Ol Eskius Jehova i Gat Wanem Tingting Long En?

MAN i tok: “Dispela meri yu bin givim mi olsem poroman bilong mi, em tasol i givim mi pikinini bilong dispela diwai na mi kaikai.” Na meri i tok: “Snek i grisim mi na mi kaikai pikinini bilong dispela diwai.” Em ol tok namba wan tumbuna papamama bilong yumi, Adam na Iv, i bin mekim long God, na dispela em i kirap bilong pasin bilong ol man long givim ol eskius.​—Stt. 3:​12, 13.

Strafe Jehova i givim long Adam tupela Iv taim ol i bin bikhet na sakim tok bilong em, i kamapim klia olsem God i no orait long ol eskius bilong tupela. (Stt. 3:​16-19) Orait yu ting dispela i makim olsem Jehova i no orait long olgeta eskius? O em i ting sampela eskius i gat as bilong en? Sapos olsem, orait olsem wanem yumi inap save wanem eskius i gat as bilong en na wanem eskius, nogat? Bilong bekim ol dispela askim, pastaim yumi mas skelim mining bilong dispela tok​—eskius.

Eskius em risen man i givim taim em i bin mekim wanpela samting, o em i no bin mekim, o em bai i no mekim. Man inap givim eskius bilong kamapim as tru na em i no bin mekim wanpela samting, na dispela em rot bilong em long tok sori na nau narapela inap fogivim em. Tasol olsem Adam na Iv i bin mekim, eskius inap kamap samting bilong haitim as tru bilong samting man i bin mekim o i no mekim. Planti eskius em ol kain eskius olsem, olsem na planti man i no bilipim ol eskius ol narapela i mekim.

Taim yumi givim ol eskius​—na moa yet sapos yumi givim ol eskius long wok bilong God yumi mekim​—yumi mas was gut, nogut yumi ‘giamanim yumi yet.’ (Jem. 1:22) Olsem na i gutpela sapos yumi skelim sampela stori bilong Baibel na ol stiatok em ol bai helpim yumi long “kisim save long ol pasin Bikpela i save laikim.”​—Ef. 5:10.

Samting God i Laik Yumi Mas Mekim

Long Baibel i gat ol tok em yumi ol lain bilong Jehova i mas bihainim. Olsem, tok Krais i mekim long “go mekim olgeta lain manmeri i kamap disaipel,” em tok ol trupela disaipel bilong Krais i mas bihainim yet. (Mt. 28:​19, 20) Wok bilong truim dispela tok i bikpela samting tru, olsem na aposel Pol i tok: “Sapos mi no autim gutnius, bai mi stap nogut tru.”​—1 Ko. 9:16.

Maski i olsem, sampela husat i stadi long Baibel wantaim yumi inap longpela taim pinis, ol i surik yet long autim gutnius bilong Kingdom Bilong God. (Mt. 24:14) Sampela husat i bin insait long wok bilong autim tok long bipo, ol i no mekim moa dispela wok. Ol man husat i no insait long wok bilong autim tok, ol i save givim wanem ol risen long ol i no autim tok? Long bipo Jehova i bin mekim wanem long ol lain husat i surik long mekim samting God i tokim ol long mekim?

Ol Eskius Em God i No Orait Long En

“Em hatwok tumas.” Ol lain husat i save sem, ating ol i ting em hatwok tumas long mekim wok autim tok. Tasol tingim skul yumi ken kisim long stori bilong Jona. Em i kisim wanpela wok we em i ting i hatwok tumas long mekim​—Jehova i tokim em long tokim ol Ninive olsem bagarap bai painim ol. I no hatwok long save long as na Jona i ting dispela wok i hatwok tumas long mekim. Ninive em biktaun bilong Asiria, na ol Asiria i gat nem olsem lain bilong mekim nogut tru long ol narapela. Jona inap ting: ‘Wanem samting bai kamap long mi long dispela hap? Ol bai mekim wanem long mi?’ I no longtaim na em i ranawe. Tasol Jehova i no orait long eskius bilong Jona. Nogat. Jehova i tokim em gen long autim tok long ol Ninive. Long dispela taim, Jona i no pret na em i inapim wok bilong em, na Jehova i blesim dispela wok.​—Jna. 1:​1-3; 3:​3, 4, 10.

Sapos yu ting olsem wok bilong autim gutnius i hatwok tumas long mekim, orait tingim olsem “God em inap mekim olgeta samting.” (Mk. 10:27) Yu ken bilip tru olsem Jehova bai strongim yu taim yu wok yet long askim em long helpim yu na long blesim yu taim yu strongim bel long mekim wok autim tok.​—Lu. 11:​9-13.

“Mi no laik mekim.” Yu ken mekim wanem sapos yu no gat laik long mekim wok Kristen bilong yu? Tingim olsem Jehova inap kirapim laik i stap long bel bilong yu. Pol i tok: “God i save wok insait long bel bilong yupela. Em yet i kirapim laik bilong yupela bilong mekim ol pasin em i laikim, na em i givim yupela strong bilong mekim ol dispela pasin.” (Fl. 2:13) Olsem na yu ken askim Jehova long kirapim laik bilong yu long mekim wok bilong em. King Devit i bin mekim olsem. Em i askim Jehova: “Lainim mi long bihainim tok tru bilong yu.” (Sng. 25:​4, 5) Yu inap mekim wankain long rot bilong beten askim Jehova long kirapim laik bilong yu long mekim ol samting em i laikim.

Tru, taim yumi taiet o bel hevi, ating sampela taim yumi mas fosim yumi yet long i go long miting long Haus Kingdom o mekim wok autim tok. Sapos olsem, yu ting dispela i makim olsem yumi no laikim tru Jehova? Nogat, i no olsem. Ol gutpela wokboi bilong God long bipo, ol tu i bin taitim bun bilong mekim laik bilong God. Olsem, Pol i tok em i save ‘paitim tru bodi bilong em’ bambai em i bihainim ol tok bilong God. (1 Ko. 9:​26, 27) Olsem na maski yumi mas fosim yumi yet long mekim wok autim tok, yumi ken bilip olsem Jehova bai blesim yumi. Bilong wanem? Long wanem, pasin bilong laikim tru Jehova i as na yumi subim yumi yet long mekim laik bilong em. Taim yumi mekim olsem, yumi bekim tok Satan i bin sutim, olsem ol wokboi bilong God bai givim baksait long Em sapos traim i painim ol.​—Jop 2:4.

“Mi bisi tru.” Sapos yu no autim tok long wanem yu pilim olsem yu bisi tru, em i bikpela samting long yu mas skelim wanem samting i bikpela samting moa long yu. Jisas i tok: “Wok yet long painim Kingdom pastaim.” (Mt. 6:​33, NW) Bilong bihainim dispela stiatok, ating yu mas lusim sampela samting bilong skin yu holim, o yu mas lusim sampela amamas na yusim dispela haptaim bilong mekim wok autim tok. Tru, i stret yumi mas kisim ol amamas na mekim ol narapela samting bilong yumi yet, tasol ol dispela samting i no as na yumi givim eskius long yumi no mekim wok autim tok. Wokman bilong God i save putim ol samting bilong Kingdom i stap namba wan samting long laip bilong em.

“Mi no fit long mekim.” Ating yu pilim olsem yu no fit long kamap wanpela wokman bilong autim gutnius. Long taim bilong ol man i bin raitim Baibel, sampela gutpela wokboi bilong Jehova i pilim olsem ol i no fit long mekim ol wok Jehova i givim ol. Tingim Moses. Taim Jehova i tokim em long mekim wanpela wok, Moses i tok: “Bikpela, bipo mi no man bilong toktok gut long ai bilong planti man. Na nau yu toktok wantaim mi, tasol dispela i no mekim mi i kamap man bilong toktok. Maus bilong mi i hevi tumas, na mi no inap toktok gut.” Maski Jehova i strongim bel bilong Moses, em i tok: “Sori Bikpela, mi no inap. Yu ken salim narapela man.” (Kis. 4:​10-13) Jehova i mekim wanem?

Jehova i no tok Moses i ken lusim wok. Nogat. Jehova i makim Aron long helpim Moses long mekim dispela wok. (Kis. 4:​14-17) Na tu, insait long ol yia i kam bihain, Jehova i sambai long Moses na givim em ol samting em i nidim bilong inapim gut ol wok God i givim em. Long nau, yu ken bilip tru olsem Jehova bai kirapim ol wanbilip i gat save long mekim wok autim tok, long helpim yu long mekim dispela wok. Na bikpela samting moa, Baibel i tok olsem Jehova bai inapim yumi long mekim wok em i bin tokim yumi long mekim.​—2 Ko. 3:5; lukim blok “Ol Yia Mi Bin Stap Amamas Tru.”

“Wanpela i bagarapim bel bilong mi.” Sampela i no autim tok moa o go moa long ol miting long kongrigesen, long wanem, wanpela i bin bagarapim bel bilong ol. Ol i ting Jehova bai orait long eskius bilong ol long ol i no mekim moa ol wok Kristen. Tru, yumi no amamas taim wanpela i bagarapim bel bilong yumi, tasol yu ting dispela em i gutpela eskius long lusim ol wok Kristen? Ating bel bilong Pol na wanbilip bilong em Barnabas i bagarap bihain long tupela i bin mekim bikpela “tok kros.” (Ap. 15:39) Tasol yu ting dispela i mekim na tupela i lusim wok autim tok? Nogat tru!

Na olsem tasol, taim wanpela wanbilip i bin bagarapim bel bilong yu, tingim olsem birua bilong yu em Satan husat i laik bagarapim yu, na i no brata Kristen bilong yu i gat sin. Tasol Satan i no inap bagarapim yu sapos yu “stap strong long bilip na sakim em.” (1 Pi. 5:​8, 9; Ga. 5:15) Sapos yu gat kain bilip olsem, bai yu no inap “bel hevi.”​—Ro. 9:​33, NW.

Yumi Gat Skel Bilong Yumi

Olsem ol dispela eksampel bilong ol eskius i soim, i no gat wanpela eskius em Baibel i as bilong en we yumi ken tok yumi no inap bihainim ol tok bilong Jehova, na wok bilong autim gutnius i wanpela bilong ol. Tasol ating i gat as tru na yumi no inap lusim planti aua long mekim wok autim tok. Ol narapela wok Baibel i tok yumi mas mekim inap kisim haptaim bilong yumi long mekim wok autim tok. Na tu, sampela taim yumi sik o taiet nogut tru, na yumi no inap mekim bikpela wok bilong Jehova olsem yumi gat laik long mekim. Tasol Baibel i tok Jehova i save long laik bilong bel bilong yumi na em i tingim skel bilong yumi long mekim wok.​—Sng. 103:14; 2 Ko. 8:12.

Olsem na yumi mas was gut, nogut yumi strong tumas long skelim yumi yet o ol narapela long ol dispela samting. Aposel Pol i tok: “Yu husat na yu skelim pasin bilong wokboi bilong narapela man? Sapos em i sanap strong long wok bilong en, o sapos em i pundaun, dispela em i samting bilong Bikman bilong em yet.” (Ro. 14:4) Yumi no ken skelim sindaun bilong yumi wantaim sindaun bilong ol narapela, nogat, yumi mas tingim olsem “yumi olgeta wan wan bai yumi mas tokim God long as bilong olgeta pasin yumi bin mekim.” (Ro. 14:12; Ga. 6:​4, 5) Taim yumi beten long Jehova na kamapim ol eskius bilong yumi long em, yumi olgeta wan wan i laik mekim olsem wantaim ‘bel i stap stret long ai bilong God.’​—Hi. 13:18.

As na Wok Bilong Jehova i Givim Amamas Long Yumi

Yumi olgeta inap mekim wok bilong Jehova wantaim bikpela amamas, long wanem, ol samting em i laik yumi mas mekim i no hatwok tumas na em samting yumi inap mekim, maski sindaun bilong yumi i wanem kain. Bilong wanem yumi inap tok olsem?

Baibel i tok: “Sapos wanpela man i sot long samting na em i askim yu long givim em, yu no ken tok, ‘Nogat.’ Sapos yu inap, yu mas givim em.” (Snd. 3:27) Dispela savetok i tok wanem long ol samting God i laik bai yumi mas mekim? Jehova i no tok yu mas mekim wok long wankain skel olsem brata bilong yu inap mekim, nogat, yu mas mekim wok bilong Em inap long skel “yu inap” mekim. Yes, yumi olgeta wan wan inap givim bel olgeta long mekim wok bilong Jehova inap long skel bilong yumi yet.​—Lu. 10:27; Kl. 3:23.

[Blok/​Piksa long pes 14]

“Ol Yia Mi Bin Stap Amamas Tru”

Maski yumi gat bikpela sik o sik bilong bel hevi, yumi no ken hariap long ting olsem dispela bai pasim yumi long mekim bikpela wok bilong autim tok. Tingim samting i bin painim Ernest, em wanpela brata Kristen long Kanada.

Ernest i gat hevi long kolim gut ol tok na em i man bilong sem. Bihain long em i kisim bagarap long baksait bilong em, em i mas lusim wok bilong em long konstraksen. Maski baksait i bagarap, nupela sindaun bilong em i mekim na em inap lusim bikpela haptaim moa bilong autim tok. Ol tok i kamap long ol miting bilong kongrigesen bilong kirapim ol brata long mekim wok painia haptaim, i kirapim laik bilong em long mekim dispela wok. Tasol em i pilim olsem em i no fit long mekim.

Bilong pruvim long em yet olsem em i no inap mekim wok painia haptaim, em i putim aplikesen bilong mekim dispela wok inap wanpela mun. Em i kirap nogut olsem em inap mekim. Em i tingting long em yet olsem, ‘mi save mi no inap mekim gen.’ Bilong pruvim dispela tingting, em i putim aplikesen namba tu taim​—na long dispela taim tu em inap mekim.

Ernest i mekim wok painia haptaim inap wanpela yia, tasol em i tok, “mi save mi no inap kamap wanpela painia oltaim.” Na gen, bilong pruvim dispela tingting bilong em, em i putim aplikesen bilong mekim wok painia oltaim. Em i kirap nogut long em inap winim namba wan yia bilong em long mekim wok painia oltaim. Em i wokim disisen long mekim yet dispela wok, na em i amamas long em inap mekim wok painia oltaim inap tupela yia, i go inap long taim sik i winim em na em i dai. Tasol paslain long em i dai, planti taim em i aiwara na tokim ol visita olsem: “Dispela tupela yia mi mekim wok bilong Jehova olsem wanpela painia, em ol yia mi bin stap amamas tru.”

[Piksa long pes 13]

Yumi inap winim olgeta kain samting em inap pasim yumi long mekim wok autim tok

[Piksa long pes 15]

Jehova i amamas taim yumi givim bel olgeta long wok bilong em inap tru long skel bilong yumi