I Gat Wanem As Na God I wokim Ol Manmeri?

1. I gat wanem as na God i wokim ol manmeri?

GOD i laik bai ol manmeri i stap amamas. God i bin wokim namba wan man na meri, Adam na Iv, na putim tupela long wanpela naispela gaden. Em i laik bai ol i karim ol pikinini, skruim Paradais i go long olgeta hap bilong graun, na lukautim ol animal.—St 1:28; 2:8, 9, 15; lukim Futnot long pes 208.

2. (a) Olsem wanem yumi save ol samting God i tingting long mekim bai kamap tru? (b) Baibel i tok wanem long ol manmeri bai stap oltaim?

² Yu ting wanpela taim bai kamap we yumi inap stap long paradais? Jehova i tokim yumi olsem: “Samting mi tingting pinis long mekim, mi bai mekim tu dispela samting.” (Aisaia 46:9-11; 55:11) Yes, ol samting God i tingting pinis long mekim em bai mekim na i no gat wanpela samting bai stopim em. Jehova i tok i gat as na em i wokim dispela graun. Em “i no wokim graun bilong i stap nating, nogat.” (Aisaia 45:18) Em i laik bai ol manmeri i stap long olgeta hap bilong graun. God i laik bai wanem kain ol man i stap long graun? Na em i laik bai ol i stap hamas yia long en? Baibel i tok: “Ol stretpela man [o, ol man i save bihainim tok] bai kisim graun olgeta, na ol bai stap oltaim long en.”—Song 37:29; Revelesen 21:3, 4.

3. Ol manmeri i save sik na dai, olsem na ating yu bai gat wanem askim?

³ Tasol long nau ol manmeri i save sik na dai. Long planti hap ol i save pait na narapela i save kilim i dai narapela. Tasol dispela i no laik bilong God. So, wanem samting i bin kamap? Bilong wanem samting God i tingting pinis long mekim i no bin kamap? Baibel tasol inap tokim yumi long dispela samting.

WANPELA BIRUA BILONG GOD

4, 5. (a) Husat i toktok long Iv long rot bilong snek long gaden Iden? (b) Wanpela man bipo em i no save giaman, olsem wanem em inap kamap stilman?

⁴ Baibel i tokim yumi olsem God i gat wanpela birua em “ol i kolim em Devil na Satan.” Long rot bilong wanpela snek, Satan i toktok long Iv long gaden Iden. (Revelesen 12:9; Stat 3:1) Em i mekim na i luk olsem dispela snek i toktok.—Lukim Futnot long pes 208.

⁵ Olsem wanem? God i wokim Satan dispela Devil? Nogat! Wanpela ensel i stap long heven long taim God i wokim graun bilong Adam na Iv i ken i stap long en, em i mekim em yet i kamap Devil. (Jop 38:4, 7) Olsem wanem dispela inap kamap? Orait, olsem wanem wanpela man bipo em i no save giaman, em inap kamap stilman? Taim em i bon em i no wanpela stilman. Tasol em i gat laik long kisim samting i no bilong em. Em i wok long tingting long en, na dispela laik nogut bilong em i kamap strong tru. Na taim rot i op em i stilim dispela samting. Em i mekim em yet i kamap wanpela stilman.—Ritim Jems 1:13-15; lukim Futnot long pes 210.

6. Olsem wanem wanpela ensel i kamap birua bilong God?

⁶ Dispela samting i bin kamap long dispela ensel. Taim Jehova i wokim pinis Adam na Iv, em i tokim tupela long kamapim ol pikinini na “go sindaun long olgeta hap bilong graun.” (Stat 1:27, 28) Ating dispela ensel i tingting, ‘Olgeta dispela manmeri inap lotu long mi na i no long Jehova!’ Em i wok long tingting long dispela samting, na laik bilong em long kisim samting i bilong Jehova i go bikpela. Dispela ensel i laik bai ol manmeri i lotuim em. Olsem na em i giamanim Iv long rot bilong trikim em. (Ritim Stat 3:1-5.) Taim em i mekim olsem, em i kamap Satan dispela Devil, em birua bilong God.

7. (a) Bilong wanem Adam na Iv i dai? (b) Bilong wanem yumi save go lapun na dai?

⁷ Adam na Iv i sakim tok bilong God na kaikai prut. (Stat 2:17; 3:6) Ol i mekim sin long Jehova, olsem na bihain ol i dai, olsem Jehova i bin tok ol bai dai sapos ol i sakim tok bilong em. (Stat 3:17-19) Olgeta pikinini bilong Adam na Iv i kisim sin, olsem na ol tu i dai. (Ritim Rom 5:12.) Bilong helpim yumi long kliagut long wai na ol pikinini bilong Adam na Iv i kamap sinman tu, tingim dispela tok piksa. Tingim olsem yu wokim bret long wanpela trei we i krungut. Dispela bret bai i gat wankain krungut olsem bilong dispela trei. Taim Adam i sakim tok bilong God, Adam i kisim sin. Yumi olgeta i pikinini bilong Adam olsem na yumi olgeta i gat sin, o yumi olgeta i gat dispela “krungut” wankain olsem em. Long dispela as yumi olgeta i save go lapun na i dai.—Rom 3:23; lukim Futnot long pes 210.

8, 9. (a) Satan i laik bai Adam na Iv i bilip long wanem samting? (b) Bilong wanem Jehova i no kilim i dai wantu ol dispela bikhetman?

⁸ Satan i kirapim pasin bilong bikhet long Jehova taim em i kirapim Adam na Iv long sakim tok bilong God. Em i laik bai Adam na Iv i ting olsem Jehova em man bilong giaman, em i wanpela bos nogut i no laik bai gutpela samting i kamap long ol. I olsem Satan i tok God i no gat wok long tokim ol man long wanem samting ol i mas mekim na Adam na Iv i ken makim wanem samting i gutpela na wanem samting i nogut. Olsem na Jehova bai mekim wanem? Em inap long kilim i dai ol dispela bikhetman na pinisim pasin bikhet. Tasol yu ting dispela bai kamapim klia olsem Satan em man bilong giaman? Nogat, a?

⁹ Olsem na Jehova i no kilim i dai wantu ol dispela bikhetman. Nogat, em i larim sampela haptaim i mas lus pastaim bilong ol man i ken bosim ol yet. Dispela bai kamapim klia olsem Satan em i man bilong giaman na Jehova i save wanem samting i gutpela bilong helpim ol man. Long Sapta 11 bai yumi kisim save moa long dispela samting. Tasol yu gat wanem tingting long disisen em Adam na Iv i bin mekim? I stret tupela i bilip long Satan na sakim tok bilong God? Jehova i bin givim Adam na Iv olgeta samting ol i gat. Em i givim tupela laip i gutpela olgeta, wanpela gutpela ples long stap long en, na wok em tupela i amamas long en. Tasol Satan i no bin mekim wanpela gutpela samting long tupela. Sapos yu bin stap long dispela taim, bai yu mekim wanem?

10. Yumi gat wanem bikpela disisen long mekim?

¹⁰ Long nau, yumi olgeta wan wan i gat wankain disisen long mekim na disisen yumi mekim bai mekim sampela samting long i stap bilong yumi. Yumi inap makim olsem yumi bai bihainim tok bilong Jehova olsem King bilong yumi na kamapim klia olsem Satan em i man bilong giaman. O yumi inap makim Satan olsem man bilong bosim yumi. (Song 73:28; ritim Provep 27:11.) I no planti manmeri i bihainim tok bilong God. Na em i no bosim dispela graun. Tasol sapos God i no bosim dispela graun, orait husat i bosim?

HUSAT I BOSIM DISPELA GRAUN?

11, 12. (a) Satan i laik givim olgeta kingdom bilong dispela graun long Jisas na yumi lainim wanem samting long dispela? (b) Wanem ol skripsa i soim olsem Satan i bosim dispela graun?

¹¹ Jisas i save long wanem man tru i bosim dispela graun. Wanpela taim Satan i “soim em olgeta kingdom bilong graun wantaim ol nambawan gutpela samting bilong ol.” Na Satan i tok promis long Jisas olsem: “Mi bai givim yu olgeta dispela samting sapos nau yu brukim skru na lotu long mi.” (Matyu 4:8, 9; Luk 4:5, 6) Askim yu yet, ‘Olsem wanem Satan inap givim ol kingdom bilong dispela graun long Jisas, sapos ol dispela kingdom i no bilong em?’ Olgeta gavman i bilong Satan, olsem na em i laik givim long Jisas.

¹² Ating yu tingting: ‘Hau na Satan inap bosim dispela graun? Jehova em i God i Gat Olgeta Strong, na Man Bilong Wokim heven na graun.’ (Revelesen 4:11) Yes em tru, tasol Jisas i tok Satan em i “hetman bilong dispela graun.” (Jon 12:31; 14:30; 16:11) Aposel Pol i kolim Satan dispela Devil olsem “god bilong dispela graun.” (2 Korin 4:3, 4) Na aposel Jon i tok “dispela graun olgeta i stap long han bilong Satan.”—1 Jon 5:19.

GRAUN BILONG SATAN BAI PINIS OLSEM WANEM?

13. Bilong wanem nupela taim i mas kamap?

¹³ Pasin bilong dispela graun i wok long i go nogut moa. Yumi lukim ol pait, pasin korapsen, pasin bilong ol man long i gat tupela maus, na pasin bilong pait na bagarapim man i pulap long olgeta hap. Ol man i no inap stretim ol dispela hevi, maski ol i wok strong long pinisim. Tasol klostu nau God bai pinisim ol man nogut long pait bilong em long Armagedon, na em bai kamapim nupela taim i gat stretpela pasin long en.—Revelesen 16:14-16; lukim Futnot long pes 210.

14. God i bin makim husat long kamap King long Kingdom bilong Em? Baibel i bin mekim wanem tok profet long Jisas?

¹⁴ Jehova i makim Jisas Krais long kamap King long Kingdom o gavman bilong Em long heven. Inap planti tausen yia bipo, Baibel i tok profet olsem Jisas bai mekim wok king olsem “Prins Bilong Bel Isi,” na gavman bilong em bai i stap oltaim. (Aisaia 9:6, 7) Jisas i lainim ol disaipel bilong em long beten long dispela gavman na em i tok: “Kingdom bilong yu i mas i kam. Laik bilong yu i mas kamap long graun olsem em i save kamap long heven.” (Matyu 6:10) Long Sapta 8, yumi bai kisim save long olsem wanem Kingdom Bilong God bai kisim ples bilong olgeta dispela gavman bilong graun. (Ritim Daniel 2:44.) Long dispela taim Kingdom Bilong God bai kamapim Paradais hia long graun.—Lukim Futnot long pes 211.

NUPELA TAIM I KLOSTU PINIS!

15. “Nupela graun” em i wanem samting?

¹⁵ Baibel i tok promis olsem: “God i promis pinis long wokim nupela skai na nupela graun, na stretpela pasin tasol bai i stap long en. Em dispela samting tasol yumi wetim.” (2 Pita 3:13; Aisaia 65:17) Taim Baibel i tok long “graun,” sampela taim dispela i makim ol manmeri i stap long graun. (1 Stori 16:31) Olsem na “nupela graun” i makim ol manmeri i save bihainim tok bilong God na em i blesim ol.

16. God bai givim wanem gutpela presen long ol man i stap long nupela taim? Yumi mas mekim wanem bilong kisim dispela presen?

¹⁶ Jisas i tok promis olsem ol manmeri i stap long nupela taim God bai kamapim, ol bai kisim “laip oltaim.” (Mak 10:30) Yumi mas mekim wanem bilong kisim dispela presen? Plis ritim Jon 3:16 na 17:3 bilong kisim bekim bilong en. Nau bai yumi skelim tok Baibel i mekim long sindaun bilong ol man bai wanem kain long Paradais long graun.

17, 18. Olsem wanem yumi ken save olsem bel isi bai stap long olgeta hap bilong graun na yumi bai stap gut?

¹⁷ Pasin nogut, woa, pasin raskol, na pasin bilong pait bai pinis. Bai i no gat ol manmeri nogut i stap long graun. (Song 37:10, 11) God bai “mekim i dai ol pait i kamap long olgeta hap bilong graun.” (Song 46:9; Aisaia 2:4) Graun bai pulap long ol manmeri i laikim God na i bihainim tok bilong em. Bai i gat bel isi oltaim oltaim.—Song 72:7.

¹⁸ Lain bilong Jehova bai i no bungim birua. Taim lain Israel long bipo i bihainim tok bilong God, ol i stap gut. (Wok Pris 25:18, 19) Long paradais, yumi bai i no pret long wanpela samting o long wanpela man. Yumi bai stap gut!—Ritim Hosea 2:18; Maika 4:4.

19. Olsem wanem yumi save bai i gat planti kaikai long nupela taim God bai kamapim?

¹⁹ Bai i gat planti kaikai. “Bai i gat planti wit samting long graun; na antap long ol maunten, ol wit samting bai pulap.” (Song 72:16) Jehova, “em i God bilong mipela, em bai mekim gut long mipela.”—Song 67:6.

20. Bilong wanem yumi ken bilip tru olsem graun olgeta bai kamap wanpela paradais?

²⁰ Graun olgeta bai kamap wanpela paradais. Ol manmeri bai i gat ol naispela haus na ol gaden. (Ritim Aisaia 65:21-24; Revelesen 11:18.) Graun olgeta bai kamap naispela tru olsem gaden Iden. Oltaim Jehova bai givim ol samting yumi nidim. Baibel i tok long em olsem: “Yu save opim han bilong yu na inapim laik bilong olgeta samting i gat laip.”—Song 145:16.

21. Olsem wanem yumi save olsem pasin wanbel bai stap namel long ol man na ol animal?

²¹ Ol man na ol animal bai i stap wanbel wantaim. Ol animal bai i no bagarapim moa ol man. Ol liklik pikinini bai i no pret long ol animal em ol inap bagarapim yumi long nau.—Ritim Aisaia 11:6-9; 65:25.

22. Jisas bai mekim wanem samting long ol man i sik?

²² I no gat wanpela bai sik. Taim Jisas i stap long graun, em i bin oraitim planti manmeri. (Matyu 9:35; Mak 1:40-42; Jon 5:5-9) Tasol olsem King bilong Kingdom Bilong God, Jisas bai oraitim olgeta manmeri. I no gat wanpela bai tok: “Mi sik.”—Aisaia 33:24; 35:5, 6.

23. God bai mekim wanem long ol manmeri i dai pinis?

²³ Ol man i dai pinis bai kisim laip gen. God i tok promis olsem em bai kirapim bek planti milion manmeri em ol i bin dai. “Bai i gat kirap bek bilong ol man i dai pinis, em ol stretpela man na ol man nogut wantaim.”—Ritim Jon 5:28, 29; Aposel 24:15.

24. Yu pilim olsem wanem long i stap long Paradais?

²⁴ Yumi olgeta i mas makim wanem samting yumi bai mekim. Yumi bai kisim save long Jehova na mekim wok bilong em, o yumi ken mekim ol samting em yumi laik mekim. Sapos yumi mekim wok bilong Jehova, yumi bai stap amamas long bihain. Taim wanpela man i askim Jisas long tingim em bihain long em i dai, Jisas i tok promis long em olsem: “Yu bai stap wantaim mi long Paradais.” (Luk 23:43) Orait yumi ken kisim sampela save moa long Jisas Krais na olsem wanem em bai mekim ol tok promis bilong God i kamap tru.