok em i “wanpela strongpela tok bilong makim bikpela laik tru i stap long bel long mekim wanpela samting.” Yes, Jehova i tingim ol man husat i bin lotuim em na ol i dai pinis—em i gat strongpela laik long kirapim ol bek na givim laip long ol.
Yumi amamas olsem long Buk Jop—em wanpela bilong ol namba wan buk bilong Baibel ol i bin raitim—Jehova i kamapim klia olsem em i tingting long kirapim bek ol man i dai pinis.b Jehova i laik bai yu bungim gen ol famili bilong yu i dai pinis. Dispela tingting inap strongim yu long karim bel hevi taim wanpela yu laikim tumas i dai. Mipela i laik bai yu kisim sampela save moa long dispela God i gat pasin laikim, na long olsem wanem yu ken larim em i stretim stretim yu long kamap man husat inap lukim ol samting Em i tingting pinis long mekim.
Baibel ritim bilong Mas:
[Ol Futnot]
a Wanpela buk i tok, dispela hap tok bilong Jop olsem “haitim mi” inap makim olsem “putim [mi] olsem wanpela naispela samting long ples we hevi i no inap painim mi.” Narapela buk i tok, i olsem Jop i tok “haitim mi olsem wanpela samting i dia tumas.”
b Bilong kisim sampela save moa long tok promis bilong Baibel long kirap bek long nupela taim i gat stretpela pasin long en, lukim sapta 7 bilong buk Tru Tru Baibel i Tok Wanem?, em ol Witnes Bilong Jehova i wokim.