Mekim Gutpela Pasin Olsem Wokman Bilong God

“Yupela i mas bihainim ol pasin [God] yet i save mekim.”​—EF. 5:1.

1, 2. (a) Bilong wanem em i bikpela samting long yumi mekim gutpela pasin long ol narapela? (b) Dispela stadi bai skelim wanem samting?

WANPELA meri bilong raitim ol buk, Sue Fox, em i stori long pasin bilong rispek olsem: “Gutpela pasin em i no samting yumi ken malolo long mekim, nogat, yumi mas mekim long olgeta taim. Long olgeta taim na long olgeta hap, gutpela samting i save kamap taim yumi mekim pasin i soim olsem yumi tingim gut ol narapela.” Taim ol man i kisim pasin bilong tingim tru man, ol bikpela hevi i no inap kamap namel long ol na sapos hevi i kamap em bai pinis hariap. Tasol sapos yumi no mekim gutpela pasin long ol narapela, dispela inap kamapim kros, bel nogut, na bel hevi.

² Insait long kongrigesen Kristen tru ol man i save mekim gutpela pasin long ol narapela. Tasol yumi gat wok long was gut, nogut yumi kisim ol pasin i no gutpela tumas em planti man long nau i save mekim. Orait nau yumi ken stori long olsem wanem pasin bilong bihainim ol stiatok bilong Baibel long gutpela pasin inap pulim ol man i kam long lotu i tru na i helpim yumi long sakim ol pasin i no gutpela. Bilong kliagut long wanem ol samting i insait long gutpela pasin, yumi ken skelim pasin bilong God Jehova na Pikinini bilong em.

Jehova na Pikinini Bilong Em​—Ol i Gutpela Piksa Long Gutpela Pasin

3. Olsem wanem God Jehova i stap gutpela piksa long pasin bilong tingim tru narapela?

³ God Jehova i stap nambawan gutpela piksa long pasin bilong tingim tru narapela. Maski em i King bilong heven na graun, em i mekim gutpela pasin na pasin rispek long ol man. Taim Jehova i toktok long Abraham na Moses, em i yusim wanpela tok Hibru ol i save tanim planti taim olsem “plis.” (Stt. 13:​14, NW; Kis. 4:​6, NW) Taim ol wokboi bilong em i mekim rong, Jehova i ‘sori na marimari, na em i no save kros kwiktaim. Em i save laikim ol tumas, na em i no save senisim tok bilong em.’ (Sng. 86:15) Em i narapela kain olgeta long ol man i save kros na bikmaus taim ol narapela i no mekim samting ol i laikim.

4. Olsem wanem yumi ken bihainim pasin bilong Jehova taim ol narapela i toktok long yumi?

⁴ Gutpela pasin bilong God i kamap ples klia tu long pasin bilong em long putim gut yau long tok bilong ol man. Taim Abraham i kamapim sampela askim long samting bai painim ol manmeri bilong Sodom, Jehova i no les, nogat, em i bekim olgeta wan wan askim. (Stt. 18:​23-32) Em i no ting pasin bilong Abraham long mekim planti askim i westim taim bilong Em. Jehova i save putim yau long beten bilong ol wokboi bilong em na harim krai bilong ol sinman i tanim bel. (Ritim Song 51:​11, 17.) Yumi mas bihainim pasin bilong Jehova na putim gut yau taim ol narapela i toktok long yumi.

5. Taim yumi bihainim pasin bilong Jisas long tingim tru ol narapela, olsem wanem dispela inap helpim yumi long pas gut wantaim ol?

⁵ Jisas Krais i bin lainim planti samting long Papa bilong em, na wanpela bilong ol dispela samting em pasin bilong tingim tru narapela. Sampela taim wok bilong em i pinisim taim na strong bilong em, tasol oltaim Jisas i mekim gutpela pasin na i no les kwik. Jisas i redi na amamas long helpim ol lepraman na ol aipas em ol i singaut long mani, na ol narapela man tu husat i mas kisim helpim. Taim ol man i kam long em, em i no givim baksait long ol maski ol i no bin toksave pastaim olsem ol bai kam. Planti taim em i save lusim wok em i mekim bambai em i ken helpim man i stap tarangu. Jisas i mekim gutpela pasin tru long ol man husat i bilip long em. (Mk. 5:​30-34; Lu. 18:​35-41) Yumi ol Kristen i bihainim pasin bilong Jisas na helpim ol narapela na mekim gutpela pasin long ol. Ol wanblut, ol neiba, na ol narapela man bai luksave long kain gutpela pasin olsem. Na tu, kain pasin olsem i litimapim nem bilong Jehova na mekim yumi i stap amamas.

6. Olsem wanem Jisas i stap gutpela piksa long pasin bilong mekim gutpela pasin pren?

⁶ Jisas i soim rispek long ol man long rot bilong kolim nem bilong ol. Olsem wanem? Ol bikman bilong lotu Juda i mekim olsem? Nogat. Ol i ting ol lain i no save long Lo em lain “God i tok pinis long ol bai i bagarap,” olsem na ol i no mekim gutpela pasin long ol. (Jo. 7:49) Pikinini Bilong God i no mekim kain pasin olsem. Jisas i kolim stret nem bilong Maria, Marta, na Sakius, na bilong planti narapela man tu taim em i toktok long ol. (Lu. 10:​41, 42; 19:5) Long nau, kastam bilong ples inap makim olsem bai yumi kolim stret nem bilong man o nogat, tasol ol wokboi bilong Jehova i wok strong long mekim gutpela pasin pren long ol narapela.a Ol i no larim pasin bilong tingim olsem wanpela lain i winim narapela lain, i pasim ol long soim rispek long ol wanbilip na long ol narapela man. Nogat.​—Ritim Jems 2:​1-4.

7. Olsem wanem ol stiatok bilong Baibel i helpim yumi long mekim gutpela pasin long ol man bilong olgeta hap?

⁷ Gutpela pasin em God na Pikinini bilong em i mekim long ol manmeri bilong olgeta kantri na ples, i soim olsem tupela i rispektim ol dispela man na dispela i pulim ol man i gat gutpela bel long kam long tok i tru. Tru, tingting bilong ol man long gutpela pasin i no wankain long olgeta hap. Olsem na yumi no save bihainim sampela strongpela lo long dispela samting. Nogat. Yumi larim ol stiatok bilong Baibel i stiaim pasin yumi mekim long ol man na bai i stret long ol man bilong olgeta hap. Orait nau yumi ken skelim olsem wanem pasin bilong mekim gutpela pasin inap mekim na wok autim tok bilong yumi i ken kamapim gutpela kaikai moa.

Tok Gude Long Ol Man na Toktok Long Ol

8, 9. (a) Yumi inap kisim wanem kain pasin we i no luk gut long ai bilong ol narapela? (b) Bilong wanem yumi mas larim tok bilong Jisas long Matyu 5:47 i stiaim pasin yumi mekim long ol narapela?

⁸ Long planti hap ol man i hariap hariap long mekim ol samting, olsem na planti taim tupela man bai abrusim narapela narapela na ol bai i no tok “gude” o askim olsem “yu orait?” Tru, yumi no inap toktok long olgeta man yumi abrusim long rot. Tasol long planti taim i stret na i gutpela long tok gude long ol narapela. Olsem wanem? Yu save tok gude long ol man? O yu save wokabaut i go na yu no smail o mekim wanpela gutpela tok? Ating man i no gat tingting nogut, tasol em inap kisim wanpela pasin we i no luk gut long ai bilong ol narapela.

⁹ Jisas i kirapim tingting bilong yumi taim em i tok: “Sapos yupela i givim gude long ol brata bilong yupela tasol, bai yupela i winim ol arapela man long wanem samting? Ol haiden tu i save mekim olsem.” (Mt. 5:47) Dairekta Donald Weiss i tok: “Ol manmeri i no save amamas taim ol narapela i no gat luksave long ol o i no mekim sampela tok long ol. I no gat wanpela gutpela eskius yumi inap givim sapos yumi no mekim wanpela gutpela tok long narapela. Gutpela sapos yumi mekim olsem: Tok gude long ol man. Toktok wantaim ol.” Sapos yumi no pes drai na yumi mekim gutpela pasin pren, dispela bai kamapim ol gutpela samting.

10. Olsem wanem ol gutpela pasin inap helpim yumi long mekim gut moa wok autim tok? (Lukim blok “Smail na Kirap Toktok.”)

¹⁰ Tingim tupela marit Kristen, em Tom na Carol, husat i sindaun long wanpela bikpela taun long Not Amerika. Ol i bin kisim pasin bilong toktok gut wantaim ol neiba olsem hap bilong wok autim tok bilong ol. Ol i mekim dispela olsem wanem? Tom i stori long Jems 3:18 na i tok: “Mipela i mekim pasin pren na stap bel isi wantaim ol man. Mipela i go long ol man i stap ausait long haus bilong ol na ol man i wok long dispela hap. Mipela i smail na tok gude long ol. Mipela i toktok long ol samting ol i save tingim​—ol pikinini bilong ol, dok bilong ol, haus bilong ol, na wok mani bilong ol. Bihain, ol i tingim mipela olsem pren bilong ol.” Carol i tok: “Bihain mipela i kolim nem bilong mipela long ol na askim ol long nem bilong ol. Mipela i tokim ol long wok mipela i mekim, tasol mipela i no toktok longpela taim. Bihain, mipela inap autim tok long ol.” Long dispela rot, planti neiba i trastim Tom na Carol. Planti i bin kisim ol buk na nius bilong Baibel, na sampela i bin kamapim olsem ol i gat laik long save long tok i tru.

Soim Gutpela Pasin Long Taim Bilong Hevi

11, 12. Bilong wanem yumi mas save olsem sampela taim ol man bai tok nogut long yumi taim yumi autim gutnius? Yumi no ken mekim wanem taim ol i tok nogut long yumi?

¹¹ Sampela taim ol man i no mekim gutpela tok long yumi taim yumi autim gutnius. Yumi save dispela samting bai kamap, long wanem, Krais Jisas i bin tokim ol disaipel bilong em olsem: “Sapos ol i bin mekim nogut long mi, orait ol bai i mekim nogut long yupela tu.” (Jo. 15:20) Tasol sapos yumi bekim tok nogut long wankain pasin, dispela i no inap kamapim gutpela samting. Orait yumi mas mekim wanem kain pasin? Aposel Pita i tok: “Long bel bilong yupela, yupela i mas putim Krais wanpela em i stap Bikpela bilong yupela. Na sapos ol i askim yupela long as bilong dispela gutpela samting yupela i wetim i stap, orait yupela i mas redi oltaim long bekim tok long ol.” (1 Pi. 3:15) Taim yumi mekim gutpela pasin​—yumi tok isi na long pasin rispek​—dispela inap mekim na ol man husat i tok nogut long yumi, ol bai kisim gutpela tingting long wok bilong yumi.​—Ta. 2:​7, 8.

¹² Olsem wanem? Yumi inap redi long bekim tok nogut bilong ol man, long pasin God i orait long en? Yes, yumi inap. Pol i tok: “Oltaim yupela i mas mekim gutpela tok tasol, em olkain tok ol man i save laik long harim. Yupela i mas tingting gut na traim long bekim gut tok bilong olgeta man.” (Kl. 4:6) Sapos yumi kisim pasin bilong mekim gut long ol wanfamili, ol wanskul, ol wanwok, ol bratasista bilong kongrigesen, na ol neiba, orait yumi bai redi gut long bekim tok nogut bilong ol man long pasin i stret long ol Kristen.​—Ritim Rom 12:​17-21.

13. Stori long ekspiriens i soim olsem gutpela pasin inap senisim tingting bilong ol man i birua.

¹³ Sapos yumi soim gutpela pasin taim hevi i kamap, dispela bai kamapim ol gutpela samting. Olsem: Long Japan, wanpela man bilong haus na visita bilong em i tok bilas long wanpela Witnes. Long gutpela pasin, brata i lusim haus. Taim em i wok long autim tok long teritori, em i luksave olsem dispela visita i sanap na lukluk long em. Taim brata i go long em, dispela man i tok: “Mi laik tok sori long samting i bin kamap. Mipela i mekim ol tok nogut long yu, tasol mi lukim olsem yu smail yet. Mi mas mekim wanem na bai mi ken kamap kain man olsem?” Ol i bin pinisim dispela man long wok na i no longtaim na mama bilong em i bin i dai, olsem na em i ting em i no gat rot bilong i stap amamas gen. Witnes i tok em i amamas long stadi long Baibel wantaim em, na man i wanbel long mekim olsem. I no longtaim na em i stadi tupela taim long olgeta wik.

Nambawan Gutpela Rot Bilong Kisim Pasin Bilong Tingim Gut Man

14, 15. Long taim bilong ol man i bin raitim Baibel, olsem wanem ol wokboi bilong Jehova ol i bin skulim ol pikinini bilong ol?

¹⁴ Long taim bilong ol man i bin raitim Baibel, ol gutpela papamama i skulim ol pikinini long kisim pasin bilong tingim gut ol narapela insait long famili. Tingim gutpela pasin bilong Abraham na pikinini bilong em Aisak long toktok wantaim, olsem Stat 22:7 i kamapim. Pasin bilong Josep tu i kamapim klia olsem papamama bilong em i bin lainim em gut. Taim em i kalabus, em i gat gutpela pasin bilong toktok wantaim ol wankalabus bilong em. (Stt. 40:​8, 14) Tok em i mekim long Fero i soim olsem em i bin lain long stretpela pasin bilong toktok long man i gat bikpela namba.​—Stt. 41:​16, 33, 34, NW.

¹⁵ Insait long Tenpela Lo em God i givim long lain Israel, i gat dispela lo: “Yupela i mas aninit [“givim ona,” NW] long papamama bilong yupela na bihainim tok bilong ol. Sapos yupela i mekim olsem, bai yupela i no inap i dai kwik. Nogat. Bai yupela i ken i stap longtaim long dispela graun mi God, Bikpela bilong yupela mi laik givim yupela.” (Kis. 20:12) Wanpela rot bilong ol pikinini long givim ona long papamama, em ol i mas mekim gutpela pasin taim ol i stap long haus. Pikinini meri bilong Jepta i soim rispek tru long papa bilong em na em i orait long inapim tok promis Papa i bin mekim maski i hatwok long mekim olsem.​—Het. 11:​35-40.

16-18. (a) Long wanem rot yumi ken skulim ol pikinini long mekim gutpela pasin? (b) Wanem ol gutpela samting bai kamap taim yumi skulim ol pikinini long mekim gutpela pasin?

¹⁶ Em i bikpela samting tru long skulim ol pikinini bilong yumi long mekim gutpela pasin. Ol yangpela i mas lain long gutpela pasin bilong tok gude long ol visita, toktok long telefon, na kaikai wantaim ol narapela, na dispela bai helpim ol gut taim ol i bikpela pinis. Papamama i mas helpim ol long kliagut long as na taim ol i raun long bas ol i mas kirap na givim sia bilong ol long man i gat bikpela krismas, na mekim gutpela pasin long ol lapun na ol sikman, na karim ol hevipela beg samting bilong ol narapela. Ol i mas save olsem em i bikpela samting long tok “plis,” “tenkyu,” “em orait, nogat samting,” “inap mi helpim yu?,” na “sori.”

¹⁷ I no olsem i hatwok long lainim ol pikinini long mekim gutpela pasin. Nogat. Nambawan gutpela rot bilong skulim ol em pasin bilong stap gutpela piksa. Kurt i gat 25 krismas na em i stori long olsem wanem em na tripela brata bilong em i bin lain long mekim gutpela pasin: “Mipela i lukim na harim pasin bilong Papa na Mama long toktok wantaim long gutpela pasin, na tingim tru ol narapela na i no les kwik long ol. Long Haus Kingdom, paslain na bihain long ol miting, Papa i save kisim mi i go wantaim em long toktok wantaim ol lapun brata na sista. Mi harim pasin bilong em long tok gude long ol na lukim pasin rispek em i soim long ol.” Kurt i tok moa: “Bihain, mi kisim pasin bilong em. Pasin bilong mekim gut long ol narapela i kamap pasin tru bilong mi. Mi no mekim tasol pasin mi mas mekim, nogat, mi mekim pasin mi laik mekim.”

¹⁸ Sapos papamama i skulim ol pikinini long mekim gutpela pasin, wanem samting bai kamap? Ol pikinini inap kisim ol pren na stap wanbel wantaim ol narapela. Ol bai i gat save long wok gut wantaim ol bos na wanwok. Na tu, ol pikinini i save mekim gutpela pasin na pasin rispek, papamama bilong ol bai amamas na belgut.​—Ritim Sindaun 23:​24, 25.

Gutpela Pasin i Mekim na Yumi Stap Narapela Kain

19, 20. Bilong wanem yumi mas strong long bihainim pasin bilong God bilong yumi na Pikinini bilong em?

¹⁹ Pol i tok: “Yupela i mas bihainim ol pasin [God] yet i save mekim.” (Ef. 5:1) Bilong bihainim pasin bilong God Jehova na Pikinini bilong em, yumi mas bihainim ol stiatok bilong Baibel, olsem ol stiatok i stap long dispela stadi. Long dispela rot, yumi no giaman long mekim gutpela pasin bilong grisim ol man i gat namba o bilong kisim sampela gutpela samting bilong skin, nogat.​—Ju. 16.

²⁰ Long taim bilong las de bilong wok bos nogut bilong Satan, em i strong long pinisim tru ol gutpela pasin rispek Jehova i bin kamapim. Tasol Satan i no inap pinisim gutpela pasin bilong ol Kristen tru. Gutpela sapos yumi olgeta i strong long bihainim pasin bilong God bilong yumi na Pikinini bilong em. Long dispela rot, toktok na pasin bilong yumi bai i narapela kain long pasin bilong ol man i no laik mekim gutpela pasin. Bai yumi litimapim nem bilong Jehova, em God bilong yumi em i gat gutpela pasin, na dispela bai kirapim ol man i gat gutpela bel long kam long lotu i tru.

[Futnot]

Yu Inap Tingim?

• Pasin bilong Jehova na Pikinini bilong em inap lainim yumi long wanem samting long ol gutpela pasin?

• Taim yumi tok gude long gutpela pasin, bilong wanem dispela i litimapim nem bilong yumi ol Kristen?

• Olsem wanem pasin bilong tingim tru ol narapela i kamapim gutpela kaikai long wok autim tok?

• Olsem wanem ol papamama inap lainim pikinini bilong ol long mekim ol gutpela pasin?

[Blok long pes 27]

Smail na Kirap Toktok

Planti man i surik long kirapim toktok wantaim man ol i no save long em. Tasol ol Witnes Bilong Jehova i laikim tru God na ol man, olsem na ol i wok strong long lain long pasin bilong toktok bambai ol i ken autim ol tok i tru bilong Baibel long ol narapela. Wanem samting inap helpim yu long mekim gut moa dispela pasin?

Wanpela gutpela stiatok i stap long Filipai 2:​4, em i tok: “Yupela i no ken lukautim ol samting bilong yupela tasol. Nogat. Yupela wan wan i mas lukautim ol samting bilong ol arapela manmeri bilong yupela na helpim ol long i stap gut.” Tingim ol dispela tok olsem: Sapos yu no bin bungim wanpela man bipo, em bai tingim yu olsem man em i no save long en. Yu ken mekim wanem bilong mekim em i stap isi? Smail long em na tok gude long gutpela pasin. Tasol i gat sampela samting moa yu mas tingim.

Taim yu laik kirap toktok wantaim wanpela, ating em i wok long tingting long wanpela samting na nau yu tromoi tok. Sapos yu traim long kirapim em long toktok long samting yu tingting long en na yu no tingim samting em i tingting long en, ating em bai i no laik toktok. Olsem na sapos yu inap luksave long samting man i tingting long en, gutpela sapos yu yusim dispela samting bilong kirap toktok wantaim em. Jisas i bin mekim olsem taim em i bungim wanpela meri long hulwara long Samaria. (Jo. 4:​7-26) Dispela meri i tingting long kisim wara. Jisas i kirapim toktok wantaim em long dispela samting, na bihain liklik em i kirap toktok long ol samting bilong spirit.

[Ol Piksa long pes 26]

Taim yu mekim gutpela pasin pren long ol man, dispela inap opim rot long autim tok

[Piksa long pes 28]

Gutpela pasin i stret long olgeta taim