Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w09 2/1 p. 5
  • God Em i Wanpela Man Tru?

No gat vidio bilong dispela seksen.

Sori, popaia kamap long lodim vidio.

  • God Em i Wanpela Man Tru?
  • Wastaua i Tokaut Long Kingdom Bilong Jehova—2009
  • Wankain Infomesen
  • Rot Bilong Save Long God
    Wastaua i Tokaut Long Kingdom Bilong Jehova—1987
  • God Em i Husat?
    Yu Inap i Stap Oltaim long Paradais long Graun
  • God Em i Husat?
    Wastaua i Tokaut Long Kingdom Bilong Jehova—2002
  • Holi Spirit Bilong God Em Wanem Samting?
    Kirap!—2006
Lukim Moa
Wastaua i Tokaut Long Kingdom Bilong Jehova—2009
w09 2/1 p. 5

God Em i Wanpela Man Tru?

Bekim bilong planti man:

◼ “Em i stap long olgeta hap, em i stap insait long olgeta samting. Em i kain olsem win.”

◼ “Em i wanpela samting i gat save, em wanpela kain strong.”

Jisas i tok wanem?

◼ “Long haus bilong Papa bilong mi i gat planti rum i stap.” (Jon 14:2) Jisas i tok piksa long God olsem em i gat wanpela haus, o ples bilong i stap long en.

◼ “Bipo mi bin stap wantaim Papa, na mi lusim em na mi kam long graun. Nau mi laik lusim graun na mi go bek long Papa.” (Jon 16:28) Jisas i bilip olsem God em i wanpela Man tru na i gat wanpela ples stret em i stap long en.

JISAS i no bin stori long God olsem wanpela kain strong tasol. Nogat. Em i bin toktok wantaim God na beten long em. Planti taim em i kolim Jehova olsem Papa bilong em i stap long heven, na dispela i soim olsem Jisas i bin pas gut wantaim God.​—Jon 8:​19, 38, 54.

Tru, “i no gat wanpela man i bin lukim God,” na “God em i Spirit.” (Jon 1:18; 4:24) Tasol dispela i no makim olsem em i no gat wanpela kain bodi. Baibel i tok: “I gat bodi bilong graun, na i gat bodi bilong heven tu.” (1 Korin 15:44) Olsem na yu ting Jehova i gat wanpela bodi spirit?

Yes, em i gat. Taim Jisas i kirap bek long matmat em “i go insait long heven stret. Na nau em i stap klostu tru long God, na em i wok long helpim yumi.” (Hibru 9:24) Dispela i skulim yumi long tupela bikpela samting bilong God. Namba wan, em i gat wanpela ples bilong i stap long en. Namba tu, em i wanpela Man, em i no wanpela strong nating i stap long olgeta hap.

Orait olsem wanem God i gat strong inap long bosim ol samting long olgeta hap? God inap salim holi spirit, o strong bilong em, i go mekim wok long olgeta hap bilong ples antap na graun. Olsem wanpela papa i putim han i go bilong mekim gut bel bilong ol pikinini bilong em na helpim ol, God i save salim holi spirit bilong em i go bilong kamapim ol samting em i tingting pinis long mekim.​—Song 104:30; 139:7.

God em i wanpela Man, olsem na em i gat ol pasin bilong em yet, na i gat ol samting em i save laikim na ol samting em i no save laikim​—na em inap pilim tru ol samting long bel bilong em. Baibel i tok em i save laikim tru ol manmeri bilong em, em i amamas long ol wok bilong em, em i nolaik tru long pasin bilong lotuim god giaman, na em i bel hevi tru long ol pasin nogut. (Stat 6:6; Lo 16:22; 1 King 10:9; Song 104:31) Long 1 Timoti 1:​11, Baibel i kolim em olsem “as bilong pasin tru bilong amamas.” Olsem na Jisas i tok yumi inap lain long laikim tru dispela God long bel bilong yumi!​—Mak 12:30.a

[Futnot]

a Bilong kisim sampela save moa long dispela samting, lukim sapta 1 bilong buk Tru Tru Baibel i Tok Wanem?, em ol Witnes Bilong Jehova i wokim.

[Rait long pes 5]

Olsem wanpela papa i putim han i go bilong helpim pikinini, God i save salim holi spirit bilong em i go bilong kamapim laik bilong Em

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim