Strongim Pasin Wanbel Insait Long Kongrigesen

Taim yumi stap namel long ol wanbilip, yumi pilim wankain olsem King Devit, em i tok: “Em i gutpela tru long ol brata i sindaun gut wantaim na i stap wanbel!” (Buk Song 133:1) Pasin wanbel i stap namel long yumi i no kamap nating. Yumi olgeta i gat wok long strongim pasin wanbel.

1. Wanem samting i narakain namel long lain bilong God?

Sapos yu go long wanpela miting bilong kongrigesen long narapela kantri, ating yu no inap kliagut long tokples bilong ol, tasol yu bai pilim olsem yu save long lain insait long dispela kongrigesen na yu bai pilim pasin laikim bilong ol. Wai na i olsem? Bikos long olgeta hap mipela i save yusim ol wankain buk na nius bilong stadi long Baibel. Na mipela i wok strong long soim pasin laikim long narapela narapela. Maski mipela i stap long wanem hap bilong graun, mipela olgeta i save “singaut long nem bilong Jehova, na wanbel wantaim long lotuim em.”​—Sefanaia 3:9, futnot.

2. Yu ken mekim wanem bilong strongim pasin wanbel?

“Yupela i mas laikim tru narapela narapela long bel olgeta.” (1 Pita 1:22) Olsem wanem yu ken bihainim dispela tok? No ken tingim pasin kranki bilong ol narapela, nogat, tingim ol gutpela pasin bilong ol. No ken bung tasol wantaim lain i gat wankain laik olsem yu, traim long kisim save long ol bratasista bilong kain kain sindaun. Na tu, yumi mas wok strong long rausim pasin bilong bel nogut long ol man bilong narapela lain na skin kala.​—Ritim 1 Pita 2:17.a

3. Yu bai mekim wanem sapos yu gat hevi wantaim wanpela wanbilip Kristen?

Yumi stap wanbel wantaim, tasol yumi no gutpela olgeta. Sampela taim yumi inap mekim samting i bagarapim bel bilong narapela narapela. Olsem na Baibel i tokim yumi long “wok yet . . . long fogivim narapela,” na i tok moa: “Jehova i amamas long fogivim yupela, olsem na yupela tu i mas mekim wankain pasin.” (Ritim Kolosi 3:13.) Planti taim yumi save mekim Jehova i bel hevi, tasol em i save fogivim yumi. So em i laik bai yumi tu i fogivim ol brata bilong yumi. Sapos yu luksave olsem yu bagarapim bel bilong wanpela, yu mas go pas long stretim dispela hevi.​—Ritim Matyu 5:23, 24.b

KISIM SAMPELA SAVE MOA

4. Sakim pasin bilong bel nogut long ol man bilong narapela lain na skin

Yumi mas laikim olgeta bratasista bilong yumi. Tasol ating yumi hatwok long laikim wanpela i no wankain olsem yumi. Wanem samting inap helpim yumi? Ritim Aposel 10:34, 35, na stori long ol dispela askim:

• Jehova i laikim olgeta kain man i stap Witnes bilong em. Dispela i mas mekim wanem long tingting bilong yu long ol man bilong narapela sindaun?

• Long hap bilong yu, ol man i save bel nogut long wanem ol lain na yu laik abrusim dispela pasin?

Ritim 2 Korin 6:11-13, na stori long dispela askim:

• Yu ting yu inap mekim wanem bilong i go klostu moa long ol bratasista i gat narapela sindaun?

5. Redi long fogivim narapela na stap wanbel wantaim

Jehova i redi long fogivim yumi maski yumi no gat wok long fogivim em. Ritim Buk Song 86:5, na stori long ol dispela askim:

• Long dispela ves yumi kisim wanem skul long pasin bilong Jehova long fogivim ol sin?

• Wai na yu amamas olsem em i save fogivim yu?

• Wanem sampela samting inap kamap na i hatwok long yumi stap wanbel wantaim ol arapela?

Olsem wanem yumi ken bihainim pasin bilong Jehova na stap wanbel wantaim ol bratasista bilong yumi? Ritim Provep 19:11, na stori long dispela askim:

• Taim wanpela i sikirapim bel bilong yu o mekim yu bel hevi, yu ken mekim wanem bilong stretim dispela hevi?

Sampela taim yumi inap bagarapim bel bilong ol narapela. Taim dispela i kamap, yumi mas mekim wanem? Pilaim VIDIO, na stori long dispela askim.

VIDIO: Pasin Wanbel i Save Kamapim Ol Blesing (6:01)

• Long vidio, sista i mekim wanem bilong kamapim pasin wanbel?

6. Tingim ol gutpela pasin bilong ol brata na sista

Taim yumi kisim save gut moa long ol brata na sista bilong yumi, yumi bai kisim save long ol gutpela pasin bilong ol na ol pasin kranki bilong ol. Olsem wanem yumi ken tingim ol gutpela pasin bilong ol? Pilaim VIDIO, na stori long dispela askim.

VIDIO: Kamap Gutpela Moa! (5:10)

• Wanem samting inap helpim yu long tingim ol gutpela pasin bilong ol brata na sista?

Jehova i save tingim ol gutpela pasin bilong yumi. Ritim 2 Stori 16:9a, na stori long dispela askim:

• Yu pilim olsem wanem taim yu kisim save olsem Jehova i save tingim ol gutpela pasin bilong yu?

OL BIKPELA POIN

Yu inap strongim pasin wanbel insait long kongrigesen long rot bilong fogivim ol narapela na soim pasin laikim long olgeta brata na sista.

Riviu

• Olsem wanem yu inap sakim pasin bilong bel nogut long ol man bilong narapela lain, skin, na tokples?

• Yu bai mekim wanem sapos yu gat hevi wantaim wanpela wanbilip Kristen?

• Wai na yu laik bihainim pasin bilong Jehova long fogivim ol narapela?

MEKIM WOK PAINIMAUT

Kisim save long wanpela tok piksa bilong Jisas we inap helpim yumi long no ken skelim ol narapela.

Rausim Bikpela Plang (6:56)

Yu ting yumi mas tok sori sapos yumi pilim olsem yumi no mekim wanpela rong?

“Pasin Bilong Tok Sori​—Em Gutpela Rot Bilong Kamapim Pasin Wanbel” (Wastaua, Novemba 1, 2002)

Lukim hau sampela i bin lain long mekim pasin i fea long ol narapela.

No Ken Skelim Lukluk Bilong Man (5:06)

Skelim ol rot yu ken bihainim bilong stretim hevi yu gat wantaim narapela paslain long hevi i bagarapim pasin wanbel insait long kongrigesen.

“Bihainim Pasin Laikim na Stretim Hevi” (Wastaua, Me 2016)