FRAN PES STORI
Yu Inap Kisim Ol Gutpela Pasin
AUSTIN i pilim aislip yet maski alam klok bilong em i krai. Tasol kwiktaim em i lusim bet, putim klos bilong eksasais em i bin redim long nait na nau em i go wokabaut liklik, long yia i go pinis em i save wokabaut 3-pela taim long wanpela wik.
Laurie i tok pait wantaim man bilong em. Em i belhat tru, olsem na em i hariap long go long kitsen, kisim ol soklet loli na kaikai olgeta loli. Em i save mekim olsem taim em i bel hevi.
Austin na Laurie i mekim wanem samting i wankain? Ating tupela i no luksave olsem samting ol i mekim i kamap olsem pasin bilong ol.
Olsem wanem? Yu laik wok strong long kisim ol gutpela pasin? Ating yu putim mak long eksasais oltaim, kisim planti slip, o ringim na salim pas long wanpela pren o wanfamili bilong yu.
O ating yu laik senisim wanpela pasin, olsem pasin bilong smok, kisim ol kaikai i no gutpela long helt bilong yu, o lusim bikpela haptaim long Intenet.
Em tru olsem i hatwok long senisim ol pasin bilong yu. Sampela man i tok, em isi long bihainim wanpela pasin, tasol taim yu laik senisim dispela pasin, i hatwok tru long mekim olsem! Olsem na yu mas wok strong long kisim ol gutpela pasin.
So hau yu inap senisim ol pasin bilong yu na kisim ol gutpela pasin? Bai yumi stori long 3-pela stiatok bilong Baibel long samting yu ken mekim.