Tok i Givim Save Long Odiens Bilong Yu

BILONG mekim tok i givim save long odiens, yu no ken stori long ol tok i gutpela na em tasol. Askim yu yet olsem: ‘Bilong wanem dispela odiens i mas harim dispela tok? Bai mi mekim wanem tok na odiens bai pilim tru olsem dispela tok i bin helpim ol?’

Sapos long skul ol i makim yu long mekim tok olsem yu autim tok long wanpela man, orait helpim bilong yu i olsem odiens. Long sampela taim, kongrigesen olgeta em i odiens bilong yu.

Ol Samting Odiens i Save Pinis Long En. Askim yu yet: ‘Odiens i gat wanem save pinis long samting mi laik stori long en?’ Dispela i mas givim tingting long yu long samting yu bai kirap stori long en. Sapos yu toktok long wanpela kongrigesen i gat planti strongpela Kristen, yu no ken kolim ol bikpela as tok tasol bilong tok i tru, em ol samting ol i save pinis long en. Skruim sampela tok moa long ol dispela as tok. Tasol sapos i gat planti nupela man i stap, yu mas tingim dispela tupela lain wantaim.

Tingim save bilong odiens na senisim spit bilong yu long mekim tok. Sapos yu stori long samting planti ol i save long en, orait stori hariap long dispela tok. Tasol toktok isi liklik taim yu kamapim ol tingting em i nupela long planti man na bai ol inap kisim gut dispela tok.

Tok i Givim Save. Bilong tok i ken givim save, i no olsem yu mas stori long nupela tok tasol, nogat. Sampela i save kamapim tok i tru ol man i save long en na ol i mekim long pasin em odiens inap kisim gut tru dispela tok.

Taim yu autim tok, nogut yu kamapim tasol samting yu bin ritim long niuspepa bilong soim olsem yumi stap long taim bilong las de. Yu mas mekim wok long Baibel bilong kamapim as bilong dispela samting i kamap. Dispela bai givim save long man bilong haus. Na tu, taim yu stori long ol lo i bosim ol samting bilong graun, o sampela diwai o animal samting, yu no ken kamapim ol tok bilong saiens i gat bikpela save long en na man bilong haus i no bin harim bipo, nogat. Yu laik stori long dispela samting na bungim wantaim tok bilong Baibel bilong soim olsem i gat wanpela Man bilong wokim yumi na em i laikim yumi tumas. Dispela bai givim sampela nupela tingting long man bilong haus.

Em i hatwok long kamapim tok long samting odiens i bin harim planti taim. Tasol bilong mekim gutpela wok tisa yu mas lain long mekim gut dispela kain tok. Yu ken mekim olsem wanem?

Bilong helpim yu, painim sampela save insait long ol buk, no ken kamapim ol save yu inap tingim na em tasol, nogat. Yusim ol tul bilong painim save em pes 33 i go inap long pes 38 i stori long en. Tingim ol tok i stap long ol dispela pes i stori long ol samting yu laik bai tok bilong yu i mekim. Taim yu wok long painim save, ating yu kisim save olsem wanpela samting i bin kamap bipo em ol man i no save tumas long en, i insait long samting yu stori long en. O ating yu painim wanpela tok i kamap nau tasol long niuspepa o TV na i stret long samting yu laik stori long en.

Taim yu skelim ol save yu painim pinis, tingim sampela askim bilong kirapim tingting bilong yu yet, olsem: wanem samting? bilong wanem? wanem taim? we? husat? olsem wanem? Olsem: I gat wanem as na dispela tok em i tru? Olsem wanem mi ken kamapim klia olsem dispela em i tru? Wanem sampela bilip bilong ol man i mekim na i hatwok long ol i kisim tok i tru bilong Baibel? Bilong wanem em i bikpela samting? Dispela i mas mekim wanem long i stap bilong man? I gat wanem samting i soim olsem taim man i bihainim dispela tok, dispela i save helpim em? Dispela tok i tru bilong Baibel i kamapim wanem pasin bilong Jehova? Sampela taim yu ken askim: Dispela samting i bin kamap long wanem taim? Olsem wanem yumi ken bihainim dispela tok long nau? Bilong kirapim tingting bilong odiens, yu ken kamapim sampela askim olsem na bekim taim yu givim tok.

Ating long tok yu mekim yu mas kamapim sampela skripsa em odiens i save gut long en. Yu ken mekim wanem na ol dispela skripsa bai givim save long ol man? No ken ritim tasol; kamapim insait bilong ol.

Taim yu stori long wanpela skripsa ol man i save gut long en, em inap givim save long ol man sapos yu stori long ol wan wan hap i stret wantaim tim na yu kamapim insait bilong ol dispela hap. Tingim ol tok yu inap kamapim long Maika 6:8. “Stretpela pasin” em i wanem samting? Yu stori long stretpela pasin bilong husat? Bai yu mekim wanem tok piksa bilong kamapim mining bilong “bihainim stretpela pasin”? O bilong “laikim tru ol arapela”? Olsem wanem yumi ken “daunim tingting bilong yumi yet”? Bai yu mekim wanem tok long dispela ves bilong helpim wanpela lapun? Bilong skelim wanem ol tok yu bai kamapim, yu mas tingim tim, wok yu laik bai tok bilong yu i mekim, odiens, na yu gat hamas minit long stori.

Taim yu kamapim mining bilong tok, dispela i save helpim ol man. Sampela i kirap nogut long mining bilong dispela “kingdom” em Matyu 6:10 i stori long en. Taim yu kirapim wanpela Kristen bilong longtaim long tingim gen mining bilong wanpela tok, dispela inap helpim em tu long kisim gut tingting em dispela ves i kamapim. Dispela i kamap ples klia taim yumi ritim 2 Pita 1:​5-8 na kamapim insait bilong ol wan wan bikpela tok bilong en: bilip, gutpela pasin, save, bosim gut laik bilong bodi, sanap strong na karim hevi, wokabaut long pasin bilong God, stap pren tru bilong ol arapela, na givim bel long ol arapela. Taim sampela tok bilong wanpela sentens o paragraf i gat mining i wankain liklik, yu inap helpim ol man long save olsem wanem ol i narapela narapela sapos yu kamapim mining bilong ol. Dispela i stret long ol kain tok i stap long Sindaun 2:​1-6 olsem gutpela tingting, save, na gutpela tingting na save.

Ating odiens bai kisim save sapos yu toktok gut wantaim ol long wanpela ves. Planti man i kirap nogut long namba wan taim ol i ritim Saveman 3:21 long Baibel na kisim save olsem ol man na ol animal i gat wanpela spirit, na olsem Jop 34:​14, 15 i kamapim, dispela spirit em i wanpela strong i helpim bodi long i stap laip. Wanpela taim ol Sadyusi i kirap nogut taim Jisas i kolim tok bilong Kisim Bek 3:​6, em ol Sadyusi i tok ol i bilipim, na em i kamapim dispela skripsa bilong strongim bilip olsem ol man i dai pinis bai kirap bek.​—Lu. 20:​37, 38.

Bilong givim save long ol man, sampela taim yu ken stori long ol ves i stap klostu long ves yu stori long en, o ol samting i bin kamap long taim ol i raitim dispela ves, na husat i mekim tok o husat i harim. Ol Farisi i save gut long Song 110. Tasol Jisas i kirapim ol long skelim wanpela tok i stap long namba wan ves. Em i askim ol: “Yupela i ting wanem long dispela man God i makim bilong kisim bek ol manmeri bilong en? Em i pikinini bilong husat?” Ol i tokim em olsem, “Pikinini bilong Devit.” Na Jisas i askim ol olsem, “Orait olsem wanem na Holi Spirit i givim tingting long Devit na Devit i kolim dispela man ‘Bikpela’? Devit i bin tok olsem, ‘Bikpela i tokim Bikpela bilong mi olsem, “Yu sindaun long han sut bilong mi inap mi putim ol birua bilong yu i stap aninit long yu.” ’ Yupela lukim. Devit yet i kolim dispela man Bikpela bilong en. Orait olsem wanem na dispela man em i pikinini bilong Devit?” (Mt. 22:​41-45) Taim yu toktok gut wantaim ol man long ol tok bilong Baibel olsem Jisas i bin mekim, bai yu helpim ol long ritim gut Baibel.

Taim brata i kamapim taim stret man i bin raitim wanpela buk bilong Baibel o wanem taim wanpela samting i bin kamap, em i mas stori tu long i stap bilong ol man long dispela taim. Long dispela rot odiens inap kisim gut as na dispela buk o dispela samting i bin kamap em i bikpela samting.

Pasin bilong skelim samting wantaim narapela samting i ken helpim yu long givim sampela save moa long ol man. Yu ken stori long tingting bilong planti man long wanpela samting na skelim wantaim tok bilong Baibel. O yu ken skelim tupela hap bilong Baibel ol i stori long wankain samting. I gat sampela samting i no wankain? Wanem as na ol i no wankain? Yumi kisim wanem save long dispela? Taim yu mekim olsem, dispela inap helpim odiens long kisim nupela tingting long samting yu stori long en.

Sapos ol i makim yu long stori long wanpela hap bilong wok autim tok, orait bilong mekim tok i kamap gutpela moa yu ken kirap stori liklik long ol bikpela tok yu bin kamapim. Toktok long samting yumi mas mekim, na bilong wanem yumi mas mekim, na olsem wanem dispela wok i insait long ol mak ol Witnes Bilong Jehova i laik winim. Bihain stori gut olsem yumi mas mekim dispela wok we, long wanem taim, na olsem wanem.

Olsem wanem sapos yu mas toktok long sampela “tingting hait bilong God”? (1 Ko. 2:10) Taim yu kirap stori long dispela samting insait long tok, sapos yu kamapim klia ol bikpela samting bilong en, orait odiens bai kisim gut ol narapela tok insait long stori. Na long pinis bilong tok sapos yu stori liklik long ol bikpela tok yu bin kamapim, orait odiens bai pilim olsem ol i bin lainim tru sampela samting na ol bai amamas.

Tok i Helpim Man Long Bihainim Pasin Kristen. Sapos yu helpim odiens long save olsem wanem ol i ken bihainim dispela tok long i stap bilong ol, dispela bai helpim ol tru. Taim yu skelim ol skripsa i stap long tok bilong yu, askim yu yet olsem, ‘Wanem as na God i lukautim ol dispela tok na ol i stap yet long Baibel i kam inap long taim bilong yumi?’ (Ro. 15:4; 1 Ko. 10:11) Tingim ol samting i save kamap long sindaun bilong odiens na skelim wantaim ol tok kaunsel na stiatok bilong Baibel. Stori gut long ol skripsa bilong soim olsem wanem ol i ken helpim man long bihainim savepasin taim ol kain samting olsem i kamap long sindaun bilong em. No ken stori antap antap tasol. Stori gut long sampela tingting na pasin bilong ol man.

Taim yu laik redim wanpela tok, pastaim wok long bihainim wanpela o tupela hap tok yumi stori pinis long en. Taim pasin bilong yu long mekim tok i kamap gutpela, wok long bihainim sampela tok moa i stap long dispela stadi. Bihain bai yu luksave olsem odiens i gat laik long harim ol tok bilong yu, long wanem, ol i save ol bai harim sampela tok em bai helpim ol tru.